Primé carta stiʼ Juan

4 Hermanu ni nadxieeʼ caʼ, cadi guni cretu intiica profecía,* sínuque laguuyaʼ chaahuiʼ* pa dxandíʼ zeeda ca profecía ca de Dios, purtiʼ maʼ canazá stale falsu profeta ndaaniʼ guidxilayú.

2 Sicaríʼ nga zanda gánnatu pa zeeda ti profecía de Dios: profecía ni ruzeeteʼ beeda gaca Jesucristu binni guidxilayú, zeeda ni de Dios. 3 Peru intiica profecía ni ruzeeteʼ cadi dxandíʼ beeda gaca Jesús binni guidxilayú, cadi zeeda ni de Dios. Zeeda profecía ca de anticristu,* ni maca binadiágatu gueeda que ne yanna maʼ nuu ndaaniʼ guidxilayú.

4 Xiiñehuiineʼ caʼ, laatu zeedatu de Dios ne maʼ biʼniʼ ganartu ca falsu profeta, purtiʼ jma nandxóʼ ni nuuné laatu tobi si que ni nuuné guidxilayú tobi si.* 5 Zeedacabe de guidxilayú, nga runi riníʼcabe cosa ni zeeda de guidxilayú ne rucaadiaga binni guidxilayú laacabe. 6 Laanu ziúpanu de Dios. Ni runibiáʼ Dios la? rucaadiaga laanu; ni cadi zeeda de Dios la? qué rucaadiaga laanu. Zacá nga rudiʼnu cuenta gunáʼ nga profecía ni dxandíʼ ne profecía ni cadi dxandíʼ.

7 Hermanu ni nadxieeʼ caʼ, cadi gusaana de gannaxhiisaanu, purtiʼ de Dios nga zeeda guendarannaxhii, ne ni rannaxhii la? xiiñiʼ Dios laa ne runibiáʼ Dios. 8 Ni cadi nadxii stobi la? qué runibiáʼ Dios, purtiʼ Dios nga guendarannaxhii. 9 Sicaríʼ nga bisihuinni Dios nadxii laanu: biseendaʼ Dios tobi lucha Xiiñiʼ ndaaniʼ guidxilayú para gudii laanu guendanabani ni qué zaluxe. 10 Sicaríʼ rihuinni xii nga guendarannaxhii: cadi laadinu nga gunnaxhiinu Dios, sínuque laabe nga gunnaxhiibe laanu, ne biseendabe Xiiñibe casi ti sacrificiu para ganda chuʼnu tobi si né laabe sti biaje* ne para guixá ca pecadu stinu.

11 Hermanu ni nadxieeʼ caʼ, pa gunnaxhii Dios laanu zacá, laanu laaca nuunu obligadu gannaxhiisaanu. 12 Guirutiʼ qué huayuu dxi guʼyaʼ Dios. Pa qué gusaana de gannaxhiisaanu la? nuu Dios né laanu ne jmaruʼ si zahuinni nadxiibe laanu.* 13 Pur ndiʼ nga nánnanu nuunu tobi si né laabe ne laabe nuube tobi si né laanu:* purtiʼ maʼ bidiibe laanu espíritu stibe. 14 Laapedu bidúʼyadu biseendaʼ Bixhózenu Xiiñiʼ para gulá binni guidxilayú ne de laani nga cayuínedu binni. 15 Guiráʼ tu guni cré* Jesús nga Xiiñiʼ Dios, nuu Dios tobi si né laa ne laa nuu tobi si né Dios.* 16 Nánnanu nadxii Dios laanu ne runi crenu ni.

Dios nga guendarannaxhii, ne ni qué gusaana de gannaxhii la? nuu tobi si né Dios ne nuu Dios tobi si né laa.* 17 Ne pa dxandíʼ nadxiinu Dios,* zanda guininu né confianza dxi gueeda juiciu, purtiʼ nácanu casi Jesucristu ndaaniʼ guidxilayú riʼ. 18 Gastiʼ guendaridxibi lu guendarannaxhii. Nga runi, ora perfectu guendarannaxhii stinu la? ribeeni guendaridxibi nuu luguianu, purtiʼ rucueeza guendaridxibi ca laanu. Ndiʼ nga laani: ti binni ni ridxibi la? cadi perfectu diʼ guendarannaxhii stiʼ. 19 Randa rannaxhiinu purtiʼ laabe gunnaxhiibe laanu primé.

20 Pa chuʼ tu guiníʼ «Nadxieeʼ Dios» peru nanalaʼdxiʼ hermanu stiʼ la? rusiguii. Purtiʼ pa cadi nadxiibe hermanu stibe nin ne ruuyabe laa, ximodo zanda gannaxhiibe Dios pa qué ruuyabe laa. 21 Ne ndiʼ nga mandamientu bidiibe laanu: tutiica gannaxhii Dios, laaca naquiiñeʼ gannaxhii hermanu stiʼ.