Bidxiña Dios

«Riguixhe dxí [Dios] ladxidóʼ no» 2 Corintios 1:3, 4

NABÉ nga ridxaagalú binni stale cosa ni rusiuubaʼ ladxidóʼ, ni rucaa laa guiníʼ ique maʼ qué zanda guni xiixa ne guni sentir nuu stubi. Guiráʼ ca cosa riʼ rucaacani binni chuʼ triste ne nuu tiru dede maʼ qué ridxela xi guni. Zándaca guiníʼ íquenu pa nuu tu zanda gacané laanu ora maʼ nuunu zacá. Ca diidxaʼ ni bicaa apóstol Pablu lu 2 Corintios 1:3, 4, cusihuinni nuu tu zanda gacané laanu guiráʼ ora, laabe nga Jiobá, Dios stinu.

Lu versículo 3 ca na laabe nga «Bixhoze nu» ni «riá laanu». Xi zanda guiénenu ne ca diidxaʼ ca yaʼ. Diidxaʼ «riá laanu» ca zeedani de ti diidxaʼ griegu ni riníʼ guiuubaʼ ladxidóʼ tuuxa ora guʼyaʼ cayacaná stobi.a Nga runi ca binni ni rusiene xi riníʼ ca diidxaʼ ca nacaʼ zanda guininu ni sicaríʼ: «Bixhózenu ni nabé rizaalaʼdxiʼ laanu». Zacá nga Dios purtiʼ qué riuubaʼ si ladxidoʼbe ora gúʼyabe cayacananu, sínuque rucaani laabe gúnibe xiixa pur laanu. Cadi dxandíʼ rucaa nga laanu guidxíñanu jma gaxha de laabe la?

Pablu laaca caníʼ naca Jiobá, «Dios stinu ne riguixhe dxí be ladxidóʼ no». Diidxaʼ «riguixhe dxí be» ni biquiiñeʼ Pablu lu diidxaʼ griegu ca riniʼni «gacanécabe tuuxa ni cayuubaʼ ladxidóʼ o nuu triste, ne gúnicabe xiixa para uguucabe gana laa». Sti libru cusiene diidxaʼ ca sicaríʼ: «Quixhedxinu ladxidóʼ tuuxa nga gacanenu laa para guni huantar xiixa guendanagana ni cadiʼdiʼ» (The Interpreterʼs Bible).

Peru zándaca guinabadiidxanu: «Ximodo riguixhedxí Dios ladxidoʼno yaʼ. Ximodo riguube gana laanu para guni huantarnu ca yuubaʼ stinu yaʼ». Primé la? racanebe laanu ne Stiidxabe, Biblia, ne laaca zanda guni orarnu laabe. Pablu na bidii Dios laanu Stiidxaʼ «ti pur laani gata dxí ladxidóʼ no» ne cuézanu gaca guiráʼ ni maʼ guníʼ Dios. Ne ora guni orarnu laaca rudiʼnu cuenta riguixhedxini «ladxidóʼ [n]o dede iruti zanda guiene ximodo ni» (Romanos 15:4; Filipenses 4:7).

Pora nga riguixhedxí Jiobá ladxidoʼno yaʼ. Pablu na rúnibe ni “ora tiica acaná ladxidóʼ no» (2 Corintios 1:4). Nga runi, intiica guendanagana o yuubaʼ ni gápanu, zanda gacané Dios laanu ne gudii stipa ni caquiiñenu para guni huantarnu cani. Cadi dxandíʼ riguixhedxí nga ladxidoʼno la?

Peru cadi laasinu nga riguixhedxibe ladxidoʼno. Pablu na riguixhedxí Dios ladxidoʼno «ne zacá riziʼdi nu usieche nu stobi ni cayacaná ladxidóʼ, cásica bisieche be laanu». Modo riguixhedxí Jiobá ladxidoʼno ca rucaani laanu guianu xcaadxi binni ne gacanenu laacaʼ.

Nga runi, Jiobá nga Dios ni riguixhedxí ladxidoʼno. Peru, qué zanda diʼ cuézanu cueebe guiráʼ ca yuubaʼ ne ca guendanagana cadídinu yanna. Neca zacá zanda guni crenu zacanebe laanu ne zudiibe stipa laanu para guni huantarnu cani. ¡Nabé nga riá Dios laanu! Nga runi naquiiñeʼ gusisácanu laabe ne guni adorarnu laabe.

[Cani cá ñee yaza]