願我哋所有人團結一致

1,2．（甲）耶穌同使徒一齊禱告嗰陣提出乜嘢請求？（乙）點解耶穌咁注重團結？

耶穌喺犧牲前嘅最後一晚，好關心門徒能唔能够團結一致。佢同門徒一齊禱告嘅時候講到，佢希望所有門徒合一，正如佢同佢父親聯合。（請讀約翰福音17:20,21）佢哋嘅團結關係清楚證明，耶穌受耶和華差派，嚟地上執行上帝嘅旨意。愛係真基督徒嘅標誌，有助於佢哋促進團結。（約翰福音13:34,35）

² 耶穌好注重團結。喺最後嘅晚餐期間，佢留意到使徒之間唔係咁團結。佢哋同之前一樣爭論“究竟佢哋邊個係最大嘅”。（路加福音22:24-27；馬可福音9:33,34）另一次，雅各同約翰請求耶穌，俾佢哋喺天上嘅王國坐喺佢旁邊顯要嘅位置。（馬可福音10:35-40）

 3．乜嘢因素妨礙基督嘅門徒保持團結？呢篇課文會討論邊啲問題？

³ 不過，想得到顯赫嘅地位只係妨礙門徒保持團結嘅其中一個因素。當時大多數人由於怨恨同偏見産生分裂，而耶穌嘅門徒都有同樣嘅問題。所以，佢哋需要消除内心嘅偏見。我哋喺呢篇課文會討論以下嘅問題：雖然好多人都懷有偏見，不過耶穌點樣做？佢點樣幫助門徒學識公正待人、促進團結？佢嘅教導點樣幫助我哋保持團結？

 4．耶穌點樣受到歧視？請舉例。

⁴ 耶穌自己本身都受到歧視。當腓力對拿但業講佢揾到彌賽亞嗰陣，拿但業回答話：“拿撒勒會出咩好嘅嘢呢？”（約翰福音1:46）彌迦書5:2預告彌賽亞會喺伯利恆出世。睇嚟，因為拿但業知道呢個預言，又覺得拿撒勒係一個唔顯眼嘅地方，所以佢認為拿撒勒唔可能係彌賽亞嘅家鄉。由於好多猶地亞人認為加利利人低人一等，猶地亞嘅權貴就因為耶穌係加利利人而歧視佢。（約翰福音7:52）而一啲猶太人為咗羞辱耶穌，甚至話佢係撒馬利亞人。（約翰福音8:48）當時嘅撒馬利亞人無論種族定係宗教都同猶太人唔一樣。猶地亞人同加利利人都睇唔起撒馬利亞人，唔想同佢哋來往。（約翰福音4:9）

 5．耶穌嘅門徒點樣受到歧視？

⁵ 猶太領袖同樣鄙視耶穌嘅門徒。法利賽派嘅人將所有冇喺拉比學校受過教育或者唔遵守佢哋傳統嘅人視為可憎同卑微嘅。（使徒行傳4:13）所以喺佢哋眼中，耶穌嘅門徒係“受咀咒嘅”。（約翰福音7:47-49）耶穌同佢嘅門徒受到歧視，歸根究底係因為當時嘅人覺得自己喺宗教、社會地位同種族方面比其他人優越。呢啲觀念亦都影響咗耶穌嘅門徒。佢哋如果想保持團結，就要徹底改變自己嘅思想。

 6．對人嘅偏見點樣影響我哋？請舉例説明。

⁶ 今日，世界充滿歧視同偏見。我哋可能會遭受歧視，亦都可能會歧視其他人。一位澳大利亞嘅先驅姊妹話：“原住民一直以來都受到好多唔公平嘅對待。以前，我越諗呢件事就越憎恨白人，而我自己受過嘅虐待亦都加深咗呢種仇恨。”一個加拿大嘅弟兄承認：“我曾經覺得，講法語嘅人比其他人更加優越，所以好睇唔起講英語嘅人。”

 7．喺耶穌嘅日子，雖然好多人都懷有偏見，不過耶穌點樣做？

⁷ 同耶穌嘅日子一樣，今日好多人内心都有難以消除嘅偏見態度。耶穌當時點樣做呢？第一，佢從來都唔會對人懷有偏見。無論富人窮人，法利賽派人或者撒馬利亞人，收税人抑或罪人，耶穌都樂意向佢哋傳道。第二，耶穌通過言傳身教向門徒表明，佢哋唔應該對人懷有偏見，隨意猜疑其他人。

 8．基督徒嘅團結關係以乜嘢為基礎？請解釋。

⁸ 為咗講明團結關係嘅基礎係乜嘢，耶穌對門徒講：“你哋全部都係弟兄。”（請讀馬太福音23:8,9）點解耶穌話門徒係“弟兄”？其中一個原因係，所有人都係亞當嘅後代。（使徒行傳17:26）另外，耶穌嘅門徒都稱耶和華做天父，所以彼此都係弟兄姊妹。（馬太福音12:50）佢哋都屬於一個用愛心同信心嚟維繫團結嘅屬靈大家庭。所以，使徒將信徒同工視為弟兄姊妹。（羅馬書1:13；彼得前書2:17；約翰一書3:13）a

9,10．（甲）猶太人覺得自己比其他種族嘅人優越，點解呢種諗法係錯嘅？（乙）耶穌點樣表明呢一點？（請睇吓課文開頭嘅圖片）

⁹ 耶穌清楚表明佢嘅門徒都係弟兄姊妹之後，亦都强調噉樣做需要謙卑嘅態度。（請讀馬太福音23:11,12）正如耶穌所講，高傲嘅態度同種族優越感會喺門徒當中引起分裂。猶太人因為自己係亞伯拉罕嘅子孫就覺得自己比其他人更優越。好多猶太人都有呢種根深蒂固嘅觀念，但係施浸者約翰同佢哋講：“上帝有能力從呢啲石頭為亞伯拉罕興起子孫。”（路加福音3:8）

¹⁰ 耶穌認為，人唔應該覺得自己嘅種族比其他人嘅優越。有一次，一個抄經士問耶穌：“邊個係我要愛嘅人呢？”為咗回答呢個問題，耶穌就講咗一個故事。一個猶太人俾强盜打到重傷。有兩個猶太人經過，但係都冇理會佢哋嘅同胞。後來一個撒馬利亞人見到呢個受傷嘅猶太人，就心生憐憫，仁慈噉照顧佢。講完故事之後，耶穌就同抄經士講，佢應該效法呢個好心嘅撒馬利亞人。（路加福音10:25-37）耶穌表示，即使係一個撒馬利亞人都可以教導猶太人點樣真摯關愛其他人。

11．點解基督嘅門徒唔應該對外邦人有偏見？耶穌點樣幫助佢哋明白呢一點？

¹¹ 耶穌喺升天之前吩咐門徒要喺“全猶地亞、撒馬利亞，直到地極”作見證。（使徒行傳1:8）為咗幫助門徒喺廣大嘅地區完成傳道職務，耶穌提醒佢哋要除去驕傲同偏見嘅態度，並留意外邦人嘅好品格。佢稱讚一個非猶太人嘅軍官有出衆嘅信心。（馬太福音8:5-10）耶穌喺家鄉拿撒勒曾經通過撒勒法嘅腓尼基寡婦同叙利亞嘅痲瘋病人乃縵嘅事例，表明耶和華亦都善待外邦人。（路加福音4:25-27）耶穌唔單止向撒馬利亞婦人傳道，亦都為咗其他對真理有興趣嘅撒馬利亞人而喺佢哋嘅一個城鎮停留咗兩日。（約翰福音4:21-24,40）

12,13．（甲）耶穌教導一個撒馬利亞婦人嘅時候，使徒有點樣嘅反應？（請睇吓課文開頭嘅圖片）（乙）乜嘢表明雅各同約翰未完全領會耶穌嘅意思？

¹² 使徒要克服偏見一啲都唔容易。佢哋見到耶穌教導一個撒馬利亞婦人，就感到好驚訝。（約翰福音4:9,27）猶太宗教領袖唔會喺公開場合同女子交談，更何況係一個名聲唔好嘅婦人。當時，使徒勸耶穌快啲食飯，但係耶穌嘅回答表明佢好開心同呢個婦人談論耶和華嘅真理，其實食物並唔係最重要嘅。耶穌清楚知道，天父希望所有人——哪怕係一個撒馬利亞婦人——都認識真理。所以對耶穌嚟講，傳道工作就係佢嘅食物。（約翰福音4:31-34）

¹³ 當時，雅各同約翰喺呢件事上未能完全領會耶穌嘅教導。有一次，耶穌同門徒經過撒馬利亞，想喺當地一個村莊過夜，但撒馬利亞人就拒絶俾佢哋留宿。雅各同約翰好嬲，希望天上降火毁滅整個村莊。結果，佢哋受到耶穌嚴厲責備。（路加福音9:51-56）如果呢件事發生喺雅各同約翰嘅家鄉加利利，佢哋會唔會有同樣嘅反應呢？睇嚟，佢哋咁嬲係因為對撒馬利亞人懷有偏見。後來，使徒約翰向撒馬利亞人傳道嘅時候，好多撒馬利亞人都樂意接受真理。如果約翰諗翻起自己之前幾咁魯莽，一定會感到慚愧。（使徒行傳8:14,25）

14．一個可能因為語言引起嘅問題點樣得到解決？

¹⁴ 公元33年五旬節之後冇幾耐，會衆就因為偏見而發生問題。分配食物嘅時候，講希臘語嘅寡婦俾人忽視。（使徒行傳6:1）呢個問題可能係由於語言歧視而産生嘅。使徒迅速作出調整，委派一啲符合屬靈資格嘅男子分配食物。呢啲男子都有希臘語名字，可以使嗰啲受到忽視嘅寡婦覺得舒服啲。

15．彼得點樣克服偏見？（請睇吓課文開頭嘅圖片）

¹⁵ 公元36年，耶穌嘅門徒開始向其他國族嘅人傳道。在此之前，使徒彼得按照傳統只係同猶太人來往。後來，上帝向彼得清楚表明基督徒唔應該偏心，彼得就向一個叫哥尼流嘅羅馬士兵傳道。（請讀使徒行傳10:28,34,35）之後，彼得同外邦信徒一齊食飯交往。不過多年後，彼得喺安提阿就避開非猶太裔嘅基督徒，唔同佢哋一齊食飯。（加拉太書2:11-14）保羅喺呢件事上責備彼得，而彼得亦都接受咗勸告。我哋點知呢？因為彼得第一次寫信俾小亞細亞嘅猶太裔同外邦基督徒嘅時候，親切噉提到愛整個弟兄團體嘅重要性。（彼得前書1:1；2:17）

16．早期嘅基督徒以乜嘢為人所知？

¹⁶ 耶穌立下榜樣，幫助使徒學識愛“［各種］各樣嘅人”。（約翰福音12:32；提摩太前書4:10）雖然噉樣做需要時間，不過佢哋最終都調整咗自己嘅諗法。早期嘅基督徒以彼此相愛而為人所知。2世紀嘅作家德爾圖良引錄過一啲非基督徒所講嘅話：“［基督徒］彼此相愛……佢哋甚至願意為對方犧牲生命。”早期嘅基督徒都努力穿上“新品格”，用上帝嘅觀點看待所有人。（歌羅西書3:10,11）

17．我哋可以點樣除去内心嘅偏見？請舉例。

¹⁷ 今日，我哋都需要時間除去内心嘅偏見。一個法國姊妹描述自己内心嘅掙扎話：“耶和華已經教導我乜嘢係愛，乜嘢係分享，同埋點樣愛各種各樣嘅人。不過，我而家仲學緊點樣克服對其他人嘅偏見。噉樣做一啲都唔容易，所以我經常為呢件事禱告。”一個西班牙嘅姊妹都有類似嘅感覺，佢話：“我時不時都要克制自己唔好去憎恨某族人。雖然好多時我都可以成功控制自己嘅思想，不過我知道自己都需要繼續努力。我真係好感激耶和華，使我可以屬於佢團結嘅屬靈大家庭！”我哋每個人都應該誠實噉省察自己，好似呢兩個姊妹噉努力克服内心嘅偏見。

18,19．（甲）點解我哋應該接納所有人？（乙）我哋可以點樣做？

¹⁸ 我哋要謹記，自己曾經都係同上帝疏遠嘅“外人”。（以弗所書2:12）不過，耶和華 “用愛嘅繩子”引導我哋嚟到佢身邊。（何西阿書11:4；約翰福音6:44）基督亦都為我哋打開大門，使我哋可以成為上帝大家庭嘅一分子。（請讀羅馬書15:7）雖然我哋唔完美，但係耶穌都樂意接納我哋。所以，我哋根本冇理由排斥任何人！

¹⁹ 隨住呢個邪惡制度嘅終結臨近，人與人之間産生分歧，互相懷有偏見同敵對嘅情況會變得更加嚴重。（加拉太書5:19-21；提摩太後書3:13）不過，身為耶和華嘅僕人，我哋尋求嘅係嚟自上帝嘅智慧。呢種智慧可以幫助我哋消除偏見，促進和睦。（雅各書3:17,18）我哋好開心可以同世界各地嘅人建立友誼，接受唔同嘅文化，甚至學習新語言。我哋噉樣做，平安就會多如河水，正義亦都浩如海浪。（以賽亞書48:17,18）

20．愛可以點樣塑造我哋？

²⁰ 上文提到嘅澳大利亞姊妹睇出，係聖經嘅知識改變咗佢自己。佢話：“真理嘅大門向我敞開。我嘅心同頭腦就好似被重新塑造噉，所有根深蒂固嘅偏見同怨恨都慢慢從内心消失。”嗰位加拿大嘅弟兄話，佢而家意識到“無知往往係種族主義嘅源頭，人嘅素質唔係在於佢哋嘅出生地”。後來，佢仲同一個講英語嘅姊妹結婚！佢哋喺態度上發生咁大嘅轉變，證明基督徒嘅愛的確能够戰勝偏見。呢種愛使我哋團結一致，友誼牢不可破。（歌羅西書3:14）