受委任嘅弟兄——向提摩太學習

上年，全球有數以萬計嘅耶和華見證人男子受委任成為長老或助理僕人。如果你係其中一位，噉你一定好開心可以得到新嘅服務機會。

不過你可能會有啲擔心，呢個係可以理解嘅。賈森係一位年輕嘅長老，佢話：“一開始被委任嘅時候，我好擔心自己唔能够勝任。”摩西同耶利米受耶和華委派嗰陣，都覺得自己能力不足。（出埃及記4:10；耶利米書1:6）如果你有同感，可以點樣克服呢種感覺並繼續進步呢？請考慮吓提摩太嘅榜樣。（使徒行傳16:1-3）

使徒保羅邀請提摩太同佢一齊從事海外傳道工作嘅時候，提摩太可能係20歲左右。因為年輕，提摩太一開始執行新委派嗰陣可能缺乏自信，猶豫不決。（提摩太前書4:11,12；提摩太後書1:1,2,7）不過，十年之後，保羅同腓立比會衆講：“如果係主耶穌嘅意思，我希望冇幾耐之後就派提摩太去你哋嗰度，……因為冇其他人性情好似佢噉樣”。（腓立比書2:19,20）

乜嘢使年輕嘅提摩太成為一個出色嘅長老？我哋可以從佢身上學到以下六點：

1．佢真誠關心人。保羅同腓立比嘅弟兄姊妹講：“［提摩太］真摯關心你哋嘅事”。（腓立比書2:20）冇錯，提摩太關心人。佢真心希望幫助人親近耶和華，佢亦都甘願為咗其他人嘅益處獻出自己。

可能你見過有啲巴士司機關心準時到站多過關心乘客。我哋要避免有噉樣嘅態度。二十幾年來，威廉一直係一位受人尊敬嘅長老，佢建議新委任嘅弟兄話：“要關愛弟兄姊妹，留意佢哋嘅需要，唔好只係關注會衆嘅事務。”

2．佢最關注嘅係屬靈嘅事。保羅睇出，唔係所有人都好似提摩太噉熱心追求屬靈嘅事，佢話：“其他人都只係求自己嘅利益，唔係求基督耶穌嘅利益。”（腓立比書2:21）保羅寫呢句話嘅時候身在羅馬，佢觀察到當地嘅弟兄姊妹過度忙於個人事務。喺某程度嚟講，佢哋對屬靈嘅事有一種得過且過嘅態度。不過，提摩太就完全唔同！提摩太把握機會推廣好消息，表現出同以賽亞一樣嘅態度——“我喺呢度！請差遣我！”（以賽亞書6:8）

喺個人同屬靈職責方面，你可以點樣保持平衡？第一，要分清主次。保羅勸勉我哋要 “睇清邊啲事更為重要”。（腓立比書1:10）我哋應該將耶和華認為重要嘅事放喺首位。第二，簡化生活，避免浪費時間、精力。保羅鼓勵提摩太 “要遠避年輕人常有嘅慾望，……追求正義、信心、愛心、和平”。（提摩太後書2:22）

3．佢努力從事神聖服務。保羅提醒腓立比嘅弟兄姊妹話：“提摩太表明咗自己嘅為人點樣，呢個你哋都知道。佢為咗推廣好消息，同我一齊辛勞，就好似仔同爸爸噉一齊辛勞。”（腓立比書2:22）提摩太唔係一個做事懶散嘅人。佢同保羅一齊辛勤工作，結果佢哋嘅關係越來越親密。

今日，上帝嘅組織有好多工作要做。呢啲工作使人心滿意足，亦都能够拉近弟兄姊妹之間嘅關係。所以，你可以定立目標，“多做主嘅工作”。（哥林多前書15:58）

4．佢學以致用。保羅寫信俾提摩太話：“你緊緊跟隨我嘅教導、生活方式、目標、信心、耐心、愛心、忍耐”。（提摩太後書3:10）提摩太將學到嘅應用出嚟，所以佢可以勝任更重要嘅職責。（哥林多前書4:17）

你有冇一位屬靈嘅良師益友？如果冇嘅話，你可以試吓結交噉樣嘅朋友。湯姆係一個經驗豐富嘅長老，佢回憶話：“一個有經驗嘅長老特别關心我，又俾咗我好好嘅訓練。我經常請教佢，亦都將佢嘅建議實踐出嚟。我好快就建立咗自信。”

5．佢不斷訓練自己。保羅勉勵提摩太“要以敬虔為目標操練自己”。（提摩太前書4:7）運動員需要教練嘅指導，亦都需要自己不斷練習。保羅鼓勵提摩太話：“你要繼續致力於宣讀、勸勉、教導嘅事，……呢啲事你要思考，要全神貫注，等人人都可以睇得出你嘅長進。”（提摩太前書4:13-15）

你需要繼續提高自己嘅技能。要繼續喺屬靈上進步，熟悉組織對會衆嘅最新指引。另外，要避免變得過度自信。你可能覺得自己有好多經驗，唔需要查考指引都可以成功應付任何情況。要效法提摩太，“時刻留意自己同自己嘅教導”。（提摩太前書4:16）

6．佢倚靠上帝嘅聖靈。保羅鼓勵提摩太，喺傳道工作上“要倚靠住喺［佢哋］裏面嘅聖靈，守護呢個美好嘅信託”。（提摩太後書1:14）如果提摩太想做好交託俾佢嘅傳道工作，就需要倚靠上帝嘅聖靈。

做咗幾十年長老嘅唐納德話：“受委任嘅弟兄一定要珍視自己同上帝嘅關係。噉樣佢哋就會‘力上加力’。如果佢哋祈求上帝賜佢哋聖靈，而且努力培養聖靈嘅果實，噉對會衆嘅弟兄姊妹嚟講，佢哋就的確係上帝嘅恩賜。”（詩篇84:7；彼得前書4:11）

睇到咁多新委任嘅弟兄樂意受耶和華任用，真係鼓舞人心。文章開頭提到嘅賈森弟兄話：“我自從做咗長老之後，學到好多嘢，變得更有自信。而家我真係好鍾意自己嘅委派，亦都將呢個視為莫大嘅殊榮！”

你有冇繼續喺屬靈上進步？效法提摩太嘅榜樣，噉你就會成為上帝賜俾佢子民嘅恩賜。