Jonás

4 Peru guizáʼ bidxiichi Jonás pur ni bizaaca que, biaʼ que ñati xiana si. 2 Ngue runi biʼniʼ orarbe Jehová: «Jehová, ¿ñee cadi ndiʼ nga ni guníʼ iqueʼ zazaaca dxi nuaaʼ xquidxeʼ la? Ngue runi, primeca ni bineʼ nga guyaaʼ Tarsis; purtiʼ nannaʼ nácaluʼ ti Dios ni riá ne napa misericordia, nápaluʼ paciencia* ne qué rusaana de gannaxhiiluʼ,* riuubaʼ ladxidoʼloʼ ora gúʼyaluʼ cayacaná binni. 3 Ay, Jehová, canabaʼ lii guutiluʼ naa, purtiʼ jma galán gateʼ que guibáneruaʼ».

4 Para gunabadiidxaʼ Jehová laabe: «¿Ñee rábiluʼ jneza nga guidaaluʼ xiana* zacá la?».

5 Óraque biree Jonás de ndaaniʼ guidxi que ne yetí neza ra rindani gubidxa. Raqué bíʼnibe ti ramadahuiiniʼ ne guribe lu bandáʼ stini para gúʼyabe xi guizaaca guidxi que. 6 De raqué, biʼniʼ Jehová guindani ti lubáʼ guitu para cuʼ bandáʼ ique Jonás, ti cadi tan guniná gubidxa laa. Ngue runi guizáʼ guyuulaʼdxiʼ Jonás lubáʼ guitu que.

7 Peru sti dxi que, birá si gueelaʼ, biseendaʼ Dios ni dxandíʼ ti bicutiʼ, gudome lubáʼ guitu que ne bibídxini. 8 Ne ora biree gubidxa, laaca biseendaʼ Dios ti bi ndaʼ ni biasa neza ra rindani gubidxa, tantu cuzaaquiʼ gubidxa que ique Jonás dede cadeeguʼ. Ne cadi cusaanabe de guinábabe gátibe. Ne nabe: «Jma galán gateʼ que guibáneruaʼ».

9 Óraque gunabadiidxaʼ Dios Jonás: «¿Ñee rábiluʼ nápaluʼ razón guidaaluʼ xiana pur bibidxi lubáʼ guitu ca la?».

Para bicábibe: «Napaʼ razón para guidxiicheʼ ne guizáʼ cadxiicheʼ dede nuaaʼ gateʼ». 10 Peru ná Jehová rabi laabe: «Pa cayaluʼ lubáʼ guitu ca, nin ndaʼ qué ñúniluʼ gastiʼ para nigaani, ti gueelaʼ si bigaani ne ti gueelaʼ si bibídxini. 11 ¿Ñee cadi laaca naquiiñeʼ guiaʼyaʼ Nínive, guidxi risaca ri’, ra nuu jma de ti gayuaa gande mil binni ni qué lica gánnacaʼ xii nga ni jneza ne ni cadi jneza la? Nga ndaʼ cadi caguaaʼ cuenta guiráʼ ca maniʼ stícabe».