Colosenses

2 Purtiʼ racalaʼdxeʼ gánnatu pabiáʼ nuaaʼ gacaniaʼ laatu, ne zaqueca nuaaʼ gacaniaʼ guiráʼ ca ni nuu Laodicea, ne guiráʼ ca ni qué huayuuyaʼ naa. 2 Ni racalaʼdxeʼ nga gatadxí ladxido’to, chu’tu tobi si ne gannaxhiisaatu. Zacá zacaatu guiráʼ ndaayaʼ ni ricaa tuuxa ora guiene chaahuiʼ ne guiziidiʼ chaahuiʼ secretu sagradu stiʼ Dios: laani nga Cristu. 3 Laabe nga gucuaabe guendabiaani’ ne laabe nga ni jma riene,* ne zeeda gaca ca cosa riʼ casi ti tesoro. 4 Cayabeʼ ndiʼ laatu ti cadi chuʼ tu quiteʼ laatu né diidxaʼ sicarú. 5 Neca qué guinneʼ ra nuutu, peru nuuné ladxiduáʼ laatu,* ne riuaaʼ nayecheʼ ora guuyaʼ cayúnitu ca cosa ca jneza ne pabiáʼ naguidxi fe nápatu Cristu.

6 Nga runi, cumu maʼ xpinni Cristu Jesús, Señor stinu, laatu la? cadi guixéletu de laa. 7 Ne casi maʼ biziiditu, fe ni nápatu Cristu naquiiñeʼ gacaneni laatu gápatu stipa ne guzuhuaatu dxiichiʼ casi ti yaga ni napa xcu gueteʼ. Ne cadi gusaana de gudiitu xquixe peʼ Dios.

8 Lachuu cuidadu cadi guchenda tuuxa laatu né ni zeeda si de xquendabiaaniʼ, purtiʼ zeeda ni de tradición stiʼ binni guidxilayú ne modo riníʼ íquecaʼ ne cadi modo rusiidiʼ Cristu. 9 Purtiʼ luguiabe nga nuu guiráʼ ca cualidad stiʼ Dios. 10 Nga runi, pur laabe nápatu guiráʼ xixé cosa, ne laabe nga xaíque stiʼ guiráʼ gobiernu ne autoridad. 11 Ra maʼ nácatu xpinni Cristu laaca maʼ guca circuncidartu* peru cadi binni biʼniʼ ni laatu, sínuque gúcatu ni ra bicaanatu ca deseu malu stiʼ cuerpu stitu, purtiʼ zacá nga naquiiñeʼ gaca circuncidar ca xpinni Cristu. 12 Purtiʼ bigaachinetu laabe lu bautismo stibe, ne cumu maʼ xpínnibe laatu la? juntu bibaninetu laabe pur fe ni nápatu lu poder stiʼ Dios, ni bisibani laabe.*

13 Neca guyuutu casi gueʼtuʼ pur guiráʼ donda stitu ne pur qué ñaca circuncidartu,* bisibani Dios laatu juntu né laabe. Bisihuinni Dios pabiáʼ nachaʼhuiʼ ra biʼniʼ perdonar guiráʼ pecadu stinu 14 ne bixhiá Ley ni napa stale regla ni bicaa binni, ni ruluíʼ laanu paraa cucheʼnu. Bixhiabe ni ra gutiʼ Cristu lu yaga.* 15 Laabe* biʼniʼ ganarbe ca gobiernu ne ca autoridad, ne bizuhuaabe laacaʼ nezalú guiráʼ binni para guihuinni maʼ biʼniʼ ganarbe laacaʼ, ne yenebe laacaʼ para guieguyoocaʼ.

16 Nga runi, cadi gudiitu lugar chuʼ tu guni juzgar laatu pur ni goto o pur ni guetu o pur cayuni celebrartu ti saa o pur cayuni celebrartu beeuhuiiniʼ* o ti sábadu.* 17 Purtiʼ naca ca cosa riʼ ti bandáʼ si stiʼ ca cosa ni chigueedaruʼ, peru bisihuinni Cristu xii nga ni dxandíʼ. 18 Nuu binni riuulaʼdxiʼ gusihuinni casi ora humilde laa ne riuulaʼdxiʼ guni adorar ca ángel, peru cadi gudiitu lugar gucueeza ca binni ca laatu de guicaatu premiu ni nuu para laatu. Nabé riuulaʼdxiʼ ca binni riʼ gúnicaʼ guiráʼ ni ruuyacaʼ ne riníʼ íquecaʼ casi riníʼ ique binni guidxilayú. 19 Ti binni naca zacá la? cadi nuu tobi si né Cristu. Laa nga ique cuerpu ca ne rudii guiráʼ ni caquiiñeʼ ni, ne racané para chuʼ ca parte stini tobi si ne riquiiñeʼ Dios laa para guiniisi guidubi naca cuerpu ca.

20 Pa maʼ gutinetu Cristu ra bicaanatu modo riníʼ ique binni guidxilayú, ¿xiñee nabánitu casi ora nácarutu parte de guidxilayú pue? ¿Xiñee de yanna ruzuubatu diidxaʼ ora rabi binni laatu 21 «cadi guinaazeluʼ, cadi guni pruébaluʼ, cadi cánaluʼ» yaʼ? 22 Naca guiráʼ ndiʼ cosa ni zanitilú ora iquiiñeʼ, purtiʼ naca ni mandatu ne ni rusiidiʼ binni. 23 Ruluíʼ racané ni rusiidicabe riʼ para chuʼ xpiaaniʼ binni purtiʼ laacabe nga riguíxhecabe modo guni adorar binni Dios ne rúnicabe casi ora humilde laacabe, runinácabe cuerpu stícabe, peru qué racané diʼ ca ndiʼ para gucaanáʼ binni ca cosa malu ni runi desear xcuerpu.