Ñee zanda guchaa binni ni runi cosa malu la?

ÑEE cadi guizáʼ sicarú nga pa guiráʼ xixé binni ñuni ni jneza la?... Peru ni dxandíʼ nga guirutiʼ diʼ tu runi ni guiráʼ ora. Nannuʼ xiñee guiranu rúninu cosa malu nuu tiru, neca qué nanu la?... Purtiʼ guiranu ralenenu donda. Peru nuu binni runi stale ni qué iquiiñeʼ. Nanaláʼdxicabe ne riulaʼdxipécabe guninácabe binni. Ñee raʼbuʼ zanda guchaacabe ne guiziidicabe gácacabe nachaʼhuiʼ la?...

Biiyaʼ hombre ni cayapa xhaba cani cuchá guié Esteban ca. Lu diidxaʼ hebreu labe Saulo, peru gúpabe sti labe romanu, ne nga nga Pablu. Laabe biéchebe ora biiticabe Esteban, purtiʼ naca discípulo stiʼ Maestru Ni Jma Nanna Gusiidiʼ que. Peru guidúʼyanu xiñee guizáʼ malu guca Saulo.

Saulo guyuu lade ti religión judíu stiʼ ca fariseu. Nécapeʼ gúpacabe Stiidxaʼ Dios, peru qué ñunidícabe ni nani, jma nga bíʼnicabe cani bisiidiʼ ca xaíque stiʼ religión que. Nga runi guizáʼ malu nga ni biʼniʼ Saulo.

Saulo nuu Jerusalén ora yenécabe Esteban nezalú juez. Caadxi de ca juez que nácacaʼ fariseu. Neca nabé guníʼcabe mal de Esteban la? qué nidxíbidibe, sínuque ne stale guendanadxibalú guniʼbe de Jiobá Dios ne de Jesús nezalú ca juez que.

Peru qué ñulaʼdxiʼ diʼ ca juez que ni guniʼbe que. Laacabe maca nánnacabe stale de Jesús, ne laca laacabe nga guníʼcabe gátibe. Despué Jiobá gundisaʼ laabe ne bidxiguetaʼ laabe guibáʼ. Peru ca juez que, lugar de nuchaacaʼ modo nácacaʼ, laga guzanándacaʼ ca discípulo stiʼ Jesús.

Ca juez que gunaazecaʼ Esteban ne guleecaʼ laabe ndaaniʼ guidxi que, bilaacaʼ laabe layú ne bichacaʼ guié laabe. Casi modo ruuyuʼ lu dibuju ca, Saulo biiyabe de gaxha ni guca que. Para laabe la? jnézapeʼ ngue biiticabe Esteban.

Ñee nannuʼ xiñee guníʼ ique Saulo zaqué la?... Purtiʼ dede nahuiinibe fariseu laabe ne biʼniʼ crebe jneza nga guiráʼ ni bisiidicabe laabe lade religión que. Guiráʼ ni biʼniʼ ca xaíque stiʼ ca fariseu que laaca bíʼnibe ni purtiʼ para laabe ca hombre que nga naquiiñeʼ chinándabe (Hechos 7:54-60).

Xi biʼniʼ Saulo despué de guti Esteban yaʼ.... Gucuá íquebe gunduuxebe stuudxi discípulo stiʼ Jesús. Ngue runi yendeebe laacaʼ dede ndaaniʼ lídxicaʼ, cásica hombre ne gunaa bitaguyoobe laacaʼ. Stale de ca discípulo que bixooñecaʼ de Jerusalén, peru qué nusaanacaʼ de nusiidicaʼ de Jesús (Hechos 8:1-4).

Ngue bicaa Saulo gacananalaʼdxiʼ jma ca xpinni Cristu. Ngue runi guyebe ra nuu xaíque stiʼ ca ni ruzaaquiʼ guʼxhuʼ ni láʼ Caifás, ne hombre que bidii permisu laabe para guinaazebe ca xpinni Cristu ni nuu Damasco. Saulo nuu guteguyoo laacabe Jerusalén para guninácabe laacaʼ raqué. Peru ora zebe neza Damasco guca ti guendaridxagayaa.

Neza zebe que málasi bihuinni ti biaaniʼ guizáʼ ruzaaniʼ de guibáʼ, ne biree ti ridxi na: «Saulo, Saulo, xiñee canaza [...] nanda lu naa». ¡Jesús ngue guniʼné laabe de guibáʼ! Guizáʼ nadipaʼ biaaniʼ que dede bicheepaʼ ni lú Saulo, ne cani ziné laabe que gúpacaʼ xidé yenecaʼ laabe Damasco.

Gudiʼdiʼ si chonna gubidxa, Ananías, tobi de ca discípulo ni nuu Damasco biiyabe Jesús lu ti visión. Ne gudxi Jesús laabe chigánnabe Saulo para guxhálebe lú ne guiníʼnebe laa. Ora guniʼné Ananías laabe la? biʼniʼ crebe guiráʼ ni dxandíʼ binadiágabe de Jesús ne bibiguetaʼ biiyabe. Bidxaa xquendanabánibe ne gúcabe ti xpinni Dios ni qué nixeleʼ de Dios (Hechos 9:1-22).

Ñee rieʼnuʼ yanna xiñee biʼniʼ Saulo cosa malu la?... Purtiʼ bisiidicabe laabe stale cosa ni cadi jneza. Yenándabe ca hombre ni qué ñuni ni na Dios ne guyuube lade ti religión ni bisisaca jma ni na binni que ni na Stiidxaʼ Dios. Yanna, xiñee bichaa Saulo xquendanabani ne bizulú biʼniʼ ni galán, neca stuudxi fariseu que bicaalúrucaʼ Dios yaʼ.... Purtiʼ cadi de ladxidóʼdibe nga gucananaláʼdxibe ni rusiidiʼ Biblia, ne ora gúdxicabe laabe xi laani la? guyuube listu para gúnibe ni.

Ñee nannuʼ tu beeda gaca Saulo la?... Ti apóstol stiʼ Jesús: apóstol Pablu. Bietenalaʼdxiʼ, laabe nga bicaabe jma libru ni zeeda ndaaniʼ Biblia.

Nuu stale binni naca casi Saulo ne ñanda nuchaacaʼ. Peru nagana rácani para laacaʼ purtiʼ nuu tobi ni rucaa binni guni cosa malu. Nannuʼ tu laabe la?... Jesús bizeeteʼ de laabe ora guníʼnebe Saulo neza Damasco que. Jesús gúdxibe Saulo dede guibáʼ: «Chi useenda lii ra nuu ca [binni ca] para güi neu laaca xii nga ni dxandíʼ, ti ixele xquenda biaani ca ne usaana ca irá enda huati sticaʼ, uyubi ca xii nga jneza. Ne cadi chi nanda ca ni na binidxabaʼ sínuque ni na Dios» (Hechos 26:17, 18).

Binidxabaʼ nga rucaa guiráʼ binni guni cosa malu. Ñee nagana raca para lii gúniluʼ ni galán la?... Guiranu rácanu zacá purtiʼ Binidxabaʼ runi ni nagana para laanu. Peru nuu sti razón ni rucueeza laanu gúninu ni jneza. Nannuʼ xi laani la?... Guiranu ralenenu donda.

Nga runi jma nga nagueenda rúninu ni cadi jneza. Yanna pue, xi naquiiñeʼ gúninu.... Gúninu stale stipa pur gúninu ni jneza. Pa gúninu zacá la? gánnacanu zacané Jesús laanu purtiʼ nadxiibe laanu.

Dxi guyuu Jesús lu Guidxilayú riʼ, bisihuínnibe pabiáʼ nadxiibe binni ni biʼniʼ cosa malu peru bichaacaʼ modo nabánicaʼ. Laabe gúnnabe xiñee guca nagana para laacaʼ guchaacaʼ. Dxiqué, guyuu gunaa ni guyuuné stale hombre. Ne nga la? malu ni. Biblia ribee lá laacabe gunaa ni canazá si, o gunaa dxabaʼ.

Ti dxi la? tobi de ca gunaa riʼ binadiaga de Jesús ne yeguuyabe laa ralidxi ti fariseu, purtiʼ raqué nuu Jesús. Gunaa riʼ gudiibibe ñee Jesús ne nisa biete lube ne bicuiidxibe ni ne guicha íquebe ne bichabe aceite ni. Guizáʼ guca arrepentirbe de ca donda stibe, ngue runi Jesús biʼniʼ perdonar laabe. Peru fariseu que na cadi naquiiñeʼ diʼ ñaca perdonarbe (Lucas 7:36-50).

Ñee nannuʼ xi gudxi Jesús tuudxi fariseu sti dxi la?... Ca diidxaʼ riʼ: «Gabe caʼ laatu, jma nagueenda ziuu [...] ca gunaa dxaba ra runi mandar Dios que laatu» (Mateo 21:31). Jesús guníʼ zaqué purtiʼ biʼniʼ cré ca gunaa que laabe ne bichaacaʼ, peru ca fariseu que guzanándarucaʼ ca discípulo stiʼ Jesús.

Nga runi, pa Biblia cayabi laanu cadi jneza ni cayúninu la? naquiiñeʼ chuʼnu listu para guchaʼnu. Ne ora guizíʼdinu xiná Jiobá gúninu la? naquiiñeʼ chuláʼdxinu gúninu ni. Zacá la? Jiobá ziechené laanu ne zudiibe laanu ti guendanabani ni qué zaluxe.