Ñee rietenaláʼdxiluʼ gudiiluʼ xquíxepeʼ la?

MAʼ GUDOLOʼ yannadxí la?... Nannuʼ tu biʼniʼ guendaró ca la?... Zándaca jñaaluʼ biʼniʼ ni o sti binni. Yanna, xiñee naquiiñeʼ gudiʼnu xquíxepeʼ Dios pur guendaró ca yaʼ.... Purtiʼ laabe nga rusiniisibe ca yagahuiiniʼ ni rudii ni guidoʼno. Peru, laaca riquiiñeʼ gudiʼnu xquíxepeʼ cani runi ni guidoʼno o cani ruzuhuaa ni lu mexaʼ.

Nuu tiru rusiaandanu gudiʼnu xquíxepeʼ stuudxi binni pur ca cosa galán rúnicabe pur laanu, cadi dxandíʼ nga la? Dxi guyuu Maestru Ni Jma Nanna Gusiidiʼ que lu Guidxilayú riʼ, tuudxi binni gupa lepra biaandaʼ laacaʼ nudiicaʼ xquíxepeʼ laabe.

Ñee nannuʼ xii nga lepra la?... Nga nga ti guendahuará ni rusaba beela ladi binni. Ca dxi bibani Jesús, cani napa lepra que riquiiñeʼ guixálecabe de stuudxi binni. Pa binni ni napa lepra riʼ gúʼyabe zidxiña tuuxa laabe la? naquiiñeʼ gábibe laa huarabe para guixaleʼ. Ne zaqué rúnicabe para cadi guicá diʼ guendahuará que xcaadxi binni.

Jesús nabé gúcabe nachaʼhuiʼ ne binni ni gupa lepra. Ti dxi gudíʼdibe ti guidxihuiiniʼ ni nuu neza zécabe Jerusalén. Ora guyuube ndaaniʼ guidxihuiiniʼ que, chii binni ni napa lepra bidxíñacaʼ laabe. Gúnnacabe Dios nga bidii poder Jesús para gusianda guiráʼ xixé guendahuará.

Cani huará que, qué nidxíñacaʼ Jesús sínuque biaanacaʼ zituhuiiniʼ. Peru nannadxíchicabe zanda gusianda Maestru Ni Jma Nanna Gusiidiʼ que laacabe. Ngue runi, ora bíʼyacabe laabe la? bicaacabe ridxi: «Jesús, Ma[e]stru, biá laadu».

Ñee rialuʼ binni huará la?... Jesús biá laacabe. Purtiʼ nánnabe pabiáʼ naná nga gapa binni lepra. Ngue runi bicábibe laacaʼ: Laché, lachiguluíʼ laatu ca ni ruzaaquiʼ guʼxhuʼ ca (Lucas 17:11-14).

Xiñee gudxi Jesús laacabe gúnicabe ngue yaʼ. Pur ley ni bidii Jiobá xquidxi, ni caníʼ xi guni binni ni napa lepra. Ley que na naquiiñeʼ guʼyaʼ ni ruzaaquiʼ guʼxhuʼ que ladi binni huará que ne gábibe laa pa maʼ bianda de guendahuará stiʼ. Ne ora maʼ bianda la? maʼ zanda chuʼ lade binni ni nazaaca (Levítico 13:16, 17).

Peru cani napa lepra que huarárucaʼ. Yanna pue, ziécabe ra nuu ni ruzaaquiʼ guʼxhuʼ que casi gudxi Jesús laacabe la?... Ya, guyécabe oraqueca. Dxandipeʼ biʼniʼ crécabe zusianda Jesús laacabe. Xi guca despué yaʼ.

Zérucabe neza ra nuu ni ruzaaquiʼ guʼxhuʼ que, mápeca gastiʼ guendahuará que. Biá ládicabe ne biándacabe. Nga nga ndaayaʼ gucuaacabe pur biʼniʼ crécabe poder stiʼ Jesús. ¡Guizáʼ biéchecabe! Peru, nouʼ xi naquiiñeʼ ñúnicabe para nusihuínnicabe pabiáʼ cayéchecabe pur ni guca riʼ yaʼ. Xi ñúniluʼ yaʼ....

Tobi de ca hombre que bibiguetaʼ ra nuu Jesús ne bizulú bisisaca Jiobá, ne guníʼ stale cosa sicarú de laabe. Ngapeʼ nga ni naquiiñeʼ gúnibe, purtiʼ ne poder stiʼ Dios nga biándabe. Ne hombre que biaba xañee Maestru Ni Jma Nanna Gusiidiʼ que ne bidiibe xquíxepeʼ laa. Biéchebe stale purtiʼ bisianda Jesús laabe.

Peru, xtuudxi hombre que yaʼ. Jesús gunabadiidxaʼ: Ñee cadi chii hombre nga bianda la? laga xcaʼ que yaʼ, gunáʼ laacaʼ. Tobi si bibiguetaʼ para gusisaca Dios la?

Ya, dxandíʼ. Lade chii que ti hombre si bisisaca Dios, ne bibiguétabe para bidiibe xquíxepeʼ Jesús. Hombre que de Samaria laa, de sti guidxi. Xcaʼ que, qué nudiidicaʼ xquíxepeʼ Dios nin Jesús (Lucas 17:15-19).

Tu tobi de ca hombre que ruluiʼluʼ yaʼ. Cadi dxandíʼ riuláʼdxinu gácanu casi hombre de Samaria que la?... Nga runi, ora tuuxa guni xiixa ni galán pur laanu, xi naquiiñeʼ guietenaláʼdxinu yaʼ.... Gudiʼnu xquíxepeʼ laabe. Neca riaandaʼ binni gúnini, galán gudiʼnu xquíxepeʼ, purtiʼ nga rusiecheʼ Jiobá Dios ne Xiiñibe, Jesús.

Pa guiníʼ íqueluʼ la? zannuʼ pabiáʼ maʼ huayacané stuudxi binni lii. Casi lii, ñee huayuu ora gaca huaraluʼ la?... Zándaca qué huayaca huaraluʼ casi ca chii hombre gupa lepra que, peru huayápaluʼ guidxagá nadipaʼ o ti yuubaʼ ndaaniʼ. Ñee guyuu tu gupa lii la?... Zándaca bidiicabe lii xiixa remediu ne gúpacabe lii. Biécheluʼ pur gucanécabe lii la?...

Samaritanu que bidiibe xquíxepeʼ Jesús pur bisianda laabe, ne nga bisiecheʼ Jesús. Ñee raʼbuʼ qué ziecheʼ jñaaluʼ ne bixhózeluʼ ora gudiiluʼ xquíxepeʼ laacabe ora gúnicabe xiixa pur lii la?... Ziéchecabe pue.

Nuu binni runi xiixa pur lii guiráʼ dxi o guiráʼ semana. Zándaca nga nga xhiiñacabe ne riuláʼdxicabe gúnicabe ni. Peru málasi guiaandaʼ lii gudiiluʼ xquíxepeʼ laacabe. Zándaca maestra stiluʼ guni stipa pur gusiidiʼ lii. Nga nga dxiiñaʼ stibe, peru dxandipeʼ ziéchebe pa gudiiluʼ xquíxepeʼ laabe pur ni cayúnibe ca.

Nuu tiru stuudxi binni runi xiixa pur laanu. Ñee huayacanécabe lii gualuʼ xiixa ni nanaa la? o huatiidicabe lii gueta ora maʼ cayoto. Guizáʼ galán gudiiluʼ xquíxepeʼ laacabe pur ca cosahuiiniʼ ca.

Pa guietenaláʼdxinu gudiʼnu xquíxepeʼ ca binni nuu gaxha de laanu la? cadi nagana diʼ zaca para laanu gudiʼnu xquíxepeʼ Bixhózenu ni nuu guibáʼ. ¡Ne stálepeʼ nga ni cudiibe laanu para gudiʼnu xquíxepeʼ laabe! Bidiibe laanu guendanabani ne guiráʼ ni runi ni nayecheʼ. Pur nga runi, naquiiñepeʼ gusisácanu Dios guiráʼ dxi ra guininu puru si ni galán de laabe.