Xi naguixhe ique Dios guni lu Guidxilayú

Jiobá bizáʼ Guidxilayú para guibani binni ndaaniʼ ni. Dxi bizaʼbe Adán ne Eva, ca primé binni guyuu lu Guidxilayú riʼ, cadi bizaʼbe laacaʼ para gápacaʼ xiiñicaʼ ni cheʼ guibáʼ. Xiñee rininu zacá yaʼ. Purtiʼ Dios maca bizáʼ ca ángel para guibánicaʼ guibáʼ (Job 38:4, 7). Jiobá guluu primé hombre que ndaaniʼ ti jardín nabé sicarú ni láʼ Edén (Génesis 2:15-17). Ne gudxi Jiobá laabe zanda guibaninebe ca xiiñibe ni chigale despué nayecheʼ sin qué chuʼ dxi gáticabe ndaaniʼ Guidxilayú. Biindaʼ Génesis 1:28 ne 1 Juan 2:17.

Jiobá biquiiñeʼ ti ndaa si de lu Guidxilayú para biʼniʼ jardín ni guyuu Edén. Adán ne Eva naquiiñeʼ ñápacaʼ xiiñicaʼ para nuchacaʼ Guidxilayú riʼ de binni ne chaahuiʼ chaahuiʼ nusiroobacaʼ Paraísu que (Génesis 1:28). Qué ziuu dxi gusaana de guibani binni lu Guidxilayú riʼ, ne qué ziuu dxi guinitilú ni. Biindaʼ Salmo 104:5.

Biiyaʼ videu ni láʼ ¿Xiñee bizáʼ Dios Guidxilayú?

Purtiʼ qué nuzuubaʼ Adán ne Eva stiidxaʼ Dios, ngue runi guleebe laacaʼ de ndaaniʼ jardín stiʼ Edén. Zaqué nga biniti Paraísu que, ne maʼ guirutiʼ tu huayanda gudxiguetaʼ ni. Nga runi, Biblia riníʼ nuu Guidxilayú riʼ lu náʼ binni malu. Biindaʼ Génesis 3:23, 24.

Yanna, ñee maʼ bisiaandaʼ Jiobá ni gudixhe ique guni para binni guidxilayú la? Nin qué ziuu dxi, purtiʼ laabe nga ni jma nandxóʼ ne guiráʼ ni riguíxhebe gúnibe rácacani (Isaías 45:18). Maʼ qué zandaa, zabiguetaʼ zaca xquendanabani binni cásica gucalaʼdxiʼ Dios ñácani dxi bizulú Guidxilayú. Biindaʼ Salmo 37:11, 34.

Jesús, ni naca Rey lu Reinu stiʼ Dios, zuni Guidxilayú riʼ ti paraísu. Laabe né ca ángel, zunduuxecabe ca xhenemigu Dios lu guendaridinde ni láʼ Armagedón. Dxi ca nga guseguyoobe Binidxabaʼ ti mil iza, ángel malu ni bicaa Adán ne Eva gucheenecaʼ Dios. Ca xpinni Dios zalacaʼ ora guinitilú ca binni malu, purtiʼ Jesús zapa laacaʼ ne zuluíʼ laacaʼ xi gúnicaʼ, ne últimu la? zabánicaʼ ndaaniʼ ti paraísu sin qué chuʼ dxi gáticaʼ. Biindaʼ Apocalipsis 20:1-3 ne 21: 3, 4.

Padxí gunduuxeʼ Dios guiráʼ guendaquéiquiiñeʼ ni nuu yanna. Jesús bidii ti seña ni zusihuinni mayaca guinitilú cani. Pur cani cayaca lu Guidxilayú riʼ, zándaca gunitilú cani binni ne nga cusihuinni mayaca guiree guiráʼ cosa malu nuu luni. Biindaʼ Mateo 24:7-14, 21, 22.

Lu ti mil iza guni mandar Jesús Guidxilayú dede guibáʼ, chaahuidugá zabeebe guiráʼ ni cayuniná binni (Isaías 9:6, 7; 11:9). Zaca Jesús rey ne xaíque stiʼ ca sacerdote oracá zuxhiabe donda stiʼ ca binni ni nadxii Dios. Zacá nga zaquiiñeʼ Dios Jesús para cuee guendahuará, guendarioʼxhoʼ ne guendaguti. Biindaʼ Isaías 33:24 ne Apocalipsis 21:4.

Ca binni ni ruzuubaʼ stiidxaʼ Dios zabánicaʼ ndaaniʼ ti paraísu (1 Juan 2:17). Jesús gunabaʼ ca xpinni guyúbicaʼ ca binni ni nayá ladxidóʼ para gusiidicaʼ laacabe gúnicabe ni riuulaʼdxiʼ Dios. Yanna riʼ, cusiidiʼ Jiobá millón de binni para guibánicaʼ ndaaniʼ Paraísu ca (Sofonías 2:3). Ndaaniʼ Yoo stiʼ Reinu stiʼ ca testigu stiʼ Jiobá, riziidiʼ ca hombre ne ca gunaa gácacaʼ nachaʼhuiʼ né xheelacaʼ ne zaqueca né ca xiiñicaʼ, ne juntu runi adorárcabe Dios ne riziidicabe ca diidxaʼ sicarú ni zeeda lu Biblia. Biindaʼ Miqueas 4:1-4.