Caquiiñeʼ guiníʼ íquenu para ganda gucheechenu diidxaʼ né stale gana
1. Xi gucané Jesús para qué nusaana de nucheeche diidxaʼ.
1 Ti dxi bisianda Jesús binni huará ne gulee demonio lu xcuerpu binni dede huadxí hasta huaxhinni. Cumu qué nidxela ca discípulo que laabe ora birá gueelaʼ sti dxi que la? bizulú biyúbicaʼ laabe ne ora bidxélacaʼ laabe guniʼcaʼ: «Irá binni canayubi lii». Ni gucaláʼdxicabe niníʼcabe nga rápacabe gana gúʼyacabe gúnirube jma milagru. Peru Jesús bicabi laacabe: «Chuu ca xcaadxi guidxi huiini ni nuu gaxha ca, para güe stiidxa Dios, purti para nga nga zendaʼ». Jesús guníʼ ca diidxaʼ riʼ purtiʼ qué ninabe ñuu xiixa ni nucueeza laabe de nucheechebe ca diidxaʼ nacubi ne galán que. Xi gucané laabe para qué nusaana de ñúnibe ni yaʼ. Biásabe tempranu para guníʼ íquebe ne biʼniʼ orarbe (Mar. 1:32-39). Yanna laanu, xi zabeendunu pa guiníʼ íquenu yaʼ.
2. Xidé naquiiñeʼ guiníʼ íquenu para cadi gusaana de gucheechenu diidxaʼ né stale gana.
2 Xidé naquiiñeʼ guiníʼ íquenu. Jesús biiyaʼ «qué ganna ca [binni que] xi guni ca ne iruti cayaca né laacaʼ. Nuu ca casi dendxu ni qué gapa pastor» (Mat. 9:36). Cásica Jesús, laanu laacaʼ zanda guiníʼ íquenu pabiáʼ caquiiñeʼ binni guiziidiʼ de ca diidxaʼ nacubi ne galán ca, ne pur ca tiempu nabáninu riʼ caquiiñeʼ gúninu ni nagueendaca (1 Cor. 7:29). Zanda guiníʼ íquenu de ca cosa ni bizáʼ Jiobá, de ca guenda ni nápabe ne guiníʼ íquenu pabiáʼ galán nga nácanu Testigu stibe. Laaca naquiiñeʼ guiníʼ íquenu guiráʼ ca cosa ni maʼ bizíʼdinu lu Stiidxaʼ Dios, cani zeeda gaca casi guié sicarú, ne laacani nga ca cosa ni qué ganna binni ni nabeza neza ra rucheechenu diidxaʼ (Sal. 77:11-13; Isa. 43:10-12; Mat. 13:52).
3. Pora nga zanda guiníʼ íquenu.
3 Pora naquiiñeʼ gúninu ni. Cásica Jesús, laaca nuu tu laa riasa tempranu ora cadi cayaca nin ti ridxi para ganda guiníʼ ique. Xcaadxi la? rúnicaʼ ni huaxhinni ante gásicaʼ (Gén. 24:63). Peru neca nuu stale cosa ni rúninu la? zanda cueenu tiempu para guiníʼ íquenu. Nuu tu laa runi ni ora maʼ zeʼ ndaaniʼ carru de pasaje, ne xcaadxi ribee ti tiempu huiiniʼ ora guendaréʼ para guiníʼ ique. Stale xpinni Cristu rudiicaʼ cuenta rucheechecaʼ diidxaʼ né stale gana ne rúnicaʼ ni sin guidxíbicaʼ ora ribeecaʼ neca ti tiempu huiiniʼ si para guiníʼ íquecaʼ ante chigucheechecaʼ diidxaʼ.
4. Xiñee caquiiñeʼ guiníʼ íquenu.
4 Pa guiníʼ íquenu ne guni orarnu la? zacanécani laanu para gúninu xhiiñaʼ Jiobá né stale gana. Laaca zadúʼyanu gástiruʼ stiʼ cosa jma risaca para laanu qué guni adorarnu laabe ne zacaneni laanu para cadi gusaana de gucheechenu diidxaʼ. Jesús, hombre ni jma jneza bicheeche stiidxaʼ Dios nabé guníʼ ique, ne nga gucané laabe para gunda bíʼnibe xhiiñaʼ Dios jneza. Yanna, pa gucaneni Jesús la? jmaruʼ si zacaneni laanu.