你嘅思想受邊個影響？

1,2． （甲）彼得勸耶穌愛惜自己嘅時候，耶穌有乜嘢反應？（請睇吓課文開頭嘅圖片）（乙）點解耶穌有噉樣嘅反應？

耶穌嘅門徒冇辦法相信佢哋所聽到嘅。佢哋期待耶穌重建以色列王國，不過耶穌話自己好快就會受苦同死去。當時冇人出聲，使徒彼得就話：“主啊，你應該愛惜自己，你絶對唔會有呢種下場。”但係，耶穌話：“撒但，退到我後面！你係我嘅絆腳石，因為你所諗嘅，唔係上帝嘅意思，而係人嘅意思。”（馬太福音16:21-23；使徒行傳1:6）

² 通過呢番話，耶穌將源於上帝嘅思想同源於撒但控制嘅呢個世界嘅思想區分開嚟。（約翰一書5:19）彼得表現出呢個世界嘅自私精神，而耶穌知道呢種精神唔係源於天父嘅。佢知道，上帝希望佢鼓起勇氣，做好準備面對將臨嘅痛苦同死亡。耶穌嘅回答清楚表明，佢接受嘅係耶和華嘅思想，堅決拒絶世俗嘅思想。

 3． 點解我哋好容易就會跟從呢個世界嘅思想？

³ 我哋又點樣呢？我哋有上帝嘅思想，抑或有世人嘅思想呢？作為基督徒，我哋努力按照上帝嘅要求行事。不過，我哋嘅思想又點樣呢？我哋有冇使自己嘅思想、觀點同上帝嘅保持一致？噉樣做須要付出好大嘅努力。相反，跟從世人嘅思想就毫不費力，因為周圍都充滿世界嘅精神。（以弗所書2:2）另外，呢個世界嘅人往往鼓吹自私嘅精神，我哋唔小心就會受到影響。我哋唔容易同耶和華嘅思想保持一致，但係就好容易會按照世人嘅方式嚟思考。

 4． （甲）如果我哋任由自己嘅思想俾呢個世界同化，會有乜嘢後果？（乙）呢篇課文會討論乜嘢？

⁴ 如果我哋容許自己嘅思想俾呢個世界同化，我哋就會變得自私同埋鍾意自行判斷是非對錯。（馬可福音7:21,22）所以，我哋要培養上帝嘅思想，而唔係人嘅思想。為咗幫助我哋做到呢一點，呢篇課文會討論吓，點解我哋嘅思想同耶和華嘅保持一致，對我哋嚟講唔係過度嘅限制，而係會使我哋得益，以及點樣可以避免俾呢個世界嘅思想同化。而下一篇課文會分析，我哋點樣可以全心接納耶和華嘅思想，使自己喺唔同嘅問題上都反映出佢嘅觀點。

 5． 點解有啲人唔鍾意俾其他人影響自己嘅諗法？

⁵ 有啲人唔鍾意俾任何人塑造或者影響自己嘅諗法。佢哋會話：“我自己識諗㗎喇。”意思大概係話，佢哋想自己做決定，而且覺得自己有權噉樣做。佢哋唔想俾人控制，亦都唔想放棄自己嘅個性。a

 6． （甲）耶和華俾我哋有自由做乜嘢？（乙）呢種自由係咪毫無限制嘅？

⁶ 可以放心嘅係，我哋同耶和華嘅思想保持一致，唔代表要完全放棄個人嘅諗法或者意見。哥林多後書3:17話：“耶和華嘅靈喺邊度，邊度就有自由。”正如呢節經文所講，我哋有自由培養自己獨特嘅個性。我哋可以有自己嘅喜好，選擇自己感興趣嘅事。因為耶和華將我哋設計成可以噉樣做。不過，我哋唔可以任意運用自己嘅自由。（請讀彼得前書2:16）如果事情涉及到是非對錯，耶和華就希望我哋運用佢嘅話語嚟做決定。噉樣會過度限制我哋，抑或令我哋得益？

7,8． 對我哋嚟講，按照耶和華嘅觀點做事係咪過度嘅限制？請舉例。

⁷ 請睇吓一個例子。父母努力將正確嘅價值觀灌輸俾兒女。佢哋可能教導兒女要誠實、勤勞同埋體恤其他人。呢個唔係過度嘅限制，而係父母為咗兒女喺成年之後可以過好嘅生活，而預先幫助佢哋做好準備。到咗兒女長大成人，離開屋企之後，佢哋就可以自己自由噉做決定嘞。如果佢哋按照父母所教導嘅嚟生活，就會更加識得做明智嘅決定。噉樣，佢哋就可以避免好多難題同煩惱，亦都唔會後悔自己曾經所做嘅決定。

⁸ 耶和華就好似仁愛嘅父母噉，希望自己嘅兒女享有最心滿意足嘅生活。（以賽亞書48:17,18）所以，佢喺道德行為同埋待人接物方面，為我哋提供咗基本嘅原則。佢邀請我哋學習用佢嘅方式去睇問題，同埋按照佢嘅價值觀嚟生活。噉樣唔係過度限制我哋，而係增强、提升同埋擴展我哋嘅思維能力。（詩篇92:5；箴言2:1-5；以賽亞書55:9）我哋仲係可以有自己嘅個人喜好，亦都可以作出令自己高興嘅正確選擇。（詩篇1:2,3）冇錯，我哋有耶和華嘅思想，可以令自己喺好多方面得到益處同滿足感！

9,10． 耶和華嘅思想點樣比世界嘅思想高明？

⁹ 崇拜耶和華嘅人好希望自己嘅思想同耶和華一致嘅另一個原因係，耶和華嘅思想遠遠比呢個世界嘅優越。世人喺道德行為、家庭關係、工作滿意度同埋生活嘅其他方面都提出咗好多建議，但係大部分嘅建議都同耶和華嘅思想有矛盾。例如，呢個世界經常鼓勵人只係追求自己嘅利益，或者鼓勵人將性不道德視為可以接受嘅事，有時建議已婚夫婦為咗自己開心，可以隨便用一啲瑣碎嘅理由分居或離婚。呢啲建議都同聖經嘅原則有抵觸。不過，嚟自呢個世界嘅建議係咪比聖經嘅勸告更實用呢？

¹⁰ 耶穌話：“有智慧嘅行為自然會顯出正義。”（馬太福音11:19）呢個世界喺科技方面取得好大嘅進步，不過就始終冇辦法解決一啲妨礙我哋得到幸福嘅重要問題，例如戰爭、種族歧視同罪行。另外，呢個世界認為性不道德係可以接受嘅事。不過好多人都承認，呢個會破壞家庭，引發健康問題，亦都會造成其他難題。而另一方面，採用上帝觀點嘅基督徒可以有更好嘅家庭關係，保持道德潔淨，同全球嘅弟兄姊妹享有和睦嘅關係。（以賽亞書2:4；使徒行傳10:34,35；哥林多前書6:9-11）呢一切都清楚表明，耶和華嘅思想的確比世界嘅思想高明。

11． 摩西受邊個嘅思想引導？結果點樣？

¹¹ 古代嘅忠僕知道耶和華嘅思想非常高明。雖然摩西“學識埃及人嘅一切智慧”，佢仲係向耶和華尋求“智慧嘅心”。（使徒行傳7:22；詩篇90:12）佢亦都懇求耶和華，話：“求你教我認識你嘅道路”。（出埃及記33:13）喺耶和華思想嘅引導下，摩西有機會參與執行耶和華嘅旨意，亦都被視為信心嘅傑出榜樣。（希伯來書11:24-27）

12． 保羅根據乜嘢嚟推理？

¹² 使徒保羅係一個聰明而且有學問嘅人，佢至少識得講兩種語言。（使徒行傳5:34；21:37,39；22:2,3）不過，喺判斷事情啱定錯嘅時候，佢唔會運用世俗嘅智慧，而係根據聖經嚟推理。（請讀使徒行傳17:2；哥林多前書2:6,7,13）所以，保羅喺傳道工作上取得好大嘅成功，而且有機會享有永恆嘅獎賞。（提摩太後書4:8）

13． 使自己嘅思想同耶和華嘅保持一致，係邊個嘅責任？

¹³ 顯然，上帝嘅思想比呢個世界嘅思想高明得多。我哋按照上帝嘅思想生活，就可以得到最大嘅快樂同成功。不過，耶和華唔會强迫我哋接受佢嘅思想，“忠信睿智嘅奴隸”同長老亦都唔會控制我哋嘅思想。（馬太福音24:45；哥林多後書1:24）每個基督徒都要負起自己嘅責任，使自己嘅思想同上帝嘅一致。我哋點樣先可以做到？

14,15． （甲）沉思乜嘢事有助於我哋用耶和華嘅觀點嚟睇事情？（乙）根據羅馬書12:2，點解我哋唔應該接受呢個世界嘅思想？請舉例。

¹⁴ 羅馬書12:2話：“唔好俾呢個制度同化，要更新思想而改變自己，噉你就可以察驗上帝良善、完美而又蒙佢悦納嘅旨意。”呢啲聖靈啟示嘅話語表明，無論我哋喺學習真理之前思想受過點樣嘅影響，都可以作出調整，使自己嘅思想更接近上帝嘅思想。我哋嘅思想雖然喺某程度上會受遺傳因素同以往嘅經驗所影響，但係可以不斷改變。呢啲改變主要取決於我哋允許乜嘢進入頭腦，以及我哋細心思考嘅係乜嘢。我哋沉思細想耶和華嘅思維模式，就可以睇出佢嘅觀點係正確嘅。噉樣，我哋自然就會希望自己嘅思想同耶和華嘅一致。

¹⁵ 為咗使自己嘅思想同耶和華嘅一致，我哋就要小心，千祈“唔好俾呢個制度同化”。呢個意味住，我哋要停止接納任何同上帝嘅觀點對立嘅思想。我哋可以用食物做比喻。一個人可能通過一啲有營養嘅食物嚟改善自己嘅健康狀況，但如果佢同時又經常食一啲受污染嘅食物，噉嗰啲有營養嘅食物對佢又有乜嘢用呢？同樣，如果我哋容許世俗嘅思想腐化自己嘅頭腦，噉我哋從耶和華嘅思想所吸收到嘅就好有限嘞。

16． 我哋可以點樣保護自己嘅思想？

¹⁶ 我哋可唔可以完全唔接觸世界嘅思想呢？唔可以。我哋唔能够完全脱離呢個世界，所以或多或少都會接觸到呢個世界嘅思想。（哥林多前書5:9,10）我哋傳道嗰時難免會接觸到錯誤嘅信仰，但係我哋唔需要學習、研究或者接受呢啲嚟自世界嘅思想。撒但好想用呢啲思想嚟影響我哋，所以我哋要好似耶穌噉即刻拒絶接受。另外，我哋要避免同呢個世界嘅思想有不必要嘅接觸，噉就可以使自己得到保護。（請讀箴言4:23）

17． 我哋可以點樣避免同世界嘅思想有不必要嘅接觸？

¹⁷ 例如，我哋應該小心選擇密友。聖經警告話，如果我哋同唔崇拜耶和華嘅人親密來往，就會受佢哋嘅思想所影響。（箴言13:20；哥林多前書15:12,32,33）我哋亦要小心選擇娛樂。我哋拒絶接受推崇進化論、暴力或者性不道德嘅娛樂活動，就可以避免受嗰啲“抵觸上帝知識”嘅思想毒害。（哥林多後書10:5）

18,19． （甲）點解我哋必須警惕嗰啲唔容易察覺嘅世俗思想？（乙）選擇娛樂嘅時候，我哋可以問吓自己乜嘢問題？點解？

¹⁸ 有啲世俗嘅思想唔容易察覺，我哋要小心識别並加以拒絶。例如，有啲新聞報道為咗迎合某啲政治觀點，可能會偏向某個立場；有啲節目會報道一啲人物事跡，推崇一啲令世人羨慕嘅目標同成就；有啲電影同書刊提倡“自我優先”或者“家庭優先”嘅人生觀。如果唔小心識别嘅話，我哋可能會覺得呢啲同聖經原則相抵觸嘅觀點好合理、好感人，甚至認為係啱嘅。聖經表明，我哋最愛嘅係耶和華，噉我哋同我哋嘅家庭先至會有真正嘅幸福。（馬太福音22:36-39）另外，有啲兒童故事雖然大部分都可以接受，但係有部分内容可能會誤導小朋友，令佢哋覺得不道德嘅行為係可以接受嘅。

¹⁹ 雖然呢個世界嘅娛樂有好多危險，但並唔係話，我哋唔可以享受健康嘅娛樂。選擇娛樂嘅時候，最好問吓自己：“有啲娛樂間接噉反映出世界嘅思想，我有冇察覺到呢？我有冇保護自己同仔女，免受某啲電視節目或者刊物影響呢？我有冇用耶和華嘅觀點幫助仔女抵抗佢哋接觸到嘅世俗思想呢？”如果我哋睇出上帝嘅思想同世界嘅思想之間嘅區别，就可以避免“俾呢個制度同化”。

20． 我哋受上帝嘅思想塑造抑或受世界嘅思想影響，視乎乜嘢？

²⁰ 請謹記，信息嘅來源基本只有兩個：一個係耶和華，另一個係受撒但控制嘅世界。我哋受邊個影響呢？呢個要視乎我哋從邊一個來源獲取信息。如果我哋採納世界嘅思想就會被同化，噉我哋嘅觀點同行為就會有屬肉體嘅傾向。所以，我哋一定要非常小心噉選擇自己睇嘅、讀嘅、聽嘅同埋諗嘅嘢。

21． 下一篇課文會討論乜嘢？

²¹ 正如課文之前提到嘅一樣，我哋想用耶和華嘅觀點嚟睇事情，只係使自己嘅頭腦免受不良嘅影響係唔够嘅。我哋仲要不斷吸收，並全心接納上帝嘅思想。下一篇課文會進一步討論我哋可以點樣做。