希伯来书

13 你哋要继续表现弟兄之爱。 2 唔好忘记对人表现好客*。有人乐意款待客人，不知不觉就款待咗天使。 3 你哋要记住嗰啲坐紧监嘅人*，就好似同佢哋一齐坐监噉，亦都要记住嗰啲受虐待嘅人，就好似同佢哋一齐受苦噉*。 4 婚姻人人都应该尊重*，婚姻关系唔可以玷污*，因为淫乱嘅*、通奸嘅，上帝都会审判。 5 你哋做人唔好贪钱，要满足于而家拥有嘅嘢。上帝讲过：“我一定唔会揼低你，一定唔会离弃你。” 6 所以，我哋可以充满勇气噉讲：“有耶和华*帮助我，我一啲都唔惊。人可以对我做啲乜呢？”

7 要记住嗰啲喺你哋当中带头嘅人，即系一直教导你哋上帝话语嘅人。要仔细留意佢哋做人处世*带嚟咩好结果，效法佢哋嘅信心。

8 耶稣基督以前、而家、永永远远，都始终如一。

9 唔好俾各种各样、奇奇怪怪嘅道理误导嘞。人应该靠住分外恩典加强内心嘅力量，而唔系靠住食物*，因为过度关注食物唔会对人有咩益处。

10 我哋有一座祭坛，上面嘅祭牲系喺圣幕入面敬奉上帝嘅人冇权食嘅。 11 大祭司会将祭牲嘅血带入至圣所作为赎罪祭，而祭牲嘅身体就攞出去营外烧。 12 所以，耶稣都喺城门外受苦，用自己嘅血使人成圣*。 13 既然系噉，我哋应该去到营外，去佢嗰度，承受佢受过嘅耻辱。 14 我哋喺呢度冇永远长存嘅城，我哋恳切寻求嘅系将来嘅城。 15 要通过耶稣不断赞美上帝，呢个就系我哋献俾佢嘅祭牲；要用嘴宣扬佢嘅圣名，呢个就系我哋献上嘅果实。 16 另外，亦都唔好忘记行善*同埋分享*，因为上帝好钟意噉样嘅祭物。

17 要服从嗰啲喺你哋当中带头嘅人，愿意接受佢哋嘅指示*，因为佢哋时刻守护你哋，而且要向上帝交账。你哋噉样做，佢哋就可以喜乐噉履行职责，唔会唉声叹气。如果唔系，你哋就有损失嘞。

18 请为我哋不断祷告，因为我哋深信自己有清白嘅*良心，而且希望喺所有事上都有诚实嘅行为。 19 我亦都好想你哋为我祷告，等我可以快啲返去你哋嗰度。

20 上帝已经令羊群嘅伟大牧人，我哋嘅主耶稣，带住永恒誓约嘅血死而复生。愿呢位赐人安宁*嘅上帝 21 令你哋具备所需要嘅一切，可以遵行佢嘅旨意，而且通过耶稣基督，喺我哋身上成就令佢喜悦嘅事。愿荣耀永永远远归于上帝。阿们。

22 各位弟兄，请耐心听我写俾你哋嘅鼓励说话。我写俾你哋嘅信，其实都唔算好长。 23 我想话俾你哋知，我哋嘅弟兄提摩太已经喺监狱度获释嘞。如果佢好快嚟到，我就会带埋佢去见你哋。

24 请代我问候所有喺你哋当中带头嘅人，亦都问候所有圣民。喺意大利嘅弟兄都问候你哋。

25 愿你哋所有人享有分外恩典。