真正自由之道

1,2．（甲）為咗爭取自由，世人往往會做乜嘢？（乙）結果點樣？

今日，世界各地嘅人都鍾意談論平等同自由。大多數人都想擺脱壓迫、歧視同貧窮。有啲人想得到言論同選擇嘅自由。顯然，每個地方嘅人都渴望做自己想做嘅事，過自己希望過嘅生活。

² 不過，點樣實現呢啲夢想係另一回事。好多人都嘗試通過抗議、示威、發動叛亂甚至革命嚟解決社會或者政治問題。呢啲反抗行為可唔可以達到預期嘅效果呢？唔可以。反抗往往導致慘劇發生，造成人員傷亡。呢一切證明咗，所羅門王受聖靈啟示所講嘅話一啲都冇錯：“人轄制人，使人受害”。（傳道書8:9）

 3．為咗得到真正嘅幸福同滿足，我哋需要做乜嘢？

³ 門徒雅各向我哋指出，人類想得到真正嘅幸福同自由就需要點樣做。佢話：“人如果仔細察看自由嘅完美律法，並且恆心遵守，……就會因為實踐出嚟而得福。”（雅各書1:25）耶和華賜俾我哋完美嘅律法，佢最清楚人類需要乜嘢先可以得到真正嘅幸福同滿足。佢將獲得幸福快樂所需要嘅一切賜俾亞當同夏娃，包括真正嘅自由。

 4．亞當同夏娃享有點樣嘅自由？（請睇吓課文開頭嘅圖片）

⁴ 我哋從創世記嘅頭兩章可以睇出，亞當同夏娃生活得無憂無慮，唔需要擔驚受怕，亦都唔會受到壓迫；佢哋完全唔需要為食物同工作憂慮，唔使恐懼疾病同死亡。佢哋所享有嘅自由係今日世人夢寐以求嘅。（創世記1:27-29；2:8,9,15）噉係咪話，亞當同夏娃享有絶對嘅自由呢？等我哋嚟分析吓。

 5．如果人想得到自由，就需要乜嘢？

⁵ 今日好多人都認為，真正嘅自由就係佢哋可以隨意做任何自己想做嘅事，唔需要考慮後果。《世界圖書百科全書》將自由定義為“作出選擇同實行決定嘅能力”。呢本書話：“從法律嘅角度嚟睇，如果社會冇將唔公正、唔合理或者不必要嘅限制强加喺人民身上，人民就係自由嘅。”即係話，雖然人喺社會享有自由，但為咗使每個人都可以從中得益，定立某啲限制係必要嘅。不過問題係，邊個先至有權定立公正、必要同合理嘅限制呢？

 6．（甲）點解只有耶和華上帝先擁有絶對嘅自由？（乙）人類享有嘅自由係點樣嘅？點解？

⁶ 講到自由，我哋要記住嘅係，只有耶和華上帝先有絶對同無限嘅自由。因為佢係萬物嘅創造主，亦都係擁有宇宙至高統治權嘅全能者。（提摩太前書1:17；啟示錄4:11）大衛王用優美嘅言詞嚟形容耶和華嘅至高地位。（請讀歷代志上29:11,12）相比之下，無論天上定係地上嘅受造物所享有嘅自由只係相對嘅。佢哋必須承認，耶和華上帝擁有至高嘅權力，佢所設立嘅限制都係公正、必要同合理嘅。其實，耶和華從一開始就為人類定下界限。

 7．邊啲賴以維生嘅本能使我哋嘅生活更加多姿多彩？

⁷ 亞當同夏娃一開始享有好多自由，但係佢哋嘅自由係有限制嘅。有啲限制對佢哋嚟講係必須嘅。例如，佢哋一定要呼吸、進食同瞓覺。佢哋會唔會覺得，有呢啲限制就係失去自由呢？唔會。因為呢一切都經過耶和華精心設計，可以為佢哋帶嚟快樂同滿足。（詩篇104:14,15；傳道書3:12,13）試問邊個會唔鍾意呼吸清新嘅空氣，品嘗美味嘅食物，或者晚上舒舒服服噉瞓一覺呢？我哋做呢啲事唔會覺得有負擔或者受到約束。亞當同夏娃都一定有同感。

 8．上帝俾亞當同夏娃乜嘢吩咐？為要成就乜嘢旨意？

⁸ 耶和華明確吩咐亞當同夏娃要生兒育女，好好管理地球。（創世記1:28）呢個吩咐會唔會奪去佢哋嘅自由？當然唔會。相反，人類因為呢個吩咐而有機會為耶和華嘅旨意出一分力，使佢哋完美嘅後代可以永遠住喺地上嘅樂園。（以賽亞書45:18）今日，無論人選擇保持獨身，抑或結婚但唔打算要小朋友，都冇違反上帝嘅旨意。不過總嘅嚟講，雖然知道會面對各種挑戰，好多人仲係會選擇結婚生子。（哥林多前書7:36-38）因為結婚生子通常可以帶俾人快樂同滿足。（詩篇127:3）如果亞當同夏娃服從上帝，就能够永遠享受佢哋嘅婚姻同家庭生活。

 9．點解上帝喺創世記2:17嘅吩咐係公正、合理同必要嘅？

⁹ 耶和華俾咗亞當同夏娃另一個吩咐，又清楚講明唔服從會有乜嘢後果。佢話：“只係‘辨識善惡樹’嘅果，你唔可以食，因為你食咗，當日你就一定死。”（創世記2:17）呢個吩咐係咪唔公正、唔合理、冇必要？係咪奪去咗亞當同夏娃嘅自由？當然唔係。其實，好多聖經學者認為上帝呢個吩咐好有智慧，而且合情合理。有一位學者提出：“從上帝［喺創世記2:16,17］嘅吩咐可以得知，只有上帝知道，對人類嚟講乜嘢係善，乜嘢係惡。為咗可以從‘善’嘅事得益，人類必須相信同服從上帝。如果佢哋唔服從，就要靠自己去制定善惡標準。”而呢個對人類嚟講，係一個永遠都唔能够成功應付嘅重擔。

10．點解我哋唔應該將有自由意志同有權決定是非標準呢兩件事混為一談？

¹⁰ 好多人覺得，耶和華嘅吩咐剝奪咗亞當嘅自由。佢哋噉樣諗，就係將有自由意志，同有權決定是非對錯呢兩件事混為一談。亞當同夏娃的確有自由選擇服唔服從上帝。不過，只有耶和華先有權決定絶對嘅是非標準，而伊甸園入面嘅“辨識善惡樹”就係象徵呢個權柄。（創世記2:9）我哋唔肯定自己嘅決定會有點樣嘅結果，亦都唔知每次嘅結果係咪好嘅。所以我哋經常見到，有啲人懷住好嘅動機做某件事，但係結果不盡人意，甚至導致悲劇。（箴言14:12）冇錯，人類嘅能力的確非常有限。耶和華仁愛噉教導亞當同夏娃點樣運用真正嘅自由。佢哋選擇點樣做？

11,12．點解亞當同夏娃嘅決定導致悲慘嘅後果？請用比喻説明。

¹¹ 結果，亞當同夏娃選擇背叛耶和華。撒但誘惑夏娃，向佢保證話：“你哋嘅心眼就會打開，你哋會好似上帝一樣，能够辨識善惡”。（創世記3:5）最終係咪好似撒但講嘅噉，亞當同夏娃可以得到更多嘅自由？唔係。佢哋好快就知道，拒絶接受耶和華嘅指引，走自己嘅路，會導致悲慘嘅下場。（創世記3:16-19）點解？簡單嚟講，耶和華並冇授權俾人去定立是非標準。（請讀箴言20:24；耶利米書10:23）

¹² 呢個就好似飛行員駕駛飛機一樣。為咗安全到達目的地，飛行員通常會按照一個預先設定好嘅飛行路線。只要佢利用現代航空設備嚟導航，同空中交通管制員保持聯繫，就可以去到目的地。不過，如果飛行員無視指引，隨意選擇自己想飛嘅路線，就可能造成嚴重嘅後果。亞當同夏娃就好似自行其是嘅飛行員噉，無視上帝嘅指引。結果點樣？佢哋嘅決定令自己同所有後代都變得唔完美，最終都要死。（羅馬書5:12）亞當同夏娃想自行定立是非標準，結果並冇得到更多嘅自由，反而使佢哋失去耶和華所賜嘅真正自由。

13,14．我哋可以點樣得到真正嘅自由？

¹³ 有啲人覺得，最好能够有更多自由。不過其實，毫無限制嘅自由係一把兩刃劍。的確，自由可以帶俾我哋好多益處。但係如果呢個世界完全冇限制，你可以想像到會幾咁得人驚。《世界圖書百科全書》提到，由於呢個原因，每個有組織性嘅社會都有複雜嘅法律。因為佢哋既要保護人民嘅自由，同時亦都要作出限制。噉樣做並唔容易。所以我哋睇到人類社會有好多法律條文，而呢啲法律亦都需要好多律師同法官去解釋同實施。

¹⁴ 耶穌話俾我哋知點樣先可以得到真正嘅自由。佢話：“你哋時刻遵守我講嘅話，就真係我嘅門徒喇。你哋會認識真理，真理會使你哋自由。”（約翰福音8:31,32）如果想得到真正嘅自由，我哋就需要符合兩個條件：第一，接受佢教導嘅真理；第二，成為佢嘅門徒。我哋而家受到乜嘢束縛？耶穌繼續解釋話：“凡係犯罪嘅人，就係罪嘅奴隸。……如果兒子使你哋自由，你哋就真係自由嘞。”（約翰福音8:34,36）

15．點解耶穌承諾嘅自由係真正嘅自由？

¹⁵ 耶穌對佢門徒承諾嘅自由，比今日大部分人所渴求嘅自由好得多。耶穌話：“如果兒子使你哋自由，你哋就真係自由嘞。”耶穌所講嘅自由係從罪嘅奴役得到釋放。成為罪嘅奴隸係全人類有史以來經歷過最絶望嘅事。喺罪嘅影響下，我哋好容易做錯事，就算我哋盡咗最大嘅努力都好難做啱嘅事。我哋成為罪嘅奴隸，結果只會面對挫折、痛苦同死亡。（羅馬書6:23）使徒保羅對呢種痛苦同無奈深有體會。（請讀羅馬書7:21-25）我哋完全擺脱罪嘅枷鎖，先有希望得到亞當同夏娃最初享有嘅自由。

16．我哋可以點樣得到真正嘅自由？

¹⁶ 耶穌話：“你哋時刻遵守我講嘅話”。呢個表明，如果我哋想通過耶穌得釋放，就需要接受佢嘅教導同要求。作為獻咗身嘅基督徒，我哋要承認唔再擁有自己，而且接受佢為門徒定立嘅標準。（馬太福音16:24）就好似耶穌應許嘅噉，將來贖價喺我哋身上完全發揮作用嘅時候，我哋就可以得享真正嘅自由。

17．（甲）想得到真正嘅快樂同滿足，我哋就要點樣做？（乙）下一篇課文會討論乜嘢？

¹⁷ 作為耶穌嘅門徒，我哋服從佢嘅教導就可以喺生活上得到真正嘅快樂同滿足，將來亦都可以從罪同死亡嘅奴役得到完全嘅釋放。（請讀羅馬書8:1,2,20,21）下一篇課文會討論，我哋可以點樣明智噉運用自己嘅自由，永遠榮耀賜人真正自由嘅上帝——耶和華。