“喺樂園再見！”

1,2． 人對樂園有乜嘢唔同嘅睇法？

呢個係一個非常感人嘅場面。韓國首爾大會結束之後，外國代表離開嘅時候，當地嘅見證人走過去，圍住佢哋，當中好多人都揮手，大聲話：“喺樂園再見！”你覺得佢哋所講嘅係乜嘢樂園呢？

² 唔同嘅人對樂園有唔同嘅理解。有啲人認為樂園係人幻想出嚟嘅，有啲人就話樂園係可以使佢哋快樂同滿足嘅地方。對一個好肚餓嘅人嚟講，可能擺滿食物嘅餐檯就係佢嘅樂園嘞。19世紀嘅一個旅行家睇到一個開滿鮮花嘅山谷就感嘆話：“哇！好靚嘅樂園啊！”雖然嗰個地方每年都有超過15米（50英尺）厚嘅積雪，不過而家都仲係被稱為樂園。對你嚟講樂園係乜嘢？你希唔希望去樂園呢？

 3． 聖經提到最初嘅樂園係一個點樣嘅地方？

³ 聖經提到，有一個曾經存在過嘅樂園同埋一個將會嚟到嘅樂園。樂園嘅概念好早就出現喺聖經入面。譯自拉丁語嘅天主教思高聖經學會譯本嘅創世記2:8話：“上主天主在伊甸東部種植了一個樂園，就將他形成的［亞當］安置在裏面。”希伯來語原文將樂園稱為伊甸園。伊甸嘅意思係“喜悦”。呢個美麗嘅花園食物充足，景色迷人，人同動物相處融洽，的確係一個令人開心快樂嘅地方。（創世記1:29-31）

 4． 點解我哋可以將伊甸園稱為樂園？

⁴ 喺希臘語入面，意思係“花園”嘅希伯來語詞被譯作“帕拉迪索斯”。關於呢個詞，麥克林同斯特朗合編嘅《百科全書》（英語）話：“一個寬闊、開放嘅公園，與世隔絶，入面嘅自然美景冇被破壞過。有莊嚴嘅森林，好多樹木都結出果實，由清澈嘅溪流所灌溉，岸邊有一群群嘅羚羊或綿羊走嚟走去。呢個就係一個希臘旅行者心目中嘅樂園嘞。”（參考創世記2:15,16）

5,6． 點解亞當同夏娃唔可以繼續喺樂園生活？有啲人可能想知道乜嘢問題？

⁵ 耶和華就係將亞當同夏娃安置喺一個咁靚嘅樂園，不過由於佢哋背叛耶和華，所以佢哋同後代都唔可以繼續喺樂園生活。（創世記3:23,24）雖然唔再有人類住喺伊甸園，不過伊甸園喺挪亞洪水之後先至完全消失。

⁶ 有啲人可能會諗：“將來有冇人可以喺地上嘅樂園生活呢？”事實表明乜嘢？你有冇充分嘅理由相信未來你會同自己所愛嘅人喺樂園生活呢？你能唔能够解釋，點解將來一定會有樂園？

7,8． （甲）上帝對亞伯拉罕作出乜嘢應許？（乙）上帝嘅應許可能令亞伯拉罕諗到乜嘢？

⁷ 聖經嚟自伊甸園嘅創造主耶和華，所以同樂園有關嘅所有問題都可以喺聖經入面揾到答案。請諗吓上帝同佢嘅朋友亞伯拉罕講過乜嘢。上帝話，佢會使亞伯拉罕嘅後代多到好似“海邊嘅沙”噉。之後，佢向亞伯拉罕作出一個重要嘅應許，話：“地上嘅萬國都必定因你嘅後代而贏得福分，因為你聽從咗我嘅話。”（創世記22:17,18）上帝向亞伯拉罕嘅仔同孫都重申同樣嘅承諾。（請讀創世記26:4；28:14）

⁸ 聖經入面冇任何迹象表明，亞伯拉罕認為人類會喺天上嘅樂園獲得最終嘅獎賞。所以，當上帝話“地上嘅萬國”得到福分嗰時，亞伯拉罕認為呢啲福分係喺地上得享嘅。不過，呢個係咪聖經入面證明樂園喺地上嘅唯一證據呢？

9,10． 後來乜嘢預言使我哋堅信樂園即將會到嚟？

⁹ 亞伯拉罕嘅子孫大衛指出，“作惡嘅人”同“行事不義嘅人”喺將來都會被消滅，結果“惡人就唔會再存在”。（詩篇37:1,2,10）相反，“謙和嘅人必得着大地，大享平安，滿心喜樂”。大衛亦都受聖靈啟示，預言話：“義人必得着大地，永遠喺地上安居。”（詩篇37:11,29；撒母耳記下23:2）你覺得，呢啲保證對嗰啲想遵行上帝旨意嘅人有乜嘢影響？佢哋相信，如果喺地上生活嘅全部都係義人，噉好似伊甸園一樣嘅樂園一定會喺某個時候被重建。

¹⁰ 隨住時間過去，大多數聲稱事奉耶和華嘅以色列人都背棄咗耶和華，唔再支持正確嘅崇拜。所以上帝容許巴比倫人征服佢嘅子民，毁滅佢哋嘅土地，擄走好多以色列人。（歷代志下36:15-21；耶利米書4:22-27）不過，上帝嘅先知預告，70年之後上帝嘅子民會重返佢哋嘅家園。呢啲預言都應驗咗。而呢啲預言對我哋亦都有好重要嘅意義。喺考慮其中一啲預言嗰陣，請將焦點集中喺即將到嚟嘅地上樂園。

11． 以賽亞書11:6-9嘅預言初次係點樣應驗嘅？仲有乜嘢問題需要回答？

¹¹ 請讀以賽亞書11:6-9。上帝通過以賽亞預告，佢嘅子民返到故鄉之後，唔會處於惡劣、危險嘅環境，亦都唔需要驚俾動物或者兇殘嘅人攻擊，無論老人定係細路都會感到好安全。呢一切唔係會令你諗起伊甸園嘅和平景象咩？（以賽亞書51:3）以賽亞嘅預言亦都提到，“認識耶和華嘅知識必定遍滿［整個地球］，就好似水彌漫海洋一樣”。所以，呢個預言唔單止喺以色列國，將來仲會喺全球應驗。噉呢啲事幾時會發生呢？

12． （甲）嗰啲被擄嘅以色列人重返故土之後得到乜嘢福分？（乙）乜嘢表明以賽亞書35:5-10嘅預言會有另一次應驗？

¹² 請讀以賽亞書35:5-10。以賽亞進一步强調，重返故土嘅以色列人唔會受到動物或者惡人嘅威脅。佢哋嘅土地會出産豐盈，因為嗰度好似伊甸園噉有充足嘅水源。（創世記2:10-14；耶利米書31:12）呢個預言係咪只應驗喺重返故土嘅以色列人身上呢？請留意，預言亦都提到盲人、聾人同跛腳嘅人會痊癒，不過呢啲事當時並冇發生。所以上帝講嘅係，佢喺將來先至會消除所有疾病。

13,14． 以賽亞書65:21-23嘅預言點樣喺以色列人返回故土嗰時獲得應驗？呢個預言嘅邊部分仲未應驗？（請睇吓課文開頭嘅圖片）

¹³ 請讀以賽亞書65:21-23。猶太人返到家鄉嗰時，冇舒適嘅住所，亦都冇見到耕地同葡萄園。不過，由於上帝賜福俾佢哋，情況就慢慢改變過嚟。請想像吓，可以住喺自己建造嘅房屋，佢哋有幾咁開心！佢哋亦可以種植農作物，享受美味嘅食物。

¹⁴ 請留意預言嘅一個重要細節。我哋嘅壽命係咪真係“會好似樹木嘅壽命”一樣咁長呢？有啲樹有成千年甚至更長嘅壽命。如果一個人亦都有咁長嘅壽命，噉佢身體一定好健康。以賽亞預言所描述嘅環境對人嚟講就係一個樂園，係人類一直夢寐以求嘅！呢個預言必定實現！

15． 以賽亞書預言未來會有乜嘢福分？

¹⁵ 請諗吓，上文討論過嘅應許點樣表明將來會有一個樂園。到時，全人類都會得到上帝嘅賜福。冇人會擔心俾動物或者兇殘嘅人攻擊。盲人、聾人同跛腳嘅人都會得到醫治。人可以建造自己嘅房屋，享受地上出産嘅有益食物。佢哋嘅壽命比樹木仲要長。冇錯，聖經向我哋展現咗未來嘅景象。不過，有啲人可能會話，呢啲預言唔係真係指將來地上會有一個樂園。你會點答呢？點解你堅信地上會有一個真正嘅樂園？地上最偉大嘅人物可以俾到我哋一個穩確嘅理由。

16,17． 耶穌喺乜嘢情況下提到樂園？

¹⁶ 雖然耶穌係無罪嘅，但佢仲係被判有罪，而且被釘喺木柱上，最終死去。當時，喺佢旁邊有兩個猶太犯人。臨死之前，其中一個犯人承認耶穌係君王，請求佢話：“耶穌，你領受王權之後，求你顧念我。”（路加福音23:39-42）路加福音23:43寫低咗耶穌嘅回答，呢個關乎我哋嘅未來。有啲現代學者將耶穌講嘅話詞對詞噉翻譯為：“實在我話俾你知，今日同我一齊你必定喺樂園。”請留意“今日”呢個詞。耶穌係乜嘢意思呢？唔同嘅人有唔同嘅睇法。

¹⁷ 為咗清楚表達句子嘅意思，好多現代語言都會使用逗號。不過，喺揾到嘅最早期嘅希臘語抄本當中，唔係時時都使用標點符號。噉樣就會産生一個問題，到底耶穌想講嘅係，“我話俾你知，你今日必定同我一齊喺樂園”；定係，“我今日話俾你知，你必定同我一齊喺樂園”呢？翻譯員可能會根據自己對呢句話嘅理解嚟加入逗號。呢兩種譯法喺今日唔同嘅聖經譯本當中都可以揾到。

18,19． 我哋可以點樣推理耶穌嘅意思？

¹⁸ 不過，請諗吓耶穌之前點樣同佢嘅門徒講。佢話：“人子亦會喺地入面三日三夜。”佢又話：“人子必被出賣，落喺人手上，俾人殺死，第三日復活。”（馬太福音12:40；16:21；17:22,23；馬可福音10:34）使徒彼得話呢件事的確發生過。（使徒行傳10:39,40）耶穌同嗰個罪犯死去當日並冇去樂園。耶穌“喺墳墓［或者‘海地斯’］”幾日，直至上帝使佢復活。（使徒行傳2:31,32）a

¹⁹ 所以，我哋可以睇出，耶穌通過“我今日實在話俾你知”呢句話嚟帶出佢對犯人嘅承諾。呢個係一種普遍而且禮貌嘅表達方式，喺摩西嘅日子就已經使用。摩西曾經話：“今日我吩咐你嘅呢啲話，你要記喺心上”。（申命記6:6；7:11；8:1,19；30:15）

20． 乜嘢幫助我哋明白耶穌嘅意思？

²⁰ 嚟自中東嘅一位聖經譯者提到耶穌嘅回答，話：“呢段文字嘅關鍵在於‘今日’呢個詞，成句話應該讀成：‘我今日實在話俾你知，你必定同我一齊喺樂園。’承諾係當日作出嘅，但以後先至會實現。呢個係東方語言嘅一個特點，表明肯定會信守某一日所作嘅承諾。”所以，公元5世紀嘅一個叙利亞語譯本將耶穌嘅話翻譯為：“確實，我今日同你講，你將會同我一齊喺伊甸園。”我哋所有人都可以從呢個承諾受到鼓勵。

21． 乜嘢事唔會發生喺嗰個犯人身上？點解？

²¹ 耶穌同使徒定立咗王國之約，使佢哋可以同佢一齊去天上嘅王國。嗰個就嚟要死嘅犯人唔知道呢個王國之約。（路加福音22:29）另外，佢亦都冇受浸。（約翰福音3:3-6,12）所以，我哋從中睇出，耶穌所承諾嘅一定係地上嘅樂園。多年之後，使徒保羅通過異象見到一個人“忽然被接到樂園”。（哥林多後書12:1-4）同嗰個犯人唔一樣，保羅同其他忠心嘅使徒被揀選到天上同耶穌一齊作王。不過，保羅所指嘅都係將來先至會發生嘅事，就係未來嘅“樂園”。b 呢個樂園係咪喺地上嘅呢？你會唔會喺嗰度呢？

22,23． 你有乜嘢希望？

²² 請唔好忘記，大衛講“義人必得着大地”呢句話嘅時候，其實都係講緊一個時間點。（詩篇37:29；彼得後書3:13）大衛想指出嘅係，到咗某個時候，地上嘅人會按照上帝正義嘅原則生活。以賽亞書65:22嘅預言話：“我子民嘅壽命，會好似樹木嘅壽命。”呢句話隱含嘅意思係，人類可以有好長好長嘅壽命。點解我哋可以相信呢件事呢？啟示錄21:1-4話，上帝會賜福俾嗰啲喺新世界事奉佢嘅人，而其中一個福分就係“唔再有死亡”。

²³ 聖經真係將樂園描述得好清楚。亞當同夏娃失去嘅係伊甸嘅樂園，不過樂園唔會永遠消失。上帝應許，地上嘅人仍然會得到賜福。大衛喺聖靈啟示下話，温和嘅人同義人會承受大地，喺地上永遠生活落去。以賽亞書提到，人類將來可以喺地上美麗嘅樂園享受生命。我哋都期待呢啲預言實現。呢個樂園幾時會嚟呢？就係耶穌實現對猶太犯人嘅承諾嗰時。你都有機會喺呢個樂園裏面生活。到時，“喺樂園再見！”呢句話就會實現。