成為屬靈嘅人意味住乜嘢？

1,2．（甲）好多弟兄姊妹對培養屬靈思想有乜嘢睇法？（乙）我哋會討論邊三個同屬靈有關嘅主要問題？

一位加拿大嘅姊妹話：“做屬靈嘅人令我更加開心，亦都幫助我成功應付每日嘅考驗。”一位嚟自巴西嘅弟兄話：“我哋夫婦都努力培養屬靈嘅思想，所以23年嘅婚姻生活過得好幸福。”一位菲律賓嘅弟兄亦都話：“做屬靈嘅人使我享有内心安寧，幫助我同唔同文化背景嘅弟兄姊妹有更親密嘅關係。”

² 以上呢一類嘅描述都清楚表明，做屬靈嘅人可以使我哋獲益良多。我哋可以問吓自己：“我點樣先可以成為一個屬靈嘅人，享有上述嘅福分？”回答呢個問題之前，我哋先要清楚明白，聖經點樣談及屬靈或者有屬靈思想嘅人。喺呢篇課文，我哋會回答三個主要問題：（1）成為屬靈嘅人意味住乜嘢？（2）邊啲榜樣可以幫助我哋喺屬靈上進步？（3）努力培養“基督嘅思想”點樣幫助我哋自己成為屬靈嘅人。

 3．聖經描述順應肉體嘅人同屬靈嘅人有乜嘢唔同？

³ 為咗幫助我哋明白屬靈嘅人係點樣嘅，使徒保羅將“屬靈嘅人”同“順應肉體嘅人”作比較。（請讀哥林多前書2:14-16）兩者有乜嘢唔同呢？“順應肉體嘅人認為上帝聖靈嘅事愚不可及，唔肯接受。噉樣嘅人唔能够認識呢啲事”。相反，“屬靈嘅人能够了解萬事”，而且“有基督嘅思想”。保羅鼓勵我哋要做屬靈嘅人。接住落嚟，我哋睇吓兩者喺其他方面仲有邊啲差異。

4,5．順應肉體嘅人有乜嘢特徵？

⁴ 首先，請睇吓順應肉體嘅人有點樣嘅態度。呢個世界流行一種只係關心自己肉體慾望嘅態度。保羅話呢種態度係“目前作用於悖逆嘅人身上嘅精神”。（以弗所書2:2）喺呢種精神嘅影響之下，大多數人都有一種普遍嘅態度——隨大流。佢哋淨係關心肉體嘅慾望。結果，大多數人只係做自己覺得啱嘅事，根本唔想遵守上帝嘅標準。一個順應肉體或者有肉體思想嘅人，通常會注重名譽地位，追求金錢財富，或者堅持自己認為有權得到嘅嘢。

⁵ 仲有乜嘢可以幫助我哋睇出一個人順應肉體？聖經話，佢哋會有“順應肉體嘅行為”。（加拉太書5:19-21）通過保羅寫俾哥林多會衆嘅第一封信，我哋可以睇出順應肉體嘅人嘅其他特徵：挑撥離間、分黨結派、挑起紛爭、互相控告、唔尊重領導權，同埋濫食縱酒。一旦受到誘惑，順應肉體行事嘅人就會屈服妥協。（箴言7:21,22）聖經執筆者猶大話，呢啲墮落嘅人甚至一啲都“唔明白屬靈嘅事”。（猶大書18,19）

 6．點樣睇出一個人係咪屬靈嘅人？

⁶ 成為“屬靈嘅人”意味住乜嘢？一個屬靈嘅人好注重自己同上帝嘅關係，力求“效法上帝”。（以弗所書5:1）即係話，佢哋會努力了解上帝對事物嘅睇法，用上帝嘅觀點嚟睇事情。對佢哋嚟講，上帝非常真實。同順應肉體行事嘅人完全唔同嘅係，有屬靈思想嘅人會努力喺生活每一方面都謹守上帝嘅標準。（詩篇119:33；143:10）佢哋唔會將精神集中喺順應肉體嘅事上，而會盡力結出“聖靈嘅果實”。（加拉太書5:22,23）以下嘅對比可以進一步説明“有屬靈思想”係乜嘢意思：一個好識得做生意嘅人，我哋會話佢有商業頭腦；類似嘅係，一個渴求真理同重視正確崇拜嘅人，會被稱為有屬靈思想嘅人。

 7．聖經點樣談及有屬靈思想嘅人？

⁷ 耶穌話，有屬靈思想嘅人係有福嘅。我哋可以喺馬太福音5:3讀到：“自覺有屬靈需要嘅人有福嘞，因為天上嘅王國係佢哋嘅。”羅馬書8:6提及有屬靈思想嘅人所得到嘅益處，話：“思想總係順應聖靈，就必得生命平安。”我哋專注屬靈嘅事，而家就可以同上帝享有和睦嘅關係，仲可以喺未來得到永生。

 8．點解我哋要培養同保持有屬靈嘅思想？

⁸ 不過，我哋生活喺一個危機四伏嘅環境入面。呢個世界充斥住順應肉體嘅態度，所以，我哋想培養並保持有屬靈嘅思想就需要付出好大嘅努力。如果我哋冇用耶和華嘅思想嚟充滿自己嘅頭腦，噉呢個世界就會將順應肉體嘅精神同態度塞入我哋嘅頭腦。我哋可以點樣避免噉樣嘅事發生？我哋點樣可以變得更加屬靈？

 9．（甲）乜嘢可以幫助我哋喺屬靈上進步？（乙）我哋會睇吓邊啲人嘅榜樣？

⁹ 小朋友可以通過觀察同模仿父母而得以進步。同樣，觀察同埋向靈性堅强嘅人學習可以幫助我哋喺屬靈上成長。另一方面，我哋從嗰啲屬肉體嘅人身上亦都學到乜嘢事唔應該做。（哥林多前書3:1-4）聖經將好嘅榜樣同唔好嘅事例都記錄落嚟。既然我哋嘅目標係要成為屬靈嘅人，噉我哋可以特别留意嗰啲值得效法嘅榜樣，例如雅各、馬利亞同耶穌。

10．雅各點樣表明自己係一個屬靈嘅人？

¹⁰ 首先，我哋嚟睇吓雅各嘅榜樣。同今日好多人一樣，雅各嘅人生充滿波折。佢嘅親生哥哥以掃要殺死佢。除此之外，佢詭詐嘅岳父亦都三番四次噉利用佢。雖然身邊有“順應肉體嘅人”，不過雅各依然持有屬靈嘅思想。佢堅信耶和華對亞伯拉罕所作嘅應許，亦都因為知道自己嘅家族喺成就耶和華旨意方面擔任特别嘅角色，而盡心盡力照顧家人。（創世記28:10-15）雅各嘅所言所行表明佢謹記耶和華嘅標準同旨意。有一次，佢知道以掃會害佢，就向耶和華禱告話：“求你救我……你講過：‘我必恩待你，使你嘅後代有如海邊嘅沙’”。（創世記32:6-12）佢顯然對耶和華嘅應許有堅定嘅信心，亦都喺行事為人方面盡力符合上帝嘅旨意。

11．乜嘢表明馬利亞係一個屬靈嘅人？

¹¹ 我哋而家再嚟睇吓馬利亞嘅例子。點解耶和華選擇馬利亞做耶穌嘅母親？一定係因為，佢係一個有屬靈思想嘅人。我哋點知道呢？喺拜訪親戚撒迦利亞同伊利莎白嗰時，馬利亞衷心讚美耶和華。通過呢番美麗嘅言詞，我哋清楚睇出佢係一個屬靈嘅人。（請讀路加福音1:46-55）馬利亞所講嘅話表明佢深愛上帝嘅話語，非常熟悉希伯來語經文。（創世記30:13；撒母耳記上2:1-10；瑪拉基書3:12）請留意，雖然佢同約瑟啱啱結咗婚，但喺耶穌出世之前，佢哋並冇發生性關係。噉表明乜嘢呢？呢個表明，比起滿足個人嘅慾望，佢哋兩個更關注嘅係耶和華嘅旨意。（馬太福音1:25）喺耶穌嘅成長過程中，馬利亞細心留意發生喺耶穌身上嘅事同埋佢所講嘅話，而且“將呢一切都謹記在心”。（路加福音2:51）顯然，佢好關注上帝對彌賽亞嘅應許。我哋都應該諗吓，自己可以點樣效法馬利亞嘅榜樣，將上帝嘅旨意放喺生活嘅首位。

12．（甲）耶穌喺邊方面效法佢嘅天父？（乙）我哋可以點樣效法耶穌嘅榜樣？（請睇吓課文開頭嘅圖片）

¹² 喺世上生活過嘅人當中，邊個喺屬靈方面係最佳嘅榜樣？冇錯，就係耶穌。耶穌喺地上嘅一生同埋佢嘅傳道工作，都充分表明佢好想效法天父耶和華。佢喺思想、感情同行為上都同耶和華非常相似，佢亦都按照上帝嘅旨意同標準生活。（約翰福音8:29；14:9；15:10）我哋不妨比較吓以賽亞書同馬可福音嘅記載，睇吓耶和華同耶穌喺表現憐恤方面有乜嘢相似之處。（請讀以賽亞書63:9；馬可福音6:34）我哋係咪樂意效法耶穌，隨時做好準備，向嗰啲需要幫助嘅人表現憐恤？我哋係咪亦都效法耶穌，獻出自己，專注於傳講同教人王國好消息嘅工作？（路加福音4:43）向人表現憐恤同努力幫助人都係屬靈嘅人嘅標誌。

13,14．（甲）我哋從今日屬靈嘅弟兄姊妹身上可以學到乜嘢？（乙）請舉例。

¹³ 今日，好多有屬靈思想嘅弟兄姊妹都盡力效法基督。可能你都留意到，佢哋熱心傳道，熱情好客，滿懷憐恤，仲有其他美好嘅特質。其實，佢哋同我哋一樣都係唔完美嘅人，要好努力對抗自身嘅弱點，先可以培養出呢啲美好嘅屬靈特質。巴西一個叫蕾切爾嘅姊妹話：“我以前好鍾意跟呢個世界嘅潮流，所以我嘅衣着唔係咁端莊得體。但係，學習聖經之後，聖經真理推動我努力成為一個屬靈嘅人。作出調整一啲都唔容易，不過調整之後，我變得更加開心，而且揾到人生嘅真正意義。”

¹⁴ 菲律賓嘅拉倫要面對另一種挑戰。佢為咗可以出人頭地，就一心追求高等教育，希望揾到一份好工作。佢話：“我嘅屬靈目標變得越來越模糊。不過後來，我開始意識到自己嘅人生缺失咗啲嘢，一啲遠遠比我嘅工作更加重要嘅嘢。之後，我作出調整，再次將注意力集中喺事奉耶和華嘅事上。”而家，拉倫對馬太福音6:33,34嘅承諾充滿信心。佢話：“我可以肯定，耶和華一定會照顧我！”可能你會衆入面都有類似嘅榜樣。你見到佢哋努力效法基督，係咪都好想跟隨佢哋忠心嘅榜樣？（哥林多前書11:1；帖撒羅尼迦後書3:7）

15,16．（甲）我哋想有基督嘅思想就要點樣做？（乙）我哋可以點樣了解“基督嘅思想”？

¹⁵ 我哋每個人可以點樣效法基督？聖經喺哥林多前書2:16提到要有“基督嘅思想”。羅馬書15:5 亦都提到要有“基督耶穌嘅思想態度”。所以，我哋想有基督嘅思想，就要認識佢嘅思維模式，全面了解佢嘅品格，仲要跟隨佢嘅腳蹤走。耶穌最注重嘅係自己同上帝嘅關係，佢完美反映出上帝嘅美好特質，所以我哋效法佢就係效法耶和華上帝。由此睇出，學習耶穌嘅思想的確非常重要。

¹⁶ 我哋點樣可以做到？門徒睇到耶穌施行嘅奇迹，聽到佢打動人心嘅教導，見到佢點樣對待各種各樣嘅人，同埋觀察到佢點樣運用上帝嘅原則。佢哋話：“佢……所做嘅一切事，我哋都可以做見證人。”（使徒行傳10:39）雖然我哋唔能够直接觀察耶穌，但係耶和華仁愛噉提供福音書嘅記載，能够使耶穌嘅品格鮮明浮現喺我哋嘅腦海中。閲讀同沉思四本福音書嘅記載，我哋可以了解更多關於基督嘅思想。噉樣做，我哋就能够“緊緊跟隨［基督］嘅腳蹤走”，而且“用［同佢一樣］嘅心志武裝自己”。（彼得前書2:21；4:1）

17．基督嘅思想可以點樣幫助我哋？

¹⁷ 學習耶穌嘅思想可以點樣幫助我哋？富有營養嘅食物可以使我哋身體强壯，同樣，基督嘅思想可以强化我哋嘅靈性。我哋不斷吸收基督嘅思想，就越來越清楚耶穌喺各種情況下會點樣做。噉樣可以幫助我哋作出明智嘅決定，使我哋保持清白嘅良心，得蒙上帝悦納。既然學習基督嘅思想使我哋得到咁多益處，我哋唔係有理由要“穿上主耶穌基督嘅品格”咩？（羅馬書13:14）

18．你從呢篇課文學到乜嘢？

¹⁸ 喺呢篇課文，我哋討論咗成為屬靈嘅人意味住乜嘢，我哋可以從聖經入面嘅榜樣學到乜嘢，同埋有“基督嘅思想”可以點樣幫助我哋成為一個屬靈嘅人。不過，我哋仲有幾個問題需要討論。例如，我哋點樣知道自己嘅靈性有幾强壯？為咗培養堅强嘅靈性，我哋仲可以做啲乜嘢？一個人嘅屬靈情況點樣影響佢嘅日常生活？下一篇課文會回答呢啲問題。