«Bicaadiaga ni guiníʼ ca binni nuu xpiaaniʼ»

 1. a) ¿Xiñee zándaca gudii tuuxa conseju laanu? b) ¿Xiñee nabé risaca gucaʼdiáganu ca conseju ni gudiicabe laanu?

GUIRANU gatigá caquiiñeʼ guicaanu conseju. Nuu biaje laapenu rinábanu gudii tuuxa laanu conseju. Nuu biaje zándaca gudii ti hermanu conseju laanu purtiʼ cayuuyaʼ cayúninu xiixa cosa ni zándaca gucaa laanu gucheʼnu (Gál. 6:1). O zándaca gudiicabe laanu conseju purtiʼ maʼ bíninu cosa ni cadi jneza. Modo tiica si, caquiiñeʼ gucaʼdiáganu ca conseju ca, purtiʼ zacané ca ni laanu ne zanda gulá ca ni xquendanabáninu (Prov. 6:23).

 2. Casi ná Proverbios 12:15, ¿xiñee caquiiñeʼ gucaʼdiáganu ca conseju ni gudiicabe laanu?

² Textu stiʼ artículo riʼ caguu ni gana laanu gucaʼdiáganu ca diidxaʼ «ni guiníʼ ca binni nuu xpiaaniʼ» (Prov. 22:17). Cadi guiaandaʼ laanu; nuu stale cosa ni qué gánnanu ne nuu tu laa jma nanna o jma napa experiencia que laanu (biindaʼ Proverbios 12:15). Nga runi, ora rucaʼdiáganu conseju rusihuínninu nácanu humilde, nánnanu nuu cosa ni qué gánnanu ne rudiʼnu cuenta caquiiñenu tu gacané laanu para ugaandanu ca meta ni maʼ gudixhe íquenu. Gucané Jehová rey Salomón para gucaa ca diidxaʼ riʼ: «Ora nuu stale tu cudii conseju la? riree ni galán» (Prov. 15:22).

 3. ¿Xi chupa modo zanda guicaanu conseju?

³ Nuu chupa modo zanda guicaanu conseju. Primé ca nga ora ridúʼndanu Biblia ne ca publicación stinu, purtiʼ rucaa ca ni laanu guiníʼ íquenu ximodo nabáninu ne paraa caquiiñeʼ guchaʼnu (Heb. 4:12). Guiropa modo ca nga ora guicaanu conseju ni gudii ti ancianu o ti hermanu laanu purtiʼ cayuuyaʼ caquiiñeʼ guchaʼnu. Pa gudii tuuxa laanu conseju ni zeeda lu Biblia la? cusihuinni nadxii laanu. Nga runi rusihuínninu cudiʼnu xquixe peʼ binni ca ra gucaʼdiáganu laa ne chinándanu ca conseju stiʼ.

 4. Casi ná Eclesiastés 7:9, ¿xi cadi naquiiñeʼ gúninu ora gudii tuuxa conseju laanu?

⁴ Dxandíʼ nga raca nagana para laanu guicaanu conseju ni gudii tuuxa laanu, ne nuu biaje dede ridxiichinu. ¿Xiñee yaʼ? Qué raca nagana para laanu guininu rucheʼnu. Peru ora gabi tuuxa laanu paraa cucheʼnu la? zándaca gaca nagana para laanu guni crenu ni (biindaʼ Eclesiastés 7:9). Zándaca cueenu pretextu ne guiníʼ íquenu xiñee bidiibe laanu conseju ca o qué chuuláʼdxinu modo gúdxibe ni laanu. O dede zándaca guiníʼ íquenu sicaríʼ: «¿Tu nácabe para gudiibe conseju naa? ¡Laaca la? rucheebe yaʼ!». Ne pa qué chuuláʼdxinu conseju bidiibe laanu la? qué zacaanu ni o zándaca zuyúbinu sti binni ni gudii laanu conseju ni riuuláʼdxinu.

 5. ¿Xi zadúʼyanu lu artículo riʼ?

⁵ Lu artículo riʼ, zadúʼyanu ejemplu stiʼ caadxi binni ni riete lu Biblia ni qué niná nicaa conseju ne ca ni gucuaa conseju. Laaca zazíʼdinu xi zacané laanu guicaanu conseju ni gudiicabe laanu ne xi zabeendunu pa gúninu ni.

 6. ¿Xi rizíʼdinu de ni bizaaca Rehoboam?

⁶ Guidúʼyanu ni bizaaca Rehoboam. Dxi gúcabe rey stiʼ guidxi Israel, gunabaʼ guidxi que laabe guindétebe lu dxiiñaʼ ni rúnicaʼ, ni gudixhe bixhózebe Salomón gúnicaʼ. Biʼniʼ Rehoboam ti cosa galán: gunabadiidxabe ca ancianu stiʼ guidxi Israel xi zanda gúnibe. Gúdxicaʼ laabe pa gúnibe ni ná guidxi que la? siempre zacanecaʼ laabe (1 Rey. 12:3-7). Nánnanu qué ñuulaʼdxiʼ Rehoboam conseju ni bidii ca ancianu que laa, ngue runi yenábabe conseju ca hombre ni biniisinebe. Zándaca napa ca hombre riʼ jma de 40 iza, ngue runi zándaca maʼ nápacabe caadxi experiencia (2 Crón. 12:13). Peru cadi jneza conseju bidiicabe Rehoboam: gúdxicabe laa guquiichináʼ guidxi que jma (1 Rey. 12:8-11). Gucuaa Rehoboam chupa conseju gadxé. Ñanda ñuni orarbe Jehová para ninabadiidxabe laa xi conseju naquiiñeʼ chinándabe, peru qué ñúnibe ni. Gucuaabe conseju ni jma guyuuláʼdxibe: stiʼ ca hombre ni biniisinebe que. Ne pur ngue, laabe ne guidxi que gúpacabe guendanagana. Zaqueca nga laanu, zándaca gudiicabe laanu conseju ni qué chuuláʼdxinu, peru pa zeedacani de lu Biblia la? caquiiñeʼ guicaanu ca ni.

 7. ¿Xi rizíʼdinu de ni bizaaca Uzías?

⁷ Laaca qué niná rey Uzías nicaa conseju ni bidiicabe laa. Gucaláʼdxibe nuzaaquibe inciensu, guyuube ti lugar ndaaniʼ templu que, ra randa si riuu ca sacerdote. Sicaríʼ gudxi ca sacerdote que laabe: «¡Uzías, cadi lii nga naquiiñeʼ guzaaquiluʼ inciensu para Jehová! Ca sacerdote si zanda guzaaquiʼ inciensu». ¿Xi biʼni Uzías óraque yaʼ? Biblia ná guizáʼ bidxiichibe. ¿Xiñee qué nicaabe conseju que yaʼ? Zándaca purtiʼ cumu laabe ngue rey la? guníʼ íquebe zanda gúnibe guiráʼ ni gacaláʼdxibe. Peru cadi zaqué diʼ guníʼ ique Jehová. Pa ñaca Uzías humilde, nicaa conseju ni bidiicabe laa ne nagueendaca niree de ndaaniʼ templu que la? ñándaca ñuni perdonar Jehová laabe. Peru cumu qué nuzuubabe diidxaʼ la? biseendaʼ Jehová lepra luguiabe ne gúpabe guendahuará ca dede dxi gútibe (2 Crón. 26:16-21). ¿Xi rizíʼdinu de ni bizaaca Uzías yaʼ? Intiica si asignación nápanu, pa qué chinándanu ca conseju ni zeeda lu Biblia la? qué zaca xhamigu Jehová laanu.

 8. ¿Xi biʼniʼ Job ora bidiicabe conseju laa?

⁸ Lu Biblia laaca zeeda ejemplu stiʼ binni ni gucuaa conseju ni bidiicabe laa, ne guluu Dios ndaayaʼ laacaʼ. Guidúʼyanu ejemplu stiʼ Job. Neca biyúbibe gúnibe ni riuulaʼdxiʼ Dios, guyuu biaje bicheebe. Dxi gudíʼdibe lu stale guendanagana, guniʼbe cosa ni cadi jneza. Ngue runi bidii Elihú ne Jehová conseju laabe. ¿Xi biʼniʼ Job óraque yaʼ? Gúcabe humilde ne gucuaabe ca conseju que. Job bizeeteʼ guníʼ sin niníʼ ique ne laaca bizeeteʼ: «Racaʼ arrepentir pur ca ni gunieeʼ, ne ribiéʼ lu yú dé ne dé ludé para gusihuinneʼ dxandíʼ peʼ cayacaʼ arrepentir». Guluu Jehová ndaayaʼ Job purtiʼ guca humilde (Job 42:3-6, 12-17).

 9. ¿Xi biʼniʼ Moisés ora guluu jneza Jehová laa, ne xiñee bisaanabe ti ejemplu galán para laanu?

⁹ Laaca bisaana Moisés ti ejemplu galán purtiʼ qué nidxiichi ora guluu jneza Jehová laa despué de bichee. Ti biaje guizáʼ bidxiichibe ne qué nusisácabe Jehová. Ngue runi, maʼ qué ñuube ndaaniʼ Tierra Prometida (Núm. 20:1-13). Ora gudxi Moisés Jehová nuu triste pur decisión ni gucuaa que, gudxi Jehová laabe maʼ qué guibiguétaruʼ guiniʼbe de laani (Deut. 3:23-27). Lugar de nidxiichi Moisés, yenanda decisión ni gucuaa Jehová ne biquiiñeruʼ Jehová laabe para gácabe líder stiʼ guidxi Israel (Deut. 4:1). Guizáʼ galán ejemplu ni bisaana Job ne Moisés para laanu. Bichaa Job modo riníʼ ique ne qué nuyubi pretextu. Ne Moisés la? qué nidxiichi ora guluu jneza Jehová laa ne qué nusaanaʼ de ñuni ni nabe neca maʼ qué nicaa ti cosa nabé risaca.

10. a) Casi ná Proverbios 4:10-13, ¿xi zabeendunu pa chinándanu ca conseju ni gudiicabe laanu? b) ¿Xi biʼniʼ caadxi hermanu ora bidiicabe laacaʼ conseju?

¹⁰ Zieni laanu galán pa chinándanu ejemplu stiʼ ca binni ni bizuubaʼ diidxaʼ casi Job ne Moisés (biindaʼ Proverbios 4:10-13). Stale hermanu huayuni zacá. Ti hermanu láʼ Emmanuel,b ni nabeza República Democrática del Congo, gucuaa conseju stiʼ caadxi hermanu. Sicaríʼ guniʼbe: «Bidii caadxi hermanu de congregación stinneʼ cuenta cayuneʼ xiixa ni zándaca guxheleʼ naa de Jehová, ngue runi biyúbicaʼ modo gacanecaʼ naa. Yenandaʼ ca conseju ni bidiicabe naa ne pur nga maʼ qué ñapaʼ guendanagana». Sicaríʼ guníʼ ti precursora de Canadá láʼ Megan: «Cadi guiráʼ diʼ ca conseju ni huacaaʼ riuuladxeʼ, peru laacani nga ni caquiiñeʼ». Ne ti hermanu de Croacia láʼ Marko guníʼ: «Biniteʼ ti privilegiu ni gupaʼ, peru ca conseju ni bidiicabe naa, gucané ni naa para chuaaʼ gaxha de Jehová sti biaje».

11. ¿Xi gunna hermanu Karl Klein?

¹¹ Sti ejemplu stiʼ tuuxa ni gucuaa conseju ni bidiicabe laa nga hermanu Karl Klein, laa guyuu lu Grupu ni Zániru. Lu historia stibe bizeetebe bidii xhamígube, hermanu Joseph Rutherford, laabe ti conseju. Bizeeteʼ hermanu Klein huaxiéʼ guyuulaʼdxiʼ conseju bidiibe laa. Laaca guniʼbe: «Sti biaje biʼyaʼ [hermanu Rutherford] naa, cayecheʼ gudxi naa: “¿Xi tal xa, Karl?”. Peru cumu cadxiicheruaʼ la? huaxiéʼ galán modo bicabeʼ laabe. Ngue runi gúdxibe naa: “¡Guyuu cuidadu, Karl! ¡Nuu Binidxabaʼ gusaba lii!”. Peru catuí luaʼ gudxeʼ laabe: “Coʼ, cadi guizaalaʼdxuʼ hermanu Rutherford”. Peru cumu nánnabe ximodo nuaaʼ la? gúdxibe naa sti biaje: “Nuu bien, guyuu si cuidadu. Nuu Binidxabaʼ gusaba lii”. ¡Dxandíʼ ngue ni ná hermanu que! Ora ridxiichinenu ti hermanu ni gudii conseju laanu […], zanda gusaba Binidxabaʼ laanu lu trampa stiʼ»c (Efes. 4:25-27). Gucuaa hermanu Klein conseju ni bidii hermanu Rutherford laa, ne qué nusaana de ñaca xhamígucaʼ.

12. Pa humilde laanu, ¿ximodo zacané ni laanu ora gudiicabe laanu conseju? (Salmo 141:5).

¹² Caquiiñeʼ gácanu humilde para guicaanu ca conseju ni gudiicabe laanu. Rusietenalaʼdxiʼ cualidad riʼ laanu nácanu binni ruchee ne nuu biaje zúninu o zaninu cosa ni cadi jneza. Casi maʼ bidúʼyanu, cadi jneza modo guníʼ ique Job, peru despué bichaabe. Gúcabe humilde ne gucuaabe ca conseju ni bidii Elihú laabe neca jma nahuiiniʼ que laabe (Job 32:6, 7). Guluu Jehová ndaayaʼ Job purtiʼ guca humilde. Pa humilde laanu, laaca zacaanu conseju ni gudiicabe laanu neca guiníʼ íquenu cadi caquiiñenu ni o neca ti binni ni jma nahuiiniʼ gudiini laanu. Sicaríʼ guníʼ ti ancianu de Canadá: «Qué ridúʼyanu laanu modo ruuyaʼ xcaadxi laanu. Nga runi, ¿ximodo guni progresarnu pa guirutiʼ gudii conseju laanu yaʼ?». Guiranu racaláʼdxinu gápanu cualidad stiʼ espíritu ne gusíʼdinu jma jneza (biindaʼ Salmo 141:5).

13. ¿Ximodo naquiiñeʼ guidúʼyanu ca conseju ni ricaanu?

¹³ Rusihuinni Dios nadxii laanu ora rudii laanu conseju. Racalaʼdxiʼ Jehová ni galán para laanu (Prov. 4:20-22). Rusihuinni Jehová nadxii laanu ora rudii laanu conseju ni zeeda lu Biblia, lu ti publicación o ni gudii tuuxa hermanu laanu. Ne casi ná Hebreos 12:9, 10, rudiibe conseju «para gacaneni laanu».

14. ¿Xii nga ni jma jneza gúninu ora gudiicabe laanu conseju?

¹⁴ Guicaanu conseju ni gudiicabe laanu, neca cadi galán modo bidiicabe ni. Nuu biaje cadi jneza ridúʼyanu modo rudiicabe laanu conseju. Dxandíʼ, ni rudii conseju ca runi stipa pur gúnini jneza ne cadi guniná (Gál. 6:1).d Peru pa laanu nga cudiicabe conseju, naquiiñeʼ guicaanu ni neca ruluíʼ cadi jneza modo bidiicabe ni laanu. Zanda guiníʼ íquenu: «Neca qué ñuuladxeʼ modo bidiibe naa conseju, ¿ñee nápabe razón la? ¿Ñee zanda gusiaandaʼ modo guniʼbe ni ne chinandaʼ conseju bidiibe naa la?». Guizáʼ galán gúninu stipa chinándanu ca conseju ni gudiicabe laanu (Prov. 15:31).

15. ¿Xiñee risaca guinábanu gudiicabe laanu conseju?

¹⁵ Biblia rabi laanu guinábanu conseju. Proverbios 13:10 ná: «Ti binni nuu xpiaaniʼ rinabaʼ gudiicabe laa conseju». ¡Dxandíʼ ca diidxaʼ ca! Ca ni rinabaʼ gudiicabe laa conseju lugar de cueza ni, jma nagueenda runi progresar. Nga runi, gúninu stipa guinábanu gudiicabe laanu conseju.

16. ¿Pora nga zanda guinábanu gudiicabe laanu conseju?

¹⁶ ¿Pora nga zanda guinábanu conseju ca hermanu de congregación? Guidúʼyanu pora zanda gúninu ni. Primé, zanda guinabaʼ ti hermana ti publicador ni napa experiencia chiné laa para gudii estudiu ne despué zanda guinabadiidxabe laa xi zanda gúnibe para gusiidibe jma jneza. Guiropa, pa racalaʼdxiʼ ti hermana soltera siʼ pantalón, zanda guluiʼbe ti hermana ni maʼ huaniisi xii nga ni racaláʼdxibe sibe ne gacané laabe gúʼyabe gunáʼ nga ni zanda sibe. Ne guionna, ora chigudii ti hermanu primé discursu públicu ndaaniʼ congregación, zanda guinábabe ti hermanu ni maʼ napa experiencia gucaadiaga laabe ne gudii laabe caadxi sugerencia. Dede né ca hermanu ni maʼ napa stale iza de cudii discursu, zanda guinábacaʼ conseju xcaadxi hermanu ne chinándacaʼ ni.

17. ¿Xi zanda gúninu para cueendunu ni galán ora gudiicabe laanu conseju?

¹⁷ Zándaca lu ca dxi ni zeeda riʼ guiranu zándaca guicaanu xiixa conseju, zándaca gudii tuuxa ni laanu o guicaanu ni ora guidúʼndanu Biblia ne xiixa publicación. Ora guizaaca ndiʼ la? guietenaláʼdxinu ni maʼ bizíʼdinu lu artículo riʼ: gácanu humilde, chinándanu ca conseju gudiicabe laanu neca ruluíʼ cadi galán modo bidiicabe ni. Cadi maca nuu xpiaaninu nga gúlenu. Peru pa chinándanu ca conseju ne gudiʼnu lugar uguu jnézacabe laanu, Biblia cayabi laanu zácanu binni nuu xpiaaniʼ (Prov. 19:20).