Ndaa ra rinabadiidxaʼ

◼ Ñee jneza nga iquiiñeʼ ti neza binni ridagulisaa o ti xpinni Cristu logotipu ni riquiiñeʼ xquidxi Jiobá la?

Ti logotipu nga ti figura o ti marca ni riquiiñeʼ caadxi empresa para gunibiáʼ binni tu laacaʼ. Logotipu ni riquiiñeʼ Watch Tower Bible and Tract Society of Pennsylvania nga ti torre ra rápacabe, ne laaca laani nga riquiiñeʼ xcaadxi grupu stícabe. Ne logotipu ni riquiiñeʼ grupu ni láʼ Congregación Cristiana de los Testigos de Jehová lu ca guiʼchiʼ stiʼ nga ti Biblia zuxaleʼ. Ne xcaadxi grupu stiʼ ca Testigu riquiiñecaʼ xcaadxi logotipu.

Cadi jneza diʼ iquiiñeʼ ca neza binni ridagulisaa o ti xpinni Cristu ca logotipu riʼ. Laaca cadi jneza diʼ iquiiñecabe ca lá napa xquidxi Jiobá nezalú ley nin xcaadxi lá para gucaacabe ni ndaaniʼ Yoo stiʼ Reinu, lu letreru, lu guiʼchiʼ, o xiixa ni nápacabe. Xiñee yaʼ. Purtiʼ qué racaláʼdxinu guiníʼ ique gobiernu, binni ne dede ca xpinni Cristu zeeda guiráʼ ni de Betel. Ngaca nga ni zaca pa iquiiñenu ca guiʼchiʼ napa logotipu riʼ, laaca zándaca guiníʼ ique binni Betel cuseendaʼ cani.

Nga runi, nin logotipu stiʼ Watch Tower nin ti lá casi laani cadi naquiiñeʼ diʼ guicá ndaaniʼ o fuera de ca Yoo stiʼ Reinu ni nacubi cabí, neca stiʼ Watch Tower ni. Pa Yoo stiʼ Reinu ra rié ti neza binni ridagulisaa maca napa ti logotipu lu letreru stiʼ o dede dxi gurí ni bisaanacabe tobi ndaaniʼ ni o luni la? zanda guiaana ni pa zuníticabe stale tiempu ne bueltu para gaca chaahuiʼ ni. Peru naquiiñeʼ guireeni ora guidxaa letreru ca o gaca chaahuiʼ Yoo stiʼ Reinu ca. Pa qué zaniti stale tiempu ne bueltu para gaca dxiiñaʼ ca la? naquiiñeʼ cueecabe logotipu ca nagueendaca.