Pa nga nga ni guníʼ ique Eva la? cadi zaqué diʼ ni. Ne pa laabe ne Adán gúdxicabe Caín laa ngue ni zá de gunaa ni bizeeteʼ Dios que la? bicaacabe laabe guchabe bi yánnibe. Despué gupa Eva sti xiiñiʼ, peru dxi gule guiropa xiiñibe riʼ qué niníʼdibe nin ti diidxaʼ para nusisácabe laa. Gulee lácabe laabe Abel, ni zándaca riníʼ «ora ribee binni bi neza xii» o «xiixa ni qué risaca» (Génesis 4:2). Ñee rusihuinni ni riníʼ lá Abel ca guníʼ ique Adán ne Eva qué risácabe casi Caín la? zándaca, peru qué ganna chaahuinu pa zacá ni.

Dxi biniisi guiropaʼ xiiñiʼ Adán, zándaca bisiidibe laacaʼ gúnicaʼ dxiiñaʼ ni gacané laacaʼ gudiicaʼ ni guibaniné binnilídxicaʼ. Nga runi biʼniʼ Caín dxiiñaʼ layú ne Abel gupa dendxuʼ.

Nanna dxíchinu gulee Abel tiempu para guníʼ ique de Jiobá. Yanna, cumu dendxuʼ nga gúpabe la? nabé guzabe. Bixuiʼlú laabe zinebe ca maniʼ huiiniʼ stibe lade ca dani que, gudíʼdibe guiiguʼ para biyúbibe paraa nuu jma guixi gaʼ ne ra zanda gueʼ ca dendxuʼ stibe nisa, ra zanda guiaapacaʼ para guiziiláʼdxicaʼ. Lade guiráʼ ca maniʼ ni bizáʼ Dios, ca dendxuʼ huiiniʼ ca nga cani jma caquiiñeʼ gapa binni laacaʼ, casi ñaca guyáʼpecame para sané binni laacame ne gapa laacame. Yanna, Abel yaʼ, ñee laaca biʼniʼ sentirbe caquiiñeʼ chuʼ tuuxa jma nuu xpiaaniʼ ne jma nadipaʼ que binni para guluíʼ laabe xi gúnibe ne gapa laabe la? Nanna dxíchinu gúdxibe Jiobá guiráʼ nga ora biʼniʼ orarbe laa, ne zacá nga jma biguidxi fe stibe.