“我嘅王國唔屬於呢個世界”

1,2．（甲）乜嘢表明人類世界越來越分裂？（乙）呢篇課文會回答乜嘢問題？

歐洲南部嘅一個姊妹回憶話：“我自細見到嘅都係唔公平嘅事，所以我對自己國家嘅政治制度好反感。我會支持一啲極端嘅思想，而且有好多年我係一個恐怖分子嘅女朋友。”非洲南部嘅一個弟兄以前支持使用暴力，佢話：“我相信我嘅部族係最優越嘅。我加入咗一個政黨，呢個政黨教我哋要用槍矛殺死嗰啲敵對嘅人，即使對方係同部族嘅都唔應該放過。”一個住喺歐洲中部嘅姊妹承認：“我曾經對嗰啲同我唔同國家或者唔同信仰嘅人懷有偏見，甚至憎恨佢哋。”

² 今日，越來越多人有類似嘅諗法。以暴力爭取獨立嘅運動此起彼伏，政治分歧越來越大，好多人對外國人嘅敵意越來越深。正如聖經預言一樣，喺最後嘅日子，大多數人都“唔願意達成協議”。（提摩太後書3:1,3）人類世界越來越分裂，基督徒可以點樣維持團結？喺耶穌嘅日子，好多人喺政治上有分歧。我哋可以學習耶穌點樣面對噉樣嘅情況。呢篇課文會討論三個要點：點解耶穌拒絶參與任何獨立運動？佢點樣表明上帝嘅忠僕唔應該支持任何政治觀點？耶穌點樣教導我哋唔應該對其他人使用暴力？

3,4．（甲）喺耶穌嘅日子，猶太人喺政治上期待有乜嘢事發生？（乙）乜嘢表明耶穌嘅門徒都有同樣嘅諗法？

³ 1世紀有個叫猶大嘅加利利人假冒彌賽亞，誤導咗好多人。猶太歷史家約瑟夫斯話，呢個猶大“煽動同胞造反，指責向羅馬人納税嘅同胞係懦夫”。結果猶大被羅馬人處決。（使徒行傳5:37）耶穌時期有好多猶太人渴望脱離羅馬，爭取獨立。當時有一個叫猶太奮鋭黨嘅極端政治黨派，佢哋有好多成員都追隨加利利人猶大嘅思想，經常喺民衆當中煽動分裂情緒，甚至不惜使用暴力嚟達成目的。

⁴ 大多數猶太人都熱切期待彌賽亞到嚟，以為彌賽亞會將佢哋從羅馬嘅統治解救出嚟，再次使以色列成為一個强大嘅國家。（路加福音2:38；3:15）佢哋相信彌賽亞會喺以色列建立一個王國，噉數百萬分散喺各地嘅猶太人就可以重回故土。有一次，施浸者約翰問耶穌：“你係咪‘嗰位要嚟嘅’呢？定係我哋仲要期待另一位？”（馬太福音11:2,3）約翰可能想知道係咪有另一個人會實現猶太人嘅所有願望。喺去以馬烏斯嘅路上，復活咗嘅耶穌見到兩個門徒喺度討論。佢哋以為耶穌會解放以色列，所以耶穌被處死後，佢哋就覺得希望完全落空。（請讀路加福音24:21）之後冇幾耐，使徒亦都問耶穌：“主啊，你係咪要喺呢個時候為以色列復興王國？”（使徒行傳1:6）

 5．（甲）點解加利利人想耶穌做佢哋嘅王？（乙）耶穌點樣糾正佢哋嘅諗法？

⁵ 因為對彌賽亞有噉樣嘅期望，所以加利利人好想耶穌做佢哋嘅王。佢哋都認為耶穌係最理想嘅領袖：佢口才出衆，能醫治惡疾，有能力餵飽所有飢餓嘅人。耶穌餵飽五千人之後，“知道佢哋要嚟拉住佢，叫佢作王，就再次獨自退到去山上”。（約翰福音6:10-15）第二日，民衆嘅情緒似乎平靜咗落嚟。耶穌就喺加利利海嘅另一邊向群衆解釋，佢嚟地上嘅真正目的，唔係喺物質上而係要喺屬靈上造益呢個國族。佢同佢哋講：“你哋唔好為必壞嘅食物工作，要為長存而帶嚟永生嘅食物工作。”（約翰福音6:25-27）

 6．耶穌點樣表明佢唔想喺地上追求政治權力？（請睇吓課文開頭嘅圖片）

⁶ 耶穌喺犧牲前冇幾耐，留意到一啲門徒期待佢喺耶路撒冷建立一個地上王國。為咗糾正呢種諗法，佢向大家講咗銀元嘅比喻。比喻當中嘅“貴族”指嘅係耶穌自己，佢必須離開一段好長嘅時間。（路加福音19:11-13,15）耶穌亦都向羅馬官員表明佢嘅中立立場。總督本丢·彼拉多擔心耶穌喺自己統治期間會引起政治動亂，所以佢問耶穌：“你係咪猶太人嘅王？”（約翰福音18:33）耶穌回答話：“我嘅王國唔屬於呢個世界。”（約翰福音18:36）耶穌喺地上冇參與政治，因為佢嘅王國係屬於天上嘅。佢同彼拉多講，佢嚟地上嘅目的係“為真理作見證”。（請讀約翰福音18:37）

 7．點解喺政治上完全保持中立可能唔容易？

⁷ 如果我哋好似耶穌一樣清楚知道自己嘅委派，噉我哋喺行動上甚至喺心入面都唔會支持任何政治團體或者政治運動。噉樣做可能唔容易。一個探訪會衆嘅監督話：“我哋地區嘅人變得越來越激進。國家主義情緒越來越高漲，好多人以為喺政治上爭取獨立會改善佢哋嘅生活。值得慶幸嘅係，真基督徒專注於傳講王國嘅好消息，所以弟兄姊妹之間可以維繫團結和睦嘅關係。佢哋仰望上帝解決唔公平嘅事同所有難題。”

8．1世紀嘅猶太人要承受乜嘢重擔？請舉例。

⁸ 人見到周圍有好多唔公正嘅事，往往就想通過參與政治嚟解決問題。喺耶穌嘅時代，徵税係一個熱門嘅政治話題。羅馬政府為咗得到更多税收，就要求猶太人登記户籍，所以加利利人猶大發動叛亂。羅馬統治之下嘅人，包括當時嘅猶太人，必須繳納好多税款，例如財産税、土地税同房屋税。收税人嘅腐敗使納税人嘅負擔變得更加沉重。收税人向政府官員購買職位，使自己獲取更多利益。耶利哥城嘅税務長撒該就係通過敲詐民衆而致富嘅。（路加福音19:2,8）而佢只不過係其中一個典型嘅例子。

9,10．（甲）反對者點樣試圖誘使耶穌捲入政治？（乙）我哋從耶穌嘅回答學到乜嘢？（請睇吓課文開頭嘅圖片）

⁹ 反對者企圖利用納税問題嚟捉耶穌嘅把柄。佢哋提出同“人頭税”有關嘅問題，即係受羅馬統治嘅人都要交納嘅一銀元。（請讀馬太福音22:16-18）猶太人唔想受羅馬人統治，所以特别憎恨呢項税收。向耶穌提出呢個問題嘅希律黨徒試圖誘使耶穌譴責呢項税收，然後佢哋就可以指控耶穌煽動叛亂。但如果耶穌話納税係必要嘅，噉佢就會失去群衆嘅支持。

¹⁰ 耶穌喺納税嘅問題上嚴守中立，佢話“凱撒之物要還俾凱撒，上帝之物要還俾上帝”。（馬太福音22:21）當然，耶穌知道收税人貪污腐敗嘅情況喺當時好普遍，不過佢關注嘅始終係同上帝王國有關嘅事，因為只有上帝嘅王國先至可以真正解決人類嘅所有難題。耶穌為我哋立下榜樣。無論理由睇嚟幾咁正當，我哋都唔應該參與政治紛爭。基督徒追求上帝嘅王國及其正義，唔會對政治上某啲唔公正嘅做法持有强烈嘅意見或者公然反對。（馬太福音6:33）

11．我哋可以點樣用正確嘅方式滿足自己對正義嘅渴求？

¹¹ 好多耶和華見證人都成功撇棄咗以往極端嘅政治觀念。英國嘅一位姊妹話：“喺大學上完社會學課程之後，我嘅思想變得好偏激。我想為黑人爭取利益，因為我哋受到太多唔公平嘅對待。雖然我擅長辯論，但就算我駁倒其他人都仲係會有挫敗感。因為我冇意識到，想種族平等，就一定要徹底消除人内心嘅偏見。當我學習聖經之後就明白到，首先要改變嘅係我自己嘅内心。其實，一直以來耐心噉幫助我改變嘅係一個白人姊妹。而家我喺手語會衆做先驅，繼續學習點樣向各種各樣嘅人傳道。”

12．耶穌提醒門徒遠離邊啲人嘅“酵”？

¹² 喺耶穌嘅日子，宗教領袖經常參與政治。《基督時代嘅巴勒斯坦生活》（英語）一書指出，“猶太人嘅宗教派别多多少少都係按佢哋所支持嘅政治黨派而劃分嘅”。所以，耶穌提醒佢嘅門徒“要謹慎，小心法利賽派嘅酵同希律嘅酵”。（馬可福音8:15）耶穌提到嘅“希律”，可能係指擁護希律嘅猶太人。喺政治上，法利賽派支持猶太人獨立。馬太嘅記載顯示，耶穌喺呢次談話中亦都提到撒都該派。撒都該派想維持現狀，佢哋嘅好多成員喺羅馬統治下享有唔少政治權力。耶穌特别提醒門徒要遠離呢三個派别嘅酵，即係佢哋嘅教義。（馬太福音16:6,12）有意思嘅係，耶穌呢番話係喺民衆叫佢作王之後冇幾耐講嘅。

13,14．（甲）政治同宗教勾結點樣引發暴力同唔公正嘅事？（乙）點解我哋即使受到唔公正嘅對待都唔應該通過暴力嚟解決問題？（請睇吓課文開頭嘅圖片）

¹³ 宗教同政治互相勾結往往會引發暴力。耶穌教導門徒，喺呢啲情況下一定要保持中立。呢個都係祭司長同法利賽派想殺死耶穌嘅原因之一。佢哋覺得耶穌威脅到佢哋嘅政治同宗教地位，所以將耶穌視為敵人。佢哋話：“如果由得佢噉樣，人人都會信從佢，羅馬人就會嚟奪取我哋嘅聖地，除滅我哋嘅民族嘞。”（約翰福音11:48）於是，大祭司該亞法帶頭策劃殺死耶穌。（約翰福音11:49-53；18:14）

¹⁴ 該亞法等到晚黑先派士兵逮捕耶穌。耶穌知道佢哋嘅陰謀，所以喺當晚就吩咐使徒佩上劍。兩把劍足以幫助使徒學到一個重要嘅教訓。（路加福音22:36-38）喺嗰晚，一班暴徒嚟捉耶穌嘅時候，彼得對呢件唔公正嘅事感到好憤怒，就攞劍斬傷其中一個人。（約翰福音18:10）不過，耶穌同彼得講：“將劍收翻原處！凡用劍嘅，都會死喺劍下。”（馬太福音26:52,53）耶穌幫助門徒明白乜嘢重要教訓？就係佢哋唔應該屬於呢個世界，正如耶穌喺嗰晚所禱告嘅一樣。（請讀約翰福音17:16）只有上帝先可以完全解決世上所有唔公正嘅事。

15,16．（甲）上帝嘅話語點樣幫助基督徒避免衝突？（乙）耶和華睇到世人同佢子民有乜嘢差别？

¹⁵ 上文提到嘅歐洲南部嘅姊妹都學到同樣嘅教訓。佢話：“我睇出，暴力唔會帶嚟公正。我見到好多人因為使用暴力而死，亦都有好多人因為暴力而變得憤世嫉俗。我好開心從聖經學到，只有上帝先能够為人類帶嚟真正嘅公正。呢個就係我喺過去25年來一直傳講嘅信息。”非洲南部嘅嗰個弟兄已經將佢嘅槍矛換成“聖靈嘅劍”，即係上帝嘅話語。無論對方屬於邊個部族，佢都向佢哋傳講和平嘅信息。（以弗所書6:17）歐洲中部嘅姊妹成為耶和華見證人之後，同一個佢以前憎恨過嘅種族嘅弟兄結咗婚。呢三個弟兄姊妹都因為渴望效法基督而作出改變。

¹⁶ 呢啲改變真係好重要！聖經將世人比喻為波濤洶湧嘅大海。（以賽亞書17:12；57:20,21；啟示錄13:1）雖然政治問題會激起人嘅情緒、引起分裂、導致暴力事件發生，但係基督徒之間依然能够保持和睦團結。耶和華見到佢嘅子民喺呢個四分五裂嘅世界當中團結一致，一定感到好欣慰。（請讀西番雅書3:17）

17．（甲）我哋可以點樣促進基督徒團結？（乙）下一篇課文會討論乜嘢？

¹⁷ 呢篇課文討論咗我哋可以促進基督徒團結嘅三個方面：（1）我哋相信上帝嘅王國會解決所有唔公正嘅事；（2）我哋喺政治問題上唔會偏袒任何一方；（3）我哋唔會使用暴力。不過，有時我哋嘅團結關係可能會受人嘅偏見所影響。下一篇課文會討論，我哋可以點樣效法1世紀嘅基督徒成功應付呢個問題。