點樣培養愛上帝同愛鄰人嘅心？

雖然我哋唔需要遵守摩西律法，不過耶和華對基督徒嘅要求，可以用律法嘅兩大誡命去概括，就係要愛耶和華同愛鄰人。（太22:37-39）呢種愛唔係與生俱來嘅，而係需要努力培養嘅。點樣培養呢？其中一個重要方法就係每日都閲讀聖經。我哋沉思聖經關於上帝品格唔同方面嘅記載，就會留意到“耶和華可喜嘅恩德”。（詩27:4）噉樣，我哋對上帝嘅愛就會與日俱增，亦會越來越接近佢嘅思想。呢種愛推動我哋服從上帝嘅誡命，包括對其他人表現自我犧牲嘅愛。（約13:34,35；約一5:3）以下有三個令聖經研讀更有趣嘅方法：

• 善用想像力，令記載活現眼前。諗吓自己置身其中，會睇到乜嘢？聽到乜嘢？聞到乜嘢？感覺到啲乜嘢？

  

• 運用唔同嘅方法。以下有一啲建議：你可以邊睇經文，邊聽錄音，或者讀出經文。你唔一定要跟住每章嘅順序去讀，可以選擇閲讀某一章，某個部分。例如，閲讀關於耶穌嘅記載嗰陣，可以運用《聖經參考手册》第4單元或者第16單元，又可以閲讀《天天考查聖經》當日經文嘅嗰一章，亦可以根據聖經經卷成書時間嘅順序去讀。

  

• 理解所讀嘅内容。即使每日只係睇一章經文，不過邊讀邊沉思，細嚼慢嚥嘅話，都總好過走馬觀花、匆匆而過噉睇好多章經文。閲讀聖經嗰陣，要諗吓記載嘅背景，分析經文嘅細節，善用圖表同埋參考經文。最少深入研究其中一個你唔明嘅地方。你用幾多時間閲讀經文，亦都應該抽幾多時間沉思。