尊重生命

 1．边个赐生命俾我哋？

耶和华系“永活嘅上帝”。（耶利米书10:10）佢系我哋嘅创造主，佢赐生命俾我哋。圣经话：“你创造咗一切，一切都系因为你嘅旨意先至存在，先至被创造嘅”。（启示录4:11）冇错，生命系嚟自耶和华嘅宝贵恩赐。（请读诗篇36:9）

 2．我哋点样先至可以充分享受生命？

² 耶和华赐俾人维持生命所需嘅一切，例如食物同水。（使徒行传17:28）唔单止噉，佢仲想人享受生活嘅乐趣。（使徒行传14:15-17）要充分享受生命，我哋就要服从上帝嘅律法。（以赛亚书48:17,18）

 3．该隐杀死亚伯之后，耶和华点做呢？

³ 圣经话，每个人嘅生命喺耶和华眼中都系宝贵嘅。例如，喺亚当同夏娃嘅日子，佢哋嘅儿子该隐向弟弟亚伯大发雷霆。耶和华就警告该隐，要控制自己嘅怒气。不过该隐唔听，结果佢嬲到“袭击弟弟亚伯，将佢杀死”。（创世记4:3-8）耶和华因为该隐杀咗亚伯而惩罚佢。（创世记4:9-11）由此可见，怒气同仇恨系好危险嘅，会使人变得暴力同残忍，噉样嘅人唔会得到永生。（请读约翰一书3:15）要取悦耶和华，我哋就一定要学会爱所有人。（约翰一书3:11,12）

 4．从上帝赐俾以色列人嘅诫命，我哋点样睇出生命系一个恩赐？

⁴ 两千几年之后，耶和华通过摩西颁布嘅十诫，表明佢好重视生命。其中一条诫命系：“不可杀人。”（申命记5:17）如果有人故意杀人，佢就会被处死。

 5．上帝对堕胎有乜嘢睇法？

⁵ 上帝对堕胎有乜嘢睇法？即使系胎儿嘅生命，耶和华都视为宝贵。耶和华赐俾以色列人嘅律法指出，如果有人伤害咗孕妇，导致胎儿死去，嗰个人就要被处决。（请读出埃及记21:22,23；诗篇127:3）所以，我哋从中学到，人唔应该堕胎。——请睇附注28

6,7．我哋可以点样向耶和华表明自己珍视生命？

⁶ 我哋可以点样向耶和华表明自己珍视生命？我哋唔应该做任何危及自己同他人性命嘅事。所以我哋唔会食烟，噍槟榔，或者滥用药物，因为噉样做会危害健康，甚至会导致死亡。

⁷ 我哋嘅身体同生命系嚟自上帝嘅，所以要按照佢嘅旨意生活。如果人沾染任何恶习，就会喺上帝眼中成为不洁。（罗马书6:19；12:1；哥林多后书7:1）如果我哋唔珍视耶和华所赐嘅生命，佢就唔会接纳我哋嘅崇拜。戒除恶习可能好唔容易，不过，我哋珍视生命努力戒除恶习嘅话，就会得到耶和华嘅帮助。

 8．为咗避免伤害自己或者危害他人嘅生命，我哋应该点样做？

⁸ 生命系嚟自耶和华嘅宝贵恩赐。耶和华相信真正崇拜佢嘅人唔会故意做任何伤害自己，或者危害他人生命嘅事。无论驾驶私家车，摩托车定系其他交通工具，我哋都会留意安全，绝对唔会冒险。我哋唔会参与危险或者暴力嘅运动。（诗篇11:5）另一方面，我哋会尽力使家居设施唔会对人构成危险。耶和华吩咐以色列人：“你起新屋嘅时候，要喺屋顶上面安设栏杆，免得有人从嗰度跌落嚟，你嘅家就承担血债。”（申命记22:8）

 9．我哋应该点样对待动物？

⁹ 耶和华亦好关注我哋点样对待动物。佢允许人为咗食物、衣服、或者自卫而杀死动物。（创世记3:21；9:3；出埃及记21:28）但系，如果只系为咗娱乐而虐待或者残杀动物，噉就唔啱嘞。（箴言12:10）

10．我哋点样睇出血代表生命？

¹⁰ 喺耶和华眼中血系神圣嘅，因为血代表生命。该隐杀死亚伯之后，耶和华同该隐讲：“你弟弟嘅血从地里向我呼喊”。（创世记4:10）亚伯嘅血代表佢嘅生命。由于该隐夺去亚伯嘅生命，耶和华就惩罚佢。挪亚洪水之后，耶和华再次表明血代表生命。耶和华允许挪亚一家食动物嘅肉。上帝话：“凡系活嘅动物都可以做你哋嘅食物。我将呢一切都赐俾你哋，就好似青菜一样。”但系有一样嘢，耶和华吩咐佢哋唔好食，佢话：“唯独带生命嘅肉，就系带血嘅肉，你哋唔可以食。”（创世记1:29；9:3,4）

11．关于血，耶和华吩咐以色列人乜嘢？

¹¹ 耶和华吩咐挪亚唔好食血之后，过咗大约800年，佢再次吩咐佢嘅子民话：“凡系以色列人或喺你哋嗰度侨居嘅外族人，无论打猎得到可以食嘅走兽定系飞鸟，都要将血放出嚟，用泥土掩盖。”然后佢仲话：“凡活物嘅血，你哋都唔可以食”。（利未记17:13,14）耶和华一直希望佢嘅子民将血视为神圣。佢哋可以食动物嘅肉，但系就唔可以食血。佢哋食动物之前，要将血放出嚟。

12．基督徒对血应该有乜嘢睇法？

¹² 耶稣去世十几年之后，使徒同耶路撒冷嘅基督徒长老开会，要决定基督徒必须继续遵守边啲诫命。（请读使徒行传15:28,29；21:25）耶和华帮助佢哋睇出，血喺佢眼中仍然系宝贵嘅，所以基督徒应该继续将血视为神圣。早期基督徒唔可以食未放血嘅肉，亦唔可以饮血。禁戒血同禁戒拜偶像、禁戒淫乱一样咁重要。嗰阵以来，真基督徒都坚决唔会食血或者饮血。今日又点样？耶和华依然想我哋将血视为神圣。

13．点解基督徒唔会接受输血？

¹³ 噉系咪话基督徒都唔应该接受输血？的确系。耶和华吩咐我哋唔可以食血或者饮血。试谂吓，如果医生叫你唔好饮酒，你会唔会将酒输入血管呢？当然唔会！同样，唔可以食血同饮血，就意味住我哋都唔会接受输血。——请睇附注29

14,15．对基督徒嚟讲，尊重生命同服从耶和华有几重要？

¹⁴ 假如医生话我哋唔输血就会死，噉又点呢？每个人都要自己决定系咪要服从上帝就血所定嘅律法。基督徒非常尊重上帝所赐嘅生命，所以我哋会寻求其他可行嘅疗法保全生命，但系就唔会接受输血。

¹⁵ 当然我哋都想健康噉生活落去，但由于血代表生命，而且喺上帝眼中系神圣嘅，所以我哋唔会接受输血。服从耶和华比延续生命更加重要，我哋唔应该违反上帝嘅诫命。耶稣话：“边个想救自己嘅生命，就必失去生命；边个为我失去生命，就必得着生命。”（马太福音16:25）我哋服从耶和华系因为爱佢，而佢亦都知道乜嘢对我哋系最好嘅。我哋对生命嘅睇法同耶和华一致，就系生命既宝贵又神圣。（希伯来书11:6）

16．点解上帝嘅仆人会服从佢？

¹⁶ 上帝忠贞嘅仆人决心遵从上帝就血所定嘅律法。佢哋唔会食血或者饮血，亦唔会因为医疗嘅理由接受输血。a但系，为咗要保全生命，佢哋会接受其他可行嘅疗法。生命同血系上帝创造嘅，佢哋深信上帝知道乜嘢对人最好。你呢？

17．耶和华容许以色列人唯独喺乜嘢情况下使用血？

¹⁷ 耶和华通过摩西赐俾以色列人嘅律法指出：“活物嘅生命就喺血里面。我规定血只能用喺坛上，为你哋嘅生命赎罪［或者请求宽恕］。血里面有生命，所以能够赎罪”。（利未记17:11）以色列人犯罪之后，为咗得到上帝嘅宽恕，就需要将动物献俾耶和华作为祭牲，并且请祭司将动物嘅血洒喺圣殿嘅祭坛上面。呢个就系耶和华唯一容许以色列人使用血嘅方式。

18．耶稣嘅牺牲使我哋有乜嘢希望？

¹⁸ 耶稣牺牲生命，献出宝血使我哋嘅罪得到赦免，所以人就唔需要再通过献祭牲得到上帝嘅宽恕。（马太福音20:28；希伯来书10:1）耶稣嘅血好宝贵，耶和华接受耶稣所献嘅赎价，使所有人有机会得享永生。（约翰福音3:16；希伯来书9:11,12；彼得前书1:18,19）

19．要避免欠“血债”，我哋必须点做？

¹⁹ 耶和华赐俾人嘅生命真系好奇妙，我哋的确好感激上帝！所以，我哋都好想话俾人知，如果佢哋对耶稣有信心就可以有永生。由于我哋爱其他人，所以会尽己所能帮助佢哋，教导佢哋点样可以得到真正嘅生命。（以西结书3:17-21）噉我哋就能够好似使徒保罗噉讲：“无论边个灭亡，我都系清白嘅，冇欠边个嘅血债，因为上帝嘅旨意，我连一样都冇退缩唔传俾你哋”。（使徒行传20:26,27）冇错，我哋帮助人认识耶和华，使人明白上帝系几咁珍视宝贵嘅生命，噉就表明自己深深尊重生命同血。