10 摩西法典只係將來美好事物嘅影子，而唔係實體。所以，按照法典嘅吩咐每年不斷獻上相同嘅祭牲，係永遠都冇辦法令嗰啲去到上帝面前嘅人變得完美嘅。 2 如果敬奉上帝嘅人只係獻一次祭，就永遠潔淨，唔再覺得有罪，噉唔係一早就唔使再獻祭嘞咩？ 3 不過，呢啲祭牲反而令人年年都諗起自己有罪， 4 因為公牛同山羊嘅血冇可能將罪除去。
5 所以，基督嚟到世人當中嘅時候話：「『祭牲同其他祭物都唔係你想要嘅，但係你為我準備咗身體。 6 全燒祭同贖罪祭都唔係你鍾意嘅。』 7 於是我話：『上帝啊，你睇，我嚟係要照你嘅旨意去做。我嘅事就寫咗喺書卷上面。』」 8 佢首先話：「祭牲、祭物、全燒祭、贖罪祭，都唔係你想要嘅，亦都唔係你鍾意嘅。」（呢一切都係按照法典獻嘅。） 9 然後佢話：「你睇，我嚟係要照你嘅旨意去做。」由此可見，佢廢除咗以前嘅安排，係為咗設立之後嘅安排。 10 憑住呢個「旨意」，耶穌基督只係一次獻上佢嘅身體，我哋就成聖嘞。
11 另外，所有祭司每日都要侍立，履行神聖職務，經常獻上相同嘅祭牲，因為呢啲祭牲永遠都唔能夠完全除罪。 12 不過，基督只係獻咗一次祭，就將罪永遠除去，坐喺上帝右邊， 13 由嗰陣時開始，等待上帝令佢嘅敵人成為佢嘅腳凳。 14 佢只係獻咗一次祭，就令成聖嘅人永遠完美。 15 神聖力量亦都向我哋作證，首先話： 16 「耶和華話：『嗰段時期之後，我要同佢哋立噉樣嘅約：我要將我嘅法律放喺佢哋心入面，寫喺佢哋嘅腦海。』」 17 然後話：「我唔會再諗返佢哋嘅罪惡同埋不法嘅行為。」 18 既然呢啲罪都得到寬恕，就唔使再獻祭贖罪嘞。
19 各位弟兄，我哋憑住耶穌嘅血，就可以放膽踏上通往至聖所嘅路。 20 佢穿過帷幔，為我哋開拓咗呢條通往生命嘅新路。帷幔象徵佢嘅身體。 21 佢係我哋偉大嘅祭司，負責管理上帝嘅家。 22 既然係噉，我哋應該真心真意、信心十足噉嚟到上帝面前。我哋嘅心已經潔淨，良心唔再污穢，身體亦都好似用清水洗乾淨。 23 要堅定不移噉宣講我哋嘅希望，唔好動搖，因為作出承諾嘅上帝係信實可靠嘅。 24 要互相關心，噉就可以激發愛心，促進善行。 25 唔好放棄聚會，唔好好似有啲人噉經常缺席，反而要彼此鼓勵。你哋既然見到嗰個日子越嚟越近，就更加要噉樣做。
26 我哋確切認識真理之後，如果仲經常蓄意犯罪，就再冇祭物可以贖罪嘞， 27 唯有戰戰兢兢噉等待判決。上帝嘅義憤會好似火一樣燃燒，吞滅嗰啲敵對嘅人。 28 如果人無視摩西法典，有兩三個人指證，都會被處死，唔會得到憐恤， 29 更何況人踐踏上帝嘅仔，連令自己成聖嘅立約之血都視作等閒，仲侮辱帶嚟分外恩典嘅神聖力量呢？你哋諗吓，呢種人唔係應該受到更加嚴厲嘅懲罰咩？ 30 我哋知道上帝講過：「我會懲罰，我會治罪。」佢仲話：「耶和華會審判佢嘅子民。」 31 落喺真神嘅手，真係件得人驚嘅事！
32 要諗返以前嘅日子，你哋接受咗真理嘅亮光之後，喺激烈嘅搏鬥之中忍耐，受咗好多苦， 33 有時當眾遭受侮辱同患難，有時同遭遇呢啲事嘅人共渡難關。 34 你哋唔單止體恤嗰啲坐監嘅人，連自己嘅財物俾人搶走都冇失去喜樂，因為你哋知道自己有更加美好而且長存嘅產業。
35 所以要勇敢，唔好放棄，因為會有豐厚嘅獎賞。 36 你哋需要忍耐，噉樣你哋遵行上帝嘅旨意之後，就可以得到佢承諾嘅福分。 37 過多「一陣間」，「要嚟嘅嗰位就會嚟到，唔會延遲」。 38 「我正義嘅僕人會因為有信心而活著」。「如果佢退縮，我就唔鍾意佢」。 39 我哋唔係因為退縮而滅亡嘅人，而係因為有信心而保全生命嘅人。