點解要“讚美耶和華”？

1-3．（甲）詩篇147篇可能係幾時寫嘅呢？（乙）我哋通過研讀詩篇147篇可以學到乜嘢？

如果某個人出色噉完成一件工作，或者表現出美好嘅基督徒特質，就會受到稱讚。既然我哋有理由稱讚人，噉唔係有更多嘅理由去讚美耶和華上帝咩？我哋通過奇妙嘅受造物睇出耶和華有無窮嘅力量，亦都通過佢犧牲愛子作為贖價睇出佢對人類充滿温情，所以我哋應該讚美佢。

² 詩篇147篇嘅執筆者唔單止自己深受感動去讚美上帝，佢仲積極鼓勵其他人同佢一齊將讚美獻俾耶和華。（請讀詩篇147:1,7,12）

³ 我哋唔知道詩篇147篇係邊個寫嘅，但睇嚟佢生活喺耶和華幫助以色列人脱離巴比倫嘅奴役，返翻耶路撒冷嗰段時期。（詩篇147:2）上帝嘅子民可以回歸故土恢復正確嘅崇拜，的確打動詩篇執筆者去讚美耶和華。佢仲有更多嘅理由噉樣做。有邊啲理由呢？喺你生活裏面，你會因乜嘢理由而衷心“讚美耶和華”呢？

 4．被擄嘅以色列人得知居魯士王要釋放佢哋嘅時候，點解感到好安慰？

⁴ 想像吓，被擄嘅以色列人喺巴比倫會有啲乜嘢感受。奴役佢哋嘅人嘲笑話：“唱一首錫安嘅歌俾我哋聽吓！”正確崇拜嘅中心耶路撒冷係佢哋喜樂嘅最大因由，不過喺嗰時已經淪為一片廢墟。（詩篇137:1-3,6）猶太人心靈破碎，好需要安慰，根本冇心情唱歌。後來，就好似耶和華預言所講，波斯王居魯士為佢哋帶嚟拯救。佢征服咗巴比倫，宣布話：“耶和華……指派我喺猶大嘅耶路撒冷為佢建造聖殿。你哋當中凡係佢子民嘅，都可以上去，願耶和華佢哋嘅上帝與佢哋同在！”（歷代志下36:23）對於嗰啲住喺巴比倫嘅以色列人嚟講，事態嘅發展的確俾咗佢哋好大嘅安慰！

 5．關於耶和華嘅醫治能力，詩篇執筆者留意到乜嘢？

⁵ 耶和華唔單止為整個以色列國族帶嚟安慰，仲個别安慰每一個以色列人。今日亦都係一樣。關於上帝，詩篇執筆者話：“佢醫治心碎嘅人，包紮佢哋嘅傷口。”（詩篇147:3）冇錯，耶和華關心嗰啲喺身體上同感情上有創傷嘅人。今日，耶和華好渴望為我哋提供安慰，減輕我哋喺感情上嘅痛楚。（詩篇34:18；以賽亞書57:15）佢賜我哋智慧同力量，使我哋可以應付任何難題。（雅各書1:5）

 6．我哋從詩篇147:4學到乜嘢？（請睇吓課文開頭嘅圖片）

⁶ 之後，詩篇執筆者抬頭望向夜空，話耶和華佢“數算星辰嘅數目，一一點名呼召”。（詩篇147:4）點解佢突然間轉話題，去留意天上嘅星星呢？試諗吓：雖然詩篇執筆者能够用肉眼睇到天上嘅星星，但係佢根本冇辦法知道確切嘅數目。時至今日，我哋可以觀察到嘅星星比以前多咗好多。有人認為，單係我哋嘅銀河系就有數以十億計嘅星星，而宇宙裏面存在嘅星系，可能多至數萬億！對我哋人類嚟講，星星真係多到數都數唔晒！但係，造物主為每一粒星都起咗個名或稱號。呢個意味住，對耶和華嚟講，每一粒星都係獨一無二嘅。（哥林多前書15:41）噉地上嘅人呢？既然耶和華上帝確切知道每一粒星喺任何時候嘅位置，同樣，無論幾時佢都清楚知道你喺邊度，明白你嘅感受，同埋了解你嘅個人需要。佢真係對我哋每個人都瞭如指掌！

7,8．（甲）當耶和華幫助佢嘅子民應付考驗嘅時候，佢會考慮啲乜嘢？（乙）喺幫助唔完美嘅人方面，耶和華點樣表現體恤之心？請舉例。

⁷ 耶和華唔單止了解你，佢亦都體恤你嘅情況，而且有能力幫助你解決生活上嘅難題。（請讀詩篇147:5）你可能覺得，自己嘅情況太艱難，負擔太重。耶和華上帝清楚知道你嘅限度，“記得［你］不過係塵土”。（詩篇103:14）因為唔完美，我哋一次又一次犯同樣嘅錯。我哋經常會因為講錯嘢而感到後悔，又時不時有錯誤嘅慾望或者妒忌其他人。雖然耶和華冇任何弱點，但係佢智慧深不可測，對我哋唔完美嘅人嘅了解無可估量。（以賽亞書40:28）

⁸ 你可能已經體驗過耶和華點樣用佢大能嘅手幫助你應付某啲考驗。（以賽亞書41:10,13）我哋嚟睇吓一個叫做恭子嘅先驅姊妹嘅例子。佢搬咗去新委派嘅地區之後有一段時間變得好灰心。乜嘢表明耶和華了解佢嘅難題？後來，恭子發覺佢身邊嘅人都好理解佢嘅感受。佢覺得好似耶和華喺度同佢講：“我愛你，唔單單因為你係個先驅，仲因為你係我嘅女，你獻咗身俾我。我希望你可以開開心心噉做我嘅見證人！”喺你嘅生活上，全能嘅上帝點樣表現出“佢嘅悟性無可測度”呢？

9,10．耶和華首先會提供乜嘢嚟幫助我哋？請舉例。

⁹ 我哋每個人都有物質上嘅需要。例如，你可能擔心自己冇足够嘅食物。但係，耶和華創造咗自然循環嚟供應食物，甚至連幼小嘅烏鴉都得到餵養！（請讀詩篇147:8,9）既然耶和華一直提供食物俾烏鴉，你都可以確信耶和華同樣會供應你嘅物質所需。（詩篇37:25）

¹⁰ 最重要嘅係，耶和華供應强化信心嘅屬靈食物，賜俾我哋“超越人所能理解嘅［平安］”。（腓立比書4:6,7）我哋睇吓陸奧夫同佢太太喺2011年日本海嘯期間，點樣親身體會到耶和華用佢嘅大能扶助佢哋。海嘯嘅時候，佢哋爬咗上自己屋頂，先可以死裏逃生。但係，佢哋喺嗰日幾乎失去晒自己所有嘅嘢，連間屋都爛埋。佢哋喺二樓嘅房間，捱過咗一個又黑又凍嘅夜晚。朝早，佢哋好想得到一啲屬靈上嘅鼓勵。佢哋唯一揾到嘅一本書，就係《2006耶和華見證人年鑑》。陸奧夫即刻留意到“最嚴重的海嘯”呢個標題。資料提到2004年蘇門答臘嘅一場地震，引發咗有史以來傷亡最慘重嘅海嘯。陸奧夫同佢太太一邊睇一邊喊。喺佢哋最需要嘅時候，得到適時嘅屬靈鼓勵，使佢哋感受到耶和華嘅温暖同愛心。耶和華亦都仁慈噉提供俾佢哋物質所需，通過弟兄姊妹使佢哋得到救援物資。但係，最鼓勵佢哋嘅係，上帝嘅組織派代表嚟探訪會衆。陸奧夫話：“我感受到耶和華就喺我哋每一個人嘅身邊照顧緊我哋。真係好安慰啊！”耶和華會先提供我哋屬靈食物，之後都會滿足我哋物質上嘅需要。

11．如果我哋想從耶和華嘅幫助得益，需要點樣做？

¹¹ 耶和華隨時出手“為謙和嘅人紓困解危”。（詩篇147:6上）佢咁樂意幫助我哋，我哋可以點樣從中得益呢？我哋要同佢建立親密嘅關係。所以，我哋需要培養謙和嘅特質。（西番雅書2:3）謙和嘅人會等候耶和華糾正一切錯誤，消除佢哋所受嘅傷害。佢哋可以得到耶和華嘅認可，令佢嘅心歡喜。

12,13．（甲）為咗從耶和華嘅幫助得益，我哋應該要避免乜嘢？（乙）耶和華喜悦點樣嘅人？

¹² 另一方面，上帝“將邪惡嘅人貶抑於地”（詩篇147:6下）呢番話真係嚴厲！想從耶和華嘅忠貞之愛得益，避免得罪耶和華，我哋就一定要恨佢所恨。（詩篇97:10）例如，我哋應該憎恨不道德嘅性行為。即係話，要避開任何會導致我哋犯性不道德嘅事物，包括色情資訊。（詩篇119:37；馬太福音5:28）可能我哋需要經歷一番爭鬥，但為咗得到耶和華嘅祝福，付出任何努力都係值得嘅。

¹³ 喺呢場鬥爭，我哋要依靠耶和華上帝而唔係自己。詩篇嘅經文話：“馬雖然力大，［耶和華］並唔喜愛；人縱使腿快，佢亦唔喜悦”。（詩篇147:10）古代嘅人相信只要人强馬壯就可以打勝仗。如果我哋嘗試靠自己嘅能力或者其他人嘅幫助使自己得救，噉樣可唔可以取悦耶和華呢？當然唔可以！相反，我哋一定要親近耶和華，懇求佢嘅幫助。同世人唔一樣，就算我哋一次又一次向耶和華求助，佢都唔會覺得厭煩，總係耐心聆聽我哋嘅請求。“耶和華喜悦嘅，係敬畏佢嘅人，係等待佢忠貞之愛嘅人。”（詩篇147:11）因為耶和華有忠貞之愛，我哋可以確信，佢會對我哋不離不棄，幫助我哋戰勝自己嘅錯誤慾望。

14．詩篇執筆者確信乜嘢？

¹⁴ 耶和華使我哋確信，喺需要嘅時候，佢一定會出手幫助自己嘅子民。詩篇執筆者諗起耶路撒冷嘅復興，就歌頌耶和華話：“佢使你嘅門閂堅固，賜福俾你當中嘅居民。佢使你四境平安”。（詩篇147:13,14）知道耶和華會鞏固城門嚟保護佢嘅忠心子民，詩篇執筆者真係覺得好安心！

15-17．（甲）面對考驗嘅時候，通常我哋會有乜嘢感受？耶和華點樣運用佢嘅話語嚟幫助我哋？（乙）舉例説明上帝嘅話語點樣“迅速頒行”。

¹⁵ 你可能會面對一啲難題而感到憂慮，但係，耶和華會俾你智慧去應付。詩篇執筆者話：“［耶和華］向大地下令，佢嘅話迅速頒行。”然後，又話上帝“降下嘅雪如同羊毛，撒下嘅霜如同灰燼，扔下嘅冰雹如同碎渣”。執筆者跟住問：“佢發出寒冷，邊個能受得住呢？”最後又話，耶和華“下令，呢一切就融化”。（詩篇147:15-18）上帝係無所不知、無所不能嘅。既然佢可以控制冰雹同雪，佢亦都可以幫助你越過任何障礙。

¹⁶ 喺今日，耶和華用佢嘅話語聖經嚟指引我哋。“佢嘅話迅速頒行”，意思係，喺我哋有需要嘅時候，耶和華會迅速俾我哋屬靈嘅指引。試諗吓，你通過研讀聖經，查考“忠信睿智嘅奴隸”製作嘅出版物，收睇JW電視網嘅節目，瀏覽jw.org網站，向長老尋求幫助以及同弟兄姊妹一齊交往得到幾多益處！（馬太福音24:45）你有冇從呢啲安排睇出，耶和華喺生活上迅速噉俾你指引呢？

¹⁷ 西蒙娜就體驗過上帝話語嘅力量嘞。佢覺得自己冇乜價值，懷疑自己得唔到上帝嘅肯定同認可。但係，每當灰心嘅時候，佢都仲係堅持禱告，向耶和華尋求幫助。同時，佢亦都好勤力做個人研讀。佢話：“我從未試過得唔到耶和華嘅强化同指引。”呢種體會幫助佢盡力保持積極。

18．點解我哋可以感受到耶和華恩待我哋？有乜嘢理由我哋要衷心“讚美耶和華”？

¹⁸ 詩篇執筆者知道，上帝幾咁恩待佢古代嘅子民。佢哋曾經係唯一一個可以得到上帝嘅“話［語］”、“條例同法令”嘅國族。（請讀詩篇147:19,20）今日，世上只有我哋有福分，成為上帝名下嘅人。我哋認識耶和華，而且佢嘅話語喺我哋生活上發揮作用，所以我哋可以同佢享有特殊嘅關係。就好似詩篇147篇嘅執筆者噉，我哋真係有理由要衷心“讚美耶和華”，亦都要鼓勵其他人噉樣做！