管教——耶和華愛心嘅明證

 1．聖經通常點樣提及管教？

當你聽到“管教”呢個詞，會諗到乜嘢？或者你馬上諗到嘅係懲罰，但管教其實仲包括其他方面。聖經通常用正面嘅口吻提及管教，多次將管教同知識、智慧、愛心、生命聯繫埋一齊。（箴言1:2-7；4:11-13）耶和華管教我哋，係因為佢愛我哋，希望我哋得到永遠嘅生命。（希伯來書12:6）雖然佢有時會懲罰人，但係佢永遠都唔會用殘忍嘅方式管教人。冇錯，“管教”呢個詞主要同教導有關，就好似父母教育自己心愛嘅兒女一樣。

2,3．點解話管教包括教導同懲罰？（請睇吓課文開頭嘅圖片）

² 請諗吓以下嘅例子：明仔喺屋企入面玩足球。佢媽媽同佢講：“明仔，唔好喺屋企玩足球！好容易會打爛嘢㗎。”明仔唔聽媽媽話，繼續玩，結果真係打爛咗個花樽。媽媽點樣管教佢呢？媽媽同佢解釋點解佢做錯咗，亦都使佢知道服從父母係有益處嘅，而且父母所定嘅規矩係必要同合理嘅。為咗幫助明仔吸取教訓，媽媽覺得需要適當噉懲罰佢，於是沒收足球一段時間。明仔肯定唔開心，不過噉樣做可以使佢記住，唔聽父母話就要承擔後果。

³ 身為基督徒，我哋係上帝大家庭嘅一分子。（提摩太前書3:15）耶和華係我哋嘅天父，佢有權定立是非標準。我哋違反佢標準嘅時候，佢會懷住愛心管教我哋。如果我哋做錯事而招致惡果，耶和華嘅管教就會幫助我哋明白，聽從天父有幾咁重要。（加拉太書6:7）耶和華深愛我哋，唔希望我哋受苦。（彼得前書5:6,7）

 4．（甲）耶和華希望我哋點樣訓練聖經學生？（乙）呢篇課文會討論乜嘢？

⁴ 我哋運用聖經管教兒女或者教導聖經學生，可以幫助佢哋符合資格，成為基督嘅門徒。上帝嘅話語係我哋教導人嘅主要工具，使我哋能够“按正義施行管教”，可以幫助兒女或者聖經學生明白同遵守耶穌吩咐我哋嘅一切。（提摩太後書3:16；馬太福音28:19,20）耶和華希望我哋用呢種方式嚟訓練聖經學生，使佢哋都可以幫助其他人成為基督嘅門徒。（請讀提多書2:11-14）呢篇課文會討論三個重要問題：（1）上帝嘅管教點樣反映出佢對我哋嘅愛？（2）我哋從耶和華管教過嘅人身上可以學到乜嘢？（3）我哋施行管教嘅時候，可以點樣效法耶和華同耶穌？

 5．我哋從邊啲方面可以睇出，管教反映耶和華對我哋嘅愛？

⁵ 耶和華愛我哋，所以佢糾正、教導同訓練我哋，使我哋可以留喺佢嘅愛裏面，繼續行走永生之道。（約翰一書4:16）佢從來都唔會貶低或者侮辱我哋，使我哋覺得自己冇咩價值。（箴言12:18）相反，耶和華留意我哋好嘅特質，俾我哋自由選擇嘅權利。我哋通過聖經、聖經書刊、基督徒父母或者會衆長老所得到嘅管教，點樣證明上帝愛我哋？例如，我哋唔小心“失足”嗰陣，長老會以仁慈温和嘅方式糾正我哋。佢哋嘅做法正係反映出耶和華對我哋嘅愛。（加拉太書6:1）

 6．一個人因為受到管教而失去服務機會，呢個點樣反映出耶和華嘅愛？

⁶ 有時，管教唔只係提出勸告咁簡單。如果一個人犯咗嚴重嘅罪，佢就會失去喺會衆服務嘅機會。呢種管教係耶和華愛佢嘅表現。管教可能幫助佢睇出，需要多啲做個人研讀、沉思同禱告。噉樣做，佢就可以强化自己同耶和華嘅關係。（詩篇19:7）一段時間之後，佢可能會重新得到服務機會。開除嘅安排亦都反映出耶和華嘅愛，因為呢個安排可以使會衆避免受到不良影響。（哥林多前書5:6,7,11）另外，上帝施行嘅管教係適度嘅，可以幫助犯過者知道自己嘅罪有幾嚴重，推動佢真心悔改。（使徒行傳3:19）

 7．舍伯那係邊個？佢有乜嘢唔好嘅品格？

⁷ 為咗明白管教嘅價值，我哋會睇吓兩個受過耶和華管教嘅人嘅例子：生活喺希西家王時期嘅舍伯那，以及現代一位叫格雷姆嘅弟兄。舍伯那係“王宮嘅管家”，擁有好大嘅權力。（以賽亞書22:15）好可惜，佢變得驕傲自大，追求個人榮耀。佢甚至為自己建造奢華嘅墓穴，出入乘坐“華麗嘅馬車”！（以賽亞書22:16-18）

 8．耶和華點樣管教舍伯那？結果點樣？

⁸ 舍伯那追求個人榮耀，所以耶和華革除佢嘅官職，委任以利亞敬取代佢。（以賽亞書22:19-21）呢件事發生喺亞述王西拿基立準備攻打耶路撒冷嘅時候。後來，亞述王派高官率領一支大軍去耶路撒冷，試圖通過恐嚇使猶太人同希西家投降。（列王紀下18:17-25）希西家派以利亞敬同另外兩個人去見亞述高官。其中一個陪同嘅人就係舍伯那，佢當時係書記。睇嚟，舍伯那並冇因為受到管教而怨恨不滿，反而願意謙卑噉接受較低嘅職位。我哋從呢個記載可以學到乜嘢？請睇吓以下三個方面。

9-11．（甲）我哋從舍伯那嘅事例學到乜嘢？（乙）我哋施行管教嘅時候，可以點樣效法耶和華？

⁹ 第一，舍伯那失去咗佢嘅職位，呢個提醒我哋，“驕傲自大係失敗嘅先聲，心高氣傲係絆倒嘅前因”。（箴言16:18）如果你喺會衆負有職責，而且受人尊敬，你會唔會努力保持謙卑？無論自己有點樣嘅才幹或者成就，你會唔會將功勞歸俾耶和華？（哥林多前書4:7）使徒保羅勸勉我哋“唔好自視過高”，而要“務求思想健全”。（羅馬書12:3）

¹⁰ 第二，耶和華嚴厲責備舍伯那，表明佢相信舍伯那願意接受糾正。（箴言3:11,12）嗰啲喺會衆失去職責嘅人可以從中吸取教訓。與其憤憤不平，不如盡力事奉耶和華，將管教視為佢對自己所表現嘅愛。請記住，耶和華最終會獎賞嗰啲保持謙卑嘅人。（請讀彼得前書5:6,7）如果我哋心裏謙卑就可以成為柔軟嘅陶泥，噉耶和華就會通過仁愛嘅管教嚟塑造我哋。

¹¹ 第三，我哋從耶和華管教舍伯那嘅方式學到寶貴嘅一課。我哋從耶和華嘅管教睇出，雖然佢憎恨惡事，但佢亦都關愛犯過嘅人，留意人嘅優點。如果你係基督徒父母或者長老，你願唔願意效法耶和華，用佢嘅方式嚟施行管教？（猶大書22,23）

12-14．（甲）有啲人對上帝嘅管教有乜嘢反應？（乙）上帝嘅話語點樣改變一個弟兄嘅態度？結果點樣？

¹² 好可惜，有啲人對自己受到嘅管教一直耿耿於懷，甚至離開上帝同會衆。（希伯來書3:12,13）噉係咪話，呢啲人無藥可救？請睇吓格雷姆嘅經歷。格雷姆曾經被開除，後來重新被會衆接納，之後又停止參加聚會同傳道。過咗幾年，佢請一位友善嘅長老同佢討論聖經。

¹³ 呢位長老回憶話：“格雷姆當時嘅問題係高傲。佢經常批評嗰啲決定開除佢嘅長老。所以之後嘅幾次學習，我哋都討論同高傲有關嘅經文。上帝嘅話語好似一塊鏡噉，幫助格雷姆睇清楚自己。佢覺得自己真係做得好唔啱！結果好奇妙！佢承認自己俾高傲呢條‘梁木’蒙蔽咗，而好批評嘅態度就係佢嘅問題。之後，佢好快就作出改變。佢開始經常參加基督徒聚會，熱心研讀上帝嘅話語，而且每日堅持禱告。佢亦都負起家主嘅屬靈責任，令太太同三個女都覺得好欣慰。（路加福音6:41,42；雅各書1:23-25）

¹⁴ 呢位長老繼續話：“有一日，格雷姆講咗啲令我好感動嘅話。佢話：‘我認識真理好多年，亦都做過先驅，不過而家我先可以真正噉話，我愛耶和華。’冇幾耐，佢受委派喺聚會期間負責傳遞麥克風，佢好珍惜呢個殊榮。我從佢嘅經歷睇出，如果人謙卑噉接受耶和華嘅管教，就會得到源源不斷嘅福分！”

15．如果想其他人接受我哋嘅勸告，我哋就要點做？

¹⁵ 想做個好老師，首先就要做個好學生。（提摩太前書4:15,16）同樣，如果耶和華通過你去管教其他人，你就要保持謙卑，並接受耶和華嘅指引。其他人見到你表現謙卑，就會更加尊重你，亦都更容易接受你提出嘅勸告。我哋可以從耶穌嘅榜樣學習。

16．耶穌點樣施行有效嘅管教同教導？

¹⁶ 就算喺困難嘅情況下，耶穌都依然服從天父。（馬太福音26:39）佢向人表明，自己嘅智慧同教導都係嚟自天父嘅。（約翰福音5:19,30）佢謙卑同服從嘅態度使人樂意親近佢，亦都幫助佢成為一個仁慈體貼嘅導師。（請讀馬太福音11:29）耶穌用仁慈嘅言語鼓勵嗰啲灰心軟弱嘅人。（馬太福音12:20）甚至佢嘅使徒表現出自私同野心勃勃嘅精神嗰陣，佢都仁慈温和噉糾正佢哋。（馬可福音9:33-37；路加福音22:24-27）

17．長老要牧養好上帝嘅羊群，就需要點樣做？

¹⁷ 每當長老運用聖經原則施行管教，都需要效法基督嘅榜樣。佢哋噉樣做就表明自己希望得到上帝同基督嘅塑造。使徒彼得話：“務要牧養上帝嘅羊群，就係佢交俾你哋照顧嘅，唔係出於勉强，而係出於樂意；唔係因為貪愛唔正當嘅利益，而係出於熱誠；亦都唔係轄制身為上帝産業嘅人，而係做羊群嘅榜樣。”（彼得前書5:2-4）冇錯，長老喜樂噉服從上帝同基督，就可以使自己同埋自己所照顧嘅綿羊得益。（以賽亞書32:1,2,17,18）

18．（甲）耶和華吩咐父母點樣做？（乙）耶和華點樣幫助父母履行佢哋嘅責任？

¹⁸ 同樣嘅原則都適用於家庭。耶和華同家主講：“唔好激怒兒女，只要照耶和華嘅意思管教佢哋，糾正佢哋嘅思想，將佢哋撫養成人。”（以弗所書6:4）呢個責任有幾重要？箴言19:18 話：“趁仲有希望就要管教兒子，噉你就不致因佢嘅死而負上責任。”耶和華將管教兒女嘅責任交俾父母，如果佢哋冇好好管教兒女，就係失職！（撒母耳記上3:12-14）父母通過禱告尋求耶和華嘅幫助，又信賴聖經同聖靈嘅指引，耶和華就一定會賜父母所需嘅智慧同力量。（請讀雅各書1:5）

19,20．（甲）接受上帝嘅管教為我哋帶嚟乜嘢福分？（乙）下一篇課文會討論乜嘢？

¹⁹ 如果我哋接受上帝嘅管教，亦都學習耶和華同耶穌施行管教嘅方式，就會得到數之不盡嘅福分！家庭同會衆充滿和睦嘅氣氛。每個成員都感受到愛、關懷同安舒。而將來，我哋喺新世界得享嘅福分會遠遠超過而家所享有嘅。（詩篇72:7）耶和華嘅管教幫助我哋做好準備，學識點樣喺天父嘅大家庭裏面，同其他人一齊團結和睦噉享受永遠嘅生命。（請讀以賽亞書11:9）如果我哋謹記呢點就會明白，管教的確係耶和華向我哋表現愛心嘅一種美妙方式。

²⁰ 下一篇課文會分析點樣喺家庭同會衆施行管教，亦都會討論我哋點樣自我約束，同埋點樣避免一啲比管教更令人痛苦嘅事。