效法耶和華嘅憐恤

 1．耶和華點樣向摩西表明自己？點解噉樣做好重要？

有一次，耶和華向摩西宣告佢嘅名同特質，通過噉樣嚟表明佢係點樣嘅上帝。佢列出嘅頭兩種特質就係慈悲同憐恤。（請讀出埃及記34:5-7）耶和華本來可以强調佢嘅力量或者智慧。不過，當時摩西希望得到保證，表明耶和華會支持佢，所以耶和華强調咗關於佢願意幫助自己子民嘅特質。（出埃及記33:13）耶和華先提到呢兩種美好嘅特質，係咪令你覺得好温暖呢？呢篇課文會特别討論憐恤呢種特質。憐恤就係關注、同情其他人嘅困難同苦況，而且渴望減輕佢哋嘅痛苦。

2,3．（甲）乜嘢表明人天生就有憐恤呢種特質？（乙）點解憐恤呢種特質值得我哋關注？

² 因為耶和華有憐恤之心，而人係照上帝嘅形象被創造嘅，所以就算唔認識上帝嘅人，都好自然會關心體恤其他人。（創世記1:27）聖經入面有好多表明人有憐恤之心嘅例子。其中一個例子係，兩個妓女喺所羅門面前爭邊個先至係嬰兒嘅親生母親。為咗試探佢哋，所羅門下令將嬰兒斬開兩半。就喺嗰時，嬰兒嘅親生母親受到憐恤之心推動，即刻放棄自己嘅親生仔，將佢讓俾另一個女人。（列王紀上3:23-27）另一個就係法老嘅女救咗小摩西嘅例子。雖然佢知道呢個係希伯來人嘅細路，理應被處死，不過“佢仲係憐憫呢個細路”，將佢當成自己嘅仔噉撫養。（出埃及記2:5,6）

³ 點解憐恤呢種特質值得我哋關注？原因係，聖經鼓勵我哋要效法耶和華。（以弗所書5:1）雖然人類天生就有憐恤之心，但係作為亞當嘅後代，我哋唔完美，有自私嘅傾向。有時，我哋好難決定應該先去幫人抑或先顧自己。乜嘢可以幫助我哋培養憐恤之心，多啲關注其他人呢？首先，我哋會睇吓耶和華同其他人點樣表現憐恤。然後，我哋會諗吓可以點樣效法上帝嘅榜樣，同埋點解噉樣做對我哋有益。

 4．（甲）點解耶和華派天使去所多瑪？（乙）從羅得一家嘅記載，我哋學到乜嘢？

⁴ 我哋可以喺聖經入面揾到好多耶和華表現憐恤嘅例子。諗吓耶和華為羅得所做嘅事。羅得為人正義，佢因為所多瑪同蛾摩拉人嘅無恥行為而“大感痛心”。呢啲人道德敗壞，所以耶和華決定毁滅佢哋。（彼得後書2:7,8）上帝派天使去拯救羅得。天使催促羅得同佢嘅家人逃離即將被毁滅嘅城市。“羅得仲係拖延唔走。耶和華憐恤佢，嗰兩個人就拉住佢嘅手、佢妻子嘅手同佢兩個女嘅手，將佢哋帶出去，安置喺城外。”（創世記19:16）呢個記載表明，耶和華清楚明白佢忠僕所面對嘅困難。（以賽亞書63:7-9；雅各書5:11；彼得後書2:9）

 5．上帝嘅話語，例如約翰一書3:17，點樣幫助我哋學識向人表現憐恤？

⁵ 耶和華唔單止自己對人表現憐恤，佢都教導佢嘅子民要表現出呢種特質。我哋嚟睇吓耶和華俾以色列人嘅一條律法。呢條律法係同攞人嘅衫嚟做抵押有關嘅。（請讀出埃及記22:26,27）一個鐵石心腸嘅債主可能會夾硬攞走欠債人嘅衫，令到佢瞓覺嗰時連件可以冚嘅衫都冇。不過，耶和華教導佢嘅子民要避免呢種冷酷無情嘅態度同行為，要佢哋表現憐恤。我哋有冇受到呢條律法背後嘅原則推動，向人表現憐恤呢？弟兄姊妹有困難嗰陣，如果我哋有能力幫佢哋，一定唔會見死不救，袖手旁觀。（歌羅西書3:12；雅各書2:15,16；請讀約翰一書3:17）

 6．我哋從耶和華對以色列人嘅憐恤可以學到乜嘢？

⁶ 就算以色列人犯咗罪，耶和華仲係以憐恤之心對待佢哋。聖經話：“耶和華佢哋祖先嘅上帝因為憐恤佢嘅子民同佢嘅住處，就一次又一次派使者去警戒佢哋。”（歷代志下36:15）雖然有啲人嘅生活方式唔符合上帝嘅要求，但係佢哋將來有可能會悔改，成為耶和華嘅朋友。我哋唔係應該對呢啲人表現憐恤咩？耶和華唔想有任何人喺將來嘅審判被毁滅。（彼得後書3:9）所以，趁上帝仲未毁滅呢個邪惡世界，我哋應該繼續傳講佢嘅警告信息，使更多人因佢嘅憐恤而得益。

7,8．一個家庭點解相信耶和華向佢哋表現憐恤？

⁷ 有好多例子可以表明耶和華向人表現憐恤。我哋嚟睇吓一個家庭嘅經歷。喺20世紀90年代初嘅種族衝突期間，一個12歲叫米蘭嘅男仔，同父母、弟弟，仲有一啲見證人一齊從波斯尼亞搭巴士去塞爾維亞參加大會。米蘭嘅父母打算喺呢個大會受浸。不過，由於種族原因，佢哋全家喺邊境俾士兵趕咗落車，而其他弟兄姊妹可以繼續起程。負責嘅軍官拘留咗呢家人兩日之後，用無線電聯繫上司，問應該點樣處置佢哋。當時，軍官就企喺呢家人面前，所以全部人都聽到回覆話：“拉佢哋出去槍斃啦！”

⁸ 就喺軍官同下屬講緊嘢嗰陣，兩個陌生男子嚟到呢家人面前，細細聲噉表明自己係見證人。呢兩個弟兄從巴士上嘅其他人嗰度聽到佢哋嘅遭遇。兩個弟兄吩咐米蘭同佢弟弟坐佢哋部車過境，因為士兵唔會檢查細路仔嘅證件。佢哋又叫米蘭嘅父母兜過邊防站嘅後面，行去邊境嘅另一邊同佢哋會合。米蘭聽完呢個提議之後，都唔知笑好定喊好。米蘭嘅父母問：“你哋覺得佢哋會就噉俾我哋大搖大擺噉離開？”不過，佢哋行出去嘅時候，啲士兵居然乜嘢反應都冇，就好似佢哋隱咗形噉。父母同兩個仔喺邊境嘅另一邊重聚。佢哋繼續前往舉行大會嘅城市，深信耶和華回應咗佢哋懇切嘅禱告。我哋從聖經入面學到，耶和華未必每次都出手幫助佢嘅子民脱離危險。（使徒行傳7:58-60）即使係噉，米蘭分享佢嘅感受話：“對我嚟講，就好似係耶和華派天使嚟遮住士兵嘅眼，救咗我哋。”（詩篇97:10）

 9．耶穌見到群衆，佢有乜嘢反應？（請睇吓課文開頭嘅圖片）

⁹ 我哋可以從耶穌身上學到啲乜嘢呢？佢見到群衆，就憐憫佢哋，“因為佢哋俾人剝削，四處流離，好似冇牧人嘅綿羊一樣”。睇到佢哋嘅情況，“耶穌就開始教導佢哋好多嘢”。（馬太福音9:36；請讀馬可福音6:34）耶穌同嗰啲唔關心平民百姓嘅法利賽派完全唔同。（馬太福音12:9-14；23:4；約翰福音7:49）你係咪都好想同耶穌一樣，幫助嗰啲有屬靈需求嘅人認識真理呢？

10,11．係唔係任何情況下都要表現憐恤呢？請解釋。

¹⁰ 噉並唔係話，任何情況下都一定要表現憐恤。喺上文提到嘅聖經例子裏面，表現憐恤係好適合嘅。但係，掃羅王自以為表現憐恤嗰陣，其實佢表現嘅係唔服從嘅態度。佢違反上帝嘅命令，唔單止冇殺死上帝子民嘅仇敵亞甲王，仲保留咗最好嘅牲畜。結果，身為以色列君王嘅掃羅俾耶和華棄絶咗。（撒母耳記上15:3,9,15）耶和華係正義嘅審判官，佢洞悉人心，知道喺乜嘢時候唔應該表現憐恤。（耶利米哀歌2:17；以西結書5:11）耶和華好快就會對嗰啲唔服從佢嘅人施行審判。（帖撒羅尼迦後書1:6-10）到時，對嗰啲已經判定為邪惡嘅人，佢一定唔會手下留情。耶和華處決邪惡嘅人，其實就係向正義嘅人表現憐恤，拯救佢哋。

¹¹ 當然，我哋冇權去判定一個人嘅生死。反而，我哋而家應該盡己所能去幫助所有人。噉我哋可以點樣用實際嘅方法向其他人表現適當嘅憐恤之情？等我哋睇吓幾個建議。

12．點樣對人表現憐恤之情？

¹² 喺日常生活中樂於助人。如果我哋效法耶穌，就會對弟兄姊妹同其他人表現憐恤之情。（約翰福音13:34,35；彼得前書3:8）憐恤嘅其中一個意思係“一同受苦”。表現憐恤之情會推使我哋幫助其他人解決難題，減輕佢哋嘅痛苦。我哋要把握機會噉樣做！例如，我哋可唔可以幫人做啲家務，甚至為佢哋做一啲瑣碎事呢？（馬太福音7:12）

13．喺災難發生之後，上帝嘅子民表現出乜嘢特質？

¹³ 參與賑災工作。大多數人都好自然會同情嗰啲因災難而受苦嘅人。衆所周知，喺發生災難嘅時候，耶和華嘅子民好願意向人伸出援手。（彼得前書2:17）2011年日本發生咗大地震同海嘯，一位姊妹就住喺當時嘅重災區。佢覺得自己得到“好大嘅鼓勵同安慰”，因為有好多嚟自海外同日本其他地方嘅志願人員幫手修理受損嘅物業。佢話：“呢個經歷幫助我睇出，耶和華好關心我哋，弟兄姊妹之間亦都互相關心。全世界好多弟兄姊妹都不斷為我哋禱告。”

14．你可以點樣幫助患病同年老嘅人？

¹⁴ 幫助患病同年長嘅人。我哋見到其他人患病同衰老，好自然就會憐恤佢哋。我哋渴望終有一日唔會再有疾病同衰老。所以，我哋祈求上帝嘅王國嚟到。而目前，我哋會盡力幫助嗰啲有需要嘅人。某個作家寫咗一件發生喺佢媽媽身上嘅事。佢媽媽患有老年痴呆症，有一日，因為失禁而整污糟咗自己件衫。佢想整翻乾淨嘅時候，門鐘就響嘞。原來係兩個經常嚟探訪佢嘅見證人。呢兩個姊妹問，有乜嘢係佢哋可以幫到手嘅。作家嘅媽媽話：“我有啲尷尬，但真係好需要幫手。”於是，兩個姊妹就幫佢清潔。結束之後，佢哋仲為佢沖咗壺茶，陪佢傾計。呢個作家好感激兩個姊妹，於是寫低咗呢番話：“我真係要向呢啲見證人致敬。佢哋的確將自己所傳所教嘅用行動表現出嚟。”你對患病同年老嘅人懷有嘅憐恤之心，係咪會推動你盡己所能去減輕佢哋嘅痛苦呢？（腓立比書2:3,4）

15．點解我哋應該多啲向人傳道？

¹⁵ 幫助人認識耶和華。睇到好多人嘅難題同憂慮，推使我哋好想幫佢哋認識耶和華，教導佢哋明白上帝同佢嘅王國會點樣造益全人類。另一個方法就係，幫助佢哋睇出上帝嘅標準有實用嘅智慧，可以應用喺生活上。（以賽亞書48:17,18）你有冇付出努力，多啲向人傳道呢？傳道工作的確可以榮耀耶和華，又可以向人表現憐恤。（提摩太前書2:3,4）

16．樂於表現憐恤嘅人可以點樣造益自己？

¹⁶ 精神科專家話，表現憐恤可以使人身心健康，有良好嘅人際關係。你向經歷痛苦嘅人提供幫助，就會感到快樂同變得更樂觀，而且可以減少孤獨感同消極嘅諗法。冇錯，向人表現憐恤的確可以造益自己。（以弗所書4:31,32）基督徒盡力幫助其他人，就會有清白嘅良心，因為佢哋知道，噉樣做同聖經嘅原則一致。樂於助人嘅態度可以使我哋成為更好嘅父母、配偶同朋友。嗰啲經常對人表現憐恤嘅人，喺佢哋有需要嘅時候，往往都比較容易得到其他人嘅幫助同支持。（請讀馬太福音5:7；路加福音6:38）

17．點解你想培養同表現憐恤之情？

¹⁷ 雖然表現憐恤可以為自己帶嚟益處，不過呢個唔係我哋要培養憐恤之心嘅主要原因。最重要嘅係，我哋真心渴望效法同榮耀耶和華上帝，因為佢係愛心同憐恤嘅源頭。（箴言14:31）願我哋竭盡全力效法耶和華嘅完美榜樣，通過表現憐恤，加深弟兄姊妹之間嘅感情，同所有人和睦共處。（加拉太書6:10；約翰一書4:16）