1 我係雅各，係上帝同主耶穌基督嘅奴隸。我寫信俾分散各地嘅12個部族。
你哋好！
2 我嘅弟兄，你哋遇到各種考驗嘅時候，要將呢一切視為喜樂嘅事， 3 因為知道，你哋嘅信心經過驗證，就會產生忍耐。 4 但係，要俾忍耐完全發揮作用，噉你哋就可以完整齊備，喺各方面都無可指責，毫無欠缺。
5 你哋有邊個缺乏智慧，都應該不斷向上帝祈求，就可以得到智慧，因為上帝對每個人都好慷慨，而且唔責罵人。 6 不過，人應該懷住信心不斷祈求，一啲都唔好懷疑，因為懷疑嘅人就好似海浪俾風吹動一樣，起伏不定。 7 噉樣嘅人唔好以為可以喺耶和華嗰度得到乜嘢。 8 呢種人三心兩意，做任何事都搖擺不定。
9 卑微嘅弟兄應該因為自己受到提升而歡欣， 10 有錢嘅人亦都應該因為自己受到貶低而歡欣，因為佢最終會好似花草一樣消逝。 11 正如太陽升起，酷熱會令草木枯萎，花朵凋謝，失去美麗嘅外表，有錢嘅人都一樣，佢喺追逐財富嘅路上都會消逝。
12 喺考驗下保持忍耐嘅人有福嘞，因為佢受到認可之後，就會獲得生命嘅冠冕。呢個係耶和華承諾賜俾一直愛佢嘅人㗎。 13 人受到考驗嘅時候，唔應該話：「係上帝考驗我。」因為冇嘢可以令上帝做壞事，而上帝都唔會用壞事去考驗人。 14 其實每個人受考驗，係俾自己嘅私慾勾引同誘惑嘅。 15 私慾既然懷胎，就會生罪出嚟；罪一旦達到目的，就會帶嚟死亡。
16 親愛嘅弟兄，唔好被誤導嘞。 17 各種美好嘅禮物同埋完美嘅賞賜，都嚟自天上，係天上亮光之父所賜嘅。佢同會移動嘅影子唔同，絕對唔會改變。 18 佢嘅旨意係通過真理嘅話語俾生命我哋，令我哋喺佢創造嘅人類當中，好似最早獻上嘅收成一樣。
19 親愛嘅弟兄，你哋唔好忘記，人人都要樂於聆聽，唔好急住講嘢，唔好輕易發嬲， 20 因為人嘅憤怒唔能夠伸張上帝嘅正義。 21 所以，你哋要擺脫一切污穢同埋每一絲惡念。你哋要用溫和嘅態度接受上帝嘅話語，噉佢嘅話語就可以喺你哋心裡面扎根。上帝嘅話語能夠拯救你哋嘅生命。
22 你哋要實踐上帝嘅話語，唔好淨係聽咗就算，諗啲錯誤嘅道理嚟自己呃自己。 23 因為人聽咗上帝嘅話語但係唔實踐，就好似人照鏡，望住自己塊面， 24 望完就走開，即刻唔記得自己係點嘅樣。 25 但係，人如果仔細噉睇帶嚟自由嘅完美法律，仲時刻遵守，佢就係付諸實行，而唔係聽完就忘記。佢會因為實踐出嚟而得到福分。
26 一個人如果認為自己崇拜緊上帝，但係冇好好約束自己嘅舌頭，就係呃緊自己，佢嘅崇拜一啲價值都冇。 27 喺上帝我哋嘅爸爸眼中，潔淨而冇污穢嘅崇拜，就係要關心照顧遭遇患難嘅孤兒寡婦，而自己亦都唔好俾世俗玷污。