Gucaʼdiáganu stidxi pastor chaʼhuiʼ stinu

 1. ¿Xiñee bizeeteʼ Jesús zeeda gaca ca discípulo stiʼ casi dendxuʼ?

GUNÍʼ JESÚS tobi si laa né ca discípulo stiʼ casi ti pastor ne ca dendxuhuiiniʼ stiʼ (Juan 10:14). Ne biaʼ si ejemplu biquiiñebe ca purtiʼ runibiaʼ ca dendxuhuiiniʼ ca ridxi stiʼ pastor sticaʼ ne ruzuubacame stiidxaʼ. Ne nga peʼ nga ni biʼyaʼ ti hombre. Sicaríʼ guniʼbe: «Gucaláʼdxidu nidxiña caadxi dendxuʼ ra nuudu para ñuni grabardu laacaʼ, peru cumu qué runibiáʼcame stídxidu la? qué nulábicame laadu. Ne casi bidxiña ti hombrehuiiniʼ ni naca pastor stícame ne bicaa ridxi laacame zinándacame laa».

2, 3. a) ¿Ximodo rusihuinni ca discípulo stiʼ Jesús rucaadiágacaʼ stídxibe? b) ¿Xi zazíʼdinu lu artículo riʼ ne lu stobi ca?

² Ni bizaaca hombre riʼ rusietenaláʼdxini laanu ni guníʼ Jesús zuni ca discípulo stiʼ o ca dendxuʼ stiʼ. Laabe guniʼbe: «Zunadiágacaʼ stidxeʼ» (Juan 10:16). Peru pa guibáʼ nuu Jesús, ¿ximodo zanda gucaʼdiáganu laa yaʼ? Ti modo zanda gúninu ni nga ra chinándanu ca ni bisiidibe (Mat. 7:24, 25).

³ Lu artículo riʼ zazíʼdinu de chupa cosa ni guníʼ Jesús cadi naquiiñeʼ gúninu ne lu sti artículo ca zadúʼyanu xi xcaadxi cosa bisiidibe naquiiñeʼ gúninu. Peru primeru guidúʼyanu guiropaʼ cosa bisiidiʼ pastor chaʼhuiʼ stinu cadi naquiiñeʼ gúninu.

 4. Casi ná Lucas 12:29, ¿xi zándaca gucaa laanu «chuʼ xhaatanu xizaa»?

⁴ (Biindaʼ Lucas 12:29). Gudxi Jesús ca discípulo stiʼ «cadi chuʼ xhaatacaʼ xizaa» pur gápacaʼ ca cosa ni guibaninecaʼ. Nánnanu jneza conseju riʼ ne racané ni laanu, peru ¿xiñee nuu biaje raca nagana para laanu chinándanu ni yaʼ?

 5. ¿Xiñee nabé riuu stale hermanu xizaa?

⁵ Zándaca nuu hermanu nabé riuu xizaa purtiʼ raca nagana para laacaʼ gápacaʼ ni gocaʼ, ni gácucaʼ ne ra cuézanecaʼ familia sticaʼ. Zándaca lugar ra nabézacaʼ gastiʼ dxiiñaʼ, nga runi nagana para guni ganárcabe bueltu ni iquiiñeʼ familia stícabe. O zándaca guti familia stícabe ni runi dxiiñaʼ para gudii ni iquiiñecabe. Ne pur pandemia stiʼ COVID-19 stale tu laa maʼ biaana sin dxiiñaʼ (Ecl. 9:11). Pa cadídinu lu tobi de ca guendanagana riʼ, ¿xi zanda gúninu para chinándanu conseju ni bidii Jesús ora guníʼ cadi chuʼ xhaatanu xizaa yaʼ?

 6. Bizeeteʼ xi bizaaca apóstol Pedro.

⁶ Ti biaje nuu apóstol Pedro ne xcaadxi apóstol ndaaniʼ ti canuá lu nisadóʼ stiʼ Galilea óraque peʼ cundubi ti bi guizáʼ reciu, biiyacabe zedazá Jesús lu nisa. Óraque guníʼ Pedro: «Señor, pa lii nga la? gudxi naa chaaʼ ra nuuluʼ lu nisa riʼ». Óraque gudxi Jesús laabe «¡Gudáʼ!», «óraque biete Pedro ndaaniʼ canuá que ne zizá lu nisa que ne zeʼ ra nuu Jesús. Peru, ora biiyadxibe pabiáʼ reciu nuu bi que, bidxíbibe. Ne bizulú biaazibe, bicaabe ridxi: “¡Señor, bilá naa!”. Nagueendaca bisigaanáʼ Jesús ne gudapi laabe». Gunda guzá Pedro lu nisa que purtiʼ cayuuyadxí Jesús, peru ora bitiixhi lube ne biiyabe pabiáʼ reciu cundubi bi que la? bidxíbibe ne bizulú biaazibe (Mat. 14:24-31).

 7. ¿Xi rusiidiʼ ni bizaaca Pedro laanu?

⁷ Ni bizaaca Pedro que rusiidini laanu ti cosa risaca. Ora biétebe de lu canuá que ne zizabe lu nisa que, zándaca qué niníʼ íquebe pa zudxiguetaʼ lube sti ladu ne ziaazibe. Purtiʼ cá íquebe chindabe ra nuu Jesús, peru cumu biiyadxibe bi reciu que la? biaazibe. Laanu qué zanda diʼ sanu lu nisa, peru ridxaagalunu guendanagana ni rusihuinni pa naguidxi fe stinu. Pa gusaana de gápanu confianza Jehová ne ca promesa stiʼ zándaca guiráʼ fe stinu ne guizaacanu casi bizaaca Pedro. Nga runi, intiica si guendanagana guidxaagalunu ni zeeda gaca casi ti bi reciu, cadi gusaana de gápanu confianza Jehová ne guni crenu zacanebe laanu. ¿Ximodo zanda gúninu ni yaʼ?

 8. ¿Xi zacané laanu para cadi chuʼ xhaatanu xizaa pur ca cosa ni iquiiñenu?

⁸ Ni zacané laanu cadi chuʼ xhaatanu xizaa nga gápanu confianza Jehová. Cadi guiaandaʼ laanu maʼ guníʼ Jehová, pa gúninu ni ná Reinu stibe primé lu xquendanabáninu, zudiibe laanu ni caquiiñenu (Mat. 6:32, 33). Qué huasaana Jehová de guni cumplir promesa riʼ (Deut. 8:4, 15, 16; Sal. 37:25). Pa rapa Jehová ca maniʼ ripapa ne ca guieʼ ca, naquiiñeʼ guni crenu laaca zudiibe ni guidoʼno ne ni gácunu (Mat. 6:26-30; Filip. 4:6, 7). Cumu nadxii ti hombre ca xiiñiʼ rudii ni riquiiñecabe, zacaca nga Jehová né laanu, cumu nadxiibe laanu la? rudiibe ni riquiiñenu ne zanda guni crenu zapa Jehová laanu.

 9. ¿Xi bizíʼdinu de ni bizaaca ti guendaxheelaʼ?

⁹ Guzéʼtenu ni bizaaca ti guendaxheelaʼ ni rusihuinni dxandíʼ rudii Jehová ni caquiiñeʼ ca xpinni. Guirópacabe precursor regular laacabe, ti dxi biʼniʼ viajárcabe jma de ti hora ndaaniʼ carru yooxhohuiiniʼ stícabe para chicaacabe caadxi hermana ti lugar ra riaapaʼ binni ni zeeda de sti guidxi ne zacá ganda chinécabe laacaʼ reunión. Hermanu que guníʼ: «Biluxe si reunión que biʼniʼ invitardu ca hermana riʼ ra lídxidu para guidoʼdo xiixa. Peru bidiʼdu cuenta qué gápadu gastiʼ para gudiʼdu laacabe». ¿Yanna xi gúnicabe yaʼ? Hermanu que guníʼ: «Guizáʼ bidxagayaadu ora yendadu zuhuaa chupa bolsa naroʼbaʼ guendaró ra puertaʼ lídxidu. Tu yesaana ca ni la? qué gánnadidu, peru ni nánnadu nga Jehová ngue cudiini laadu». Gudiʼdiʼ si ti tiempu guca feu carru stiʼ guendaxheelaʼ riʼ, ne laani nga riquiiñecabe para chiguni predicárcabe, peru qué gápacabe bueltu para guni chaahuicabe ni. Pur ngue la? yenécabe ni ti taller para guinabadiidxacabe pagala gaca chaahuini. Ne málasi biree ti hombre gunabadiidxaʼ tu stiʼ carru que. Ne hermanu que guníʼ laa nga stini ne caquiiñeʼ gaca chaahuini. Para ná hombre que rabi laabe: «Cadi guizaaláʼdxiluʼ. Zacá peʼ ti carru cayuulaʼdxiʼ xheelaʼ ne color ca. ¿Pagala gutooluʼ ni luaʼ?». Bitoo hermanu que carru stiʼ ne bigaanda bueltu que para sibe stobi. Ne guniʼruʼ hermanu riʼ: «Guizáʼ biéchedu dxi que, nánnadu Jehová ngue gucané laadu».

10. ¿Ximodo racané ca diidxaʼ ni zeeda lu Salmo 37:5 laanu ti cadi chuʼ xhaatanu xizaa pur ca cosa ni caquiiñenu?

¹⁰ Ora gúninu ni cayabi pastor chaʼhuiʼ stinu laanu ne cadi chuʼ xhaatanu xizaa pur ca cosa ni caquiiñenu, zanda guni crenu zudii Jehová laanu ca cosa ni caquiiñenu (biindaʼ Salmo 37:5; 1 Ped. 5:7). Guiníʼ íquenu ca guendanagana ni bizéʼtenu lu párrafo 5. Zándaca yanna caquiiñeʼ Jehová tuuxa ni naca xaíque ndaaniʼ familia para gapa ne gudii ni caquiiñeʼ familia stiʼ. Peru pa maʼ qué ganda gudii ni naca xaíque familia ca ni gó familia stiʼ purtiʼ biaana sin dxiiñaʼ yaʼ, nanna dxíchinu Jehová maʼ nanna ximodo gudii ni caquiiñecabe. Guidúʼyanu yanna sti cosa ni cayabi pastor chaʼhuiʼ stinu laanu cadi gúninu.

11. Casi ná Mateo 7:1, 2, ¿xi guníʼ Jesús cadi naquiiñeʼ gúninu, ne xiñee zándaca gácani nagana?

¹¹ (Biindaʼ Mateo 7:1, 2). Nanna Jesús binni ruchee laanu ne nánnabe nabé ridúʼyanu ra ruchee xcaadxi. Nga runi guníʼ Jesús: «Cadi guni juzgartu». Ne neca nuu biaje gúninu stipa pur cadi gúninu ni, rácani nagana para laanu. ¿Xi zanda gúninu ora guizaaca ndiʼ yaʼ? Chinándanu ni cayabi Jesús laanu ne cadi guni juzgarnu.

12, 13. ¿Ximodo racané ejemplu stiʼ Jehová laanu para cadi guni juzgarnu xcaadxi?

¹² Pa guiníʼ íquenu ejemplu stiʼ Jehová zacané ni laanu, purtiʼ laa ruuyaʼ ca cosa galán ni runi binni. Zacá bíʼnibe né rey David, neca bicheené laabe. Guzéʼtenu ti ejemplu, guyuuné David Bat-Seba ne biʼniʼ mandar guuticabe xheelaʼ (2 Sam. 11:2-4, 14, 15, 24). Ne pur nga la? gucanabe, bininabe familia stibe ne xcaadxi xheelabe (2 Sam. 12:10, 11). Ne sti cosa ni biʼniʼ David nga qué ñapa confianza Jehová ora biʼniʼ mandar gaca ti censu ndaaniʼ guidxi Israel. Zándaca pur gúcabe ti binni orgulloso, bicaani laabe gápabe confianza ejércitu stibe. Ne pur ngue la? 70,000 israelita guti pur ti epidemia (2 Sam. 24:1-4, 10-15).

¹³ ¿Xi niníʼ íquenu de David pa nibáninu ndaaniʼ guidxi Israel tiempu que?, ¿ñee ñuni juzgarnu laabe ne nininu cadi naquiiñeʼ guiaʼ Dios laabe la? Cadi zacá diʼ nga biʼniʼ Jehová. Biiyaʼ Jehová qué nusaanaʼ David laa dxiqué ne dxandíʼ cayaca arrepentir. Ngue runi biʼniʼ perdonarbe ca pecadu stiʼ. Nanna Jehová guizáʼ nadxii David laa ne racalaʼdxiʼ guni ni jneza. ¿Cadi dxandíʼ guizáʼ riéchenu ora gánnanu ruuyaʼ Dios ca cosa galán ni rúninu la? (1 Rey. 9:4; 1 Crón. 29:10, 17).

14. ¿Xi huayacané caadxi hermanu para cadi guni juzgarcaʼ xcaadxi?

¹⁴ Neca nácanu binni ruchee naquiiñeʼ gúʼyanu ca cosa galán ni runi xcaadxi purtiʼ nga peʼ nga ni runi Jehová neca nánnabe nácanu binni ruchee. Jma nagueenda nga guidúʼyanu ra ruchee xcaadxi ne guni juzgarnu laacaʼ. Peru ti binni ni zinanda ejemplu stiʼ Jehová la? raca llevar xcaadxi neca nanna ximodo laacabe. Ti diamante ni caʼruʼ gaca pulir la? feu rihuinni, peru ti binni nuu xpiaaniʼ la? nanna galán zahuínnini ne zasaca ni ora maʼ guca pulirni ne maʼ guca chaahuini. Cásica Jehová ne Jesús, laanu laaca naquiiñeʼ guidúʼyanu ca cosa galán ni runi xcaadxi ne cadi ra cucheecabe.

15. ¿Xiñee galán guiníʼ íquenu ximodo nabani sti binni para cadi guni juzgarnu laa?

¹⁵ Cadi naquiiñeʼ si guidúʼyanu ca cosa galán ni runi xcaadxi, laaca naquiiñeʼ guiníʼ íquenu ximodo nabánicabe, nga zacané laanu cadi guni juzgarnu laacabe. Guidúʼyanu ti ejemplu para guiénenu ni. Ti dxi laga nuu Jesús ndaaniʼ templu, biiyabe bisaba ti viuda pobre chupa monedahuiiniʼ huaxiéʼ risaca ndaaniʼ caja ra riaba bueltu. Qué niníʼ Jesús xiñee qué nusaba viuda riʼ jma bueltu, lugar de ñuuyabe panda moneda bisaba, guníʼ íquebe primeru ximodo nabani gunaa riʼ ne bisisácabe laa pur ni biʼniʼ (Luc. 21:1-4).

16. ¿Xi rusiidiʼ ni bizaaca Verónica laanu?

¹⁶ Ni bizaaca ti hermana láʼ Verónica rusiidiʼ laanu pabiáʼ risaca nga guiníʼ íquenu ximodo nabani sti binni. Ndaaniʼ congregación stibe nuu ti hermana ni cusiniisi xiiñiʼ stubi. Sicaríʼ guníʼ Verónica: «Cumu huaxiéʼ ruuyaʼ laacabe ra reunión ne lu predicación la? guníʼ iqueʼ qué riuuláʼdxicabe gúnicabe xhiiñaʼ Dios. Peru ti dxi, bineʼ predicarniáʼ hermana riʼ ne gúdxibe naa guiráʼ guendanagana nápabe purtiʼ napa xiiñibe ti guendahuará láʼ autismo. Riquiiñebe stale tiempu para chuʼbe gaxha de laa, gudiibe ni iquiiñe ne gacanebe laa guiziidiʼ de Jehová. Ne pur huará xiiñibe nuu biaje napa xidé chebe reunión ndaaniʼ stiʼ congregación». Sicaríʼ guníʼ Verónica: «Yanna huaxa maʼ bieneʼ xi guiráʼ ridiʼdiʼ hermana riʼ. Ne runeʼ respetar laabe pur guiráʼ ni rúnibe para gúnibe ni ná Jehová».

17. ¿Xi mandatu zeeda lu Santiago 2:8, ne ximodo zanda chinándanu ni?

¹⁷ ¿Xi naquiiñeʼ gúninu pa gudiʼnu cuenta cayuni juzgarnu ti hermanu stinu yaʼ? Cadi guiaandaʼ laanu naquiiñeʼ gannaxhiinu ca hermanu stinu (biindaʼ Santiago 2:8). Ne laaca zanda guinábanu Jehová lu oración gacané laanu cadi guni juzgarnu. Ne ti modo zanda gúninu ni nga ra guidxíñanu hermanu stinu ne guinínenu laa. Nga zacané laanu gunibiaʼnu laabe. Laaca zanda guni invitarnu laabe guni predicárnebe laanu o guni invitarnu laabe ti guendaró. Ne ra gunibiaʼ chaahuinu hermanu stinu zinándanu ejemplu stiʼ Jehová ne Jesús ora guidúʼyanu ca cosa galán ni rúnibe. Zacá zusihuínninu zinándanu mandatu ni bidii pastor chaʼhuiʼ stinu ora guníʼ cadi naquiiñeʼ guni juzgarnu xcaadxi.

18. ¿Ximodo rusihuínninu rucaʼdiáganu stidxi pastor chaʼhuiʼ stinu?

¹⁸ Cásica runadiaga ne runibiaʼ ca dendxuhuiiniʼ ca stidxi pastor sticaʼ, zacaca nga rúninu né pastor chaʼhuiʼ stinu. Pa gúninu stipa cadi chuʼ xhaatanu xizaa pur ca cosa ni caquiiñenu ne cadi guni juzgarnu xcaadxi la? zaguu Jehová ne Jesús ndaayaʼ laanu. Pa nácanu de grupuhuiiniʼ de dendxuʼ ni cheʼ guibáʼ o de xcaadxi dendxuʼ ni chiguibani lu Guidxilayú riʼ, naquiiñeʼ gucaadiáganu ne chinándanu ni gabi pastor chaʼhuiʼ stinu laanu (Luc. 12:32; Juan 10:11, 14, 16). Lu sti artículo ca zadúʼyanu xi chupa cosa gudxi Jesús ca discípulo stiʼ naquiiñeʼ gúnicaʼ.