以弗所书

2 除此之外，以前你哋因为过错，因为罪，本来系死嘅，不过上帝令你哋得到生命。 2 以前你哋行事为人，系顺应呢个世界嘅制度*，顺应掌管社会风气*嘅统治者。呢种能够操纵人嘅风气，就系而家影响紧叛逆嘅人*嘅精神*。 3 我哋所有人都曾经好似佢哋噉，顺应有罪身体*嘅欲望行事为人，跟住自己有罪嘅身体同思想去做，天生就会激起上帝嘅愤怒，同其他人冇分别。 4 但系，充满怜悯嘅上帝对我哋有极大嘅爱心。 5 我哋因为过错，本来系死嘅，不过上帝令我哋同基督一样得到生命。（凭住分外恩典，你哋已经得救嘞。） 6 上帝仲令我哋同基督耶稣联合，同佢一样复活，喺天上有一席位， 7 噉系为咗喺将来嘅制度*恩待我哋呢啲同基督耶稣联合嘅人，显示佢极大嘅分外恩典。

8 由于上帝嘅分外恩典，你哋已经因为信心而得救嘞。呢个安排系上帝嘅恩赐*，唔系靠你哋自己可以做到嘅。 9 你哋得救并唔系由于自己有好行为，所以你哋根本冇理由自夸。 10 我哋系上帝嘅作品。佢创造咗我哋，令我哋同基督联合，希望我哋行善*。呢个就系上帝预先决定要我哋做嘅事。

11 唔好忘记，按照血统，你哋系外族人*，曾经俾人称为“冇受割礼*嘅人”。噉样称呼你哋嘅，系嗰啲“受过割礼嘅人”，亦即系身体实际受过割礼嘅人。 12 以前你哋唔认识基督，同以色列国冇关系*，喺上帝承诺赐福嘅誓约上系外人，你哋唔认识上帝，喺世界上冇希望。 13 你哋曾经同上帝疏远，但系而家已经同基督耶稣联合，由于基督嘅血而亲近上帝嘞。 14 基督令我哋和睦，令双方合而为一，佢拆毁咗喺中间隔开双方嘅墙。 15 佢献出自己嘅身体，消除敌意，即系废除咗摩西法典上嘅诫命同法令。佢令双方同自己联合，成为一个新嘅人，有和睦嘅关系。 16 基督死喺苦刑柱*，就令双方合为一体，同上帝完全和好，因为基督已经亲自将敌意消除。 17 佢嚟到将关于和睦*嘅好消息传俾你哋呢啲同上帝疏远嘅人，亦都传俾嗰啲同上帝亲近嘅人， 18 我哋双方通过佢，凭住同一股神圣力量，就可以亲近天父嘞*。

19 所以，你哋唔再系外人，唔再系其他国家嘅人，而系同圣民同一国家嘅公民，同上帝系一家人。 20 你哋被建立喺使徒同先知嘅根基上，有基督耶稣自己作为根基房角石*。 21 成座建筑物都同佢联合，各部分和谐团结，慢慢扩展成为耶和华*嘅圣殿。 22 你哋同基督联合，就一齐被建造成为上帝通过神圣力量居住嘅地方。