上帝嘅王國鏟除仇敵

1,2．（甲）乜嘢證據表明我哋嘅君王自從1914年以來一直施行統治？（乙）呢一章會討論乜嘢？

回顧上帝王國喺仇敵當中所取得嘅成就，真係强化人心。（詩篇110:2）我哋嘅君王興起咗一支甘心樂意嘅傳道大軍，而且喺屬靈同道德方面熬煉佢哋，使佢哋得以潔淨。今日，雖然王國嘅仇敵千方百計要分裂我哋，但係我哋依然能够享有一個團結嘅國際弟兄團體。我哋已經分析過好多王國嘅成就，呢一切充分證明，我哋嘅君王自從1914年以來已經喺王國嘅仇敵當中施行統治。

² 喺不久嘅將來，王國會有更多令人驚歎嘅成就。王國會“來臨”，將仇敵“打碎滅絶”。（馬太福音6:10；但以理書2:44）但係喺呢件事發生之前，仲會有其他大事發生。係乜嘢大事呢？有幾個聖經預言可以解答呢個問題。等我哋嚟分析呢啲預言，睇吓我哋前頭仲有乜嘢事會發生。

 3．首先發生嘅係乜嘢事？

³ 宣告和平 使徒保羅寫俾帖撒羅尼迦會衆嘅信，講到第一件我哋正熱切期待嘅事。（請讀帖撒羅尼迦前書5:2,3）保羅喺信所講嘅“耶和華嘅日子”，將會喺“大巴比倫”受到攻擊嗰時開始。（啟示錄17:5）但係喺耶和華嘅日子開始之前，列國會宣告：“和平安全嘞”。呢個可能係單獨嘅一個宣布，亦都可能係一連串嘅特别聲明。世上嘅宗教領袖會唔會參與呢件事呢？既然佢哋屬於呢個世界，好可能都會同列國一齊宣告“平安無事喇！”（耶利米書6:14；23:16,17；啟示錄17:1,2）呢個和平安全嘅宣告，就係耶和華嘅大日子馬上會開始嘅標誌。上帝王國嘅仇敵“一定無法逃脱”。

 4．保羅預告和平安全嘅宣告將會發出。明白呢個預言嘅意義，對我哋有乜嘢益處呢？

⁴ 明白呢個預言嘅意義，對我哋有乜嘢益處？保羅話：“你哋唔係喺黑暗當中，所以嗰個日子唔會忽然臨到你哋，好似人將賊捉住一樣”。（帖撒羅尼迦前書5:4）同世人唔同，我哋清楚知道呢個世界嘅結局會係點樣嘅。呢個關於和平安全嘅預言具體會點樣應驗呢？我哋一定要耐心等待，仔細留意世界嘅形勢會點樣發展落去。所以，我哋“要時刻警醒，保持清醒”。（帖撒羅尼迦前書5:6；西番雅書3:8）

 5．乜嘢事件會成為“大患難”嘅第一幕？

⁵ 宗教受到攻擊 保羅講過：“人正講緊‘和平安全嘞’嘅時候，突如其來嘅毁滅就即時臨到佢哋”。就好似閃電過後馬上會聽到雷聲一樣，一宣告“和平安全嘞”，即時就會發生“突如其來嘅毁滅”。乜嘢會被毁滅呢？首先係“大巴比倫”，又稱為“娼妓”，即係世上所有錯誤嘅宗教。（啟示錄17:5,6,15）假基督教同其他所有錯誤宗教嘅毁滅成為“大患難”嘅第一幕。（馬太福音24:21；帖撒羅尼迦後書2:8）呢件事會令好多人都覺得非常驚訝。點解呢？因為喺呢件事發生之前，娼妓以為自己係一個“永遠唔會哀慟”嘅“女王”。但係佢點都估唔到自己會突然間被鏟除，快到好似“喺一日之内”噉。（啟示錄18:7,8）

 6．邊個會攻擊“大巴比倫”？

⁶ 邊個會攻擊“大巴比倫”呢？聖經話俾我哋知，係有“十隻角”嘅“野獸”。我哋從啟示錄睇出，呢隻野獸就係聯合國。十隻角象徵當今世上所有支持呢隻“鮮紅色嘅野獸”嘅政治勢力。（啟示錄17:3,5,11,12）呢場攻擊有幾猛烈呢？聯合國嘅成員國會掠奪娼妓嘅財富，將佢吞滅，“用火將佢完全燒毁”。（請讀啟示錄17:16）a

 7．耶穌喺馬太福音24:21,22所講嘅話點樣喺公元1世紀應驗？將來又會點樣應驗？

⁷ 縮短嗰段日子 我哋嘅君王透露，喺大患難期間嘅呢個時刻會有乜嘢事發生。耶穌話：“為咗蒙揀選嘅人，嗰段日子將會縮短。”（請讀馬太福音24:21,22）耶穌嘅話喺公元66年得到小規模嘅應驗，當時耶和華“縮短”咗羅馬軍隊攻擊耶路撒冷嘅時間。（馬可福音13:20）因為噉，耶路撒冷同猶地亞嘅基督徒就可以得救。噉喺即將嚟到嘅大患難期間，全球各地會發生乜嘢事呢？耶和華會通過我哋嘅君王縮短聯合國攻擊宗教嘅時間。噉樣，正確宗教就唔會同錯誤宗教一齊被毁滅。所有錯誤宗教將會被鏟除，只有正確嘅宗教可以存留。（詩篇96:5）等我哋嚟睇吓，喺大患難嘅呢個階段結束之後，仲會有乜嘢事發生？

8,9．耶穌提到嘅奇異景象可能係乜嘢意思？世人睇到呢啲事會有乜嘢反應？

⁸ 耶穌喺關於最後日子嘅預言指出，哈米吉多頓大戰爆發之前會有幾件大事發生。我哋會先考慮兩件喺馬太福音、馬可福音同路加福音都有提及嘅事。（請讀馬太福音24:29-31；馬可福音13:23-27；路加福音21:25-28）

⁹ 天上出現奇異嘅景象 耶穌預告話：“太陽就要變黑，月亮亦唔放光，星辰從天上墜落”。到時，人唔會再向宗教領袖尋求指引，亦都唔會再認為佢哋係屬靈亮光嘅來源。耶穌嘅意思係咪亦都表明天上會出現超自然嘅景象呢？有可能。（以賽亞書13:9-11；約珥書2:1,30,31）世人睇到呢啲事會有乜嘢反應呢？佢哋會因為“不知所措”而感到“痛苦不堪”。（路加福音21:25；西番雅書1:17）冇錯，上帝王國嘅仇敵，上至君王下至奴隸都會感到“驚恐，諗到世上要發生嘅事就頭暈目眩”，要揾地方躲藏。但係，佢哋發現根本冇一個安全嘅地方，可以躲避我哋君王嘅憤怒。（路加福音21:26；23:30；啟示錄6:15-17）

10．耶穌會宣布乜嘢判決？對於呢個判決，支持同反對上帝王國嘅人分别有乜嘢反應？

¹⁰ 宣布判決 之後，上帝王國嘅所有仇敵就要被迫面對一件會令佢哋更加苦惱嘅事。耶穌話：“到時，人必睇見人子喺雲中來臨，大有力量同榮耀。”（馬可福音13:26）耶穌用呢個超自然嘅方式顯示力量，表明佢已經嚟到，要宣布判決。關於呢個判決，耶穌喺同一個關於末世嘅預言講到綿羊同山羊嘅比喻，透露咗更多同呢個判決有關嘅細節。（請讀馬太福音25:31-33,46）忠貞支持上帝王國嘅人會被判定為“綿羊”，佢哋會“挺身昂首”，因為知道自己“好快就會得救嘞”。（路加福音21:28）而嗰啲反對上帝王國嘅人會被判定為“山羊”，佢哋會“悲慟捶胸”，因為知道自己會“永遠被剪除”。（馬太福音24:30；啟示錄1:7）

11．我哋分析將要發生嘅事嗰陣，需要謹記乜嘢？

¹¹ 耶穌向“所有國族”宣布判決之後，仲有一啲大事會喺哈米吉多頓大戰爆發之前發生。（馬太福音25:32）我哋會討論吓兩件事：歌革嘅攻擊；將受膏基督徒聚集到天上。當分析呢兩件事嘅時候，我哋需要謹記，上帝嘅話語並冇透露呢兩件事發生嘅確切時間。其實，呢兩件事好可能會有一段時間同時發生。

12．撒但會點樣全力發動攻擊，對抗上帝嘅王國？

¹² 全力發動攻擊 瑪歌革地嘅歌革會攻擊地上嘅受膏基督徒同埋另外嘅綿羊。（請讀以西結書38:2,11）呢場對抗已經施行統治嘅上帝王國嘅攻擊會係最後一次。撒但被逐出天上以來，一直都同地上剩餘嘅受膏基督徒作戰。（啟示錄12:7-9,17）自從受膏基督徒開始被聚集到復興嘅基督徒會衆，撒但更加想盡辦法阻止佢哋喺屬靈方面蓬勃發展，不過佢並冇得逞。（馬太福音13:30）呢個時候，錯誤嘅宗教組織已經唔存在，上帝嘅子民就好似住喺“冇城牆，冇門冇閂”保護嘅地方一樣。撒但以為呢個係大好時機，於是煽動瑪歌革地嘅歌革，即係地上嘅政府，全力攻擊支持上帝王國嘅人。

13．耶和華會點樣解救佢地上嘅忠僕？

¹³ 跟住會有乜嘢事發生呢？關於歌革，以西結預言話：“你必從你嘅地方，從北方嘅極處而嚟。你率領好多民族，佢哋都騎住馬，成為一支人數衆多嘅大軍。你會嚟攻擊我嘅子民以色列人，好似密雲遮蓋地面。”（以西結書38:15,16）對於呢場睇嚟勢不可擋嘅攻擊，耶和華會採取乜嘢行動呢？耶和華話：“我嘅烈怒就要爆發……我必呼喚刀劍攻擊佢。”（以西結書38:18,21；請讀撒迦利亞書2:8）耶和華會發動哈米吉多頓大戰，解救佢地上嘅忠僕。

14,15．喺撒但全力發動攻擊之後，會發生乜嘢事？

¹⁴ 哈米吉多頓大戰期間，耶和華會點樣保護佢嘅子民呢？討論呢個問題之前，我哋先嚟睇吓另一件大事。呢件事會喺撒但全力發動攻擊之後，耶和華發動哈米吉多頓大戰解救佢嘅忠僕之前嘅某個時候發生。正如11段提到嘅一樣，呢件事就係將地上嘅受膏基督徒聚集到天上。

¹⁵ 將受膏基督徒聚集到天上 馬太同馬可都記錄咗，耶穌指出哈米吉多頓大戰爆發之前會發生一連串嘅事，包括同“蒙揀選嘅人”即係受膏基督徒有關嘅事。（見第7段）耶穌講到自己身為君王會做嘅事，話：“到時佢必差天使從四方，從地極到天邊，將蒙揀選嘅人聚集起嚟。”（馬可福音13:27；馬太福音24:31）耶穌喺呢節經文所講嘅“聚集”係指乜嘢呢？佢所指嘅唔係為地上嘅受膏基督徒最後蓋印嘅事，因為最後蓋印會發生喺大患難開始之前。（啟示錄7:1-3）其實耶穌所指嘅係一件會喺大患難期間發生嘅事。所以，顯然喺撒但向上帝子民全力發動攻擊之後嘅某個時候，仍然喺地上嘅受膏基督徒會被聚集到天上。

16．復活咗嘅受膏基督徒會點樣參與哈米吉多頓大戰？

¹⁶ 將地上嘅受膏基督徒聚集到天上呢件事，同跟住會爆發嘅哈米吉多頓大戰有乜嘢關係呢？聖經透露，14萬4000位同基督一齊作王嘅受膏基督徒會喺天上得到權柄，同基督一齊用毁滅嘅“鐵杖”對付所有上帝王國嘅敵人。（啟示錄2:26,27）從呢一點可以睇出，上帝嘅戰爭哈米吉多頓大戰開始之前，所有嘅受膏基督徒已經喺天上。當“人數衆多嘅大軍”向住自己嘅獵物——耶和華嘅子民逐步逼近嘅時候，復活咗嘅受膏基督徒會同大能嘅天使一齊跟隨戰無不勝嘅君王耶穌同敵人展開決戰。（以西結書38:15）呢場激烈嘅戰鬥開始嗰時，哈米吉多頓大戰就爆發嘞！（啟示錄16:16）

17．哈米吉多頓大戰期間，被判定為“山羊”嘅人會有乜嘢下場？

¹⁷ 執行判決 哈米吉多頓大戰係大患難嘅結局。呢個時候，耶穌仲有一個任務要執行。佢唔單止係“所有國族”嘅審判官，到時佢亦都會以行刑官嘅身份對嗰啲之前已經被判定為“山羊”嘅人執行判決。（馬太福音25:32,33）我哋嘅君王會用“一把鋒利嘅長劍……打擊列國”。冇錯，所有被判定為“山羊”嘅人，上至“君王”下至“奴隸”，到時都會“永遠被剪除”。（啟示錄19:15,18；馬太福音25:46）

18．（甲）對於被判定為“綿羊”嘅人嚟講，形勢點樣逆轉過嚟？（乙）耶穌點樣戰勝仇敵？

¹⁸ 對於被耶穌判定為“綿羊”嘅人嚟講，形勢發生幾咁大嘅逆轉！呢群睇嚟不堪一擊，好似“綿羊”一樣嘅“大群人”，幾乎俾撒但嘅“山羊”大軍踐踏踩碎。而家佢哋竟然喺敵人嘅攻擊之下存活，而且“從大患難中出嚟”。（啟示錄7:9,14）跟住耶穌會戰勝並且鏟除所有同上帝王國敵對嘅人，之後會將撒但同佢手下嘅邪靈揼落無底深淵。佢哋會被囚禁一千年，停止活動，就好似死去一樣。（請讀啟示錄6:2；20:1-3）

19,20．我哋從以賽亞書26:20同30:21可以學到乜嘢？

¹⁹ 呢啲驚天動地嘅大事發生之前，我哋可以點樣做好準備呢？《守望台》喺好多年前指出：“生還在於服從。”點解噉講呢？我哋喺耶和華對古代被擄去巴比倫嘅猶太人所發出嘅警告可以揾到答案。耶和華預告巴比倫會被征服，噉上帝嘅子民需要點樣做好準備呢？耶和華話：“我嘅子民啊，入去你哋嘅内室，閂埋門啦。要暫時匿藏，直到降怒完畢。”（以賽亞書26:20）請留意，經文當中“入去”、“閂埋”、“匿藏”呢幾個動詞都帶有吩咐嘅口吻，所以呢啲都係命令。聽從呢啲命令嘅猶太人都留喺屋入面，先至可以避開攻入城内嘅士兵。所以，佢哋嘅生還有賴於服從耶和華嘅指示。b

²⁰ 我哋從中可以學到乜嘢？如果我哋想喺將來保全生命，就要好似上帝嘅古代忠僕噉，服從耶和華嘅指示。（以賽亞書30:21）通過會衆，我哋可以得到呢啲指示。所以，我哋對收到嘅指示要培養樂意服從嘅態度。（約翰一書5:3）如果我哋而家就噉樣做，將來就會更容易表現甘心服從嘅態度，可以得到天父耶和華同君王耶穌嘅保護。（西番雅書2:3）因為有上帝嘅保護，我哋可以親自見證上帝嘅王國點樣徹底鏟除仇敵。到時呢一幕，我哋一定永遠都唔會忘記！