喺葡萄牙撒播王國種子

喺波濤洶湧嘅大西洋，一艘船正駛向歐洲。船上嘅一位乘客叫做喬治·揚格，佢回想自己喺巴西嘅傳道成果，覺得好滿足。a 但係，揚格弟兄而家要諗嘅係佢嘅新委派——喺從來冇聽過王國好消息嘅西班牙同葡萄牙開展傳道工作。因為盧述福弟兄遲啲會去當地發表演講，所以揚格弟兄諗住一到步，就着手為之後嘅安排做準備，仲打算分發30萬張傳單！

1925年春天，揚格弟兄到達里斯本。當時，嗰度局勢非常混亂。1910年，葡萄牙發生革命，建立共和國。由於君主制被廢除，天主教嘅勢力大受打擊。平民百姓雖然得到更多自由，但係動亂仍然持續不斷。

就喺揚格弟兄為盧述福弟兄嘅演講做籌備工作嘅時候，葡萄牙政府因為一場政變而實行軍事管制。英國及海外聖經公會嘅秘書提醒揚格弟兄，佢一定會遇到好多反對。即使係噉，揚格弟兄仍然申請使用賈梅士中學嘅體育館，結果獲得批准。

盧述福弟兄嘅演講喺5月3日發表。大家都非常期待嘅呢一日終於嚟到！大廈嘅標語牌同報紙嘅廣告上面都宣布咗公衆演講嘅題目——“點樣先可以永遠生活喺地上”。宗教反對者即刻喺佢哋嘅報章刊登一篇文章，提醒讀者小心新嚟嘅“假先知”。佢哋又喺體育館門口分發成千上萬嘅册子，抨擊盧述福弟兄嘅教導。

雖然係噉，仲係有好多人想聽演講。大約2000人逼滿咗個體育館，另外，差唔多數目嘅人因為座位唔够而入唔到場。有啲好奇嘅聽衆就爬上體育館入面嘅繩梯，而有啲就坐喺體育館嘅運動設備上面。

不過，演講期間都有啲阻滯。反對者大吵大鬧，又整爛啲凳。但係，盧述福弟兄鎮定自若，為咗等大家聽到佢嘅聲音，就企上張檯。盧述福弟兄嘅演講一直持續到差唔多凌晨十二點。演講結束之後，有超過1200個感興趣嘅人留低自己嘅姓名同地址，想得到更多聖經書刊。第二日，當地一家知名嘅報社刊登咗盧述福弟兄嘅演講内容。

1925年9月，葡萄牙語嘅《守望台》開始喺葡萄牙出版。（更早之前，葡萄牙語嘅《守望台》已經喺巴西出版）大概喺呢個時候，一位曾經同揚格弟兄喺巴西分部共事過，叫做維爾吉利奧·弗格森嘅聖經研究者，打算搬去葡萄牙幫手擴展王國工作。冇幾耐之後，佢就同太太莉齊嚟到葡萄牙，再次同揚格弟兄一齊工作。弗格森弟兄嚟得好合時，因為揚格弟兄好快就有另一個新委派，甚至要去到蘇聯。

後來，葡萄牙又發生咗一場軍事政變，當地建立咗一個獨裁政權。同時，聖經研究者受到嘅反對越來越犀利。弗格森弟兄堅持自己嘅立場，盡力保護當時人數唔多嘅聖經研究者，同時積極支持傳道工作。佢向政府申請，用自己嘅屋企舉行定期聚會。1927年10月，佢嘅申請獲得批准。

喺獨裁統治嘅頭一年，葡萄牙大約有450人訂閲《守望台》雜誌。另外，通過傳單同册子，聖經嘅真理傳播到安哥拉、亞速爾群島（亞述群島）、佛得角（維德角）、東帝汶、果阿、馬德拉同莫桑比克，遍及葡萄牙帝國全境。

1920年，一個叫曼努埃爾·德席爾瓦·若爾當嘅人嚟到里斯本，佢係一個謙卑嘅葡萄牙園丁。佢喺巴西嘅時候曾經聽過揚格弟兄發表嘅演講，馬上知道自己聽到嘅就係真理。為咗幫助弗格森弟兄擴展傳道工作，曼努埃爾開始做派書者（現稱先驅）。由於印刷同分發聖經書刊嘅工作組織得好好，喺里斯本成立嘅新會衆都發展得欣欣向榮。

1934年，弗格森夫婦要返去巴西，不過真理嘅種子已經喺葡萄牙生根發芽。當時歐洲局勢發生激烈嘅變化，先後爆發咗西班牙内戰同第二次世界大戰，但葡萄牙忠貞嘅弟兄姊妹依然保持堅强嘅靈性。有一段時間，佢哋喺艱難嘅環境之下，仍然努力使屬靈嘅火種不致熄滅。1947年，基列畢業嘅約翰·庫克到達葡萄牙，佢係當地第一個海外傳道員。喺佢幫助下，葡萄牙嘅弟兄姊妹重新燃起屬靈之火。之後，王國傳道員嘅增長勢不可擋。耶和華見證人嘅工作雖然喺1962年被當地政府禁止，不過仲係不斷發展。1974年12月，耶和華見證人得到法律認可嘅時候，全國已經有超過1萬3000個傳道員。

今日，喺葡萄牙同幾個講葡萄牙語嘅群島，包括亞速爾同馬德拉，有超過5萬個傳道員傳講上帝王國嘅好消息。當中有啲傳道員，係當年聽過盧述福弟兄歷史性演講嘅嗰批人嘅第三代後人。

呢啲早期喺葡萄牙服務嘅弟兄姊妹勇敢無懼，“做基督耶穌嘅公僕，奉派去外邦人當中”，帶頭開展傳道工作。我哋對呢啲忠心嘅弟兄姊妹同耶和華充滿感激之情。（羅馬書15:15,16）——嚟自葡萄牙分部檔案室