Ñee maʼ nuuluʼ listu para chuʼnísaluʼ la?

1, 2. a) Xii nga ni jma rusiecheʼ ca xpinni Dios tiempu riʼ. b) Ximodo zanda gusiene cani napa xiiñiʼ ne ca ancianu cani nahuiiniʼ gánnacaʼ xi riníʼ chuʼnísacaʼ.

DERUʼ 12 iza napa Christopher, peru maʼ racalaʼdxiʼ chúʼnisa. Na ti ancianu rabi laabe: «Runebiaʼyaʼ lii dede dxi nácaluʼ ti baʼduhuiiniʼ. Ne riecheʼ stale gannaʼ racaláʼdxiluʼ chuʼnísaluʼ, peru, xiñee racalaʼdxuʼ guʼnuʼ ni yaʼ». Napa ancianu que razón para guinabadiidxaʼ ngue laabe. Laanu, ca xpinni Dios, riéchenu ora ridúʼyanu riuunisa mil de hombrehuiiniʼ ne dxaapahuiiniʼ guiráʼ iza (Eclesiastés 12:1). Peru ca ancianu ne ca xpinni Cristu ni napa xiiñiʼ, naquiiñeʼ chuʼcaʼ seguru racalaʼdxiʼ xiiñicaʼ chúʼnisa purtiʼ rápacaʼ gana gúnicaʼ ni de guidubi ladxidoʼcaʼ ne purtiʼ riénecaʼ xi riníʼ chúʼnisa binni.

² Biblia rusiidiʼ, ora gudii tobi xquendanabani Jiobá ne chúʼnisa la? óraca nga cuzulú xquendanabani casi ti xpinni Dios. Ndiʼ riníʼ zacaabe stale ndaayaʼ stiʼ Jiobá, peru laaca zucaalú Binidxabaʼ laabe (Proverbios 10:22; 1 Pedro 5:8). Nga runi, ca Testigu ni napa xiiñiʼ la? naquiiñeʼ cueecaʼ tiempu para gacanecaʼ xiiñicaʼ guiene chaahuicaʼ xii nga riníʼ gaca binni ti discípulo stiʼ Cristu. Yanna, pa cadi Testigu bixhoze ti hombrehuiiniʼ yaʼ. Óraque maʼ zacané ca ancianu laabe né guendarannaxhii para gusiénecaʼ laabe xii nga gudii tobi laa Jiobá ne xi riníʼ chúʼnisa binni (biindaʼ Lucas 14:27-30). Ora chigucuí tuuxa ti yoo, napa xidé chuʼ listu. Ngaca nga ni naquiiñeʼ guni ti hombrehuiiniʼ o ti dxaapahuiiniʼ ni racalaʼdxiʼ chúʼnisa, laaca naquiiñeʼ chuʼ listu. Zacá zuzuubabe stiidxaʼ Jiobá ne qué zusaanabe laa (Mateo 24:13). Xi zacané cani nahuiiniʼ cadi gusaana de gúnicaʼ ni na Jiobá yaʼ. Guidúʼyanu.

 3. a) Xi guníʼ Jesús ne Pedru de guendariuunisa (Mateo 28:19, 20; 1 Pedro 3:21). b) Xi guendarinabadiidxaʼ zacábinu lu tema riʼ. c) Xiñee naquiiñeʼ guiníʼ ique cani nahuiiniʼ ca guendarinabadiidxaʼ riʼ.

³ Ñee nahuiiniluʼ ne racaláʼdxiluʼ chuʼnísaluʼ la? ¡Aque galán xa! Ti ndaayaʼ nga chúʼnisa binni ne gaca testigu stiʼ Jiobá. Jesús bisiidiʼ naquiiñeʼ chúʼnisa guiráʼ ca xpinni Cristu. Ne apóstol Pedru guníʼ nabé risaca chúʼnisa binni ti ganda guilá lu gran tribulación (Mateo 28:19, 20; 1 Pedro 3:21). Lu tema riʼ zadúʼyanu chonna guendarinabadiidxaʼ ni zacané lii gúʼyaluʼ pa maʼ nuuluʼ listu para chuʼnísaluʼ: «Ñee maʼ biniiseʼ lu stiidxaʼ Dios la? Xiñee racalaʼdxeʼ chuaanisaʼ. Ñee nannaʼ xii nga gudii binni laa Jiobá la?». Galán guinabadiidxaluʼ cani bizéʼtenu riʼ. Xiñee yaʼ. Purtiʼ ora chuʼnísaluʼ zusihuínniluʼ maʼ bidii stiidxaluʼ qué zusaana de guʼnuʼ ni na Jiobá. Ca guendarinabadiidxaʼ ca zacané cani lii guʼnuʼ ni maʼ bidii stiidxaluʼ.

4, 5. a) Xiñee cadi naquiiñeʼ cuézanu dede ora maʼ huaniisinu para chuʼnísanu. b) Xi riníʼ guiniisi tobi lu stiidxaʼ Dios.

⁴ Qué riníʼ diʼ Biblia pándapeʼ iza nga naquiiñeʼ gapa tuuxa para chúʼnisa. Proverbios 20:11 na: «Dede ti hombrehuiiniʼ rusihuinni pa nayá ne pa runi ni jneza pur cani runi». Nga runi, dede ti xcuidi zanda ganna xii nga jneza ne ni cadi jneza, ne guiene xi riníʼ gudii binni laa Jiobá. Nga runi, pa rusihuinni ti hombrehuiiniʼ o ti dxaapahuiiniʼ maʼ biniisi lu stiidxaʼ Dios ne maʼ bidii xquendanabani Jiobá la? maʼ zanda chúʼnisa ne naquiiñeʼ guni ni (Proverbios 20:7).

⁵ Xi riníʼ guiniisi binni lu stiidxaʼ Dios. Qué riníʼsini gaca tuuxa ti binni huaniisi o gapa stale iza. Casi modo rusiidiʼ Biblia, riniʼni ganna tuuxa xii nga jneza ne xii nga ni cadi jneza (Hebreos 5:14). Riniʼni ganna tobi xii nga ni jneza ne guni ni de guidubi ladxidóʼ. Ti binni ni maʼ biniisi lu stiidxaʼ Dios rudxiilú xiixa ni ruquiinde laa guchee ne cadi caquiiñeʼ gabi tuuxa laa guni ni jneza. Pa chuʼnísaluʼ la? naquiiñeʼ gúniluʼ ni jneza neca cadi cayuuyaʼ bixhózeluʼ, jñaaluʼ o sti binni lii (zadxélaluʼ sti conseju lu Filipenses 2:12).

6, 7. a) Xi guiráʼ gudiʼdiʼ Daniel dxi guyuu Babilonia. b) Ximodo bisihuinni Daniel maʼ biniisi lu stiidxaʼ Dios.

⁶ Ñee zanda gusihuinni ti hombrehuiiniʼ maʼ biniisi lu stiidxaʼ Dios la? Guníʼ ique ejemplu stiʼ ti xpinni Dios láʼ Daniel. Zándaca ti hombrehuiiniʼ nga Daniel dxi yenécabe laa ndaaniʼ guidxi Babilonia ne qué ñé diʼ bixhoze nin jñaa. Raqué bidxaagalube stale cosa ni nuquiinde laabe nucheebe. Nuube lade binni ni qué runi ni na Dios. Ne laaca biiyacabe laabe casi ti binni risaca. Dede beeda gácabe tobi de cani gulícabe para guni xhiiñaʼ rey (Daniel 1:3-5, 13). Ruluíʼ jma galán zabani Daniel Babilonia que modo bibani Israel.

⁷ Peru bidxiilú Daniel guiráʼ ni gudiʼdiʼ. Ximodo bíʼnibe ni yaʼ. Qué nudiibe lugar nuchaa ca binni de Babilonia modo riníʼ íquebe ne qué nusaana de nuzuubabe stiidxaʼ Jiobá. Biblia na, Daniel «gudixhe ique cadi gucheené ley stiʼ Dios». Gudixhe íquebe qué ziuu dxi gúnibe ni runi religión ni cadi dxandíʼ (Daniel 1:8). Zacá bisihuínnibe maʼ biniisibe lu stiidxaʼ Dios.

 8. Xi zanda guiziidiluʼ de ejemplu stiʼ Daniel.

⁸ Xi zanda guiziidiluʼ de ejemplu stiʼ Daniel. Pa nahuiiniluʼ, peru maʼ biniisiluʼ lu stiidxaʼ Dios, naquiiñeʼ guʼnuʼ ni na Jiobá neca guidxaagaluluʼ guendanagana. Cadi gácaluʼ casi ti camaleón, manihuiiniʼ ni ruchaa de color para guihuinni casi rihuinni ca cosa ni nuu gaxha de laa. Qué zanda diʼ gusihuínniluʼ nácaluʼ xhamigu Dios ra Yoo stiʼ Reinu ne gúniluʼ cosa ni cadi jneza ora maʼ nuuluʼ ra scuela. Naquiiñeʼ guzuubaluʼ stiidxaʼ Dios neca chuʼ tu uquiinde lii guʼnuʼ ni cadi jneza (biindaʼ Efesios 4:14, 15).

9, 10. a) Xiñee naquiiñeʼ guiníʼ íqueluʼ xi bíʼniluʼ últimu biaje gúpaluʼ guendanagana. b) Xi riníʼ chúʼnisa binni.

⁹ Dxandíʼ, pa nahuiininu o pa maʼ huaniisinu, guiranu rucheʼnu (Eclesiastés 7:20). Peru pa racaláʼdxiluʼ chuʼnísaluʼ, naquiiñeʼ guinabadiidxaluʼ laca lii pa dxandíʼ qué racaláʼdxiluʼ gusaana de gúniluʼ ni na Jiobá. Ñee maʼ xadxíhuiiniʼ de cuzuubaluʼ stiidxaʼ Jiobá la? Guníʼ ique ximodo bidxiiluluʼ xiixa ni biquiinde lii gucheeluʼ últimu biaje gúpaluʼ ti guendanagana. Ñee gunda biʼnuʼ ni jneza dxi que la? O zándaca cadíʼdiluʼ ti guendanagana cásica ni gudiʼdiʼ Daniel. Zándaca maʼ gudxi tuuxa lii gúniluʼ xiixa cosa risaca lu guidxilayú riʼ para guibániluʼ galán laga nahuiiniluʼ. Ora guidxaagaluluʼ ti guendanagana zacá, ñee riéneluʼ xii nga racalaʼdxiʼ Jiobá guʼnuʼ la? (Efesios 5:17).

¹⁰ Galán guinabadiidxaluʼ laca lii cani maʼ bizéʼtenu ca, purtiʼ zacané cani lii gánnaluʼ cadi guendariguite diʼ nga chúʼnisa binni. Ora maʼ guyuunísaluʼ la? zusihuínniluʼ maʼ bidii stiidxaluʼ zannaxhiiluʼ Jiobá ne qué zusaana de guʼnuʼ ni nabe de guidubi ladxidoʼloʼ (Marcos 12:30). Guiráʼ tu chúʼnisa naquiiñeʼ quixhe ique guni ni maʼ bidii stiidxaʼ. Biblia na: «Cada gudii stiidxaluʼ Dios gúniluʼ xiixa la? biʼniʼ ni nagueendaca, purtiʼ guirutiʼ riuulaʼdxiʼ ni runi ca binni huati. Biʼniʼ ni gudii stiidxaluʼ gúniluʼ. Jma galán cadi gudii stiidxaluʼ gúniluʼ xiixa que gudii stiidxaluʼ ne cadi gúniluʼ ni» (Eclesiastés 5:4, 5).

11, 12. a) Pa caníʼ íqueluʼ chuʼnísaluʼ, xi naquiiñeʼ ganna chaahuiluʼ. b) Xi zacané lii gúʼyaluʼ guendariuunisa casi ruuyaʼ Jiobá ni.

¹¹ Biblia na zuni guiráʼ xpinni Dios ni nabe «né stale gana», dede né cani nahuiiniʼ (Salmo 110:3). Nga runi, pa caníʼ íqueluʼ chuʼnísaluʼ, naquiiñeʼ ganna chaahuiluʼ lii nga racalaʼdxuʼ guʼnuʼ ni. Nabé risaca ndiʼ, jmaruʼ si pa biniisiluʼ ndaaniʼ ti familia ni naca testigu stiʼ Jiobá.

¹² Laga ziniisiluʼ, nánnadu maʼ biiyaluʼ guyuunisa stale binni. Zándaca maʼ guyuunisa caadxi xhamíguluʼ, ca bíʼchiluʼ o ca bizáʼnaluʼ. Peru guyuu cuidadu. Cadi guiníʼ íqueluʼ naquiiñeʼ chuʼnísaluʼ purtiʼ si maʼ napuʼ iza para laani o purtiʼ si cayuuyaluʼ cayuunisa xcaadxi. Xi zacané lii gúʼyaluʼ guendariuunisa casi ruuyaʼ Jiobá ni yaʼ. Gulee tiempu para guiníʼ íqueluʼ xiñee nabé risaca chúʼnisa binni. Lu tema riʼ ne lu stobi ca zadxeʼluʼ caadxi razón.

13. Ximodo zanda gannuʼ pa dxandipeʼ racaláʼdxiluʼ chuʼnísaluʼ.

¹³ Ximodo zanda gannuʼ pa dxandipeʼ racaláʼdxiluʼ chuʼnísaluʼ yaʼ. Ti modo nga guiníʼ íqueluʼ ximodo runi orarluʼ. Gunabadiidxaʼ laca lii: «Ñee runeʼ orar Jiobá stale biaje la? o huaxiéʼ. Ñee rabeʼ laabe de guiráʼ ni naguu xizaa naa la?». Ndiʼ zacané lii gánnaluʼ pa dxandíʼ xhamíguluʼ Dios (Salmo 25:4). Stale biaje ricabi Jiobá ca oración stinu ora gúʼndanu Biblia. Nga runi, sti modo chuʼluʼ seguru dxandíʼ racaláʼdxiluʼ chuʼnísaluʼ nga gúʼndaluʼ Biblia (Josué 1:8). Gunabadiidxaʼ laca lii: «Ñee napaʼ costumbre guʼndaʼ Biblia guiráʼ semana la? Ñee riuuladxeʼ chuaaʼ ora runi binnilidxeʼ adoración en familia la?». Zacané ca guendarinabadiidxaʼ riʼ lii para gúʼyaluʼ pa dxandíʼ gudixhe íqueluʼ chuʼnísaluʼ purtiʼ racaláʼdxiluʼ gaca xhamíguluʼ Jiobá ne gúniluʼ ni na de guidubi ladxidoʼloʼ.

14. Xiñee gadxé nga gudii tobi laa Jiobá ne gadxé nga chúʼnisa.

¹⁴ Nuu hombrehuiiniʼ ne dxaapahuiiniʼ riniʼcaʼ maʼ bidiicaʼ laacaʼ Jiobá, peru nacaʼ caʼruʼ chuʼcaʼ listu para chuʼnísacaʼ. Peru cadi zacá diʼ nga laani. Ni dxandíʼ nga qué gánnacabe xii nga gudii tuuxa laa Jiobá ne xii nga chúʼnisa. Gudiiluʼ lii Jiobá nga gúniluʼ ti oración ra gábiluʼ laabe qué zusaana de guʼnuʼ ni nabe. De racá maʼ chuʼnísaluʼ para guʼyaʼ guiráʼ binni maʼ bidiiluʼ xquendanabániluʼ Jiobá. Nga runi, ante chuʼnísaluʼ la? naquiiñeʼ guiene chaahuiluʼ xi riníʼ gudii binni xquendanabani Dios.

15. Xi riníʼ gudii binni xquendanabani Dios.

¹⁵ Ora gudiiluʼ lii Jiobá, cayábiluʼ laabe maʼ stibe xquendanabániluʼ dede dxi ca. Ne cudii stiidxaluʼ jma risaca para lii cadi gusaana de gúniluʼ ni na Jiobá (biindaʼ Mateo 16:24). Nga runi, cadi guendariguite diʼ nga gudii binni xquendanabani Jiobá (Mateo 5:33). Ximodo zanda gusihuínniluʼ maʼ bidiiluʼ xquendanabániluʼ Dios yaʼ (Romanos 14:8).

16, 17. a) Biquiiñeʼ ti ejemplu para gusiéneluʼ ximodo nga maʼ cadi stiluʼ xquendanabániluʼ. b) Ora gudii ti binni xquendanabani Dios, xi ngue cayabi laabe.

¹⁶ Ximodo zanda gusihuínniluʼ maʼ cadi stiluʼ xquendanabániluʼ. Guníʼ ique lu ejemplu riʼ. Bixuiʼlú nusigaʼdeʼ ti xhamíguluʼ lii ti carru, nudiibe lii xquiʼchiʼ ni ne ñábibe lii maʼ stiluʼ ni. Peru ñábibe lii chiguiaananebe llave stini ne laasibe nga zanda gusabe ni. Ñee niníʼ íqueluʼ dxandíʼ cusigáʼdebe lii carru que la? o coʼ.

¹⁷ Ora gudii ti binni xquendanabani Dios la? cayabi laabe: «Stiluʼ xquendanabaneʼ». Ne napa Jiobá derechu cueza guni binni riʼ ni bidii stiidxaʼ. Peru guníʼ ique nuzulú nireené binni riʼ tuuxa ni cadi naca Testigu nagaʼchiʼ. O bixuiʼlú guicaabe ti dxiiñaʼ ni qué gudii lugar laabe gucheechebe diidxaʼ o chebe ca reunión. Binni riʼ la? cadi cayuni diʼ ni bidii stiidxa Dios. Zeeda gácabe casi amigu ni biaanané llave stiʼ carru que. Nga runi, pa gábiluʼ Jiobá maʼ stiʼ xquendanabániluʼ, cadi gusaana de guʼnuʼ ni nabe, neca nuu biaje cadi ngue diʼ nga ni racalaʼdxuʼ. Ngapeʼ nga ni biʼniʼ Jesús. Laa guníʼ ca diidxaʼ riʼ: «Purti biete de ibáʼ cadi para gune ni racaladxeʼ, sínuque para gune ni na ni biseenda naa» (Juan 6:38).

18, 19. a) Xi guníʼ Rose ne Christopher pur guyuunísacaʼ. b) Xi riníʼ íqueluʼ de guendariuunisa.

¹⁸ Dxandíʼ cadi guendariguite diʼ nga chúʼnisa binni. Ti ndaayaʼ naroʼbaʼ nga gudii binni laa Jiobá ne chúʼnisa. Pa nadxiiluʼ Jiobá ne riéneluʼ xii nga gudiiluʼ xquendanabániluʼ laabe la? ziuunísaluʼ ne qué zaníʼ íqueluʼ ni chupa biaje. Ne qué zaca arrepentirluʼ de ni gudixhe íqueluʼ. Ti baʼdudxaapaʼ láʼ Rose guníʼ: «Nabé nadxieeʼ Jiobá, ne ni jma rusiecheʼ naa nga guneʼ ni nabe. Dxi gudixheʼ iqueʼ chuaanisaʼ, nannaʼ dxiicheʼ ngue nga ti cosa jma galán chiguneʼ».

¹⁹ Lu primé párrafo que guninu de ti hombrehuiiniʼ láʼ Christopher. Laa guyuunisa dxi napa 12 iza. Ximodo runi sentirbe pur ni gudixhe íquebe gúnibe yaʼ. Laabe riniʼbe guizáʼ nuube nayecheʼ. Gúcabe precursor regular dxi nápabe 17 iza, gúcabe siervu ministerial dxi nápabe 18 iza ne yanna maʼ nuube Betel. Christopher guníʼ: «Jneza ngue ni bineʼ ora gudixheʼ iqueʼ chuaanisaʼ. Cayuneʼ dxiiñaʼ para Jiobá ne para xquidxi, ne nga nga ni jma rusiecheʼ naa». Yanna lii yaʼ. Ñee caníʼ íqueluʼ chuʼnísaluʼ la? Pa zacá ni, ximodo zanda chuʼluʼ listu. Lu sti tema ca zadúʼyanu ximodo.