帖撒罗尼迦后书

2 各位弟兄，你哋好期待将来我哋嘅主耶稣基督返嚟*，亦都知道我哋会被聚集去佢嗰度，不过我哋请求你哋： 2 如果有人话耶和华*嘅日子到嘞，无论呢个系声称嚟自上帝嘅信息*，系口头传俾你哋嘅说话，定系好似嚟自我哋写嘅信，你哋都唔好轻易动摇，失去理智，亦都唔好惊慌。

3 唔好俾人用任何手段误导*你哋，因为首先会有叛道*嘅事发生，有一个不法嘅人（即系灭亡之子）显露出嚟，嗰个日子先至会嚟到。 4 佢系敌对者，会抬高自己嘅地位，超越一切所谓嘅神或者受人崇拜*嘅对象，甚至坐喺上帝嘅圣殿，公开自命为神。 5 我仲喺你哋嗰度嘅时候，再三讲过呢啲事俾你哋知，你哋唔记得嘞咩？

6 而家你哋知道乜嘢人起紧抑制作用，令嗰个不法嘅人到咗适当嘅时候，先至显露出嚟。 7 呢股隐秘嘅不法势力已经开始行动，但系喺目前起抑制作用嘅人离开前都会一直隐藏。 8 到时，嗰个不法嘅人就会显露出嚟。主耶稣会显示自己已经返到我哋呢度*，用口中嘅力量*将佢消灭，令佢灭亡。 9 呢个不法嘅人靠住撒但嘅所作所为而存在，用各种大能嘅作为同埋虚假嘅神迹奇事*， 10 仲有各种不义嘅伎俩，欺骗嗰啲将会灭亡嘅人。佢哋系咎由自取嘅，因为真理可以拯救到佢哋，但系佢哋根本唔爱真理。 11 所以，上帝任由佢哋俾虚假嘅道理误导，相信大话。 12 噉嗰啲唔相信真理，反而喜爱不义嘅人，都会被定罪。

13 耶和华*所爱嘅弟兄，我哋有理由经常为你哋感谢上帝，因为上帝由最初就拣选咗你哋，等你哋可以得救。由于你哋对真理有信心，佢就用神圣力量令你哋成圣*，拣选你哋。 14 佢通过我哋宣扬嘅好消息呼召你哋，系要令你哋好似我哋主耶稣基督噉样得到荣耀。 15 所以各位弟兄，你哋要企稳。你哋学到嘅道理*，无论系口传嘅，定系我哋喺信入面写嘅，都要谨守。 16 上帝爱我哋，凭住分外恩典，赐永久嘅安慰同光明嘅希望俾我哋。愿上帝我哋嘅爸爸，仲有我哋嘅主耶稣基督， 17 安慰你哋嘅心，等你哋坚定不移*，噉你哋就时时都有美好嘅言行嘞。