尊重上帝所賜嘅婚姻安排

1,2． 希伯來書13:4鼓勵我哋點樣做？

我哋每個人都好想榮耀耶和華。耶和華配受榮耀同尊崇，佢承諾會尊重嗰啲尊重佢嘅人。（撒母耳記上2:30；箴言3:9；啟示錄4:11）耶和華亦都希望我哋尊重其他人，例如政府官員。（羅馬書12:10；13:7）而對我哋個人嚟講，尤其要尊重婚姻嘅安排。

² 使徒保羅寫道：“婚姻人人都應該尊重，婚姻之床不容玷污”。（希伯來書13:4）保羅唔係簡單陳述婚姻嘅安排，而係鼓勵每個基督徒要尊重婚姻，將婚姻視為一個寶貴嘅恩賜。呢個係咪你對婚姻嘅睇法呢？如果你已經結咗婚，你對自己嘅婚姻係咪都有同樣嘅睇法？

 3． 關於婚姻，耶穌提出乜嘢重要勸告？（請睇吓課文開頭嘅圖片）

³ 耶穌尊重婚姻嘅安排。如果你同耶穌一樣將婚姻睇得好寶貴，就係跟從佢嘅榜樣嘞。法利賽派嘅人問耶穌對離婚有乜嘢睇法嘅時候，耶穌提到上帝創立人類第一宗婚姻嗰陣所講嘅話。佢話：“所以人要離開父母，二人成為一體”。佢又話：“上帝既然使佢哋同負一軛，人就唔可以分開。”（請讀馬可福音10:2-12；創世記2:24）

 4． 耶和華為婚姻定立乜嘢標準？

⁴ 耶穌承認創立婚姻嘅就係耶和華上帝，而且婚姻應該係恆久不變嘅。上帝冇同亞當夏娃講，夫妻可以離婚。佢喺伊甸園定立一夫一妻嘅婚姻標準，夫妻“二人”應該永遠喺一齊，長相廝守。

 5． 死亡對婚姻有乜嘢影響？

⁵ 亞當犯罪之後好多情況都發生改變。其中之一就係人會死亡，而死亡會影響到婚姻。使徒保羅向基督徒解釋，死亡會終止婚姻關係，而死者嘅配偶就有選擇再婚嘅自由。（羅馬書7:1-3）

 6． 摩西律法點樣反映上帝對婚姻嘅睇法？

⁶ 我哋從上帝賜俾以色列國族嘅律法，可以了解更多關於婚姻嘅細節。喺上帝賜下律法之前，就已經存在一夫多妻嘅習俗。雖然上帝嘅律法容許一個丈夫有多個妻子，但律法亦都保護婦女兒童免受唔公平嘅對待。例如，一個以色列男子娶一個奴隸為妻，之後又娶第二個妻子，呢個男子要同以前一樣為第一個妻子提供食物同衣服，亦都要滿足呢個妻子嘅性需要。上帝嘅要求係，呢個男子要繼續保護同照顧第一個妻子。（出埃及記21:9,10）雖然而家我哋唔須要遵守摩西律法，不過都可以從中睇出耶和華有幾重視婚姻。呢個可以幫助我哋更加尊重婚姻。

7,8． （甲）根據申命記24:1，律法包含邊啲同離婚有關嘅規定？（乙）耶和華對離婚有乜嘢睇法？

⁷ 關於離婚，上帝嘅律法點樣講呢？雖然律法容許人離婚，不過上帝依然好重視婚姻。根據律法，一個以色列男子如果發現妻子“做咗醜事”，就可以同佢離婚。（請讀申命記24:1）雖然律法冇講到“醜事”指嘅係乜嘢，但一定係可恥或嚴重嘅罪行，而唔係輕微嘅小事。（申命記23:14）可惜嘅係，喺耶穌嘅日子，好多猶太人“用各種理由”離婚。（馬太福音19:3）當然，我哋唔想同佢哋有一樣嘅態度。

⁸ 瑪拉基先知透露咗上帝對離婚嘅睇法。喺瑪拉基嘅日子，一個男子可能為咗同一個更年輕嘅異教女子結婚，就詭詐背信，同“年輕時所娶嘅妻子”離婚。瑪拉基描述上帝對呢件事嘅睇法，話：“上帝憎恨離婚。”（瑪拉基書2:14-16）上帝創立婚姻嘅時候就講過，男子要“同妻子廝守，二人成為一體”，呢個睇法自始至終都冇改變。（創世記2:24）耶穌支持天父對婚姻嘅觀點，話：“上帝使佢哋同負一軛，人就唔可以分開。”（馬太福音19:6）

 9． 耶穌喺馬可福音10:11,12所講嘅話係乜嘢意思？

⁹ 有啲人可能會問：“聖經有冇一啲關於離婚同再婚嘅原則，可以俾基督徒參考呢？”耶穌話：“邊個同妻子離婚，另外娶妻，就係通姦，對唔住妻子；婦人同丈夫離婚，另外嫁人，亦都係通姦。”（馬可福音10:11,12；路加福音16:18）顯然，耶穌好尊重婚姻，亦都希望其他人噉樣做。一個人揾藉口同佢忠貞嘅配偶離婚，然後同另一個人結婚，就係通姦。其實，佢哋離婚唔代表兩個人嘅婚姻關係已經終止，因為喺耶和華睇嚟，佢哋依然係“一體”。另外，耶穌話一個男子同佢清白嘅妻子離婚會導致妻子陷入通姦嘅危險。點解會噉？喺嗰個時代，一個女子離婚之後就會失去經濟上嘅支持，無奈之下佢可能會再婚。但係噉樣做，就相當於通姦。

10． 基督徒可以離婚同有自由再婚嘅唯一理由係乜嘢？

¹⁰ 一個人基於乜嘢理由可以終止婚姻關係呢？耶穌話：“我同你哋講，如果唔係因為妻子淫亂，丈夫離婚再娶，就係通姦。”（馬太福音19:9）佢喺登山寶訓亦都提出同樣嘅觀點。（馬太福音5:31,32）耶穌喺兩個場合都提到“淫亂［希臘語詞‘波尼阿’］”。呢個詞嘅意思包括婚姻以外嘅一系列性方面嘅罪，例如通姦、賣淫、未婚性行為、同性戀同埋獸交。如果一個已婚嘅男子犯咗淫亂，噉佢嘅妻子就可以選擇係咪要同佢離婚。如果妻子決定離婚，噉喺上帝眼中，佢哋嘅婚姻就終止嘞。

11． 即使有聖經認可嘅理由，點解有啲人都選擇唔離婚？

¹¹ 值得留意嘅係，耶穌冇講一個人犯淫亂（波尼阿），佢嘅配偶就一定要同佢離婚。例如，就算丈夫犯咗淫亂，妻子可能仲係會選擇維持呢段婚姻。原因可能係，妻子依然愛自己嘅丈夫，願意原諒佢，希望大家一齊努力改善婚姻關係。妻子如果決定離婚，之後亦都冇再婚，可能就會面對某啲難題。佢喺物質同性方面嘅需要可唔可以得到滿足呢？佢會唔會感到孤單呢？佢有冇仔女？離婚嘅話，佢要幫助仔女喺真理中成長會唔會更加困難？（哥林多前書7:14）顯然，清白嘅一方離婚之後都會面對難題。

12,13． （甲）何西阿嘅婚姻出現乜嘢情況？（乙）點解何西阿贖翻歌篾？我哋從佢嘅婚姻學到乜嘢？

¹² 我哋從先知何西阿嘅經歷可以得到啟發。上帝叫何西阿娶一個叫歌篾嘅女子為妻。上帝話歌篾“日後必成淫婦”，又話佢嘅兒女“必從淫亂而生”。後來，“歌篾懷孕，同［何西阿］生咗一個兒子”。（何西阿書1:2,3）不過，之後佢生嘅一個女同一個仔，可能都係佢同其他男人生嘅。雖然歌篾多次通姦，何西阿仲係同佢維持婚姻關係。但係佢最終離開何西阿成為一個奴隸，而何西阿又將佢贖返嚟。（何西阿書3:1,2）耶和華通過何西阿所做嘅表明，佢點樣多次原諒屬靈上通姦嘅以色列人。我哋從中可以學到乜嘢？

¹³ 如果一個基督徒嘅配偶犯咗淫亂，噉呢個基督徒就要面對一個抉擇。耶穌話，清白嘅一方有理由離婚，之後亦都有自由再婚。另一方面，清白嘅配偶亦都可以選擇寬恕，噉樣做並唔係錯嘅。何西阿贖返歌篾，等歌篾返翻自己身邊之後，要求佢唔可以同其他男子發生性關係。雖然何西阿暫時“唔同［歌篾］行房”，但係過咗一段時間之後，佢肯定同歌篾恢復翻夫妻之間嘅性關係。（何西阿書3:3）上帝通過呢件事表明，佢願意接受佢嘅子民返翻自己身邊，並恢復同佢哋嘅關係。（何西阿書1:11；3:3-5）呢個對今日嘅婚姻有乜嘢影響？如果清白嘅配偶決定維持婚姻關係，噉恢復夫妻之間嘅性關係就表明佢已經原諒對方，唔再有符合聖經嘅理由離婚。（哥林多前書7:3,5）之後，佢哋作為夫婦，應該努力反映上帝對婚姻嘅觀點。

14． 根據哥林多前書7:10,11，婚姻可能會出現乜嘢問題？

¹⁴ 所有基督徒都應該效法耶和華同耶穌，盡力尊重婚姻。不過，因為人唔完美，可能有啲人做唔到。（羅馬書7:18-23）公元1世紀，有啲基督徒喺婚姻方面遇到難題。雖然保羅喺信入面提到“妻子唔應該離開丈夫”，不過有時仲係會有噉樣嘅事發生。（請讀哥林多前書7:10,11）

15,16． （甲）即使婚姻出現問題，夫妻雙方都應該努力點樣做？點解？（乙）如果配偶唔係信徒，點樣應用呢個原則？

¹⁵ 保羅冇解釋，一啲夫妻因為乜嘢原因而分開。不過我哋知道，佢哋分開唔係因為夫妻其中一方犯淫亂。保羅話，一個離開丈夫嘅妻子“應該安於現狀，唔再結婚，如果唔係就同丈夫重修舊好”。所以，佢哋喺耶和華眼中仲係夫妻。保羅嘅建議係，如果唔係因為配偶淫亂，噉無論潛在嘅問題係乜嘢，兩個人都應該努力和解。佢哋可以通過會衆嘅長老尋求嚟自聖經嘅幫助。長老唔會偏袒任何一方，而會根據聖經提出勸告。

¹⁶ 如果夫妻當中只有其中一方係按上帝標準生活嘅信徒，噉又應該點做呢？發生問題嘅時候，分居係咪一個正當嘅解決方法呢？上文已經討論過聖經認可嘅離婚理由，不過聖經冇提及過分居嘅理由。保羅話：“任何婦人有丈夫唔信主，但係丈夫肯同佢同住，佢亦唔應該離開丈夫。”（哥林多前書7:12,13）呢個原則喺今日同樣適用。

17,18． 點解有啲基督徒即使婚姻出現難題都依然維持婚姻關係？

¹⁷ 不過，某啲情況可能表明，唔信主嘅丈夫唔肯同妻子同住。可能係丈夫嚴重傷害或虐待妻子，以致妻子覺得自己嘅健康同生命受到威脅。又可能係丈夫唔肯養家，或者嚴重危害妻子嘅屬靈生命。喺呢啲情況下，基督徒妻子可能認為丈夫噉樣做就係唔肯同自己一齊生活，需要同丈夫分居。不過，有啲姊妹面對類似嘅難題就選擇繼續忍耐，努力改善婚姻關係。點解呢？

¹⁸ 喺噉嘅情況下分居，兩個人都仲係夫妻。如果佢哋分開生活，噉兩個人都可能要面對之前所提到嘅難題。使徒保羅提出另一個要維持婚姻關係嘅理由，話：“丈夫雖然唔信主，但因妻子而成聖；妻子雖然唔信主，亦因弟兄而成聖。唔係嘅話，你哋嘅兒女就唔潔淨，但而家佢哋係聖潔嘅。”（哥林多前書7:14）好多忠貞嘅基督徒即使遇到非常艱難嘅情況，都仍然同不信嘅配偶喺一齊。如果佢哋嘅配偶後來成為耶和華見證人，噉佢哋一定會好開心，因為佢哋知道自己付出嘅犧牲都係值得嘅。（請讀哥林多前書7:16；彼得前書3:1,2）

19． 點解好多基督徒享有成功嘅婚姻？

¹⁹ 耶穌就離婚嘅問題提出原則，而使徒保羅就分居嘅問題提出勸告。佢哋都希望上帝嘅忠僕尊重婚姻。今日，世界各地有好多弟兄姊妹都享有成功嘅婚姻。你可以喺自己嘅會衆見到好多幸福嘅基督徒夫婦。喺呢啲家庭當中，弟兄深愛自己嘅妻子，而姊妹亦都深深尊重自己嘅丈夫。我哋好開心見到，千百萬人嘅例子都證明上帝嘅話語係真實嘅：“所以人要離開父母，從此同妻子廝守，二人成為一體。”（以弗所書5:31,33）