约翰一书

4 亲爱嘅弟兄姊妹，唔好每一个声称嚟自上帝嘅信息都相信，反而要验证呢啲信息系唔系源自上帝，因为已经有好多假先知喺世上出现嘞。

2 凭住以下呢一点，你哋就可以知道，声称嚟自上帝嘅信息系唔系真系源自上帝：所有承认耶稣基督成为肉身嚟过嘅信息，都源自上帝。 3 所有唔承认耶稣成为肉身嚟过嘅信息，都唔系源自上帝。你哋听讲过会有嚟自基督敌人嘅信息出现，而家呢啲信息已经喺世人当中嘞。

4 我嘅仔女啊，你哋系源自上帝嘅，而且战胜咗佢哋*，因为同你哋联合嘅，比同世人联合嘅更加强大。 5 佢哋系源自世人嘅。由于佢哋讲嘅同世人嘅思想一致，所以世人都听从佢哋。 6 我哋系源自上帝嘅。边个认识上帝，就听从我哋；边个唔系源自上帝，就唔听从我哋。噉样，我哋就可以分辨到真同假嘅信息嘞。

7 亲爱嘅弟兄姊妹，我哋几时都要彼此相爱，因为爱系出于上帝嘅。凡系有爱心嘅，都已经从上帝而生，而且认识上帝。 8 冇爱心嘅，就仲未认识上帝，因为上帝就系爱。 9 上帝派佢嘅独生子嚟到世人当中，等我哋可以通过佢得到生命，呢个清楚显示上帝对我哋嘅爱。 10 我哋仲未爱上帝，上帝就爱我哋，派佢嘅仔嚟，作为求恩嘅祭牲*为我哋除罪。呢个就系爱嘞。

11 亲爱嘅弟兄姊妹，既然上帝噉样爱我哋，我哋都应该彼此相爱。 12 从来冇人见过上帝。如果我哋几时都彼此相爱，上帝就几时都同我哋一齐*，佢嘅爱喺我哋心入面亦都完美无缺*嘞。 13 上帝赐佢嘅神圣力量俾我哋。凭住呢一点，我哋就知道自己时刻都同佢联合，佢亦都时刻同我哋联合。 14 天父派佢嘅仔嚟做救世主，我哋见证过呢件事，而家亦都为呢件事作见证。 15 边个承认耶稣系上帝嘅仔，上帝就时刻同佢联合，佢亦都时刻同上帝联合。 16 我哋感受到上帝对我哋嘅爱，亦都确信呢一点。

上帝就系爱。时刻表现爱心嘅*，就时刻同上帝联合，上帝亦都时刻同佢联合。 17 噉样，爱喺我哋里面就完美无缺*，令我哋喺审判嘅日子可以充满信心*噉发言，因为我哋喺呢个世上都好似基督一样。 18 恐惧令我哋退缩。不过爱上帝嘅人唔会恐惧，因为完美无缺嘅爱可以驱除恐惧。如果一个人恐惧，佢嘅爱就未系完美无缺嘞。 19 我哋爱，系因为上帝爱我哋先。

20 人自称爱上帝，但系憎恨自己嘅弟兄，佢就系讲大话。人唔爱自己睇得见嘅弟兄，就唔能够爱睇唔见嘅上帝。 21 爱上帝嘅，都一定要爱弟兄，呢个就系佢赐俾我哋嘅诫命。