耶和華彰顯自己嘅名

1,2． 《新世界譯本》點樣顯揚上帝嘅名？

1947年12月2日星期二，一個晴朗、清涼嘅早晨，喺美國紐約市布魯克林嘅伯特利，有一小群受膏弟兄着手執行一項艱巨嘅任務。佢哋勞心勞力，細緻嚴謹噉工作，用咗12年嘅時間，終於喺1960年3月13日星期日完成咗整本聖經嘅翻譯工作。三個月之後，1960年6月18日，喺英國曼徹斯特市嘅大會上，内森·諾爾弟兄宣布發行《聖經新世界譯本》（英語）嘅最後一册，在場所有人都興奮到不得了。諾爾弟兄講出咗大家嘅心聲：“今日的確係個歡樂嘅日子，世界各地嘅耶和華見證人都歡欣鼓舞！”《新世界譯本》有個鮮明嘅特點令到耶和華嘅子民特别開心，就係：原文裏面凡係有上帝聖名嘅地方，都一一翻譯出嚟。

² 好多聖經譯本就啱啱相反，冇將上帝嘅名翻譯出嚟。撒但企圖使上帝嘅名銷聲匿迹，但係耶和華嘅受膏僕人堅決抵抗撒但嘅奸計。當日發行嘅《新世界譯本》嘅前言話，呢個譯本“最主要嘅特點就係恢復上帝嘅名喺聖經裏面嘅應有地位”。耶和華呢個名喺《新世界譯本》裏面出現咗超過7000次，呢個譯本的確大大顯揚天父耶和華嘅聖名！

3． （甲）我哋嘅弟兄睇出上帝嘅名有乜嘢含意？（乙）我哋應該點樣理解出埃及記3:13,14嘅經文？（見附欄“上帝名字嘅含意”）

³ 早期嘅聖經研究者一直以為上帝嘅名意思係：“我是自有永有的”。（出埃及記3:14，《和合本》）所以，英語版《守望台》1926年1月1日刊話：“耶和華呢個名所代表嘅嗰位神係自有嘅……係冇開始亦都冇終結嘅。”但係，到上帝嘅子民着手翻譯《新世界譯本》嘅時候，上帝就幫佢哋睇出，耶和華呢個名唔單單係指，佢“係自有嘅”。上帝聖名嘅主要含意係，佢一定會採取行動實現自己嘅旨意。上帝嘅子民亦都明白，耶和華呢個名嘅字面意思係“佢使……成為”，亦即係話，佢係“成事者”。耶和華定意創造宇宙同各種活物，使其中一部分活物能够崇拜佢，呢一切都已經成事嘞。佢仲會繼續實現自己嘅旨意，亦都一定會成事。上帝嘅名應該受到顯揚。點解噉樣做非常重要？我哋可以點樣顯揚上帝嘅聖名呢？

4,5． （甲）我哋祈求上帝嘅名彰顯為聖，就等於係求乜嘢？（乙）上帝會喺幾時同埋點樣使自己嘅名彰顯為聖呢？

⁴ 耶和華要彰顯自己嘅名。喺模範禱告裏面，耶穌所求嘅第一件事就係：“願你嘅名彰顯為聖。”（馬太福音6:9）從呢點睇出，喺上帝嘅旨意當中，最重要嘅就係使耶和華呢個名彰顯為聖。噉我哋祈求上帝嘅名彰顯為聖，就等於求乜嘢呢？

⁵ 呢本書第1章提過，耶穌喺模範禱告裏面求咗三件同上帝旨意有關嘅事，第一件就係“願你嘅名彰顯為聖”，其餘兩件係：“願你嘅王國來臨”，“願你嘅旨意喺地上實現”。（馬太福音6:10）我哋既然求耶和華採取行動，使佢嘅王國來臨，使佢嘅旨意喺地上實現，我哋亦都會求耶和華採取行動，使佢嘅名彰顯為聖。其實，自從伊甸園嘅反叛事件以來，耶和華嘅名一直受到羞辱。我哋求耶和華彰顯自己嘅名，就等於係求佢除去自己嘅名所受嘅一切羞辱。耶和華會點樣回應呢個禱告呢？佢話“我要使我嘅大名彰顯為聖”，“我嘅名喺列國中被人褻瀆”咗。（以西結書36:23；38:23）喺哈米吉多頓大戰嗰陣，耶和華會鏟除一切惡人惡事，喺天地衆生眼前使自己嘅名彰顯為聖。

6． 我哋點樣做就係尊上帝嘅名為聖？

⁶ 自古以來，耶和華嘅僕人一直有榮幸尊佢嘅名為聖。當然，無論我哋做乜嘢都唔能够令上帝嘅名更加神聖，因為上帝嘅名係絶對神聖嘅。噉我哋點樣做就係尊上帝嘅名為聖呢？以賽亞話：“你哋應該尊萬軍之主耶和華為聖”。講到自己嘅子民，耶和華話：“佢哋都要尊我嘅名為聖……並且敬畏以色列嘅上帝。”（以賽亞書8:13；29:23）所以，我哋尊上帝嘅名為聖嘅話，就會承認唯有上帝嘅名係至高無上嘅，亦都會尊重呢個名所代表嘅一切，仲會幫助其他人尊上帝嘅名為聖。如果我哋承認耶和華係統治者，全心服從佢，就表明自己真係敬畏上帝，尊崇佢嘅名嘞。（箴言3:1；啟示錄4:11）

7,8． （甲）上帝嘅僕人點樣先至能够成為上帝名下嘅子民？（乙）我哋接落嚟會睇吓邊啲内容呢？

⁷ 從19世紀70年代開始，上帝嘅現代僕人就一直喺佢哋嘅出版物裏面使用上帝嘅名。例如，英語版《錫安嘅守望台》1879年8月刊同埋同一年出版嘅詩歌集《新婦之歌》（英語），都提到上帝嘅名耶和華，但噉樣做仲未够。我哋要知道，可以成為上帝名下嘅子民係莫大嘅榮幸。睇嚟，上帝要佢嘅僕人先符合一啲條件，然後至會俾佢哋採用一個包含上帝聖名嘅名稱。既然係噉，耶和華點樣幫助早期嘅聖經研究者做好準備，成為佢名下嘅子民呢？

⁸ 回顧19世紀末到20世紀初嘅歷史，我哋可以睇出耶和華點樣幫助佢嘅子民更加清楚理解同佢嘅名有關嘅重要真理。等我哋講吓其中三點。

9,10． （甲）點解早期嘅《守望台》文章經常將注意力放喺耶穌身上？（乙）自從1919年以來有乜嘢改變？結果點樣？（另見附欄“《守望台》顯揚上帝嘅名”）

⁹ 第一，耶和華嘅僕人對上帝嘅名嘅重要性有咗正確嘅睇法。早期忠心嘅聖經研究者以為，基督所獻嘅贖價係聖經嘅主要教義。所以，嗰時嘅《守望台》往往將注意力放喺耶穌身上。例如，第一年嘅《守望台》提到“耶穌”呢個名嘅次數比“耶和華”多好多，大概係十比一。《守望台》1976年9月15日刊指出，早期嘅聖經研究者“過度重視”耶穌。不過後來耶和華幫助佢哋睇出，聖經非常重視上帝嘅名。聖經研究者跟住點樣做呢？同一篇《守望台》文章話，從1919年起，“佢哋更加尊崇彌賽亞嘅天父耶和華”。1919年之後嘅十年期間，《守望台》提到上帝嘅名超過6500次。

¹⁰ 我哋嘅弟兄都尊崇耶和華呢個名，表明佢哋愛上帝嘅名。佢哋就好似古代嘅摩西噉樣，開始向人“宣告耶和華嘅名”。（申命記32:3；詩篇34:3）耶和華留意到佢嘅子民為咗佢嘅名所顯嘅愛心，就恩待佢哋，好似聖經講嘅噉樣。（詩篇119:132；希伯來書6:10）

11,12． （甲）1919年之後冇幾耐，上帝組織嘅出版物喺内容方面有乜嘢改變？（乙）耶和華不斷提醒佢嘅僕人要點樣做？點解呢？

¹¹ 第二，真基督徒對上帝所委派嘅工作有咗正確嘅理解。1919年之後冇幾耐，帶頭嘅受膏弟兄仔細查考以賽亞嘅預言。由嗰時起，上帝組織出版嘅書刊開始將焦點更加集中喺傳道工作上。點解話，呢種調整係“喺適當嘅時候”分發嘅食物呢？（馬太福音24:45）

¹² 以賽亞記述耶和華嘅話：“你哋係我嘅見證人，係我揀選嘅僕人”。（請讀以賽亞書43:10-12）1919年之前，《守望台》從來都冇仔細分析過呢幾節經文。1919年之後冇幾耐，上帝組織嘅出版物開始探討上面提到嘅經文，鼓勵所有受膏基督徒為耶和華作見證，因為呢個係耶和華委派俾佢哋嘅工作。事實上，從1925年到1931年，就有57期《守望台》分析過以賽亞書43章，而每一期都講以賽亞嘅話所指嘅係真基督徒。好明顯，喺嗰幾年期間，耶和華不斷提醒佢嘅僕人，要執行佢交託俾佢哋嘅工作。點解呢？係為咗等佢哋“先受試驗，睇吓係咪適合”。（提摩太前書3:10）聖經研究者一定要用行動證明自己真係為耶和華作見證，然後先至有資格成為上帝名下嘅子民。（路加福音24:47,48）

13． 聖經點樣將至為重要嘅真理顯示出嚟？

¹³ 第三，耶和華嘅子民慢慢明白尊上帝嘅名為聖非常重要。上世紀20年代，佢哋睇出上帝嘅名彰顯為聖比乜嘢都重要。聖經點樣將呢個至為重要嘅真理顯示出嚟呢？請睇吓以下兩個例子。上帝救以色列人離開埃及嘅主要原因係乜嘢呢？耶和華話：“使我嘅名傳遍全地。”（出埃及記9:16）以色列人多次反叛耶和華，點解耶和華依然向佢哋大顯慈悲呢？耶和華講明原因：“免得我嘅名喺佢哋所住嘅列國眼前被褻瀆”。（以西結書20:8-10）聖經研究者從呢兩個例子同其他聖經記載學到乜嘢呢？

14． （甲）到咗上個世紀20年代末，上帝嘅子民領悟到乜嘢？（乙）聖經研究者深入理解呢點之後，對傳道工作有乜嘢睇法呢？（另見附欄“要去傳道嘅一個重要原因”）

¹⁴ 大約2700年前，以賽亞談及耶和華，話：“你帶領你嘅子民，為你自己建立美名。”（以賽亞書63:14）到咗上個世紀20年代末，上帝嘅子民先至領悟呢句話嘅含意。佢哋明白最重要嘅係尊耶和華嘅名為聖，而唔係自己得救。（以賽亞書37:20；以西結書38:23）1929年出版嘅《預言》（英語）一書扼要噉指出：“對天地衆生嚟講，耶和華嘅名彰顯為聖係最重要嘅。”聖經研究者明白呢點之後，就更加努力為耶和華作見證，免得佢嘅聖名受到詆毁。

15． （甲）到咗上個世紀30年代，我哋嘅弟兄對乜嘢事有咗正確嘅睇法？（乙）時候到咗，耶和華會點樣做呢？

¹⁵ 到咗上世紀30年代初，我哋嘅弟兄對上帝嘅名嘅重要性已經有咗正確嘅睇法，對上帝所委派嘅工作亦都有咗更清晰嘅理解，而且深刻領悟到上帝嘅名彰顯為聖比乜嘢都重要。而家，時候到嘞，耶和華要使佢嘅僕人稱為佢名下嘅子民，呢個係莫大嘅殊榮！事情嘅經過係點樣嘅呢？等我哋嚟回顧一下歷史。

16． （甲）耶和華點樣彰顯自己嘅名？（乙）古代邊一群人最先成為上帝名下嘅子民？

¹⁶ 耶和華點樣彰顯自己嘅名呢？一個重要嘅方法係，揀選一群人歸於佢名下，做佢嘅子民。從公元前1513年起，以色列民族就代表耶和華，佢哋係耶和華嘅子民。（以賽亞書43:12）以色列人雖然同上帝立咗約，但係冇謹守呢個約。到咗公元33年，佢哋失去咗同上帝嘅寶貴關係。冇幾耐，耶和華轉而“眷顧外邦人，從佢哋當中選出一群歸佢名下嘅子民”。（使徒行傳15:14）呢群蒙揀選嘅人嚟自唔同嘅國族，全部都係基督嘅受膏門徒，稱為“上帝嘅以色列”。（加拉太書6:16）

17． 撒但嘅乜嘢陰謀得逞？

¹⁷ 公元44年前後，耶穌嘅門徒“蒙上帝指引稱為基督徒”。（使徒行傳11:26）一開始，“基督徒”呢個獨特嘅名稱，指嘅係名副其實嘅基督徒。（彼得前書4:16）但就好似小麥同毒麥嘅比喻講嘅噉，撒但企圖以假亂真，佢嘅陰謀得逞，令到“基督徒”呢個名稱亦都包括埋嗰啲有名無實嘅基督徒。結果，有千幾年嘅時間，真假基督徒好難分辨，直到1914年收割時期開始之後，呢種情況先至有所改變。點解呢？因為天使開始將真基督徒同假基督徒分開。（馬太福音13:30,39-41）

18． 我哋嘅弟兄點樣睇出需要一個新名稱？

¹⁸ 忠信嘅奴隸喺1919年受主人委派。之後，耶和華幫助佢嘅子民明白，佢哋受託要執行嘅任務係乜嘢。佢哋開始逐家逐户傳道，好快就睇出呢件工作使佢哋同有名無實嘅基督徒區分開嚟。過咗冇幾耐，佢哋就意識到“聖經研究者”呢個名稱唔够貼切，因為佢哋最重要嘅工作係要為上帝作見證，尊崇同埋顯揚上帝嘅名，而唔係單單研究聖經。所以，乜嘢名稱先至同佢哋所做嘅工作相符呢？1931年，答案就揭曉嘞。

19,20． （甲）1931年嘅大會提出乜嘢振奮人心嘅決議？（乙）對於新名稱，我哋嘅弟兄有乜嘢反應呢？

¹⁹ 1931年7月，大約有1萬5000個聖經研究者嚟到美國俄亥俄州嘅哥倫布市參加大會，睇到節目表嘅封面上面印住兩個特别大嘅英文字母“JW”。呢個係乜嘢意思呢？大家都喺度估呢兩個字母代表乜嘢。7月26日星期日，盧述福弟兄向在場嘅所有人提出決議，其中有句話噉講：“我哋決定採用‘耶和華見證人’呢個名稱，亦都希望其他人用呢個名稱嚟稱呼我哋。”全場聽衆終於明白，“JW”原來就係代表“耶和華見證人”，呢個名稱取自以賽亞書43:10。

²⁰ 聽衆都大聲贊同呢個決議，跟住全場掌聲雷動，持續不斷。通過電台廣播，喺地球另一邊嘅聖經研究者亦都可以感受到哥倫布大會嘅熱烈氣氛。喺澳大利亞嘅歐内斯特·巴伯同太太内奧米回憶話：“聽到美國傳過嚟嘅熱烈掌聲，墨爾本嘅弟兄激動到跳起嚟，亦都跟住佢哋不斷鼓掌。當時嘅情景真係令我哋畢生難忘。”a

21． 新名稱對傳道工作起咗乜嘢作用？

²¹ 上帝嘅僕人採用咗“耶和華見證人”呢個取自聖經嘅名稱，就更加落力傳講好消息。美國一對先驅夫婦愛德華·格蘭姆斯同太太潔西，參加咗1931年喺哥倫布市舉行嘅大會。佢哋話：“我哋去參加大會，出發嗰陣仲係聖經研究者，返嚟嗰時就已經係耶和華見證人嘞。有咗呢個名稱，我哋就更加能够顯揚上帝嘅名，真係好開心。”大會之後，有啲耶和華見證人用一個新方法嚟宣揚上帝嘅名。佢哋探訪住户嗰時，遞俾對方一張卡片，上面寫住：“我係個耶和華見證人，嚟宣揚耶和華上帝嘅王國。”上帝嘅子民覺得好自豪，因為佢哋嘅名稱包含上帝嘅名“耶和華”。佢哋已經準備好將上帝嘅名嘅含意傳遍四方。（以賽亞書12:4）

22． 有乜嘢可以表明耶和華嘅子民具有獨特嘅身份？

²² 耶和華指引受膏嘅弟兄採用“耶和華見證人”呢個獨特嘅名稱，到而家已經幾十年嘞。咁多年來，撒但企圖令人認唔出上帝嘅子民，佢有冇成功呢？撒但亦都設法令我哋同世上嘅宗教混為一體，佢有冇得逞呢？當然冇。作為上帝嘅見證人，我哋呢個獨特嘅身份比以往任何時候都更加鮮明。（請讀彌迦書4:5；瑪拉基書3:18）我哋嘅身份同上帝嘅名係密不可分嘅。今日邊個傳講上帝嘅名，其他人就好快可以睇出佢係個耶和華見證人。正確嘅宗教已經堅立，“凌駕群峰”，冇俾好似群山一樣嘅各種錯誤宗教遮住。（以賽亞書2:2）今日，耶和華所悦納嘅宗教同佢嘅聖名確實大受顯揚。

23． 詩篇121:5話耶和華會點樣做，令我哋深受鼓舞呢？

²³ 無論而家定係將來，耶和華都會保護我哋，幫助我哋能够抵抗撒但嘅攻擊，知道呢一點幾咁令人鼓舞！（詩篇121:5）詩篇執筆者嘅話表達咗我哋嘅心聲，佢話：“以耶和華為上帝嘅國家幾咁有福！蒙上帝揀選為産業嘅民族幾咁有福！”（詩篇33:12）