Gusisácanu Jiobá ndaaniʼ congregación

 1. ¿Xi biʼniʼ sentir David pur Jiobá, ne xi bicaa ni laabe gúnibe?

REY DAVID bicaa: «Nandxóʼ Jiobá ne naquiiñeʼ gusisácanu laa» (Sal. 145:3). Gunnaxhiibe Jiobá, ne guendarannaxhii ca bicaa ni laabe gusisácabe laa «ndaaniʼ congregación» (Sal. 22:22; 40:5). Cumu guiranu nadxiinu Jiobá la? nga runi riuuláʼdxinu ca diidxaʼ guníʼ David riʼ: «Qué chuʼ dxi gusaana de guisácaluʼ Jiobá, Dios stiʼ Israel, bixhózedu» (1 Crón. 29:10-13).

 2. a) ¿Ximodo zanda gusisácanu Jiobá? b) ¿Xi rizaaca caadxi hermanu ne xi zazíʼdinu lu artículo riʼ?

² Ti modo rusisácanu Jiobá nga ora runi comentarnu ra reunión. Nuu hermanu racalaʼdxiʼ guni comentar peru raca nagana para laacaʼ gúnicaʼ ni. Yanna, ¿ximodo zanda guníticabe dxiibi ca yaʼ? ¿Ne xi zacané laacabe gudiicabe comentariu ni cuʼ gana xcaadxi yaʼ? Ante guicábinu ca pregunta riʼ, guidúʼyanu tapa razón risaca ni rusihuinni xi pur runi comentarnu ra reunión.

3-5. a) Casi ná Hebreos 13:15, ¿xiñee runi comentarnu ra reunión? b) ¿Xiñee nánnanu qué rinabaʼ Jiobá laanu gudiʼnu ti tipu comentariu si?

³ Rudii Jiobá laanu privilegiu de gusisácanu laa (Sal. 119:108). Ora runi comentarnu rusisácanu Dios casi ñaca nudiʼnu ti sacrificiu laa, ne guirutiʼ zanda guni ni pur laanu (biindaʼ Hebreos 13:15). Peru ¿ñee rinabaʼ Jiobá laanu gudiʼnu ti tipu sacrificiu o ti tipu comentariu si la? Coʼ, qué rúnibe ni.

⁴ Nanna Jiobá gadxe gadxé capacidad ne circunstancia napa cada tobi de laanu ne guizáʼ rusisácabe ca sacrificiu ni rúninu. Guiníʼ íquenu ca tipu sacrificiu gucuaabe stiʼ ca israelita. Cani napa bueltu bidiicaʼ laabe ti dendxuʼ o ti chiva. Peru ca binni pobre la? zanda gudiicaʼ chupa guuguhuiiniʼ o chupa pichón. Ne pa nuu tu laa qué gapa nin para gudii chupa manihuiiniʼ la? ricaa Jiobá jma de chupa litru harina de ni jma galán (Lev. 5:7, 11). Neca huaxiéʼ risaca harina que la? nabé bisisaca Jiobá sacrificiu que, peru naquiiñeʼ gaca ni harina de ni jma galán.

⁵ Zacaca riníʼ ique Dios stinu dede yanna. Riénebe laanu ora runi comentarnu ne qué ribézabe guininu galán cásica guníʼ Apolos o chuʼnu seguru ora maʼ caninu cásica guníʼ Pablo (Hech. 18:24; 26:28). Ni rinábabe laanu nga gudiʼnu de ni jma galán nápanu. Guietenaláʼdxinu xa viuda pobre ni bisaba chupa monedahuiiniʼ ndaaniʼ caja ra riaba bueltu que. Guyuulaʼdxiʼ Jiobá ni bíʼnibe purtiʼ bidiibe guiráʼ ni nápabe (Luc. 21:1-4).

 6. a) Casi ná Hebreos 10:24, 25, ¿ximodo racané ca comentariu ni runadiáganu ra reunión laanu? b) ¿Ximodo zusihuínniluʼ rusisácaluʼ ca comentariu stiʼ xcaadxi hermanu?

⁶ Ora runi comentarnu, rigúʼsaanu gana laanu (biindaʼ Hebreos 10:24, 25). Guiranu riuuláʼdxinu gunadiáganu gadxé gadxé tipu comentariu ra reunión. Guzéʼtenu ti ejemplu, guizáʼ riuuláʼdxinu gunadiáganu ora runi comentar ti baʼduhuiiniʼ neca né huaxiéʼ diidxaʼ peru de guidubi ladxidóʼ. Riéchenu ora rusiene tuuxa xiixa cosa nacubi ni deruʼ biziidiʼ de lu Biblia né stale gana. Ne rusisácanu stipa stiʼ ca hermanu ni rudii ti comentariu neca natuicaʼ o deruʼ caziidicaʼ idioma stinu (1 Tes. 2:2). ¿Ximodo zanda gusihuínninu rusisácanu stipa rúnicabe yaʼ? Ti modo zanda gúninu ni nga gudiʼnu xquíxepeʼ laacabe despué de reunión ne gábinu laacabe guizáʼ guluu comentariu stícabe gana laanu. Ne laaca rusihuínninu ni ora runi comentarnu. Pa gúninu cani maʼ bizéʼtenu riʼ la? qué zaguusicabe gana laanu sínuque laaca zaguʼnu gana xcaadxi (Rom. 1:11, 12).

 7. Ora runi comentarnu, ¿ximodo racané ni laanu?

⁷ Pa guni comentarnu zacané ni laanu (Is. 48:17). ¿Ximodo yaʼ? Primé, pa quixhe íquenu guindisananu, zaca prepararnu para ca reunión ca, jma ziénenu cani zeeda lu Stiidxaʼ Dios ne zúninu cani lu xquendanabáninu. Guiropa, ora runi comentarnu jma ziuuláʼdxinu ca reunión rápanu. Ne guionna, cumu naquiiñeʼ gaca preparar chaahuinu para gudiʼnu ti comentariu la? qué ziaandaʼ laanu guiráʼ ni guni comentarnu.

8, 9. a) Casi ná Malaquías 3:16, ¿ximodo rábiluʼ ruuyaʼ Jiobá stipa rúninu para guni comentarnu? b) Peru neca zacá, ¿ximodo runi sentir caadxi hermanu?

⁸ Riuulaʼdxiʼ Jiobá gusihuínninu fe nápanu laa. Zanda chuʼnu seguru runadiágabe laanu ne rusisácabe stipa ni rúninu ora runi comentarnu ra reunión (biindaʼ Malaquías 3:16). Ne rusihuínnibe ni ora riguube ndaayaʼ laanu (Mal. 3:10).

⁹ Nápanu stale razón galán para guni comentarnu. Peru neca zacá, nuu caadxi hermanu ridxíbiruʼ guindisanáʼ. Pa laaca ngaca rizaacaluʼ la? cadi guireeluʼ gana. Zadúʼyanu caadxi principiu ne ejemplu zeeda lu Biblia. Ne laaca zadúʼyanu caadxi conseju ni zacané laanu guni comentarnu jma lu ca reunión ca.

10. a) ¿Xi runi sentir stale de laanu ante gudiʼnu ti comentariu? b) ¿Xiñee zanda guininu cadi malu nga guidxíbinu ora guni comentarnu?

¹⁰ ¿Ñee ridxíbiluʼ ora riníʼ íqueluʼ guidisanaluʼ ra reunión la? Pa rizaacaluʼ ni la? cadi lii siouʼ rizaacaluʼ zacá. Casi de guiranu riuʼnu nervioso ora runi comentarnu. Peru pa nga rucueeza lii guni comentarluʼ la? naquiiñeʼ gánnaluʼ xiñee rizaacaluʼ ni. ¿Ñee purtiʼ ridxíbiluʼ guiaandaʼ lii ni chiguiniʼluʼ la? o purtiʼ ridxíbiluʼ guiniʼluʼ xiixa ni cadi biaʼsi? ¿Ñee riuuluʼ xizaa qué guiene xcaadxi ca comentariu stiluʼ la? Pa rizaacaluʼ zacá, cadi malu ni, purtiʼ rusihuinni ni humilde lii ne riníʼ íqueluʼ jma risaca xcaadxi que lii. Guizáʼ riuulaʼdxiʼ Jiobá ca binni humilde (Sal. 138:6; Filip. 2:3). Peru laaca racaláʼdxibe gusisácaluʼ laabe ne cuʼluʼ gana ca hermanu stiluʼ ra reunión (1 Tes. 5:11). Nadxiibe lii ne zudiibe valor ni caquiiñeluʼ para guni comentarluʼ.

11. ¿Xi principiu zeeda lu Biblia zanda gacané laanu guni comentarnu?

¹¹ Guidúʼyanu caadxi principiu zeeda lu Biblia. Rusietenalaʼdxiʼ Stiidxaʼ Dios laanu guiranu rucheʼnu ora rininu (Sant. 3:2). Qué ribeza Jiobá gácanu perfectu, ne laaca qué ribézabe gaca ca hermanu stinu zacá (Sal. 103:12-14). Nadxii ca hermanu laanu purtiʼ nácacabe familia espiritual stinu (Mar. 10:29, 30; Juan 13:35). Ne riénecabe nuu biaje rucheʼnu ora rininu.

12, 13. ¿Xi rusiidiʼ ejemplu stiʼ Nehemías ne Jonás laanu?

¹² Guidúʼyanu chupa ejemplu zeeda lu Biblia ni zacané laanu cadi guidxíbinu. Guidúʼyanu ejemplu stiʼ Nehemías, laa biʼniʼ dxiiñaʼ ra palaciu stiʼ ti rey nabé nadipaʼ. Ora gúnnabe maʼ binitilú ca muru ne ca puertaʼ stiʼ guidxi Jerusalén la? guizáʼ guyuube triste (Neh. 1:1-4). Zanda guxuíʼlunu pabiáʼ bidxíbibe ora gudxi rey que laabe gusiénebe laa xiñee nuube triste. Ante guicábibe, bíʼnibe ti oración nagueenda. Ne pur ngue, guizáʼ gucané rey que xquidxi Dios (Neh. 2:1-8). Ejemplu stiʼ Nehemías rusiidiʼ ni laanu xiñee risaca guni orarnu ante guicábinu. Yanna guietenaláʼdxinu ejemplu stiʼ Jonás. Ora gudxi Jiobá laabe chitídxibe ca binni de Nínive chiguinitilucaʼ la? guizáʼ bidxíbibe ne bireebe zebe sti guidxi (Jon. 1:1-3). Peru cumu gucané Dios laabe la? bíʼnibe ni gunabaʼ laabe ne guizáʼ gucané stiidxabe ca binni de Nínive (Jon. 3:5-10). Ejemplu stiʼ Jonás rusiidiʼ ni laanu zanda gacané Jiobá laanu neca guizáʼ cadxíbinu. ¿Cadi dxandíʼ qué ridxíbinu ca hermanu stinu biaʼ bidxibi Jonás ca ninivita que la?

¹³ ¿Xi xcaadxi conseju zacané laanu gudiʼnu comentariu ni gacané ca hermanu stinu yaʼ? Guidúʼyanu caadxi de laacani.

14. a) ¿Xiñee naquiiñeʼ gaca prepararnu jneza para ca reunión ca? b) ¿Pora zanda gaca prepararnu?

¹⁴ Gaca prepararnu para guiráʼ reunión. Pa cueenu tiempu dede ante para gaca prepararnu jneza, zápanu jma confianza para guni comentarnu (Prov. 21:5). Nánnanu cadi ngueca circunstancia napa cada tobi de laanu. Eloise, ti viuda ni napa jma de 80 iza, runi estudiar revista Torre stiʼ ni rapa ora ruzulú semana. Laabe nabe: «Ora racaʼ preparar dede ante, guizáʼ riuuladxeʼ ca reunión ca». Sti hermana ni runi dxiiñaʼ guidubi semana, ni láʼ Joy, runi estudiar revista Torre stiʼ ni rapa ti dxi ante gapa reunión para cadi guiaandaʼ laa ni chiguieteʼ luni. Ne ti ancianu láʼ Ike ni guizáʼ nuu xhiiñaʼ ne naca precursor guníʼ: «Maʼ bidieeʼ cuenta jma galán guneʼ estudiar ti ndaa ga, qué guneʼ ni tobi si tiru».

15. ¿Ximodo zanda gaca prepararnu jneza para ca reunión stinu?

¹⁵ ¿Ximodo zanda gaca preparar chaahuinu para ca reunión stinu yaʼ? Primé ni naquiiñeʼ gúninu nga guinábanu Jiobá gudii laanu espíritu santu stiʼ (Luc. 11:13; 1 Juan 5:14). De racá zanda cueenu caadxi minutu para guiene chaahuinu ni rusiidiʼ artículo ca. Guidúʼndanu título, ca subtítulo, ne guidúʼyanu ca foto ne ca cuadru napa ni. De racá zanda guidúʼndanu ca párrafo ne guiráʼ ca textu zeeda luni. Guni meditarnu ni ná información ca, ne guiduʼyaʼ chaahuinu ca puntu jma risaca ni ñuuláʼdxinu nicábinu. Laga jma jneza gaca prepararnu la? jma stale ni zabeendunu ne qué zaca nagana para laanu gudiʼnu ti comentariu ra reunión (2 Cor. 9:6).

16. ¿Gunáʼ nga ca herramienta ni jma riquiiñeluʼ, ne ximodo riquiiñeluʼ cani?

¹⁶ Pa zanda la? galán iquiiñenu guiráʼ ca herramienta electrónicu ni nápanu. Riquiiñeʼ Jiobá organización stiʼ para gudii laanu gadxé gadxé tipu herramienta electrónicu para gacané laanu gaca prepararnu. Aplicación JW Library^® racané laanu guni descargarnu ca publicación ni runi estudiarnu lu teléfono o tableta stinu. Zacá zanda guni estudiarnu información ca, o neca gúʼndasinu ni o gunadiáganu ni, ora tiica ne ratiica si nuunu. Nuu tu laa riquiiñeʼ aplicación riʼ para guni estudiar ora napa ti tiempu ra dxiiñaʼ, ra scuela, o ora maʼ zeʼ de viaje. Ne sti cosa ni racané laanu nga programa Watchtower Library ne BIBLIOTECA NI NUU LU INTERNET^™, racané ca programa riʼ para guidxélanu stale información ora guni estudiarnu.

17. a) ¿Xiñee galán nga guni prepararnu chupa chonna comentariu? b) ¿Xi biziidiluʼ ora bíʼyaluʼ videu ni láʼ Guca xhamigu Jiobá: Gudixhe chaahuiʼ ni guicábiluʼ?

¹⁷ Pa ganda la? guni prepararnu chupa chonna comentariu lu cada artículo. ¿Xiñee yaʼ? Purtiʼ cadi guiráʼ biaje guindisananu zudiicabe laanu comentariu. Zándaca guindisanáʼ ti hermanu ora guindisananu ne gudii hermanu ni cayuni conducir estudiu ca laabe comentariu ca. Ne zándaca qué zudiibe comentariu de guiráʼ para cadi tiidibe de tiempu. Nga runi, cadi guidxiichinu ne cadi guireʼnu gana pa qué gudiicabe laanu comentariu lu ca primé párrafo. Pa guni prepararnu chupa chonna comentariu zápanu jma oportunidad para guni comentarnu. Ti cosa ni zanda gúninu nga guidúʼndanu ti textu de lu Biblia. Peru pa ganda la? gudiʼnu ti comentariu sin guidúʼndanu módopeʼ cá ni lu párrafo ca.b

18. ¿Xiñee naquiiñeʼ gudiʼnu comentariu nachucu?

¹⁸ Gudiʼnu comentariu nachucu. Stale biaje ca comentariu nachucu ne sencillu ca nga ni jma riguu gana xcaadxi. Nga runi gúninu stipa pur gudiʼnu comentariu de treinta segundu (Prov. 10:19; 15:23). Cani maʼ napa stale iza de runi comentar ra reunión zándaca gueeda gácacaʼ ti ejemplu galán. Pa gudiicabe comentariu ziuulaʼ, zándaca maʼ qué zandisanáʼ cani racalaʼdxiʼ gudii ti comentariu, purtiʼ zaníʼ íquecaʼ qué zanda guicábicaʼ modo ricábicabe. Ora nachucu ca comentariu ca zanda gapa xcaadxi hermanu oportunidad para guni comentarcaʼ. Pa gudiicabe laanu primé comentariu stiʼ ti párrafo, nabé risaca gusiénenu ni jneza né chupa chonna si diidxaʼ ne cadi gusiénenu guidubi párrafo ca. Ora maʼ biluxe guca analizar puntu risaca stini, zanda guiniʼluʼ xcaadxi cosa (biiyaʼ recuadru ni láʼ «¿Xiruʼ zanda guiniéʼ lu ca comentariu stinneʼ?»).

19. ¿Ximodo zanda gacané hermanu ni cayuni conducir estudiu ca laanu, peru xi naquiiñeʼ gúninu?

¹⁹ Zanda gábinu hermanu ni chiguni conducir estudiu ca ñuuláʼdxinu ñuni comentarnu lu xiixa párrafo. Pa chigúninu ni, naquiiñeʼ guinínenu hermanu ca ante guzulú reunión. Ne ora gaca pregunta stiʼ párrafo ca, guindisananu nagueenda ne luguiáʼ para gúʼyabe laanu.

20. ¿Xiñee zanda guchaaganu ca reunión stinu casi ti guendaró ró né tuuxa ca xhamigu?

²⁰ Ca reunión ni rápanu ca zeeda gaca cani casi ora nidoʼno ti guendaró né ca xhamígunu. Pa guni invitar tuuxa laanu chidoʼno ti barbacoa ra lidxi ne guinábabe laanu chinenu xiixa, ¿xi gúninu yaʼ? Zándaca chuʼnu tuudxi nervioso, peru zúninu stipa chinenu xiixa ni chuulaʼdxiʼ de guiráʼ. Nga runi, ora riuunu reunión, casi xa ñaca Jiobá peʼ cayuni invitar laanu ne maʼ biʼniʼ prepararbe ti mexaʼ ra zuhuaaʼ stale cosa galán para laanu (Sal. 23:5; Mat. 24:45). Guizáʼ riéchebe ora rudiʼnu laabe xiixa, neca ti cosahuiiniʼ ni. Nga runi, gaca prepararnu jneza ne guni comentarnu biaʼ gándatiʼ. Zacá, qué zadóʼsinu de lu mexaʼ stiʼ Jiobá, sínuque zacanenu xcaadxi guni ni.