Zanda gudxiiluluʼ intiica guendanagana

CA DXI nagana cabáninu yanna riʼ la? nabé cayuni huantar binni stale guendanagana. Peru ca xpinni Cristu nánnacaʼ ximodo gudxiilucaʼ guirácani purtiʼ racané ca conseju stiʼ Dios laacaʼ ne purtiʼ nadxiicaʼ laabe. Ximodo racané ca ndiʼ laacabe yaʼ. Para gánnanu ximodo la? guidúʼyanu ti ejemplu ni guníʼ Jesucristu ra bizeetebe zeeda gaca ca discípulo stibe «casi ti hombre ni nuu xpiaaniʼ, bicuí lidxi lu guie». Sicaríʼ guníʼ Jesús: «Biaba nisa guie bidxá guiiguʼ, biete bi yooxhoʼ, ne irá nga bidxela saa yoo que, peru qué ñaba ni purti zuba ni lu guie» (Mateo 7:24, 25).

Neca nuu xpiaaniʼ hombre ni cayeeteʼ lu ejemplu riʼ la? bidxaagalube guendanagana, laacani nga nisaguié que, guiiguʼ que ne bi yooxhoʼ que. Nga runi cadi na diʼ Jesús maʼ qué liica zadxagalú ca discípulo stibe guendanagana ne cadi nádibe qué liica ziuu ca xpínnibe xizaa (Salmo 34:19; Santiago 4:13-15). Ni cusiidibe lu ejemplu ca nga zanda chuʼ ca xpinni Dios listu para guidxagalucaʼ intiica guendanagana gápacaʼ.

Sicaríʼ guniʼbe ora bizulube ejemplu ca: «Tutiica gucaa diaga ca diidxa riʼ ne guni ni na cani la? zeda gune laa casi ti hombre ni nuu xpiaaniʼ, bicuí lidxi lu guie». Rihuínnica cadi caníʼ diʼ Jesús de ti yoo ni rucuí binni, sínuque ximodo naquiiñeʼ guibani binni. Binni ni nuu xpiaaniʼ ne riníʼ ique jneza la? rinanda ni bisiidiʼ Cristu lu guiráʼ cani runi, zacá nga casi ñaca nucuibe lídxibe lu guié. Guié ni caninu riʼ la? cadi luguiáʼ diʼ nuuni, purtiʼ hombre ni rieteʼ lu ejemplu que la? gupa xidé «gudaañe guete dede yendá» ra nuuni (Lucas 6:48). Zacagá nga runi ca discípulo stiʼ Jesús ora rúnicaʼ stipa para gápacaʼ guiráʼ ca guenda ni riuulaʼdxiʼ Dios ti ganda chuʼcaʼ gaxha de laabe (Mateo 5:5-7; 6:33).

Xi raca ora ridxagalú ca xpinni Cristu guendanagana ni rucaa laacaʼ gusihuínnicaʼ pa dxandíʼ runi crecaʼ guiráʼ ni bisiidiʼ Cristu yaʼ. Ora rúnicabe guiráʼ ni bisiidiʼ Jesús ne rápacabe ca guenda stibe la? racané nga laacabe gápacabe stipa para gudxiilúcabe intiica guendanagana gápacabe yanna, ne jmaruʼ si zacanécani laacabe para guzuhuaacabe dxiichiʼ ora gueeda Armagedón (Mateo 5:10-12; Apocalipsis 16:15, 16). Guiráʼ binni ni zinanda cani bisiidiʼ Cristu la? maʼ nanna ximodo gudxiilú guiráʼ guendanagana ni zeeda gaca casi bi yooxhoʼ o nisaguié que. Lii la? laaca zanda gannuʼ ximodo gudxiiluluʼ cani casi laacabe (1 Pedro 2:21-23).