Éxodo

26 »Zúniluʼ tabernáculo ca né chii tela para yoo de lari de hilu de lino de ni jma galán, hilu azul, hilu moradu de guicha ladi dendxuʼ ne hilu naxiñáʼ rini, ne zuni bordarluʼ querubín lúcani. 2 Cada tela zapa 28 codo* de ziuulaʼ ne tapa codo de xilaga. Ti medida si zapa guiráʼ tela ca. 3 Zaguíbaluʼ gaayuʼ ndaa tela ca para gácacani tobi si ne xcaayuʼ ndaa ca laaca zaguíbaluʼ cani para gácacani tobi si. 4 Zúniluʼ ojal de hilu azul guriá últimu tela de ca primé gaayuʼ tela ni gudíbaluʼ ca, ne laaca zúniluʼ ojal guriá xcaayuʼ tela ni gudíbaluʼ ca, zápacani ojal para iguiidiʼ guiropaʼ ndaa tela ca. 5 Zúniluʼ 50 ojal guriá tela de gaayuʼ ndaa ca ne laaca zúniluʼ 50 ojal lu sti tela de gaayuʼ ndaa ca, ti guiaana ti ojal frente de sti ojal ne racá iguiidiʼ ca tela ca. 6 Zúniluʼ 50 broche de oro ni zaquiiñeʼ para iguiidiʼ guiropaʼ tela ca. Zacá zaca tabernáculo ca tobi si.

7 »Ne laaca zúniluʼ tela para yoo de lari de guicha ladi chiva para guchii tabernáculo ca. Biaʼsi 11 tela para yoo de lari. 8 Cada tela ca zapa 30 codo de ziuulaʼ ne tapa codo de xilaga. Ti medida si zapa 11 tela ca. 9 Zaguíbaluʼ gaayuʼ tela ne aparte zaguíbaluʼ xhoopaʼ ndaa tela ca, ne últimu ndaa ra guiʼdiʼ xhoopaʼ tela ca zuzeechuluʼ ni para guiaanani frente de tabernáculo ca. 10 De racá zúniluʼ 50 ojal guriá tela de gaayuʼ ndaa ni gudíbaluʼ ca, ne laaca zúniluʼ sti 50 ojal lu sti tela de xhoopaʼ ndaa ni gudíbaluʼ ca, ne racá iguiidiʼ ca tela ca. 11 Zúniluʼ 50 broche de cobre ne zucaaluʼ cani lu ca ojal stiʼ guiropaʼ tela ca para iguiidicani; zacá zácacani tobi si. 12 Restu de tela ca zándani. Xcalaa de tela ni guiaana sobra ca zándani atrá de tabernáculo ca. 13 Lu cada ladu ziaana sobra ti codo neza ziuulaʼ tela ca ne zindani dede layú para guchiini tabernáculo ca.

14 »Laaca zúniluʼ ti capa de guidi ladi chivu barracu dieʼ naxiñáʼ ni guirenda tabernáculo ca. Ne luguiáʼ de capa riʼ zaguíxheluʼ sti capa de guidi ladi foca.

15 »Zúniluʼ armazón rectangular para tabernáculo ca. Naquiiñeʼ gácacani de yaga acacia ne zuzuhuaacani. 16 Cada armazón zapa chii codo de ziuulaʼ ne ti codo arondaʼ de xilaga. 17 Ne cada armazón zapa chupa espiga* xagueteʼ, tobi cueʼ stobi, zacá nga naquiiñeʼ gúniluʼ guiráʼ ca armazón stiʼ tabernáculo ca. 18 Zúniluʼ gande armazón para ladu gueteʼ stiʼ tabernáculo ca, zuyadxícani ladu gueteʼ.

19 »Laaca zúniluʼ 40 base de plata ni napa huecu para cuʼluʼ cani xagueteʼ de gande armazón ca: xagueteʼ de ti armazón ziuu chupa base ra guiaba guiropaʼ espiga stiʼ armazón ca, ne xagueteʼ de xcaadxi armazón ca laaca ziuu chupa base ra guiaba guiropaʼ espiga stícani. 20 Zúniluʼ gande armazón para sti ladu tabernáculo ca, ladu guiáʼ. 21 Laaca zúniluʼ 40 base de plata stícani: xagueteʼ de ti armazón ziuu chupa base ne xagueteʼ de xcaadxi armazón ca laaca ziuu chupa base. 22 Ne para atrá de tabernáculo ca, ladu riaaziʼ gubidxa, zúniluʼ xhoopaʼ armazón. 23 Laaca zúniluʼ chupa armazón ni gaca squina atrá de tabernáculo ca. 24 Zápacani chupa pieza, zuzulúcani xagueteʼ ne zaguiidicani luguiáʼ ra chichuu primé aníu. Zacá nga naquiiñeʼ gaca guiropaʼ armazón riʼ, ne guiropaʼ ni nga gaca squina. 25 Ne ziuu xhono armazón ne zápacani 16 base de plata: xagueteʼ de ti armazón ziuu chupa base ne xagueteʼ de xcaadxi armazón ca laaca ziuu chupa base.

26 »Zúnilu’ barra de yaga acacia: gaayu’ para guinaaze ca armazón ti ladu sti’ tabernáculo ca, 27 gaayu’ para guquiidilu’ ca armazón sti ladu tabernáculo ca ne xcaayu’ barra para guinaaze ca armazón neza atrá sti’ tabernáculo ca, ladu riaazi’ gubidxa. 28 Barra che’ galaa tabernáculo ca, zieni galaa de ca armazón ca, ne zadíʼdini ti punta hasta sti punta.

29 »Zuni forrarluʼ ca armazón ca de oro ne zúniluʼ aníu de oro ra tidiʼ ca barra stini. Laaca zuni forrarluʼ ca barra ca de oro. 30 Naquiiñeʼ guzaʼluʼ tabernáculo ca casi diseñu ni bilueeʼ lii lu dani ca.

31 »Zúniluʼ ti cortina de hilu azul, hilu moradu de guicha ladi dendxuʼ, hilu naxiñáʼ rini ne hilu de lino de ni jma galán. Ne zaca bordar querubín luni. 32 Zugaandaluʼ ni lu tapa columna de yaga acacia ni nuu forradu de oro. De oro gaca ca gandxu ra gándani, ne ca columna ca zuzuhuaacani lu tapa base de plata. 33 Zugaandaluʼ cortina ca xagueteʼ de ra nuu ca broche ca, ne zaguuluʼ arca ra riaapaʼ Testimonio ca deche cortina ca. Zuni dividir cortina ca Santo ne Santísimo. 34 Zaguíxheluʼ tapa que ruaaʼ arca ra riaapaʼ Testimonio, ni chichuu ra Santísimo.

35 »Sti ladu de cortina ca* zuzuhuaaluʼ mexaʼ que. Frente de mexaʼ ca zuzuhuaaluʼ candelabru que. Ziaanaʼ mexaʼ ca ladu guiáʼ de tabernáculo ca, ne candelabru ca ziaanani ladu gueteʼ. 36 Para entrada stiʼ tabernáculo ca zúniluʼ ti cortina lu ti telar* de hilu azul, hilu moradu de guicha ladi dendxuʼ, hilu naxiñáʼ rini ne hilu de lino de ni jma galán. 37 Ne para cortina riʼ zúniluʼ gaayuʼ columna de yaga acacia ni gaca forrar de oro. Zúniluʼ gandxu de oro lu ca columna ca ne gaayuʼ base de cobre ni guca fundir para laacani.