Génesis

13 Biree Abrán de Egipto ne zeʼ Négueb. Zinebe xheelabe ne zinebe Lot ne guiráʼ ni nápabe. 2 Gupa Abrán stale maniʼ, plata ne oro. 3 Despué bireebe de Négueb ne yendézabe gadxé gadxé lugar hasta Betel. Ne yendabe ti lugar ni nuu entre Betel ne Hai, ra maca bicuibe yoo de lari stibe 4 ne ra maca bíʼnibe ti altar. Lugar que bicaabe ridxi lá Jehová.

5 Yanna, Lot la? rinebe Abrán ra maʼ zeʼ ne laaca nápabe dendxuʼ, vaca ne stale yoo de lari. 6 Peru, cumu maʼ bidale cosa stícabe la? maʼ qué rugaanda ca layú que para chúʼcabe juntu ti lugar si. 7 Nga runi gudinde ca ni rapa ca maniʼ sti Abrán ne ca ni rapa ca maniʼ stiʼ Lot. (Para tiempu que, nabeza ca cananeu ne ca perizita ndaaniʼ guidxi que). 8 Ngue runi gudxi Abrán Lot: «Biaa, laanu la? bíʼchinu. Cadi naquiiñeʼ tíndenu, ne cadi naquiiñeʼ tinde ca ni rapa ca maniʼ stinu. 9 ¿Cadi dxandíʼ zanda cheluʼ ra tiica lugar stiʼ guidxi riʼ la? Canabaʼ lii pa zanda guixélenu. Pa cheluʼ ladu bigaʼ, naa ziaaʼ ladu derechu. Peru pa cheluʼ ladu derechu, naa ziaaʼ ladu bigaʼ». 10 Óraque biiyadxí Lot región stiʼ Jordán hasta Zóar. Biiyabe nácani ti región ra nuu ziáʼ nisa casi jardín stiʼ Jehová que ne casi ca layú stiʼ Egipto. Zaqué nga gúcani ante gunitilú Jehová Sodoma ne Gomorra. 11 Gulí Lot guidubi región stiʼ Jordán ne yenebe guiráʼ yoo de lari* stibe ladu rindani gubidxa stiʼ región que. Zaqué nga bixélecabe. 12 Yendeza Abrán lu layú stiʼ Canaán. Peru Lot yendeza gaxha de ca guidxi ni nuu lu región stiʼ Jordán ne despué bicuí yoo de lari stiʼ gaxha de Sodoma. 13 Peru guizáʼ malu ca binni de Sodoma ne nabé naroʼbaʼ ca pecadu ni rúnicaʼ nezalú Jehová.

14 Bixeleʼ si Lot de Abrán, gudxi Jehová Abrán: «Por favor, gundisalú. Dede ra zuhuaaluʼ ca, biiyaʼ ladu guiaʼ, ladu gueteʼ, ladu rindani gubidxa ne ladu riaaziʼ gubidxa. 15 Guidubi layú ni cayuuyadxiluʼ ca zudieeʼ ni lii ne ca ni zá de lii,* ne qué zusaana de gácani stitu. 16 Zutaleʼ ca ni zá de lii, zácacabe stale casi yudé ni nuu lu guidxilayú. Tuuxa ni zanda ugabaʼ yudé ni nuu lu guidxilayú zanda ugabaʼ ca ni zá de lii. 17 Biasa, guzá lu layú riʼ, neza ziuulaʼ ne neza xilaga ni, purtiʼ lii nga chigudieeʼ ni». 18 Para biree Abrán zeʼ ne gulézaruʼ ndaaniʼ yoo de lari. Gudiʼdiʼ si tiempu, yendabe ra nuu ca yaga naroʼbaʼ stiʼ Mamré, ndaaniʼ guidxi Hebrón. Gulézabe raqué ne bíʼnibe ti altar para Jehová.