Tantu bidxiichibe dede biitibe bíʼchibe

Biree si Adán ne Eva ndaaniʼ jardín de Edén, gúpacaʼ stale xiiñicaʼ. Primé que biree lá Caín. Laa biʼniʼ dxiiñaʼ lu layú, bidxiibaʼ cuananaxhi ne verdura. Guiropa que biree lá Abel laa guca pastor.

Ti dxi, bidii Caín ne Abel ofrenda Jiobá. ¿Nánnaluʼ xii nga ti ofrenda la? Laani nga ti regalu especial ni rudiicabe Dios. Guyuulaʼdxiʼ Jiobá ofrenda stiʼ Abel peru qué ñuuláʼdxibe stiʼ Caín. Ngue runi, guizáʼ bidxiichi Caín, ne gudxi Jiobá laabe: «Pa qué gucueezaluʼ xiana stiluʼ la? zándaca gúniluʼ xiixa cosa malu». Peru qué nulábibe laa.

¿Xi biʼniʼ Caín óraque yaʼ? Gúdxibe Abel: «Chuu ra ñaa». Ne ora nuucabe stúbicabe bicaalú Caín biʼchiʼ ne biitibe laa. ¿Xi biʼniʼ Jiobá yaʼ? Biʼniʼ castigarbe Caín ra biseendabe laa zitu de familia stiʼ. Ne maʼ qué ñuuruʼ dxi nibiguetaʼ.

¿Xi rusiidiʼ ndiʼ laanu yaʼ? Pa qué guiree xiixa cosa modo racaláʼdxinu, zándaca guidxiichinu. Pa gudiʼnu cuenta zeʼ dxi jma nápanu xiana o maʼ bidii xcaadxi binni cuenta nabé ridxiichinu la? naquiiñeʼ guchaʼnu. Ne pa qué gúninu ni nagueendaca la? jma nagana zaca para laanu gucueezanu xiana stinu ne zándaca gúninu xiixa cosa malu.

Guizáʼ gunnaxhii Abel Jiobá ne biʼniʼ ni jneza, nga runi qué zusiaandaʼ Jiobá laabe. Zusibani Dios laabe ora maʼ guni Guidxilayú riʼ ti paraísu.