罗马书

13 我哋人人都要顺服管治我哋嘅当权者*，因为所有权力都系出于上帝嘅*。目前嘅当权者都按照上帝嘅安排各在其位。 2 所以，边个反对当权者，就系同上帝嘅安排作对。作对嘅人会受到不利嘅判决。 3 行善嘅人唔使惊政府官员*，作恶嘅人先要惊。如果你唔想惊当权者，就要不断行善，噉你就会得到佢赞许。 4 当权者系上帝嘅仆人，对你有益。但系如果你作恶，就要惊嘞，因为当权者有权运用佢佩带嘅剑。佢系上帝嘅仆人，向作恶嘅人施行刑罚*。

5 所以，你哋一定要顺服*，唔单止系因为惊佢嘅惩罚，亦都系因为你哋嘅良心。 6 你哋纳税，都系为咗同样嘅理由。佢哋系上帝手下嘅公仆，负责执行呢个职务。 7 每个人应得嘅，你哋都要偿还：要求纳税嘅，就向佢纳税；要求进贡嘅，就向佢进贡；要求服从嘅，就服从佢*；要求尊重嘅，就尊重佢。

8 唔好欠人哋任何嘢。只有喺彼此相爱呢方面，几时都应该觉得自己欠咗人哋*。爱其他人，就真系遵守法典嘞*。 9 法典嘅说话，例如“唔可以通奸，唔可以杀人，唔可以偷窃，唔可以贪婪”，或者任何其他诫命，其实都可以用“要爱人如己”呢句说话总括。 10 爱其他人，就唔会伤害人哋，所以，有爱心，就真系遵守法典嘞。

11 你哋要噉样做，因为你哋知道而家系乜嘢时期。你哋系时候瞓醒嘞，因为我哋比当初成为信徒嗰阵，更加接近得救。 12 黑夜即将过去*，白昼就快嚟到。所以，我哋要弃绝黑暗嘅行为，佩带光明嘅武器。 13 我哋要行得正企得正，好似喺白昼噉，唔狂欢，唔醉酒，唔发生唔正当嘅性关系*，唔做无耻嘅事*，唔同人争斗，唔妒忌其他人。 14 要效法*主耶稣基督，唔好图谋满足有罪嘅*欲望。