Ni zacané binnilídxiluʼ chuʼ nayecheʼ

Ximodo riuu xquendaxheelaʼ binni ora gápacaʼ ti baʼduhuiiniʼ

Carlos: «Naa ne María guizáʼ biéchedu dxi gule dxaapahuiiniʼ stidu, peru ca primé beeu que nabé guleeʼ xcaandaʼ. Gudixhe chaahuidu modo gápadu laabe, peru nin tobi de laacani qué niree modo gudíxhedu».a

María: «Dxi gule dxaapahuiiniʼ stidu bineʼ sentir maʼ qué zanda guneʼ cani riuuladxeʼ. Riquiiñeʼ tiempu stinneʼ para si guneʼ ni guebe, guchaaʼ pañal stibe o gusisiaaseʼ laabe. Dede dxi que bichaa xquendanabaneʼ. Gudiʼdiʼ stale beeu para gunda bibaneniáʼ Carlos xheelaʼ casi dxiqué».

STALE tu riníʼ nuu ti cosa ni jma rusiecheʼ binni lu xquendanabani, laani nga gapa xiiñiʼ. Ne Biblia ruzeeteʼ zeeda gaca xiiñiʼ binni casi xiixa ni rusigaʼdeʼ Dios binni (Salmo 127:3). Ca guendaxheelaʼ ni deruʼ gupa primé xiiñiʼ, casi Carlos ne María, laaca nánnacaʼ zanda guchaa stale cosa lu xquendanabánicaʼ. Zándaca jma guicá ique gunaa ni gupa xiiñiʼ ca guʼyaʼ baʼduhuiiniʼ stiʼ ne dede guidxagayaa pur guiráʼ ni guni ne ni guni sentir ora gunadiaga neca ti ridxi huiiniʼ si stiʼ xiiñiʼ. Bixhoze baʼduhuiiniʼ ca zándaca chuulaʼdxiʼ ora guʼyaʼ maʼ cayaa baʼduhuiiniʼ ca jñaa, peru laaca zándaca guni sentirbe maʼ qué rulabi xheelabe laabe.

Dxandíʼ, ora gale primé xiiñiʼ binni zándaca gueedaneni stale guendanagana lu xquendaxheelaʼ. Ne pur ca guendanagana ca guni sentírcabe cadi nadxiisaacabe ne jmaruʼ si guiroobaʼ guendanagana stícabe.

Yanna, xi caquiiñeʼ guni bixhoze ne jñaa baʼduhuiiniʼ ca ti cadi gaca nagana para laacaʼ gúʼyacaʼ laabe lu ca primé beeu ra jma caquiiñebe chuʼ tu gapa laabe yaʼ. Xi zanda guni ca binni ni maʼ napa xiiñiʼ para cadi gusaana de gatanecaʼ xheelacaʼ. Xi zanda gúnicabe para cadi chuʼdíndecabe ora gusiniisicabe xiiñicabe. Guidúʼyanu cada tobi de ca guendanagana ni bizéʼtenu riʼ ne xi conseju cudii Biblia ni zanda gacané laacabe para gudxiilúcabe cani.

PRIMÉ GUENDANAGANA: Nisi baʼduhuiiniʼ ca ricá íquebe gúʼyabe.

Jñaa baʼduhuiiniʼ ca puru si xiiñiʼ ricá ique guʼyaʼ. Zándaca guni sentirbe cayúnibe guiráʼ ni naquiiñeʼ gúnibe ra chuʼbe cuidadu xiiñibe, peru xheelabe laaca zándaca guni sentir maʼ qué rulábibe laa. Manuel, ti hombre de Brasil guníʼ: «Ni jma guca nagana para naa nga guieneʼ xiñee puru si baʼduhuiiniʼ stidu runi tender xheelaʼ. Dxiqué jma gúpadu tiempu para laadu, peru ni málasi bichaa ca cosa que ne maʼ nisi baʼduhuiiniʼ stidu ricá ique xheelaʼ guʼyaʼ». Guidúʼyanu ximodo zanda gudxíʼlunu ca guendanagana ca.

▪ Ni zanda gúnitu: Cadi guidxiichitu nagueenda. Biblia na «pa nadxii lu stobi la? qué zadxiichi né gá lu laa, ne ziá lu laa», «qué zuyubu para lii siouʼ» ne cadi «gasti si guni lii maca cadxiichi neu laa» (1 Corintios 13:4, 5). Ximodo zanda chinanda ca binni ni napa xiiñiʼ ca conseju riʼ yaʼ.

Ti hombre ni nuu xpiaaniʼ zusihuinni nadxii xheelaʼ ora guiene zándaca ziuube nadá despué de gápabe xiiñibe ne zándaca zuchaa modo riníʼ íquebe. Tobi de ca cosa ni rizaaca ti gunaa nga nuuca nayecheʼ málasi riuu triste.b Adam, ti hombre de Francia ni napa ti dxaapahuiiniʼ de once beeu guníʼ: «Nuu tiru raca nagana para naa guieneʼ xiñee ti ratu nuu xheelaʼ nayecheʼ ne sti ratu maʼ cadxiichi, peru runeʼ stipa pur guiníʼ iqueʼ cadi naa diáʼ cadxiichinebe, sínuque nuube zacá pur guiráʼ ni cayúnibe yanna ra maʼ gule baʼduhuiiniʼ stidu».

Pa nacubi gupa xheelaluʼ baʼduhuiiniʼ, ñee qué riuuláʼdxibe modo racaneluʼ laabe la? Pa zacá runi sentirbe, galán gúniluʼ cadi guidxiichiluʼ (Eclesiastés 7:9). Gupa paciencia ne biyubi gúniluʼ ca cosa ni riuuláʼdxibe ne cadi ni riuuláʼdxiluʼ, nga zacané lii para cadi guidxiichiluʼ (Proverbios 14:29).

Ti gunaa ni nuu xpiaaniʼ zaguu gana xheelaʼ para guni dxiiñaʼ ni raca caber laa yanna ra maʼ nápacaʼ xiiñicaʼ. Zápabe paciencia para gusiidibe laa ximodo guchaa pañal o ximodo guni ni gueʼ baʼduhuiiniʼ stícabe, neca cadi jneza gúnini ca primé biaje.

Helena, ti gunaa de 26 iza ni maʼ napa xiiñiʼ, guníʼ gupa xidé bichaa modo riniʼné xheelaʼ ne modo guinabaʼ laabe gúnibe caadxi cosa. Laabe nabe: «Gupa xidé biziideʼ cadi puru si dxaapahuiiniʼ stidu guuyaʼ ne cadi guinabaʼ xheelaʼ chuʼ cuidadu laabe cásica runeʼ ni».

XIÑEE QUÉ GÚNITU NDIʼ. Gunaa ni maʼ bichaganáʼ, pa gadxé modo riuu xheelaluʼ cuidadu baʼduhuiiniʼ stitu ne gadxé modo ruʼnuʼ ni la? cadi gaʼbuʼ laabe cadi jneza cayúnibe ni o gaʼbuʼ laabe jma galán guʼnuʼ ni lii. Biiyaʼ cani rúnibe jneza ne gudxi laabe galán rúnibe cani, zacá jma zuni sentirbe galán. Gunabaʼ laabe gacanebe lii. Laaca galán guni hombre ca gusaana de guni ca dxiiñaʼ huiiniʼ ni huaxiéʼ risaca ti ganda gacanebe xheelabe biaʼ gándatiʼ, ne jmaruʼ si lu ca primé beeu de gule baʼduhuiiniʼ stícabe.

GUIROPA GUENDANAGANA: Maʼ qué ratanépecabe xheelacabe.

Stale guendaxheelaʼ rixélecaʼ ora nacubi gápacaʼ primé xiiñicaʼ. Cumu ribee xcaandacabe la? nabé ridxágacabe ne laaca rúnicabe ni pur ca guendanagana ni málasi rápacabe. Vivianne, ti gunaa de Francia ni napa chupa xiiñiʼ, guníʼ: «Dxi nacubi gupaʼ xiiñeʼ nabé gucuá iqueʼ guuyaʼ laabe ne dede bilá ñaandaʼ naa pa laaca naquiiñeʼ guneʼ tender xheelaʼ».

Zándaca qué gudii hombre ca cuenta pa riuu xheelaʼ nadá ora nacaxiiñiʼ ne laaca riuu ora runi sentirbe triste. Stipa ne tiempu ni gúpabe dxiqué para chuʼbe nayecheʼ ne gatanebe xheelabe la? maʼ riquiiñebe ni para si gúʼyabe xhiiñicabe. Yanna xi zanda gúnicabe para cadi guxheleʼ baʼduhuiiniʼ ca laacabe yaʼ.

▪ Ni zanda gúnitu: Laguiníʼ nadxiisaatu. Sicaríʼ ruzeeteʼ Biblia de modo naquiiñeʼ guibani ti hombre ne ti gunaa ora maʼ bichaganáʼ: «Zusaana hombre bixhoze ne jñaa, ne naquiiñeʼ guicanú xheelaʼ, ne gueeda gácacabe ti beela si» (Génesis 2:24).c Jiobá Dios guníʼ zedandá dxi zusaana binni jñaa ne bixhoze peru qué ziuu dxi gusaana xheelaʼ (Mateo 19:3-9). Pa guiníʼ ique ca guendaxheelaʼ ni nacubi gupa primé xiiñiʼ sicaríʼ la? zacaneni laacabe gúʼyacabe gunáʼ nga ni jma naquiiñeʼ gúnicabe.

Vivianne guníʼ sicaríʼ: «Guníʼ iqueʼ ca diidxaʼ ni cá lu Génesis 2:24 ne bidieeʼ cuenta maʼ beeda gacaʼ “ti beela si” né xheelaʼ ne cadi né xiiñeʼ. Biiyaʼ pabiáʼ risaca nga chuʼ xquendaxheeladu naguidxi». Theresa, ni napa ti dxaapahuiiniʼ de chupa iza, guníʼ: «Ora gudieeʼ cuenta maʼ caxeleʼ de xheelaʼ nagueendaca ruyubeʼ modo guneʼ tender laabe, neca ti ratu huiiniʼ si».

Xi zanda guni ti hombre para ganda chuʼné xheelaʼ tobi si yaʼ. Gábibe xheelabe nadxiibe laa ne gusihuínnibe ni lu ca cosa ni gúnibe ne laaca galán gúnibe stipa para cadi guiníʼ ique xheelabe cadi nadxiibe laa. Sarah, ti gunaa de 30 iza ni napa xiiñiʼ, guníʼ: «Ti gunaa naquiiñeʼ guni sentir risaca ne nadxiicabe laa, neca guchaa xcuerpu despué de gapa xiiñiʼ». Chiguzéʼtenu de Alan, ti hombre de Alemania ni napa chupa hombrehuiiniʼ. Para laabe nabé risaca nga guyúbibe modo para cadi chuʼ xheelabe triste. Laabe guniʼbe: «Ruyubeʼ modo quixhedxieʼ ladxidoʼbe casi ñaca nuchaaʼ nisa riete lube».

Ora gapa ti guendaxheelaʼ baʼduhuiiniʼ la? maʼ qué zanda diʼ gatané hombre ca xheelaʼ casi maca rúnicabe ni ante. Nga runi guirópacabe naquiiñeʼ guiníʼcabe de laani. Biblia na ora maʼ qué zanda gátacabe casi dxiqué la? guirópacabe naquiiñeʼ quíxhecabe xi gúnicabe (1 Corintios 7:1-5). Ne para ganda gúnicabe ni, caquiiñeʼ güícabe diidxaʼ. Stale biaje pur modo biniisi cada tobi de laacabe o pur ca costumbre ni gúpacabe zándaca gaca nagana para laacabe güícabe de tema riʼ, peru caquiiñeʼ gúnicabe ni ti ganda guiaacabe ca dxiiñaʼ ni caquiiñeʼ gúnicabe yanna ra maʼ nápacabe xiiñicabe. Laguyubi modo guiénetu xheelatu, lagapa paciencia ne lagusiá stiidxatu (1 Corintios 10:24). Pa gúnitu zacá, zacanetu xheelatu cadi guiníʼ ique mal de laatu ne jma zannaxhiisatu (1 Pedro 3:7, 8).

Ca guendaxheelaʼ ca zannaxhiicaʼ jma ora gudiisaacaʼ xquíxepeʼ laacaʼ. Ti hombre ni nuu xpiaaniʼ rudii cuenta huaxiéʼ rihuinni stale de ca dxiiñaʼ ni runi xheelaʼ. Vivianne guníʼ: «Ora guiluxe dxi, runeʼ sentir gastiʼ qué ñuneʼ, neca guidubi dxi bineʼ tender dxaapahuiiniʼ stidu». Ti gunaa nuu xpiaaniʼ, neca nabé biʼniʼ dxiiñaʼ dxi ca, zusisaca ca dxiiñaʼ huiiniʼ guni xheelaʼ pur gacané ca binnilidxi (Proverbios 17:17).

XIÑEE QUÉ GÚNITU NDIʼ. Laatu ca gunaa ni napa xiiñiʼ, galán gúnitu gásitu neca ti ratu huiiniʼ ora maʼ nisiaasiʼ xiiñitu. Pa gúnitu zacá, jma ziuutu gana para guni téndertu xheelatu. Ca hombre ca laaca galán gúnicaʼ guiásacaʼ huaxhinni para guchaacaʼ pañal stiʼ baʼduhuiiniʼ ca o gudiicaʼ ni guebe ti ganda guiziilaʼdxiʼ xheelacaʼ. Bisihuinni nadxiiluʼ xheelaluʼ ra gudiiluʼ laa xiixa guiʼchiʼ huiiniʼ ra gucaaluʼ caadxi diidxaʼ galán, biseendaʼ mensaje lu celular stibe o guniʼné laabe pur teléfono. Lacuee tiempu para güitu diidxaʼ. Laguiníʼ de cani caquiiñetu ne cadi guiniʼtu puru si de baʼduhuiiniʼ stitu. Cadi gusaana de gaca xhamígutu. Pa gúnitu zacá, jma zánnatu xi gúnitu ora guidxaagalutu ca guendanagana ni rapa binni ora maʼ napa xiiñiʼ.

GUIONNA GUENDANAGANA: Ora gadxé modo riníʼ íquecabe.

Nuu tiru ridinde diidxaʼ ca guendaxheelaʼ ca purtiʼ gadxé gadxé modo biniisicaʼ. Zacá nga bizaaca Asami, ti gunaa de Japón né xheelabe katsuro. Asami guníʼ: «Riníʼ iqueʼ jma nadóʼ katsuro né dxaapahuiiniʼ stidu, peru laabe riníʼ íquebe nabé naduxhuaniáʼ xiiñidu». Xi caquiiñeʼ guni ca guendaxheelaʼ para cadi guizaacacaʼ zacá yaʼ.

▪ Ni zanda gúnitu: Lagüíʼ diidxaʼ ne lagacanesaa. Salomón, ti hombre ni nabé nuu xpiaaniʼ bicaa ca diidxaʼ riʼ: «Ora rudxiibaʼ binni laca laa la? riuu guendaridinde, peru cani riníʼ ante gúnicaʼ xiixa nuu xpiaanicaʼ» (Proverbios 13:10). Ñee nánnaluʼ xi riníʼ ique xheelaluʼ de modo gusiniisitu xiiñitu la? Pa cuézatu gale si xiiñitu para guiniʼtu de laani la? zándaca ziuudíndetu lugar de guyúbitu modo gusiniisitu laabe.

Chiguzéʼtenu chupa chonna ejemplu ne laguiníʼ ique pa maʼ gudíxhetu xi naquiiñeʼ gúnitu: «Ximodo gacanenu xiiñinu guiaa gó cosa ni zanda gacané laa chuʼ nazaaca ne ganna pora naquiiñeʼ gasiʼ. Ñee zandísanu laabe guiráʼ biaje gúʼnabe la? Padxí gusíʼdinu laabe iquiiñebe taza huiiniʼ ra ribí ca baʼduhuiiniʼ ca pasiá yaʼ». Neca nga nga ni zanda guni ca guendaxheelaʼ ca, peru laacabe nga naquiiñeʼ gúʼyacabe xi gúnicabe. Ernesto, ti hombre ni napa chupa xiiñiʼ guníʼ: «Naquiiñeʼ guinidu de modo gusiniisidu xiiñidu ti ganda guiníʼ ique xheelaʼ cásica riníʼ iqueʼ, purtiʼ jma galán runi tender binni xiiñiʼ ora guni zacá».

XIÑEE QUÉ GÚNITU NDIʼ. Laguiníʼ ique ximodo bisiniisi bixhózetu ne jñaatu laatu ne laguuyaʼ gunáʼ de ca cosa ni bíʼnicabe dxiqué zanda iquiiñetu para gusiniisitu xiiñitu ne gunáʼ de laacani cadi naquiiñeʼ gúnitu. Laguiníʼ de laani.

Ca cosa galán ni zabeendutu ora guchaa xquendanabánitu

Cásica ti hombre ne ti gunaa ni caziidiʼ guyaa sandunga caquiiñecaʼ tiempu ne paciencia para guyaacaʼ ni jneza, zacaca nga bixhoze ne jñaa baʼduhuiiniʼ ca, laaca caquiiñecaʼ tiempu ti ganda gúnicaʼ dxiiñaʼ ni naquiiñeʼ gúnicaʼ yanna ra maʼ nápacaʼ xiiñicaʼ. Peru chaahuiʼ chaahuiʼ zaziidicabe gúnicabe ni.

Ora maʼ cusiniisi ca guendaxheelaʼ ca xiiñicaʼ óraca nga zahuinni pa dxandíʼ nuucabe tobi si, ne zuchaa stale cosa lu xquendaxheelacabe. Peru laaca zacaneni laacabe gápacabe guenda galán. Pa chinándacabe ca conseju ni zeeda lu Biblia la? zabeendúcabe stale cosa galán cásica guleendú Kenneth, laa guníʼ: «Ra bisiniisidu ca xiiñidu gucaneni laadu. Yanna maʼ qué ruyúbidu para laasidu ne jma maʼ nadxiisaadu ne riénesaadu». Ora gapa binni ca guenda casi cani maʼ bizéʼtenu ca racanécani chuʼ xquendaxheelacaʼ galán.

[Cani cá ñee yaza]

NI ZANDA GUINÍʼ ÍQUELUʼ

▪ Xi bineʼ últimu semana gudiʼdiʼ ca para bisihuinneʼ rudieeʼ xquíxepeʼ xheelaʼ pur cani runi para gacané familia stidu.

▪ Padxí byueniáʼ xheelaʼ diidxaʼ galán ne qué nuzéʼtedu puru si de ca xiiñidu.