Cadi gudiʼnu lugar guirá guendarannaxhii stinu

1, 2. a) ¿Tu luguiáʼ guca cumplir ca diidxaʼ zeeda lu Mateo 24:12 primeru? b) ¿Ximodo rusihuinni libru stiʼ Hechos jma stale de ca hermanu de primé siglu qué nusaanacaʼ de ñannaxhiicaʼ? (Biiyaʼ dibuju ni zeeda ra ruzulú tema riʼ).

DXI guyuu Jesús lu Guidxilayú, bizeeteʼ xi zazaaca ora mayaca «iluxe guidx[i]layú riʼ». Tobi de ca cosa guniʼbe nga «casi irá binni zusaana de ganaxhii saa» (Mateo 24:3, 12). Guca cumplir ca diidxaʼ riʼ primé biaje lade ca xpinni Cristu de primé siglu. Laacabe guníʼcabe nácacabe xquidxi Dios, peru bidiicabe lugar chaahuiʼ chaahuiʼ guirá guendarannaxhii ni runi sentírcabe pur Dios.

² Peru jma stale de ca xpinni Cristu que gadxé actitud gúpacaʼ. Laacaʼ biʼniʼ predicarcaʼ né stale gana «stiidxa Cristu» ne bisihuínnicaʼ nadxiicaʼ Dios, nadxiicaʼ ca hermanu sticaʼ ne cani caʼruʼ ganna cani dxandíʼ rusiidiʼ Biblia. Nabé naguidxi guca guendarannaxhii ni gupa ca xpinni Cristu riʼ Dios (Hechos 2:44-47; 5:42). Peru nabé triste ni gucaʼ, guyuu caadxi xpinni Cristu de primé siglu que bidiicaʼ lugar guirá guendarannaxhii ni runi sentircaʼ pur Dios chaahuiʼ chaahuiʼ. ¿Ximodo nánnanu ni yaʼ?

 3. ¿Xi zándaca bicaa caadxi xpinni Cristu guirá guendarannaxhii sticaʼ chaahuiʼ chaahuiʼ?

³ Gucané Jesús ca xpinni Cristu ni nabeza Éfeso gudiicaʼ cuenta maʼ cadi nadxiicaʼ cásica gunnaxhiicaʼ dxi bizulucaʼ (Apocalipsis 2:4). Zándaca bidii ca xpinni Cristu riʼ lugar guicá xpiaʼ ca binni de guidxi que laacaʼ, ca binni que jma gucuá íquecaʼ gúnicaʼ cani riuuláʼdxicaʼ (Efesios 2:2, 3). Nabé ricu guca guidxi Éfeso, ne ca binni guleza ndaaniʼ ni jma bisaca para laacaʼ guibánicaʼ galán ne gápacaʼ stale luju. Ne stale de ca binni que guyuunecaʼ tutiica si ne qué ñuni respetarcaʼ ca ley stiʼ Dios. Jma bisaca para laacabe gúnicabe xcuxtúcabe que gusihuínnicabe dxandíʼ nadxiicabe Dios ne xcaadxi binni sin cuézacabe guicaacabe xiixa.

 4. a) ¿Xiñee maʼ cará guendarannaxhii stiʼ binni ca dxi nabáninu riʼ? b) ¿Xi chidúʼyanu yanna?

⁴ Ca diidxaʼ guníʼ Jesús de xi zazaaca né guendarannaxhii laaca cayaca cumplir cani ca dxi nabáninu riʼ. Zeʼ dxi jma maʼ huaxiéʼ nadxii binni Dios. Lugar de nuyúbicabe Dios para guni chaahuiʼ ca guendanagana stiʼ Guidxilayú riʼ, millón de binni ruyubi gacané ca organización nuu lu Guidxilayú riʼ laacaʼ. Nga runi jma maʼ stale binni cusaana de gannaxhii. Dede zanda gueeda guirá guendarannaxhii stiʼ ca xpinni Jiobá, casi bizaaca né ca xpinni Cristu ni guleza ndaaniʼ guidxi Éfeso dxiqué. Nga runi, guidúʼyanu xi zanda gúninu para cadi gusaana de gannaxhiinu Jiobá, cadi gusaana de gannaxhiinu cani dxandíʼ rusiidiʼ Biblia ne ximodo cadi gusaana de gannaxhiinu ca hermanu stinu.

 5. ¿Xiñee naquiiñeʼ gannaxhiinu Dios?

⁵ ¿Tuu nga ni jma naquiiñeʼ gannaxhiinu? Jesús guníʼ: «“Gunaxhii [Jiobá] Dios stiuʼ de idubi ladxidóʼ loʼ ne idubi xhialma luʼ ne idubi xquenda biaani luʼ.” Nga nga primé mandamientu ne ni jma risaca» (Mateo 22:37, 38). Guendarannaxhii ni nápanu Jiobá ca racané ni laanu guzúʼbanu stiidxabe, guni huantarnu ca guendanagana guidxaagalunu ne gaca nanaláʼdxinu ni malu. Biblia ná: «Laatu cani nadxii Jiobá, lagaca nanalaʼdxiʼ ni cadi jneza. Laabe cayápabe xquendanabani cani qué rusaana laabe, de lu náʼ ca binni qué iquiiñeʼ rulabe laacaʼ» (Salmo 97:10). Peru Binidxabaʼ ne guidxilayú stiʼ nuucaʼ gusiracaʼ ne gunitilucaʼ guendarannaxhii ni nápanu Dios.

 6. ¿Xi rizaaca ora gusaana binni de gannaxhii Dios?

⁶ Cadi jneza modo riníʼ ique binni guidxilayú de guendarannaxhii. Lugar de gannaxhiicaʼ Dios, stale binni nadxii laca laa o ruyubi para laa si (2 Timoteo 3:2). Jma «riulaʼdxi binni guni ni na ique ne gapa irá ni guʼyaʼ» ne guluiʼbe guiráʼ ni nápabe nezalú xcaadxi binni (1 Juan 2:16). Apóstol Pablo laaca gudixhená laanu xi zándaca guizaacanu pa jma guicá íquenu gúninu cani riuuláʼdxinu. Laabe guniʼbe: «Cani ruyubi ni chuʼlaʼdxi si la? rati». ¿Xiñee ráticabe yaʼ? Purtiʼ cani ricá ique guni cani riuulaʼdxiʼ si la? rácacaʼ enemigu stiʼ Dios (Romanos 8:6, 7). Ca binni ni riquiiñeʼ xquendanabani para si guni ganar bueltu ne para si guni ca deseu sexual stiʼ, triste modo rilúxecaʼ (1 Corintios 6:18; 1 Timoteo 6:9, 10).

 7. ¿Xi caadxi modo riníʼ ique binni o actitud ni cadi jneza zanda guniná ca xpinni Cristu de yanna?

⁷ Stale de cani qué runi cré Dios, cani raca nagana para laacaʼ guni crecaʼ nuube ne cani runi cré ziúpanu de evolución racaláʼdxicaʼ gucaacaʼ binni gusaana de gannaxhiicaʼ Dios o gusaana de guni crecaʼ dxandíʼ nuube. Rucaacabe binni guiníʼ ique ti binni si ni nahuati o ni qué ñé scuela nga runi cré nuu tu bizáʼ ca cosa ca. Ne cadi nga si, stale binni jmápeca runi respetarcaʼ ca científicu ca que Jiobá, ni bizáʼ guiráʼ ni nuu (Romanos 1:25). Pa gudiʼnu lugar guicá modo riníʼ ique ca binni riʼ laanu, zándaca guirá guendarannaxhii ni nápanu Jiobá ne gunítinu amistad ni napanenu laabe (Hebreos 3:12).

 8. a) ¿Xiñee zándaca guiree ca xpinni Jiobá gana? b) ¿Ximodo riguixhedxí Salmo 136 ladxidoʼno?

⁸ Cumu guidxilayú riʼ nuuni lu náʼ Binidxabaʼ la? zándaca ziuu biaje zareʼnu gana (1 Juan 5:19). Peru pa gudiʼnu lugar cuee ni gana laanu, zanda guirá fe stinu ne guendarannaxhii ni nápanu Dios. Zándaca nápanu guendanagana purtiʼ qué gápanu bueltu, huaranu o maʼ nagólanu. O zándaca runi sentirnu triste purtiʼ qué randa rúninu caadxi cosa biaʼsi casi ñuuláʼdxinu. O zándaca guiuubaʼ ladxidoʼno o chuʼnu triste pur qué niree caadxi cosa casi racaláʼdxinu ñaca ni. Intiica si guendanagana gápanu, qué chuʼ dxi guiníʼ íquenu maʼ bisaana Jiobá laanu. Guietenaláʼdxinu ca diidxaʼ ni riguixhedxí ladxidoʼno ni zeeda lu Salmo 136:23. Sicaríʼ riníʼ ni de Jiobá: «Bietenaláʼdxibe de laanu dxi guirutiʼ nácanu, purtiʼ qué ziuu dxi guirá guendarannaxhii stibe». Nannadxíchinu zucaadiaga Jiobá laanu ne zacábibe laanu ora guinábanu laabe gacanebe laanu (Salmo 116:1; 136:24-26).

 9. ¿Xi gucané Pablo para cadi gusaana de gannaxhii Dios yaʼ?

⁹ Nabé guníʼ ique apóstol Pablo ximodo racané Jiobá laa, ne ngue bidii stipa laabe. Laabe bicaabe: «Nga runi zanda guininu né stale gana: Jiobá nga racané naa; qué zadxibediáʼ. ¿Xi zanda guni binni naa yaʼ?» (Hebreos 13:6). Confianza ni gupa Pablo Jiobá que gucané ni laa para gudxiilú ca guendanagana ni gupa. Neca tiidibe lu guendanagana naroʼbaʼ qué rusaana de gápabe confianza Jiobá. Dede ora guyuube cárcel gucanebe ca hermanu stibe ra bicaabe caadxi carta para cuʼ gana laacaʼ (Efesios 4:1; Filipenses 1:7; Filemón 1). Neca gúpabe stale guendanagana, qué nusaanabe de ñanaxhiibe Jiobá de guidubi ladxidoʼbe. Gupa Pablo confianza «laabe nga Dios stinu ne riguixhe dxí be ladxidóʼ no. Rusieche be laanu ora tiica acaná ladxidóʼ no» (2 Corintios 1:3, 4). ¿Ximodo zanda chinándanu ejemplu stibe yaʼ?

10. ¿Xi zanda gúninu para cadi gusaana de gannaxhiinu Jiobá?

¹⁰ Bizeeteʼ Pablo ti cosa ni zanda gúninu para cadi gusaana de gannaxhiinu Dios. Laabe guniʼbe: «Lainíʼ né Dios sin guiaana dxí tu». Ne despué laaca bicaabe: «Cadi usaana tu de iníʼ né tu Dios» (1 Tesalonicenses 5:17; Romanos 12:12). ¿Xiñee racané oración ca para gaca amistad ni napanenu Dios ca jma naguidxi yaʼ? Purtiʼ ora runi orarnu, rinínenu Jiobá (Salmo 86:3). Ora rábinu Bixhózenu ni nuu guibáʼ cani riníʼ íquenu ne cani runi sentirnu, ridxíñanu jma gaxha de laabe (Salmo 65:2). Ne jma naguidxi raca guendarannaxhii ni nápanu laabe ora ridúʼyanu ricábibe ca oración stinu. Ridúʼyanu dxandíʼ ni ná ca diidxaʼ riʼ: «Jiobá nuu gaxha de guiráʼ cani rinabaʼ gacanebe laacaʼ» (Salmo 145:18). Pa gápanu confianza nadxii Jiobá laanu ne qué rusaana laanu la? zacané ni laanu gudxíʼlunu ca guendanagana ni gápanu yanna ne ni guidxaagalunu despué.

11, 12. ¿Xi zanda gúninu para gannaxhiinu cani dxandíʼ rusiidiʼ Biblia jma?

¹¹ Laanu ca xpinni Cristu, nadxiinu cani dxandíʼ zeeda lu Biblia, Stiidxaʼ Dios. Sicaríʼ gudxi Jesús Bixhoze: «Dxandíʼ stiidxa luʼ» (Juan 17:17). Nga runi para gannaxhiinu cani dxandíʼ zeeda lu Biblia, naquiiñeʼ gánnanu xi rusiidiʼ ni (Colosenses 1:10). Peru naquiiñeʼ gúninu sti cosa. Hombre ni bicaa Salmo 119 racané laanu guiénenu xiruʼ zanda gúninu. Biblia ná: «¡Guizáʼ nadxieeʼ ley stiuʼ! Guidubi dxi laani maʼ caníʼ iqueʼ. Pur ca mandamientu stiluʼ jma nuu xpiaaneʼ que ca xhenemiguáʼ, purtiʼ guiráʼ ora napaʼ cani ndaaniʼ iqueʼ. Jma rieneʼ chaahueʼ que guiráʼ ca maestru stinneʼ, purtiʼ nabé ricá iqueʼ cani rusietenaláʼdxiluʼ naa. Pur cani runeʼ rusihuinneʼ jma rieneʼ que ca hombre ni huaniisi para naa, purtiʼ runeʼ cani riniʼluʼ» (Salmo 119:97-100). Ora guidúʼndanu xiixa lu Biblia, guiníʼ íquenu ni guidubi dxi ca. Pa guiníʼ íquenu xi zabeendunu ora gúninu cani dxandíʼ zeeda lu Biblia ca lu xquendanabáninu la? zannaxhiinu ni jma.

¹² Hombre bicaa Salmo 119 ca laaca guníʼ: «¡Guizáʼ nanaxhi runeʼ sentir ca stiidxaluʼ lu ludxeʼ, jma nanaxhi runeʼ sentir ni que dxiña yaga ndaaniʼ ruaaʼ!» (Salmo 119:103). Ca publicación ni rusiidiʼ de Biblia ni runi preparar organización stiʼ Dios zeeda gaca cani casi ti guendaró nanixe. Ora ridoʼno xiixa ni riuuláʼdxinu, qué ridoʼno ni luguʼ luguʼ. Zacaca nga naquiiñeʼ gúninu ora guni estudiarnu, cadi luguʼ luguʼ gúninu ni. Zacá jma ziuuláʼdxinu cani dxandíʼ rusiidiʼ Biblia ni zeeda gaca ca «diidxaʼ ni chuulaʼdxiʼ binni» ne qué ziaandaʼ laanu ni guidúʼndanu ne iquiiñenu ni para gacanenu xcaadxi (Eclesiastés 12:10).

13. ¿Xi gucané Jeremías gannaxhii cani bisiidiʼ Dios laa, ne xi bicaa ni laabe gúnibe?

¹³ Nabé gunnaxhii profeta Jeremías cani bisiidiʼ Dios laa. Laabe guniʼbe: «Dxi maʼ gupaʼ ca diidxaʼ stiuʼ, bizuluáʼ gudahuaʼ cani; ne bisiecheʼ stiidxaluʼ naa ne bisiécheni ladxiduáʼ; purtiʼ ziniáʼ laluʼ, Jiobá, Dios stiʼ ca ejércitu» (Jeremías 15:16). Gunnaxhii Jeremías ca diidxaʼ risaca stiʼ Dios ne guníʼ íquebe stale de laacani. Nga runi bisisácabe privilegiu ni nápabe de guiniʼbe pur Jiobá ne guni predicarbe stiidxaʼ. Pa nadxiinu cani dxandíʼ rusiidiʼ Biblia, laaca zusisácanu privilegiu ni nápanu de gácanu testigu stiʼ Jiobá ne de gucheechenu stiidxaʼ Reinu lu ca últimu dxi riʼ.

14. ¿Xiruʼ zanda gúninu para jma gannaxhiinu cani dxandíʼ zeeda lu Biblia?

¹⁴ ¿Xiruʼ naquiiñeʼ gúninu para jma gannaxhiinu cani dxandíʼ rusiidiʼ Biblia yaʼ? Cadi naquiiñeʼ guiaadxanu ca reunión ni riquiiñeʼ Jiobá para gusiidiʼ laanu ra congregación. Tobi de cani jma riquiiñeʼ Jiobá para gusiidiʼ laanu nga estudiu ni rápanu cada semana ra runi estudiarnu Biblia né revista Torre stiʼ ni rapa. Pa racaláʼdxinu cueendunu biaʼ gándatiʼ de reunión riʼ la? primeru naquiiñeʼ gaca preparar chaahuinu. Casi guidúʼndanu guiráʼ ca textu ni zeeda luni. Yanna riʼ, stale hermanu zanda guʼndaʼ ne guni descargar revista riʼ lu ca aparatu electrónicu stiʼ ne cadi nagana ni. Nuu revista riʼ lu stale idioma lu sitiu jw.org ne lu aplicación JW Library. Caadxi formatu electrónicu racané cani laanu guidxélanu ca textu ca nagueenda. Peru intiica modo iquiiñenu para guni estudiarnu ca tema ca, naquiiñeʼ guʼndaʼ chaahuinu ca textu zeeda luni ne guiníʼ íquenu de laacani jma. Pa gúninu ni la? jma zannaxhiinu Stiidxaʼ Dios. Ne zacá nga naquiiñeʼ guni ti binni. Biblia ná: «Peru riuulaʼdxiʼ guʼndaʼ ley stiʼ Jiobá, ne ruundaʼ ley stibe chaahuidugá dxi ne gueelaʼ» (Salmo 1:2).

15, 16. a) ¿Xi mandatu bidii Jesús zeeda lu Juan 13:34, 35? b) ¿Xiñee reeda gaca guendarannaxhii ni runi sentirnu pur Jiobá ne pur Biblia ca tobi si né guendarannaxhii ni nápanu ca hermanu?

¹⁵ Últimu gueelaʼ guyuu Jesús lu Guidxilayú, gúdxibe ca discípulo stibe: «Chi tixhe caʼ xiixa nacubi guni tu, ganaxhii saa tu cásica huayanaxhiee laatu. Zacá laganaxhii saa. Pa ganaxhii saa tu zacá la? zanna binni xpinne laatu» (Juan 13:34, 35).

¹⁶ Ora laanu nadxiinu ca hermanu stinu laaca rusihuínninu nadxiinu Jiobá. Pa cadi nadxiinu Dios la? qué zanda gannaxhiinu ca hermanu. Ne pa cadi nadxiinu laacabe, qué zanda gannaxhiinu Dios. Apóstol Juan bicaa de ca hermanu: «Pa qué zanda ganaxhii be stobi, nin ne ruuya be laa la? ximodo zanda ganaxhii be Dios qué ruuya be laa yaʼ» (1 Juan 4:20). Ne cadi ngasi, guendarannaxhii ni runi sentirnu pur Jiobá ne pur ca hermanu raca cani tobi si né guendarannaxhii ni nápanu Biblia. ¿Xiñee yaʼ? Purtiʼ pa nadxiinu cani rizíʼdinu lu Biblia, zúninu ni ná mandatu rudii ni laanu de gannaxhiinu Dios ne ca hermanu (1 Pedro 1:22; 1 Juan 4:21).

17. ¿Ximodo rusihuínninu nadxiinu ca hermanu?

¹⁷ (Biindaʼ 1 Tesalonicenses 4:9, 10). ¿Gunáʼ nga caadxi modo zanda gusihuínninu nadxiinu ca hermanu de congregación stinu yaʼ? Zándaca tuuxa maʼ huaniisi caquiiñeʼ gacanécabe laa para cheʼ ca reunión stinu. O zándaca tuuxa hermana viuda caquiiñeʼ guni chaahuinu xiixa ra lidxi (Santiago 1:27). Ca hermanu ni maʼ biree gana, ni nuu deprimidu o ni napa sti guendanagana caquiiñecaʼ guizaaláʼdxinu laacaʼ, cuʼnu gana laacaʼ ne quixhedxinu ladxidoʼcaʼ (Proverbios 12:25; Colosenses 4:11). Pur cani rininu ne cani rúninu rusihuínninu nadxiinu «ca hermanu» (Gálatas 6:10).

18. ¿Xi zacané laanu guni chaahuinu intiica guendanagana gapanenu ca hermanu?

¹⁸ Biblia ná lu ca últimu dxi stiʼ guidxilayú malu riʼ stale binni zaníʼ ique puru para laasi ne zachelucaʼ gápacaʼ jma (2 Timoteo 3:1, 2). Nga runi ca xpinni Cristu naquiiñeʼ gúninu stipa pur gannaxhiinu Jiobá jma ne Stiidxaʼ, ne pur gannaxhiisaanu. Cumu nácanu binni ruchee la? nuu biaje zápanu xiixa guendanagana né tuuxa hermanu. Peru intiica guendanagana gápanu, guendarannaxhii ni nápanu zucaa laanu guni chaahuinu cani nagueendaca ne chuʼnu tobi si (Efesios 4:32; Colosenses 3:14). Qué chuʼ dxi gudiʼnu lugar guirá guendarannaxhii stinu. Ni jma jneza gúninu nga cadi gusaana de gannaxhiinu Jiobá, Stiidxabe ne ca hermanu stinu de guidubi ladxidoʼno.