效法耶和華嘅公正同慈悲

1,2．（甲）耶穌對上帝嘅律法有乜嘢感覺？（乙）抄經士同法利賽派點樣歪曲律法？

耶穌喜愛摩西律法。對於呢一點，我哋唔會覺得意外，因為律法係嚟自耶穌一生當中最重要嘅嗰一位——天父耶和華。詩篇40:8嘅預言表明耶穌深愛上帝嘅律法，經文話：“我嘅上帝啊，我樂於遵行你嘅旨意，你嘅律法喺我内心深處。”耶穌通過言行向人證明上帝嘅律法係完美嘅，對人有益，而且全部都會實現。（馬太福音5:17-19）

² 當耶穌睇見抄經士同法利賽派歪曲天父嘅律法，佢一定好痛心！佢哋淨係顧住墨守律法嘅一啲細節，所以耶穌話：“你哋將薄荷、蒔蘿、大茴香，交納十分之一”。呢個有乜嘢問題？耶穌跟住話：“律法上更重要嘅事，就係公正、慈悲、忠信，［你哋］反而就漠視。”（馬太福音23:23）耶穌唔似嗰啲法利賽派嘅人自以為義。佢明白律法背後嘅精神，知道每一條誡命都反映出上帝嘅特質。

 3．呢篇課文會討論乜嘢問題？

³ 今日，基督徒唔需要遵守摩西律法。（羅馬書7:6）但係，耶和華將律法保存喺佢嘅話語聖經裏面。佢唔想我哋過度關注律法嘅細節，而係希望我哋辨明同實踐“更重要嘅事”，就係誡命背後嘅原則。例如，有關庇護城嘅安排，我哋可以睇出乜嘢原則？喺上一篇課文，我哋了解到誤殺者需要採取嘅步驟。喺呢篇課文，我哋可以通過庇護城嘅安排更加認識耶和華，亦都學到點樣效法佢嘅特質。課文會回答三個問題：庇護城嘅安排點樣反映耶和華嘅慈悲？呢個安排點樣幫助我哋更清楚了解耶和華對生命嘅睇法？庇護城嘅安排點樣反映出耶和華完美嘅公正？請留意，我哋可以點樣喺呢三方面效法天父。（請讀以弗所書5:1）

4,5．（甲）點解庇護城要位置適中，方便到達？（乙）我哋從中睇出耶和華係點樣嘅上帝？

⁴ 呢六座庇護城位置適中，方便到達。耶和華吩咐以色列人將呢啲城平均分配喺約旦河兩邊，目的係使誤殺者可以快速、容易尋得庇護。（民數記35:11-14）通往庇護城嘅道路暢順，維修妥當。（申命記19:3）按照猶太人嘅傳統，路上會有一啲指示牌，幫助誤殺者逃到就近嘅庇護城。既然附近有庇護城，誤殺者就唔使被迫逃去異地，而受異地嘅錯誤宗教影響。

⁵ 請諗吓：耶和華會將故意殺人嘅罪犯判處死刑，但係佢亦都俾誤殺者有機會得到慈悲同保護。一個評論家寫道：“上帝所設立嘅安排清晰、簡單、易明，呢個就係上帝嘅仁慈之道。”耶和華唔係一個無情嘅審判官，隨意懲罰佢嘅子民。相反，佢係“充滿慈悲嘅”。（以弗所書2:4）

 6．點解法利賽派嘅態度同上帝嘅慈悲有天淵之别？

⁶ 相比之下，法利賽派就對人非常苛刻。例如，一個人犯咗同樣嘅錯超過三次，按照慣例，法利賽派嘅人就唔會再寬恕佢。耶穌用咗一個比喻嚟指出佢哋錯誤嘅態度。喺比喻裏面一個法利賽派嘅人禱告話：“上帝啊，我感謝你，我唔似其他人，敲詐、不義、通姦，亦都唔似呢個收税人。”其實，呢個收税人正喺度好謙卑噉祈求上帝對佢表現慈悲。點解法利賽派唔願意對人表現慈悲？聖經話佢哋“睇唔起人”。（路加福音18:9-14）

7,8．（甲）如果有人得罪咗你，你可以點樣效法耶和華？（乙）點解寬恕人會考驗到我哋嘅謙卑？

⁷ 要效法耶和華，而唔係法利賽派嘅人。要表現慈悲同憐恤。（請讀歌羅西書3:13）一個做法就係，盡量令人覺得向我哋道歉唔係一件難事。（路加福音17:3,4）可以問吓自己：“如果有人多次得罪我，我會唔會樂意寬恕佢？對於一啲傷害咗我嘅人，我會唔會渴望同佢和好如初？”

⁸ 寬恕人真係會考驗到我哋嘅謙卑。法利賽派嘅人完全冇表現謙卑，因為佢哋覺得自己高人一等。但係作為基督徒，我哋要謙卑，“認為其他人比自己優越”，樂於寬恕佢哋。（腓立比書2:3）你會唔會效法耶和華表現謙卑？就好似以色列人要維修好通往庇護城嘅路一樣，我哋亦都要使自己嘅寬恕之“道”暢通無阻。要敏於表現慈悲，唔好輕易發嬲。（傳道書7:8,9）

 9．耶和華點樣向以色列人强調，生命係神聖嘅？

⁹ 設立庇護城嘅一個重要目的係，要保護以色列人避免承擔血債。（申命記19:10）耶和華喜愛生命，憎恨 “使無辜人喪命流血嘅手”。（箴言6:16,17）上帝係公正同聖潔嘅，就算係誤殺嘅案件，佢都唔會忽視。雖然耶和華對誤殺者表現慈悲，但係誤殺者都要將案件交俾長老處理。如果案件被判為誤殺，佢就要留喺庇護城直到大祭司去世。即係話，佢可能要一生都留喺嗰度。耶和華通過呢個安排向以色列人强調，生命係神聖嘅。為咗尊重賜人生命嘅上帝，佢哋要盡力避免任何可能會危害他人性命嘅行為。

10．根據耶穌所講嘅，點解話抄經士同法利賽派一啲都唔重視生命？

¹⁰ 抄經士同法利賽派嘅睇法同耶和華完全相反，佢哋一啲都唔重視生命。點解？耶穌話佢哋：“你哋攞走咗知識嘅鎖匙，自己唔入去，連正入緊去嘅人，你哋都阻止！”（路加福音11:52）佢哋本來應該向人清楚解釋上帝話語嘅意思，幫助人行走永生嘅道路。但係，佢哋反而使人離棄“領人得生命嘅領袖”耶穌，令人走上一條導致永遠滅亡嘅道路。（使徒行傳3:15）抄經士同法利賽派嘅人又高傲又自私，佢哋一啲都唔重視同胞嘅生命同利益。佢哋真係好殘忍，好無情！

11．（甲）使徒保羅點樣表明佢對生命嘅睇法同上帝一致？（乙）喺傳道方面，乜嘢可以幫助我哋懷有保羅嘅態度？

¹¹ 我哋可以點樣效法耶和華嘅榜樣，同時盡力避免抄經士同法利賽派嘅態度？要尊重同珍視我哋寶貴嘅生命。使徒保羅向人徹底作見證，表明佢真係重視生命。結果，佢可以話：“我……冇欠邊個嘅血債。”（請讀使徒行傳20:26,27）不過，保羅傳道並唔係出於責任感或者罪咎感。相反，佢好愛人，好珍視每個人嘅生命。（哥林多前書9:19-23）同樣，我哋對生命嘅睇法都要同上帝一致。耶和華“只願人人最終都悔改”。（彼得後書3:9）噉你呢？你可能睇出如果你培養慈悲，就會受到推動更加熱心傳道，内心亦都充滿喜樂。

12．對上帝嘅子民嚟講，安全點解咁重要？

¹² 如果我哋想好似耶和華一樣重視生命，就需要對安全培養正確嘅態度。喺開車或者工作嘅時候，包括喺建築、維修、來往聚會所嗰陣，都要注意安全。唔好將工作效率、經濟效益，或者時間限期睇得比安全同健康更重要。我哋公正嘅上帝所做嘅一切都係適當平衡嘅。我哋好想效法佢。長老特别需要盡力留意自己同身邊嘅人嘅安全。（箴言22:3）如果長老提醒你要留意安全條例同標準，就要接受勸告。（加拉太書6:1）喺看待生命方面，要同耶和華有同樣嘅睇法，“免得……承擔血債”。

13,14．以色列嘅長老點樣反映出耶和華嘅公正？

¹³ 耶和華要求以色列嘅長老效法佢嘅公正。首先，長老要了解事情嘅真相。跟住，佢哋要仔細衡量殺人犯嘅動機、態度同以往嘅行為，先至決定向唔向佢表現慈悲。為咗反映上帝嘅公正，佢哋需要判斷殺人犯有冇“懷住仇恨”或者“心懷惡意”。（請讀民數記35:20-24）如果有證人出嚟作證，噉最少要有兩個證人嘅指控先可以裁定一個人係咪蓄意謀殺。（民數記35:30）

¹⁴ 了解事情嘅真相之後，長老除咗要考慮佢所犯嘅錯，仲要留意佢嘅為人。佢哋需要有洞悉力，考慮事情背後嘅原因，而唔係只睇表面。更重要嘅係，佢哋需要聖靈嘅幫助去反映出耶和華嘅慈悲、公正以及洞悉力。（出埃及記34:6,7）

15．喺看待罪人方面，耶穌同法利賽派有乜嘢唔同嘅睇法？

¹⁵ 法利賽派嘅人只係留意一個人所犯嘅罪，而冇考慮佢真正嘅為人。佢哋見到耶穌去馬太屋企參加筵席，就問耶穌嘅門徒：“點解你哋嘅老師同收税人、罪人一齊食飯呢？”耶穌回答話：“健康嘅人唔需要醫生，有病嘅人先需要。‘我要嘅係慈悲，唔係祭牲。’你哋去學吓呢句話嘅含意啦。我嚟唔係要召義人，而係要召罪人。”（馬太福音9:9-13）耶穌係咪幫嗰啲有罪嘅人揾藉口？絶對唔係。事實上，耶穌通過佢傳講嘅信息叫嗰啲有罪嘅人悔改。（馬太福音4:17）耶穌留意到至少有一啲“收税人同罪人”想作出改變。佢哋去馬太屋企嘅目的唔係只係去食飯，而係因為“佢哋有好多人都跟隨耶穌”。（馬可福音2:15）可惜嘅係，喺對待人方面，大多數法利賽派嘅人同耶穌嘅睇法好唔一樣。雖然法利賽派嘅人聲稱佢哋崇拜慈悲又公正嘅上帝，但係佢哋冇用上帝嘅觀點去看待人，甚至認為平民百姓都係無藥可救嘅罪人。

16．司法委員會嘅長老需要謹慎判斷乜嘢事？

¹⁶ 今日，長老都要效法“喜愛公正”嘅耶和華。（詩篇37:28）首先，佢哋需要“調查、徹底追問”，確定一個人有冇犯咗嚴重嘅罪。如果有，佢哋就要按照聖經嘅指引去處理案件。（申命記13:12-14）司法委員會嘅長老要謹慎判斷一個有嚴重過犯嘅基督徒係咪真心悔改。有時，真心悔改唔係咁容易睇得出，因為呢個牽涉到一個人嘅觀點、態度同内心狀況。（啟示錄3:3）如果一個犯咗罪嘅人想得到慈悲，就一定要真心悔改。a

17,18．長老可以點樣判斷一個人係咪真心悔改？（請睇吓課文開頭嘅圖片）

¹⁷ 長老同耶和華、耶穌唔一樣，唔知道人内心嘅諗法。如果你係一個長老，可以點樣判斷一個人係咪真心悔改呢？首先，禱告祈求耶和華賜你智慧同辨識力。（列王紀上3:9）其次，查考聖經同忠信奴隸出版嘅書刊，可以幫助你睇出真誠悔改嘅人係“出於敬神嘅態度而傷心”，而唔係“為咗世俗嘅因素而傷心”。（哥林多後書7:10,11）要留意經文點樣描述悔改同唔悔改嘅人，亦都要根據經文分析佢哋嘅感受、態度同行為。

¹⁸ 最後要全面睇吓犯過者，諗吓佢嘅背景、動機同情況。關於會衆嘅元首耶穌，聖經預告：“佢行審判唔會單憑眼見，責備人亦唔係只憑耳聞。佢按正義審判卑微嘅人，憑正直糾正地上謙和嘅人。”（以賽亞書11:3,4）耶穌委派長老去照顧會衆，亦都幫助長老以公正同慈悲施行審判。（馬太福音18:18-20）我哋真係好感激仁慈嘅長老咁關心我哋，努力喺表現慈悲同公正方面立下榜樣！

19．你從庇護城嘅安排學到乜嘢？你想點樣將學到嘅實踐出嚟？

¹⁹ 摩西律法反映出“知識同真理嘅綱領”，幫助我哋了解耶和華同佢嘅正義原則。（羅馬書2:20）例如，長老可以從庇護城嘅安排學到，點樣“按事實秉公審判人”；我哋可以從中學到點樣 “以忠貞之愛同慈悲彼此相待”。（撒迦利亞書7:9）我哋唔需要遵守摩西律法，但係耶和華從來冇改變，對佢嚟講，公正同仁慈依然係好重要嘅。耶和華按照佢嘅形像創造我哋，使我哋可以效法佢嘅特質，向佢尋求庇護。可以事奉咁公正慈悲嘅上帝，真係莫大嘅殊榮！