唔好俾任何事奪去你哋嘅獎賞

1,2．（甲）上帝嘅僕人期待乜嘢獎賞？（乙）乜嘢可以幫助我哋定睛注視前頭嘅獎賞？（請睇吓課文開頭嘅圖片）

好似使徒保羅噉，今日嘅受膏基督徒有寶貴嘅希望，“蒙上帝……召［佢哋］去上面”。（腓立比書3:14）佢哋好期待同耶穌基督喺天上嘅王國一齊統治，幫助人類恢復完美嘅身心。（啟示錄20:6）呢個係幾咁美好嘅希望！而另外嘅綿羊期待得到嘅獎賞係永遠生活喺地上，呢個的確係令人嚮往嘅前景！（彼得後書3:13）

² 為咗幫助受膏基督徒保持忠心，得到獎賞，保羅勸勉佢哋：“你哋要思念嘅，係天上嘅事”。（歌羅西書3:2）佢哋要緊記自己將會承受天上産業呢個希望。（歌羅西書1:4,5）無論我哋嘅希望係喺天上抑或地上，沉思耶和華俾佢子民嘅祝福，可以幫助我哋定睛注視前頭嘅獎賞。（哥林多前書9:24）

 3．保羅提醒基督徒要留意乜嘢危險？

³ 保羅亦都提醒基督徒，有乜嘢危險可能會使佢哋失去獎賞。例如，佢喺寫俾歌羅西會衆嘅信裏面提到，一啲假基督徒認為通過遵守律法就可以得到上帝嘅悦納，而唔需要對基督培養信心。（歌羅西書2:16-18）保羅提到嘅危險直到今日依然存在，而且可能會奪去我哋嘅獎賞。例如，佢解釋點樣抵抗不道德嘅慾望，點樣解決同弟兄姊妹之間嘅矛盾，以及點樣處理同家庭有關嘅難題。今日，保羅嘅勸告對我哋仍然大有幫助。等我哋嚟睇吓，保羅向歌羅西會衆提出基於愛心嘅警告。

 4．點解不道德嘅慾望可以令我哋失去獎賞？

⁴ 保羅提醒弟兄將注意力集中喺天上嘅希望之後，跟住話：“所以，要治死你哋喺地上嘅肢體，根絶淫亂、不潔、唔受控制嘅性慾、有害嘅慾望、貪婪。”（歌羅西書3:5）不道德嘅慾望可以係一種强大嘅力量，破壞我哋同耶和華之間嘅關係，使我哋失去未來嘅獎賞。一個曾經有不道德行為嘅弟兄返翻嚟會衆之後，佢話：“我俾一股强大嘅力量拉住，當我想回頭嗰時已經太遲嘞。”

 5．喺危險嘅環境下，我哋可以點樣保護自己？

⁵ 有啲情況可能會使我哋唔想緊守耶和華嘅道德標準。如果遇到噉樣嘅情況，我哋就要特别小心。例如，兩個人開始拍拖嗰陣，就應該喺接吻、身體接觸、單獨喺一齊等方面定下清楚嘅界限，預先噉做係好明智嘅。（箴言22:3）一個基督徒喺出差或者同一個異性工作嘅時候，可能會受到引誘做出一啲不道德嘅事。（箴言2:10-12,16）如果你處於噉樣嘅環境，你應該表明自己係耶和華見證人，你嘅行為要莊重得體，同埋唔好忘記，調情可以導致悲慘嘅後果。我哋感到沮喪、心情低落嘅時候就更加危險喇。因為喺呢個時候，我哋可能好渴望得到其他人嘅關注，甚至任何人喺感情上俾我哋嘅支持，我哋都想接受。如果你遇到類似嘅情況，就要向耶和華同弟兄姊妹尋求幫助，免得自己失去耶和華嘅獎賞。（請讀詩篇34:18；箴言13:20）

 6．喺選擇娛樂方面，我哋要謹記乜嘢？

⁶ 要治死不道德嘅慾望，我哋就要拒絶不道德嘅娛樂。今日好多娛樂都反映出所多瑪、蛾摩拉人卑劣嘅精神。（猶大書7）商業界嘅人推崇佢哋嘅道德標準，令人覺得發生不道德嘅性行為係無傷大雅嘅，唔會有乜嘢惡果。我哋唔應該放鬆警惕，隨便接受世界提供嘅娛樂。我哋要小心選擇娛樂，唔好俾娛樂妨礙我哋得到永生嘅獎賞。（箴言4:23）

 7．我哋喺基督徒會衆裏面可能會面對乜嘢問題？

⁷ 我哋都好開心成為基督徒會衆嘅一分子。喺聚會裏面學習上帝嘅話語，同弟兄姊妹互相表現愛心、仁慈，可以幫助我哋將注意力放喺未來嘅獎賞之上。不過，有時一啲誤會可能會使弟兄姊妹關係緊張。如果我哋冇及時解決問題，内心就會好容易産生怨恨嘅情緒。（請讀彼得前書3:8,9）

8,9．（甲）培養乜嘢品格可以幫助我哋贏得獎賞？（乙）如果一個基督徒傷害咗我哋，乜嘢可以幫助我哋保持和睦？

⁸ 我哋唔應該俾怨恨嘅情緒奪去我哋嘅獎賞。保羅鼓勵歌羅西嘅基督徒：“你哋既然係上帝所揀選嘅人，係聖潔蒙愛嘅，就要穿上憐恤之情、仁慈、謙卑、温和、耐心。無論邊個有理由對人不滿，都要繼續彼此包容，彼此甘心寬恕。耶和華點樣甘心寬恕咗你哋，你哋亦都要點樣甘心寬恕人。除咗呢一切之外，仲要穿上愛，因為愛能够完美噉維繫團結。”（歌羅西書3:12-14）

⁹ 愛心同仁慈可以幫助我哋彼此寬恕。如果一個基督徒唔仁慈嘅言行傷害咗我哋，我哋要記住，自己亦都曾經講過或者做過唔仁慈嘅事。我哋好感激弟兄姊妹向我哋表現愛心同仁慈，冇將我哋嘅過犯放喺心上。（請讀傳道書7:21,22）我哋特别感激基督仁慈噉將人召集起嚟團結一致支持正確嘅崇拜。（歌羅西書3:15）我哋每個人都愛同一位上帝，傳講同一個信息，面對同樣嘅挑戰。我哋懷住愛心同仁慈彼此寬恕，就能够促進基督徒團結，亦都可以幫助我哋將目光集中喺獎賞之上。

10,11．（甲）點解心懷妒忌好危險？（乙）我哋可以點樣唔俾嫉妒奪去我哋嘅獎賞？

¹⁰ 聖經嘅一啲例子提醒我哋，心懷妒忌可能會奪去我哋嘅獎賞。例如，該隱由於妒忌佢弟弟亞伯就殺咗佢；可拉、大坦同亞比蘭由於妒忌摩西就反叛佢嘅領導；掃羅王亦都由於妒忌大衛就想殺死佢。聖經講得好啱：“邊度有嫉妒、爭勝，邊度就會有混亂同各種卑劣嘅事。”（雅各書3:16）

¹¹ 如果我哋喺内心培養愛同仁慈，就唔會咁容易妒忌其他人。聖經話：“愛係有耐心、和藹仁慈嘅。愛唔嫉妒”。（哥林多前書13:4）為咗唔俾嫉妒喺心裏面扎根，我哋要盡力用上帝嘅觀點睇事情。如果我哋真係將弟兄姊妹視為同一個身體，呢個就會推動我哋表現弟兄之情，亦都同經文所講嘅一致：“［身體］一處得榮耀，各處就一同歡樂。”（哥林多前書12:16-18,26）當某個同工得到祝福嘅時候，我哋唔會妒忌佢，反而會戥佢開心。請睇吓掃羅王個仔約拿單嘅例子。雖然大衛被立為王，但係約拿單冇妒忌佢，反而仲鼓勵佢。（撒母耳記上23:16-18）我哋可唔可以好似約拿單噉，表現愛心同仁慈呢？

12．聽從乜嘢聖經勸告，可以幫助我哋成家人贏得獎賞？

¹² 應用聖經原則能够為家庭帶嚟和平同快樂，亦都可以幫助佢哋贏得獎賞。喺家庭方面，保羅向歌羅西嘅基督徒提出咗乜嘢聖經勸告？佢話：“你哋做妻子嘅，要順服丈夫，呢個喺主睇嚟係合適嘅。你哋做丈夫嘅，要愛妻子，唔好發嬲苦待佢哋。你哋做兒女嘅，要凡事服從父母，因為呢個係主所喜悦嘅。你哋做父親嘅，唔好激怒兒女，免得佢哋灰心喪氣。”（歌羅西書3:18-21）你一定會同意，實踐保羅嘅勸告可以為丈夫、妻子同兒女帶嚟益處。

13．一個基督徒妻子可以點樣幫助不信嘅丈夫接受真理？

¹³ 如果你係一個妻子，而你不信嘅丈夫對你唔好，你可以點樣做呢？你同佢嗌交可唔可以改善你嘅情況呢？就算你嗌贏咗，你又能唔能够令佢接受聖經真理呢？睇嚟唔得。如果你尊重丈夫嘅領導權，就可以促進家庭和睦，榮耀耶和華，甚至可以吸引丈夫接受真理。噉樣，你哋就可以一齊贏得獎賞。（請讀彼得前書3:1,2）

14．如果不信嘅妻子表現唔尊重嘅態度，基督徒丈夫可以點樣做？

¹⁴ 如果你係一個丈夫，而你不信嘅妻子唔尊重你，噉又點呢？通過大聲呼喝嚟顯示邊個喺屋企係話事嘅，會唔會使佢更尊重你呢？一定唔會！上帝想你效法耶穌，仁愛噉行使領導權。（以弗所書5:23）作為會衆嘅元首，耶穌總係仁愛耐心噉對待會衆。（路加福音9:46-48）丈夫效法耶穌嘅榜樣，就可以吸引妻子接受真理。

15．一個基督徒男子點樣表明佢愛妻子？

¹⁵ 耶和華教導做丈夫嘅：“要愛妻子，唔好發嬲苦待佢哋”。（歌羅西書3:19）一個仁愛嘅丈夫會尊重妻子，留心聽佢表達意見，仲會話俾佢知自己好重視佢嘅睇法。（彼得前書3:7）雖然丈夫未必每次都會按照妻子嘅建議去做，不過同妻子商量之後，佢通常可以作出一個更平衡嘅決定。（箴言15:22）一個仁愛嘅丈夫會努力贏得妻子嘅尊重，而唔係夾硬要求妻子尊重佢。一個愛妻子同仔女嘅丈夫會更容易幫助成家人喜樂噉事奉耶和華，從而得到永生嘅獎賞。

16,17．如果你係一個年輕人，你可以點樣避免埋怨父母？

¹⁶ 如果你係一個年輕人，你覺得自己嘅基督徒父母唔明白你嘅感受，又限制你嘅自由，可以點樣做呢？你面對嘅情況可能會使你懷疑，事奉耶和華係咪最好嘅生活方式。但係，如果你因為噉而放棄事奉耶和華，你可能好快就會發現，冇人會好似你嘅基督徒父母同會衆嘅弟兄姊妹一樣咁關心你。

¹⁷ 如果你嘅父母從來都冇糾正過你，你會唔會懷疑佢哋係咪真係關心你呢？（希伯來書12:8）或者你唔鍾意父母管教你嘅方式，不過，與其一味埋怨父母嘅做法，不如嘗試去了解佢哋噉樣做嘅原因係乜嘢，亦都要保持冷靜，盡力避免對佢哋嘅批評有過激嘅反應。聖經話：“約束言語嘅人具有知識，心裏冷靜嘅人明辨事理。”（箴言17:27）要立下目標做一個成熟嘅人。成熟嘅人唔會過度在意人提出勸告嘅方式，而係會冷靜噉接受勸告。（箴言1:8）擁有真正愛耶和華嘅父母係一個好大嘅福分。佢哋真係好想幫助你贏得永生嘅獎賞。

18．點解你想下定決心，定睛注視未來嘅獎賞？

¹⁸ 無論我哋嘅獎賞係喺天上享有不朽嘅生命，抑或喺地上嘅樂園享有永遠嘅生命，我哋人人都熱切盼望美好嘅將來。呢個希望係真實穩確嘅，因為造物主親自作出承諾。關於地上嘅樂園，耶和華預告：“認識［佢］嘅知識必定遍滿大地”。（以賽亞書11:9）到時，地上所有人都會受耶和華教導。呢個的確係值得我哋追求嘅獎賞。所以要緊記耶和華作出嘅應許，唔好俾任何事奪去你嘅獎賞！