启示录

11 有一支好似长棍*嘅芦苇赐咗俾我，然后有声音话：“起身吖，去度吓上帝嘅圣殿*同埋祭坛，数吓喺嗰度崇拜嘅人， 2 但系圣殿外面嘅院子就唔使量度，因为呢个院子已经俾咗列国。列国会将圣城践踏喺脚下42个月。 3 我会叫我嘅两个见证人，着住粗布*传讲信息1260日。” 4 呢两个见证人由两棵橄榄树同两个灯台象征，佢哋企喺大地嘅主面前。

5 如果有任何人想伤害佢哋，火就会喺佢哋嘅口里面喷出嚟，将敌人消灭。所有企图伤害佢哋嘅人，都会噉样被杀。 6 佢哋喺传讲上帝信息嘅嗰段时期，有权封闭天空，令雨水唔能够降落嚟，佢哋有权将水变成血，亦都可以按照自己嘅意思，随时用各种灾祸打击大地。

7 佢哋传讲完信息之后，喺无底深渊*上嚟嘅野兽就会同佢哋作战，打败佢哋，杀死佢哋。 8 佢哋嘅尸体会喺一座大城嘅大街上，而呢座大城就系佢哋嘅主喺木柱上被处死嘅地方，由所多玛同埃及象征。 9 各民族、部族、语言同埋国族嘅人会望住佢哋嘅尸体三日半，唔准人将尸体安葬喺墓穴里面。 10 喺地上居住嘅人都为佢哋嘅死而兴高采烈，互相送礼庆祝，因为呢两个先知曾经令喺地上居住嘅人大受折磨。

11 过咗三日半，上帝将生命嘅气息吹入佢哋里面，佢哋就企起身，见到佢哋嘅人都非常之惊。 12 佢哋听到天上有把洪亮嘅声音同佢哋讲：“上嚟呢度啦。”佢哋就喺云中上咗天，敌人都见到佢哋*。 13 就喺嗰个时刻，发生咗一场大地震，城嘅十分之一冧咗，有7000人死于呢场地震。其余嘅人都好惊，将荣耀归于天上嘅上帝。

14 第二场灾祸结束嘞。睇吓！第三场灾祸好快会嚟到。

15 第七个天使吹响号筒，天上就发出洪亮嘅声音，话：“统治世界嘅王权而家已经属于我哋嘅主同佢委任嘅基督嘞，佢*会做君王，直到永永远远。”

16 喺上帝面前坐喺自己宝座上嘅24个长老都跪低俯伏崇拜上帝， 17 佢哋话：“耶和华*上帝，而家存在、以往存在嘅全能者，我哋感谢你，因为你已经执掌大权，成为君王嘞。 18 但系列国竟然发嬲，而你都向佢哋发嬲。指定嘅时候到嘞，死人会受到审判，所有圣民同埋为你服务嘅先知，仲有敬畏你嘅名嘅人，无论长幼尊卑都会得到奖赏，破坏大地嘅人都会被毁灭。”

19 上帝天上嘅圣殿打开咗，我见到约柜。跟住有闪电、雷霆、地震、大冰雹同讲说话嘅声音。