Gucané Biblia laacabe para bichaacabe

XI GUCANÉ ti gunaa de Rusia para bisaana viciu de cubaʼ guixi ne chuʼ jma galán né ca xiiñiʼ. Xi gucané ti hombre de Japón ni guzárenda lu calle para bixeleʼ de ca viciu ni bisaana laa lu guendapobre. Xi gucané ti hombre de Australia ni rapa yuze para gusaana de gueʼ xhaataʼ nisa dxuʼniʼ. Gudiʼnu lugar gusiénecabe ni laanu.

«Biziideʼ naquiiñeʼ guneʼ dxiiñaʼ ne guuyaʼ ca xiiñeʼ» (NELLY BAYMATOVA)

NÁPABE 45 IZA

DE RUSIA LAABE

GUDÚʼBABE GUIXI

MODO BIBANEʼ DXIQUÉ: Biniiseʼ Vladikavkaz, capital stiʼ república de Osetia del Norte (yanna lani Alania). Cumu gupa familia stinneʼ stale bueltu la? nabé gupaʼ stale cosa risaca. Peru neca zaqué, qué nibánediaʼ nayecheʼ. Dxi bisaaʼ 34 iza mápeca gucaʼ divorciar chupa biaje. Para ca dxi que maʼ ziniaaʼ chii iza de rigubaʼ guixi ne maʼ gucuaaʼ chupa tratamientu ndaaniʼ ti clínica para guiá cuerpu stinneʼ. Maʼ huaxiéʼ galán modo nabaneniáʼ familia stinneʼ ne ca xhamiguaʼ. Laaca napaʼ chupa xiiñeʼ, peru zanda gabeʼ laatu cadi nadxieediaʼ laacabe.

Cumu testigu stiʼ Jiobá jñaaʼ la? stale biaje biinabe pur naa ne rinábabe Dios gacané naa. Peru naa guníʼ iqueʼ: «¡Xhuncu jñaaʼ! Dxandíʼ nga ribézabe guni chaahuiʼ Jiobá ca guendanagana stinneʼ la?». Gupaʼ gana nusaanaʼ viciu que stúbesiaʼ, peru qué ñanda diʼ ñúneni. Ti biaje gunda gudideʼ chupa gubidxa sin nigubaʼ guixi. Peru maʼ qué ñuneʼ huantar, ngue runi guyuaabieʼ neza ra ventana ne biabaʼ de lu guiropa pisu. Pur ni bineʼ que biluuza ti chú nayaʼ ne ti chú ñee ne nabé gucaná decheʼ. Gudiʼdiʼ jma de ti beeu para gunda biasaʼ.

Gupa jñaaʼ naa biaʼ dxi gutaʼ que. Peru qué ñuu dxi nuchabe guirá ni bineʼ que luaʼ, purtiʼ nánnabe nabé nuaaʼ triste. Ni bíʼnibe nga bisaanabe caadxi revista ¡Despertad! cueʼ cama stinneʼ.a Guyuuladxeʼ cani ne biindaʼ dede primé ne últimu yaza stiʼ ca revista que. Raqué nga maʼ gudixheʼ iqueʼ guʼndané ca Testigu naa Biblia.

XIMODO GUCANÉ BIBLIA NAA PARA BICHAAʼ: Ndiʼ nga tobi de ca cosa ni biziideʼ lu Stiidxaʼ Dios: gudieeʼ ni caquiiñeʼ ca binnilidxeʼ. Biziideʼ naquiiñeʼ guneʼ dxiiñaʼ ne guuyaʼ ca xiiñeʼ; ne cadi guicá luaʼ guyaanaʼ jñaaʼ laadu. Peru cumu maʼ xadxí ngue de runeʼ ni gapaʼ gana la? guca nagana para naa guiaaʼ guneʼ dxiiñaʼ.

Laaca nabé gucané Deuteronomio 6:5-7 naa, ra cuzeeteʼ naquiiñeʼ gusiidiʼ binni ca xiiñiʼ de Dios. Bieneʼ zabidxi Jiobá cuenta naa pur modo gusiniiseʼ ca xiiñeʼ. Ngue runi, dede dxi que guleeʼ jma tiempu para chuaaniáʼ laacabe ne bineʼ stipa para gannaxhieeʼ laacabe.

Rudieeʼ xquíxepeʼ Dios pur bidii lugar naa gunebiaʼyaʼ laa. Ne para gusihuinneʼ zacá ni, gudixheʼ iqueʼ guneʼ ni nabe ne guyuaanisaʼ para gacaʼ testigu stiʼ Jiobá.

XI MAʼ GULEENDUAʼ: Maʼ biziideʼ gucueezaʼ naa ti cadi guidxiicheʼ nagueenda, nga runi jma galán modo nabaneniáʼ jñaaʼ. Ne laaca maʼ nuaaʼ galán né ca xiiñeʼ.

Laaca maʼ nanaladxeʼ ca cosa ni qué riuulaʼdxiʼ Dios, ne huayacané nga naa para gaca chaahuiʼ stale de ca guendanagana ni gupaʼ dxiqué. Yanna maʼ nuaaʼ nayecheʼ purtiʼ ribeeʼ tiempu para gusiideʼ binni de Jiobá, Dios ni nadxii laanu.

«Bilá ca conseju stiʼ Biblia naa» (MINORU TAKEDA)

NÁPABE 54 IZA

DE JAPÓN LAABE

GUZARÉNDABE LU CALLE

MODO BIBANEʼ DXIQUÉ: Dxi nahuiineʼ gulezaniáʼ bixhozeʼ ne jñaabidaʼ ndaaniʼ guidxi Yamaguchi, qué ñuu dxi ñunebiaʼyaʼ jñaaʼ. Guti jñaabidaʼ dxi napa 19 iza, ngue runi biaananiáʼ bixhózesiaʼ. Dxiiñaʼ stinneʼ nga guneʼ guendaró ne laaca zaquegá nga dxiiñaʼ biʼniʼ bixhozeʼ. Peru cumu gadxé gadxé turnu rúnidu dxiiñaʼ la? huaxiéʼ ridúʼyadu. Chaahuiʼ chaahuiʼ maʼ casi guidubi dxi runeʼ dxiiñaʼ ne despué de dxiiñaʼ maʼ zixhudxeniáʼ ca xhamiguaʼ.

Despué bireeʼ gana dxiiñaʼ napaʼ que. Ti biaje gudindediidxaniáʼ jefe stinneʼ, ne pur ngue bizuluáʼ güeʼ jma ziáʼ nisa dxuʼniʼ. Dxi mayaca gusaaʼ 30 iza bireeʼ de ralidxeʼ ne rabeʼ chizayaʼ ladu tiisi. Dxi birá xpuéltuaʼ la? bizuluáʼ bineʼ dxiiñaʼ ti lugar ra riguítecabe pachinko, caadxi máquina ra rusábacabe bueltu, nabé runibiáʼcabe cani Japón. Laaca tiempu que binebiaʼyaʼ ti baʼdudxaapaʼ ne bichaganadu, peru gulaa xquendaxheeladu chupa iza arondaʼ despué.

Cumu maʼ qué gapaʼ gastiʼ la? bizuluáʼ gudiiñeʼ bueltu ca binni ni ruquixe ni ne bizaabeʼ stale bueltu. Bixooñeʼ de ca binni ni nuzaabeʼ que ne yebieeʼ ralidxi bixhozeʼ ti tiempu, guidxi ra guleʼ. Cumu nabé rusiguieeʼ la? maʼ qué ninabe nidxaagabe naa. Gucuaaʼ bueltu stiʼ ca binnilidxeʼ ne bibaneʼ ti tiempu de ca bueltu ni bineʼ ganar lu ca juegu que. Chaahuiʼ chaahuiʼ biaanaʼ lu gubidxa ne últimu maʼ rigaseʼ ra estación stiʼ ti tren. De raqué maʼ guyaaʼ ndaaniʼ guidxi Hakata, despué maʼ guyaa Himeji ne últimu yendayaʼ Kioto. Biaʼsi gudiʼdiʼ chupa iza de canazayarendaʼ lu calle.

XIMODO GUCANÉ BIBLIA NAA PARA BICHAAʼ: Lu iza 1999, laga canazayaʼ ndaaniʼ ti parque ni nuu gaxha de guiiguʼ Kamogawa, ni nuu Kioto, bidxiña chupa gunaa ra nuaaʼ. Ora gunabadiidxaʼ tobi de laacabe naa pa ñuuladxeʼ niziideʼ de Biblia la? gudxeʼ laabe ñuuladxeʼ. Despué bizulú yeganna chupa testigu stiʼ Jiobá naa, laacaʼ maʼ xadxí de cayúnicaʼ ni na Dios ne bizulú bisiidicaʼ naa risaca nga chinandaʼ ca conseju ni zeeda lu Biblia. Laaca gúdxicabe naa guyubeʼ dxiiñaʼ ne guyubeʼ ti lugar ra cuezaʼ. Yeyubeʼ dxiiñaʼ chupa chonna lugar —para si gusiecheʼ laacabe— peru riaaʼ sin guicá iqueʼ guidxelaʼ ni. Despué bineʼ orar Dios para gacané naa guidxelaʼ ti dxiiñaʼ ne óraque huaxa dxandíʼ biyubeʼ ni, dede ra bidxelaʼ ni.

Ca oración runeʼ que laaca nabé gucanécani naa para gudxieeluáʼ sti guendanagana naroʼbaʼ ni gupaʼ. Ca binni ni bitiiñeʼ bueltu naa que la? bidxélacaʼ naa ne canábacaʼ quixeʼ xpuéltucaʼ. Guizáʼ nagana guca ngue para naa. Peru tobi de ca dxi cayuundaʼ Biblia, casi maca runeʼ ni guiráʼ dxi, yendayaʼ textu stiʼ Isaías 41:10 ra caníʼ Dios qué zusaana nin tobi de ca binni ni ruzuubaʼ stiidxabe: «Naa dxandipeʼ zacaniáʼ lii». Nguepeʼ nga ni caquiiñeʼ. Bizuluáʼ bineʼ dxiiñaʼ né gana ne zaqué gunda gudixeʼ guiráʼ ni nuzaabeʼ. Lu iza 2000 que guyuaanisaʼ purtiʼ maʼ runeʼ guiráʼ ni naquiiñeʼ guni tuuxa para gaca testigu stiʼ Jiobá.

XI MAʼ GULEENDUAʼ: Guiráʼ ni biziideʼ lu Biblia bicaacani naa guinabaʼ bixhozeʼ guni perdonar naa pur guiráʼ ni bineʼ ne zaqué bíʼnibe ni. ¡Guizáʼ biéchebe ora bíʼyabe maʼ zinandaʼ ca conseju stiʼ Biblia! Ora guietenalaʼdxeʼ modo bibaneʼ dxiqué, zanda guinieeʼ bilá ca conseju stiʼ Biblia xquendanabaneʼ.

Yanna maʼ runeʼ dxiiñaʼ para gapaʼ ni guibaneniáʼ (Efesios 4:28; 2 Tesalonicenses 3:12). Laaca maʼ napaʼ xhamiguaʼ lade ca binni ridagulisaa (Marcos 10:29, 30). Rudieeʼ xquíxepeʼ Jiobá de guidubi ladxiduáʼ pur guiráʼ ni bisiidiʼ naa.

«Guca nagana para naa guchaaʼ» (DAVID HUDSON)

NÁPABE 72 IZA

DE AUSTRALIA LAABE

GÜEʼ XHAATABE NISA DXUʼNIʼ

MODO BIBANEʼ DXIQUÉ: Bixhozeʼ Willie ne jñaaʼ Lucy, maʼ nápacaʼ chii xiiñicaʼ dxi guleʼ. Gulézadu ladu guiaʼ de estadu stiʼ Queensland, gaxha de nisadóʼ. Raqué nuu ti grupu de binni aborigen ni láʼ Aurukun. Ca binni que nuucabe guriá ti guiiguʼ sicarú láʼ Archer. Bisiidicabe naa ne ca bicheʼ guináʼzedu maniʼ ne gúnidu guuzeʼ benda para gápadu ni guidoʼdo. Tiempu que huaxiéʼ randa rúnidu stale cosa, purtiʼ gobiernu que nga riguixhe ximodo iquiiñedu bueltu stidu ne qué nudiibe lugar nireʼdu de ra nabézadu que.

Rietenalaʼdxeʼ nabé bicaa bixhozeʼ ne jñaaʼ ndaaniʼ íquedu gácadu binni nachaʼhuiʼ. Bisiidicabe laadu gudiʼdu de ni nápadu sti binni—neca huaxiéʼ ni— ne guni respetardu binni huaniisi. Bizíʼdidu naquiiñeʼ guidúʼyadu laacabe casi bixhózedu, jñaadu, stiudu ne stiadu.

Dxi napaʼ gadxe iza guti bixhozeʼ. De raqué yebiʼdu ra nuu sti grupu de binni aborigen ni nuu Mapoon, ni riaana biaʼ 150 kilómetru ladu guiaʼ de Aurukun. Gaayuʼ iza despué biziideʼ gapaʼ caballu ne yuze, ne dede dxi mayaca gusaaʼ 50 iza bineʼ dxiiñaʼ que ndaaniʼ gadxé gadxé hacienda. Peru guizáʼ naná dxiiñaʼ que. Ne nabé güeʼ ziáʼ nisa dxuʼniʼ, ngue runi gupaʼ stale guendanagana.

Tobi de ca dxi naxudxeʼ que, bireeʼ ndaaniʼ ti hotel ne ziyabaʼ cheríʼ chericaʼ ora zeeda ti carru nabé reciu bidxelasaa naa. Chupa iza gucuaaʼ fisioterapia ne rehabilitación para gunda bineʼ sentir galán. Peru maʼ qué ñuuruʼ dxi nigapaʼ yuze.

XIMODO GUCANÉ BIBLIA NAA PARA BICHAAʼ: Dxi cudiicabe rehabilitación naa que, bidii ti xhamigaʼ naa caadxi revista Torre stiʼ ni rapa ne ¡Despertad! Peru qué ñacanepeʼ cani naa, purtiʼ huaxiéʼ guzayaʼ scuela ne qué gánnapiaʼ guundaʼ. Qué nindaa de ngue bixhidxináʼ ti señor de 83 iza ra puertaʼ lidxeʼ. Rietenalaʼdxeʼ guizáʼ nandáʼ dxi que, ngue runi gudxeʼ laabe guiuube ne bidieeʼ laabe ti vasu nisa nagaʼndaʼ. Bidiibe naa caadxi libru ne revista ni cusiidiʼ de Biblia ne guniʼbe zabiguétabe para gusiénebe naa xiná cani. Zaqué nga bizuluáʼ biindaʼ Biblia gatigá. Chaahuiʼ chaahuiʼ bieneʼ naquiiñeʼ guchaaʼ modo nabaneʼ para chuulaʼdxiʼ Dios ni runeʼ.

Peru guca nagana para naa guchaaʼ. Nabé runeʼ respetar hombre gola ni cusiidiʼ naa de Dios que, purtiʼ ngue nga ni bisiidiʼ jñaaʼ naa. Neca zaqué, qué naʼyaʼ gudieeʼ xquendanabaneʼ Dios ne gacaʼ ti testigu stiʼ Jiobá. Guníʼ iqueʼ primeru naquiiñeʼ gannaʼ guiráʼ xixé ni cá lu Biblia.

Peru tobi de ca hombre runeniáʼ dxiiñaʼ gucané naa guchaaʼ modo riníʼ iqueʼ. Hombre que testigu stiʼ Jiobá laa ne gúdxibe naa guundaʼ Colosenses 1:9, 10. Textu riʼ cayabi ca xpinni Cristu naquiiñeʼ gunibiáʼ «chaahui[caʼ] Dios» jma. Né ca versículo riʼ gucanebe naa gudieeʼ cuenta qué ziuu dxi gusaana de guiziideʼ cosa nacubi, ngue runi qué gápadiaʼ razón para guinieeʼ cayaadxaruʼ tiidiʼ jma tiempu para gudieeʼ naa Jiobá.

Gadxé si guca para naa dxi bizulú guyaaʼ ca guendaridagulisaa stiʼ ca Testigu. Nabé bidxagayaaʼ ora biiyaʼ binni de gadxé gadxé ladu cayúnicaʼ ni na Dios ne nuucaʼ tobi si. Pur modo biiyaʼ nuucabe que la? gunieeʼ: «Ndiʼ nga religión ni dxandíʼ». Lu iza 1985 guyuaanisaʼ para gucaʼ testigu stiʼ Jiobá.

XI MAʼ GULEENDUAʼ: Yanna maʼ ruundaʼ jma galán, ne ribeeʼ stale hora guiráʼ semana para gusiideʼ binni guʼndaʼ ne guiene ni cá lu Biblia. Yanna, xhamigaʼ ni bidii naa ca revista Torre stiʼ ni rapa ne ¡Despertad! que, laaca bizulú biindaʼ Biblia, despué guyuunisa, ne laa nga xheelaʼ ni nabé nadxieeʼ. Riéchedu stale gacanedu xcaadxi aborigen para gunibiaʼcaʼ Jiobá Dios.

[Cani cá ñee yaza]

[Ni caníʼ yaza 21]

Riéchedu stale gacanedu xcaadxi aborigen para gunibiaʼcaʼ Jiobá Dios