Guníʼ Pedro qué runibiáʼ Jesús

Laga nuu Jesús né ca apóstol stiʼ ndaaniʼ yoo ra gudoxícabe que, gúdxibe laacaʼ: «Guiratu zusaanatu naa gueelaʼ riʼ». Pedro guníʼ: «Naa coʼ. Neca guirácabe gusaanacabe lii, naa qué ziuu dxi gusaanaʼ lii». Para bicabi Jesús laabe: «Ante guʼndaʼ ti gallu, chonna biaje zaniʼluʼ qué runibiaʼluʼ naa».

Ora yené ca soldadu que Jesús ra lidxi Caifás, casi guiráʼ ca apóstol que maʼ bisaanacaʼ Jesús. Peru chupa de laacaʼ nagaʼchiʼ yenándacaʼ laabe. Tobi de laacaʼ nga Pedro. Biuube lu patiu ra lidxi Caifás ne bidxíñabe cueʼ ti gui para guidxaabe. Lu biaaniʼ stiʼ bele que biiyadxí ti criada lú Pedro, ne ná: «¡Runebiaʼyaʼ lii! ¡Laaca xpinni Jesús lii!».

Para bicabi Pedro: «Coʼ. Cadi dxandíʼ ni naluʼ ca. Qué gannaʼ xii nga caniʼluʼ», ne yeguzuhuaabe ra puertaʼ que. Raqué biiyaʼ sti criada laabe ne gudxi cani nuu raqué: «¡Laaca xpinni Jesús hombre riʼ!». Pedro bicabi: «¡Qué lica gannaʼ tuu nga Jesús!». Ti hombre laaca guníʼ: «Laaca tobi de laacabe nga lii. Rihuinni ni, purtiʼ riniʼluʼ cásica Jesús ne ca binni de Galilea». Para guníʼ Pedro sti biaje: «¡Qué runebiaʼyaʼ laabe!».

Casi guniʼbe ngue, biindaʼ ti gallu. Biiyaʼ Pedro cayuuyadxí Jesús laa ne bietenalaʼdxiʼ ca diidxaʼ ni gudxi Jesús laa. Ngue runi bireebe de raqué ne biinabe stale.

Laga cayaca ngue la? guca reunir Sanedrín que ra lidxi Caifás para guni juzgarcaʼ Jesús. Sanedrín que nga tribunal stiʼ ca xaíque yuʼduʼ. Laacaʼ maca guniʼcaʼ guuticaʼ Jesús ne cuyúbicaʼ modo gúnicaʼ ni. Peru qué guidxélacaʼ modo ugaanicaʼ donda íquebe. Últimu la? gunabadiidxaʼ Caifás Jesús: «¿Ñee lii nga Xiiñiʼ Dios la?». Para bicabi Jesús: «Ya, naa ndiʼ». Óraque guníʼ Caifás: «Ngasi nga caquiiñeʼ gánnanu. ¡Cusiguiibe!». Ngue runi guníʼ tribunal que: «Naquiiñeʼ gatiʼ hombre riʼ». Óraque gudápacabe ruaabe, bichá xhínnicabe lube, gudíñecabe laabe, bichiicabe lube ne gúdxicabe laabe: «¡Pa profeta lii, gudxi laadu tu gudiñe lii!».

Sti dxi siadóʼ que, yenécabe Jesús ra nuu Sanedrín que ne gunabadiidxacabe laabe sti biaje: «¿Ñee lii nga Xiiñiʼ Dios la?». Para bicabi Jesús: «Ya. Laca laatu caniʼtu ni». Óraque guniʼcaʼ cusiguiibe, ne cayuni insultarbe Dios, ne yenecaʼ laabe ra palaciu stiʼ Poncio Pilato, gobernador stiʼ Roma. ¿Xi guca despué yaʼ? Guidúʼyanu ni.