Ziyuu ti rey Jerusalén dxiʼbaʼ ti burruhuiiniʼ

Sti dxi que, domingu 9 de nisán, biree Jesús ne ca discípulo stiʼ de Betania ne zecaʼ Jerusalén. Ora yendácabe Betfagué, lu dani Olivo, gudxi Jesús chupa discípulo stiʼ gúnicaʼ xiixa.

Gúdxibe laacaʼ: «Laché ndaaniʼ guidxihuiiniʼ ni cayuuyatu ca. Casi peʼ chindatu zadxélatu ti burra cá yaga ne ti burruhuiiniʼ. Lauxhegueʼ laacame ne latané laacame ra nuaaʼ. Ne pa chuʼ tu gabi laatu xiixa la? lagabi laa: “Caquiiñeʼ Señor laacame”. Ne oraqueca zudiibe lugar gueedanetu laacame» (Mateo 21:2, 3).

Qué nudii ca discípulo que cuenta pa ni cá lu ti profecía zeeda lu Biblia nga ni chiguizaaca que. Ma despué biénecabe sicaríʼ nga guca cumplir ca diidxaʼ ni guníʼ Zacarías. Guniʼbe zedandá Rey ni maca biʼniʼ prometer Dios chigueeda Jerusalén, naca Rey riʼ «humilde» ne «dxíʼbabe deche ti burru, ti burruhuiiniʼ, xiiñiʼ ti burra» (Zacarías 9:9).

Ora yendá ca discípulo que Betfagué bixhéguecaʼ burra ne burruhuiiniʼ que, peru gunabadiidxaʼ chupa chonna binni nuu raqué laacabe: «¿Xiñee cuxhéguetu burruhuiiniʼ ca pue?» (Marcos 11:5). Peru ora gúnnacaʼ chiguiquiiñeʼ Señor ca maniʼ riʼ bidiicaʼ permisu laacabe. Gudixhe ca discípulo que xhábacaʼ deche guiropaʼ manihuiiniʼ riʼ ne gudxiʼbaʼ Jesús burruhuiiniʼ que.

Laga jma zidxiña Jesús Jerusalén, jma stale binni zichagalú laa. Stale binni caguixhe xhaba lu neza que ne xcaadxi bigá rama lu «ca layú que». Ne cucaa guiráʼ binni que ridxi: «¡Canábadu gulaluʼ Xiiñiʼ David! ¡Lagusisaca ni zeeda lu lá Jehová! ¡Lagusisaca Reinu ni maʼ zeeda, Reinu stiʼ bixhózenu David!» (Marcos 11:8-10). Ora binadiaga ca fariseu ni nuu lade ca binni que ca diidxaʼ riʼ guizáʼ bidxiichicaʼ ne nacaʼ rábicaʼ Jesús: «Maestru, gudindené ca discípulo stiluʼ». Óraque bicabi Jesús laacabe: «Cayabeʼ laatu, pa qué guiníʼcabe la? ca guié ca zucaacaʼ ridxi» (Lucas 19:39, 40).

Ne ora biʼyaʼ Jesús guidxi Jerusalén bizulú biinaʼ ne ná: «Pa lii, lii, ñéneluʼ yannadxí gunáʼ nga ca cosa ni ñacané lii ñatadxí ladxidoʼloʼ... Peru yanna maʼ bigaachiʼ ni ne maʼ qué zuuyaluʼ ni». Zadxaagalú guidxi Jerusalén stale guendanagana purtiʼ qué ñuni guiráʼ ni maʼ gudixhe ique Jehová. Guníʼ Jesús xi zazaaca guidxi riʼ: «Zedandá dxi zuzuhuaa ca enemigu stiluʼ staca naduxhuʼ punta guidubi vuelta de lii; zaguucabe leʼ lii ne zuninácabe lii guiráʼ ladu. Zusábacabe lii layú ne ca ni nabeza racá, ne qué zusaanacabe ti guié luguiáʼ sti guié ra nuuluʼ» (Lucas 19:42-44). Guca cumplir profecía guníʼ Jesús riʼ lu iza 70 dxi binitilú Jerusalén.

Ora guyuu Jesús Jerusalén, guca yaya ca binni que, ne nacaʼ: «¿Tu laabe pue?». Para bicabi ca binni que: «¡Laabe nga profeta Jesús, de Nazaret de Galilea!» (Mateo 21:10, 11). Guiráʼ binni biʼyaʼ ora gundisaʼ Jesús Lázaro de lade gueʼtuʼ, gúdxicaʼ xcaadxi binni milagru biʼniʼ Jesús riʼ. Peru cadxiichi ca fariseu purtiʼ qué ganda gúnicaʼ gastiʼ para gucueezacaʼ ca binni que. Dede nacaʼ: «¡Laguuyaʼ maʼ zinanda guiráʼ binni laabe!» (Juan 12:18, 19).

Ne ora yendá Jesús Jerusalén, guyé ndaaniʼ templu para gusiidiʼ binni casi maca runi ni. Laaca guyé ca ciegu ne ca ni nachiitaʼ ñee para gusiándabe laacaʼ. Guizáʼ bidxiichi ca sacerdote principal ne ca escriba ora bíʼyacaʼ ni cayúnibe ne ora binadiágacaʼ cucaa ca xcuidihuiiniʼ que ridxi ndaaniʼ templu: «¡Canábadu gulaluʼ Xiiñiʼ David!». Ngue runi gúdxicaʼ Jesús: «¿Cayunadiágaluʼ ni caníʼcabe la?». Para bicábibe laacaʼ: «¿Ñee qué huayuundatu ndiʼ: “Maʼ gudíxheluʼ gusisaca xcuidi ne baʼduhuiiniʼ lii” la?» (Mateo 21:15, 16).

Biiyaʼ Jesús xi guiráʼ cayaca ndaaniʼ templu que. Peru cumu maʼ huadxí ngue la? zibíʼnebe ca apóstol que. Ante guzulú 10 de nisán que bibiguétabe Betania, ne raqué gúsibe domingu huaxhinni que.