Gúninu stipa pur guyúbinu chuʼnu tobi si

O RA nacubi gudíxhecabe pavimentu la? guizáʼ galán rihuinni luni ne nabé naguidxi. Peru tiidiʼ si caadxi tiempu la? maʼ ricá bi ni ne maʼ riuu barranca luni, óraca naquiiñeʼ guni chaahuicabe luni para cadi gaca feuni jma ne cadi guizaaca xiixa desgracia luni.

Zacaca nga zanda guizaacanu ora gápanu guendanagana ne ti xpinni Cristu. Apóstol Pablu gunna guyuudinde ca xpinni Cristu de guidxi Roma, ngue runi bidiibe laacaʼ conseju riʼ: «Sa nanda nu ni guni laanu tobi si, ne ni acané iniisi cada tobi» (Rom. 14:13, 19). Xiñee naquiiñeʼ sanándanu ni guni laanu tobi si yaʼ. Xi naquiiñeʼ gúninu para chuʼnu tobi si ne ca binni ridagulisaa yaʼ.

Xiñee naquiiñeʼ chuʼnu tobi si

Pa qué guni chaahuicabe ra maʼ cá bi lu pavimentu ca nagueenda la? chaahuidugá maʼ zaca barranca luni ne zándaca pur nga guizaaca xiixa desgracia luni. Zacaca nga zazaaca pa qué guni chaahuinu guendanagana ni nápanu ne ti xpinni Cristu. Sicaríʼ bicaa apóstol Juan: «Pa nuu tu na nadxii Dios peru nanalaʼdxi stobi la? rusiguii. Purti pa qué zanda ganaxhii be stobi, nin ne ruuya be laa la? ximodo zanda ganaxhii be Dios qué ruuya be laa yaʼ» (1 Juan 4:20). Pa qué guni chaahuinu xiixa guendanagana napanenu tuuxa la? zándaca gucaa nga laanu gacananaláʼdxinu laa.

Jesucristu bisihuinni lu cani guníʼ qué ziuulaʼdxiʼ Dios modo guni adorarnu laa pa qué chuʼnu tobi si ne xcaadxi xpinni Cristu, ngue runi gúdxibe ca discípulo stibe: «Pa zeda saanu ti ofrenda lu altar para Dios ne guiétenalaʼdxu bichee neu tuuxa la? bisaana gá ofrenda stiuʼ raqué, uyé biene né ni bichee neu que, ne óraque bigueta yetixhe ofrenda stiuʼ lu altar» (Mat. 5:23, 24). Casi maʼ bidúʼyanu ca, naquiiñeʼ gúninu stipa pur chuʼnu tobi si purtiʼ racaláʼdxinu chuulaʼdxiʼ Jiobá modo guni adorarnu laa.a

Dxi guyuudinde chupa xpinni Cristu de Filipos que bihuinni sti razón para guyúbinu chuʼnu tobi si. Lu carta stiʼ Pablu que guníʼ de guendanagana ni gupa Evodia ne Síntique, ne zándaca pur ngue maʼ cadi chuʼ ca binni ridagulisaa tobi si (Fili. 4:2, 3). Ora qué raca chaahuiʼ ca guendanagana ni gápanu nagueenda la? qué rindaa ranna binni cani. Cumu qué riuuláʼdxinu gusaananu de gannaxhiinu ca bíchinu ne ca bizánanu ne chúʼnenu laacaʼ tobi si la? qué ruyúbinu chudindenenu laacaʼ.

Jesús guníʼ: «Dichoso ni riguixhe dxí enda ridinde» (Mat. 5:9). Pa guyúbinu chuʼ binni tobi si la? nabé ziuʼnu nayecheʼ. Ne ziuʼnu nazaaca pa qué chuʼdíndenu binni, purtiʼ Biblia na: «Ora nuudxí ladxidóʼ binni la? nazaaca ziuu» (Pro. 14:30). Peru cani rapa xiana la? jma nagueenda raca huaracaʼ.

Nécaxa guiranu nánnanu naquiiñeʼ chuʼnu tobi si ne xcaadxi la? zándaca cadi guiranu nánnanu ximodo guni chaahuinu ca guendanagana ni gápanu. Guidúʼyanu caadxi conseju ni zeeda ndaaniʼ Biblia ni zacané laanu guni chaahuinu cani.

Ziuʼnu tobi si pa guininu ne diidxaʼ nadóʼ

Ora cadi naroʼbaʼ ra gucuá bi lu pavimentu que la? zanda guni chaahuicabe ni nagueenda. Ñee zanda gutiidiláʼdxinu xiixa ni cadi naxoo guni ca xpinni Cristu laanu la? Jnézapeʼ nga gúninu zacá, casi bicaa apóstol Pedru que: «Purti pa nadxii tu stobi la? neca uchee né laatu qué zuquixe tu ni laa» (1 Ped. 4:8).

Peru ziuu biaje nabé naxoo zaca guendanagana ni gapanenu stobi dede nagana zaca para gutiidiláʼdxinu stonda. Guidúʼyanu xi bizaaca ca israelita que gudiʼdiʼ si caadxi dxi de guyuucaʼ lu layú bizabiruaa Dios que. «Ca xiiñiʼ Rubén ne ca xiiñiʼ Gad ne galaa tribu stiʼ Manasés» ni nabeza ante de guiiguʼ Jordán que bizaʼcaʼ «ti altar guizáʼ nasoo». Xcaadxi de ca tribu stiʼ Israel que guníʼ íquecaʼ chiguiquiiñecabe ni para guni adorárcabe xiixa bidóʼ, ne pur ngue naquiiñeʼ ñuuyacabe ximodo ñuni chaahuicabe guendanagana que. Ngue runi guyuucabe listu para tindenécabe laacaʼ (Jos. 22:9-12).

Ruluíʼ si chupa chonna de ca israelita ni nuu lade xcaadxi tribu ni nabeza deche guiiguʼ Jordán que guníʼ íquecaʼ nápacaʼ razón para gucaalucaʼ laacabe ne gúnicaʼ ni sin gudiicabe cuenta ti cadi gati stale de laacaʼ. Peru lugar de nucaalucaʼ laacabe nagueenda la? ca tribu ca biseendacaʼ tu yenabadiidxaʼ laacabe: «Xiñee bíʼnitu nga para gucheenetu Dios stiʼ Israel, xiñee cudxiidéchetu Jiobá yannadxí [...] pue». Cadi jneza diʼ nga ni guníʼcabe ca, purtiʼ qué ñuni diʼ ca israelita que altar que para guni adorarcaʼ sti dios. Yanna, xi guni ca israelita que pur ni binadiágacaʼ caníʼcabe que yaʼ. Ñee zucaalucaʼ laacabe la? Ñee qué zanacaʼ gusiénecaʼ laacabe xi pur bíʼnicabe ni la? Coʼ, lugar de ñúnicabe nga la? ne diidxaʼ nadóʼ bisiénecabe laacaʼ bíʼnicabe altar que para guni adorárcabe Jiobá. Pur modo bicábicabe que cadi gucanésini laacabe chúʼcabe galán ne Dios, sínuque pur ngue bilá stale binni. Cumu guníʼcabe ne diidxaʼ nadóʼ la? gunda bisiénecabe xii ngue cayúnicabe ne pur ngue maʼ guyuucabe tobi si (Jos. 22:13-34).

Xcaadxi tribu que laaca jneza ni bíʼnicaʼ purtiʼ ante nucaalúcabe ca tribu stiʼ Rubén ne Gad ne galaa tribu stiʼ Manasés que la? guninécabe laacaʼ. Nga runi Stiidxaʼ Dios cudii conseju riʼ: «Cadi guidxiichiluʼ nagueenda, purtiʼ binni nahuati nga ridxiichi nagueenda» (Ecl. 7:9). Biblia na ne diidxaʼ nadóʼ nga naquiiñeʼ guni chaahuinu ca guendanagana gapanenu stobi ne de ndaaniʼ ladxidoʼno naquiiñeʼ guiree cani guininu. Qué zabézanu uguu ndaayaʼ Jiobá laanu pa qué nanu guni chaahuinu xiixa guendanagana ni gapanenu tuuxa xpinni Cristu ne gápanu xiana laa purtiʼ rábinu nabé feu ni bíʼnibe laanu.

Yanna, xi naquiiñeʼ gúninu pa ti xpinni Cristu gabi laanu cadxiichi purtiʼ bíninu laa xiixa yaʼ. Yanna xi gúninu pa cadi dxandíʼ nga ni caniʼbe ca yaʼ. Stiidxaʼ Dios na: «Ora ricábinu ne diidxaʼ nadóʼ la? rindeteʼ ni xiana» (Pro. 15:1). Ca israelita ni guníʼcabe chiguni adorarcaʼ sti dios que la? bisiénecaʼ laacabe ne diidxaʼ nadóʼ xii ngue cayúnicaʼ, zaqué bicueezacabe ca bíʼchicabe ni cadxiichi que. Pa ti xpinni Cristu gacalaʼdxiʼ guiniʼné laanu o gacaláʼdxinu guinínenu laa la? naquiiñeʼ guiníʼ íquenu: «Xi diidxaʼ ne ximodo zanda guiniéʼ para cadi guidxiichibe ne para chuaaniáʼ laabe tobi si yaʼ»

Guiníʼ íquenu xi naquiiñeʼ guininu

Jiobá nanna racaláʼdxinu guininu xi guiráʼ nuu ndaaniʼ ladxidoʼno ora cadídinu ra nagana. Peru naquiiñeʼ gánnanu pa qué guni chaahuinu xiixa ni gucanenu ti xpinni Cristu la? zándaca gábinu ni stobi ni cadi naquiiñeʼ ganna ni. Ne pur xiana nápanu ca maʼ zaninu mal de laabe nezalú stobi. Proverbios 11:11 cuzeeteʼ xi zabeendú binni pa guiníʼ mal de stobi: «Pur cani riníʼ ca binni malu ca zanitilú [guidxi ca]». Zacaca nga zaca pa guininu mal de ti xpinni Cristu, zándaca pur nga maʼ qué ziuu ca binni ridagulisaa tobi si.

Peru cadi naquiiñeʼ si gusaananu de guininu mal de ca bíʼchinu ne ca bizáʼnanu, sínuque naquiiñeʼ guininu galán de laacabe ti gusihuínninu cuyúbinu chúʼcabe tobi si. Dxandíʼ nánnanu guníʼ apóstol Pablu ca diidxaʼ riʼ: «Cadi iníʼ tu diidxa ni guniná stobi». Peru laaca guniʼbe: «Sínuque lainíʼ diidxa jneza ni zanda acané stobi uzuhuaa chaahuiʼ, [...] lagaca nachaʼhui ne stobi, ne lailaselaʼdxi saa. Laguni perdonar saa» (Efe. 4:29-32). Pa ti xpinni Cristu gabi laanu qué ñuulaʼdxiʼ xiixa ni gúdxinu laa o ni bíninu laa la? jma nagueenda zutiidiláʼdxinu donda stibe pa gánnanu riniʼbe galán de laanu. Zacaca nga zaca pa laanu guininu galán de ca bíʼchinu ne ca bizáʼnanu, laaca nagueenda zutiidiláʼdxicabe donda stinu ora guchéʼnenu laacabe (Luc. 6:31).

Naquiiñeʼ chuʼnu tobi si ora gúninu ni na Jiobá

Cumu binni ruchee laanu, ni jma nagueenda rúninu nga guixélenu de tuuxa ora guni laanu xiixa. Peru cadi nga diʼ nga ni jma jneza gúninu (Pro. 18:1). Cumu nácanu xquidxi Jiobá ne zinenu labe la? naquiiñeʼ chuʼnu tobi si ne ca xpinni Cristu ora gúninu ni na Dios (Sof. 3:9).

Cadi naquiiñeʼ diʼ gucueeza xiixa ni gabi tuuxa laanu, o ni guni laanu, de guni adorarnu Jiobá jneza. Guiníʼ íquenu de viuda pobre ni guníʼ Jesús bisaba «irá ni napa [...] para ibani né» ndaaniʼ tobi de ca caja ni nuu ndaaniʼ yuʼduʼ que. Caadxi dxi ante gaca nga gudindené Jesús ca escriba que pur cani cadi jneza cayúnicaʼ. Yanna, ñee pur ni cayuni ca escriba que cadi naquiiñeʼ guni viuda que ni canabaʼ Jiobá laa la? Ñee guyuu Jesús nucueeza laabe la? Coʼ, Jesús bisisaca laabe purtiʼ qué nusaanabe de niguube bueltu ndaaniʼ tobi de ca caja ni nuu ndaaniʼ yuʼduʼ que (Luc. 21:1-4). Laabe bíʼnibe ni na Ley ni nexheʼ chinándacabe ca dxi que dede dxi guti Jesús caadxi dxi despué.

Xi zúninu pa tuuxa xpinni Cristu guniná laanu o guni laanu xiixa ni cadi jneza yaʼ. Ñee pur nga zusaananu de gúninu ni na Jiobá de guidubi ladxidoʼno la? O, ñee zácanu nadxibalú ne zuni chaahuinu guendanagana ca nagueenda para ganda chuʼ ca binni ridagulisaa tobi si la?

Stiidxaʼ Dios cudii conseju riʼ: «Laguni biaʼ ganda para cadi chuʼ dinde né tu irutiʼ» (Rom. 12:18). Nabé risaca nga chinándanu conseju ca, ne zacá zanda sanu lu neza ni zudii laanu guendanabani ni qué zaluxe.

[Cani cá ñee yaza]

[Dibuju/foto ni zeeda lu yaza 17]

Evodia ne Síntique gupa xidé biʼniʼ chaahuicaʼ guendanagana gúpacaʼ

[Dibuju/foto ni zeeda lu yaza 18]

Xi diidxaʼ ne ximodo zanda guininu para chúʼnenu binni ni caninenu ca tobi si yaʼ